Vaovao Tsara Nisoratin’i Matio 24:1-51
-
RAHA AHAIZAN̈A FIMPODIANAN’I KRISTY (1-51)
-
Lagera, mosary, hôrohôron-tany (7)
-
Vaovao tsara io hitorian̈a amy tany jiaby (14)
-
Fahorian̈a be (21, 22)
-
“Raha ahaizan̈a favian’ny Zanak’olo” (30)
-
Fan̈oharan̈a momba kakazo aviavy (32-34)
-
“Tsisy ny hafa tamin’ny andran’i Noa” (37-39)
-
“Miambesa fo” (42-44)
-
Mpanompo atokisan̈a ndreky mpanompo ratsy fan̈ahy (45-51)
-
24 Jesosy koa fa niala tamy tempoly tao, mpianatranany aby io nan̈aton̈o izy fôtony tiandrô haboaka izy tran̈o aby tamy tempoly tao.
2 Ke ho izy tamindrô: “Hitanarô raha jiaby io? Ambarako anarô mazava tsarabe fa, tsisy vato hambela hifampitenginy eky iô, fa handeha harongana aby irô jiaby io.”
3 Jesosy mbala nipetrapetraka tamy Bongo Olivy, mpianatranany aby io nan̈aton̈o izy mitaokan̈a, ke ho irô taminany: “Ambarà zahay ombian̈a raha aby zen̈y hiboaka, baka iô ino raha hahaizan̈a fotoan̈a himpodiananao* ndreky vanim-potoan̈an’ny faran’ny donia ty?”*
4 Karaha ty ho Jesosy tamindrô: “Mitandrema tsao hisy olo hamitaka anarô,
5 fôtony maro olo ho avy hisandoko an̈aran̈anaka ke hivolan̈a: ‘Zaho Kristy’, ke maro olo ho voafitakandrô.
6 Anarô haharen̈y fa hisy lagera amy tany isan-karazany an̈y. Fa anarô aza mavozo, fôtony raha jiaby zen̈y tsy maintsy handalo, kanefa mbala tsendriky avy farany.
7 “Hisy firenena hiady amy firenena, aviô hisy fanjakan̈a hiady amy fanjakan̈a. Hisy mosary ndreky hôrohôron-tany koa amy tany isan-karazany.
8 Raha jiaby zen̈y mbala vo fanombohan’ny fijalian̈a* fo.
9 “Ke hisy olo han̈enjiky anarô* ndreky hamono anarô, aviô anarô ho halan’ny firenena jiaby fôtony anarô mpan̈ara-dia zaho.
10 Ho maro koa olo hiala amy finoan̈a ndreky hifamitaka, baka iô tsy hifankatia foeky.
11 Hisy mpaminan̈y sandoko marobe koa hiboaka ke irô hamitaka olo maro.
12 Ke hahaihanintsy fitiavan̈an’olo maro fôtony hahaimaro olo mpandika lalàn̈a.
13 Fa zay olo miaritry firaka amy farany fo ho voavonjy.
14 Ke hitorian̈a amy tany jiaby* vaovao tsara momba Fanjakan̈a ty, amy zen̈y firenena jiaby haharen̈y,* zay vo ho avy farany.
15 “Ke izikoa fa hitanarô mitsangana amy toeran̈a masin̈y ao raha mampangaroharo mahavy fandravan̈ana koran̈in’ny mpaminan̈y Daniely in̈y (mila mandiniky tsarabe lan̈iany olo mamaky faminanian̈a* io),
16 lan̈iany olo a Jodia mila milefa amy bongo an̈y.
17 Lan̈iany olo an̈abo tafon-tran̈o* tsy tôkony hijotso an-tran̈onany ao eky hangala fanan̈ananany,
18 aviô lan̈iany olo an-tsabo tsy tôkony himpody hangala lambanany ambelan̈a.
19 Amin’ny andra aby zen̈y, hidiran’andra man̈angy mavesatra ndreky mampinono!
20 Aza vôly mivavaka foeky baka tsy amin’ny andra ririn̈iny na amin’ny andra sabata anarô hilefa,
21 fôtony amy fotoan̈a zen̈y, hisy fahorian̈a be mbala tsiary nisy ambaka izy rango nisian’ny donia ty firaka amy ziôty, sady tsy ho hisy eky.
22 Izikoa tsy nahen̈y andra aby io, tsisy olo* ho voavonjy, fa baka amindrô olo voafidy aby io nahavy andra aby zen̈y hahen̈y.
23 “Ke izikoa misy olo mivolan̈a aminarô: ‘Atỳ Kristy!’ na ‘Arỳ izy!’, aza mino zen̈y.
24 Fôtony hisy Kristy sandoko ndreky mpaminan̈y sandoko ho avy, ke irô han̈ano famantaran̈a maventy ndreky fahagagan̈a fôtony tiandrô hifitahin̈y aby olo jiaby, firaka amin’olo voafidy, izikoa vitandrô.
25 Zaho efa nampitandrin̈y anarô ay!
26 Ke izikoa misy olo mivolan̈a aminarô: ‘Izy amy tany paiky an̈y’, aza mandeha an̈y; aviô izikoa misy olo mivolan̈a aminarô: ‘Izy an-tran̈o ao’,* aza mino zen̈y.
27 Fôtony fimpodianan’ny* Zanak’olo io miran̈a pelakandra baka antin̈iana mazava firaka andrefa.
28 Amy zay tany misy faty, an̈y koa hivorivorian’ny vôromahery.
29 “Miaraka fahorian̈a amin’ny andra aby zen̈y tapitry, hahiziky masoandra, fanjava tsy han̈amia hazavan̈a, baka iô lakintan̈a ho latsaka baka an-dan̈itry, aviô handeha hozongozon̈iny angôvon’ny lan̈itry.
30 Ho hita amy lan̈itry koa raha ahaizan̈a favian’ny Zanak’olo. Foko jiaby ambony tany eto hamango tratra baka amin’ny alahelo dila loatra. Irô hahita Zanak’olo ho avy amy rôndron’ny lan̈itry, miaraka amin’ny angôvo ndreky voninahitry maventy.
31 Hitsofin̈y mare trompety, ke izy han̈iraka anjelinany handeha hamory irô olo voafidy aby io baka amy farany avaratra firaka amy farany atsimo, ndreky baka amy farany antin̈iana firaka amy farany andrefa, aviô baka amy faran’ny lan̈itry an̈ila firaka amy faran’ny lan̈itry an̈ila.
32 “Ty misy fan̈oharan̈a momba kakazo aviavy, ke anarô mangalà fianaran̈a baka aminany ty: Izikoa fa hitanarô maniry tan̈antan̈an’izio, ke efa manomboko mandravim-bao, hainarô baka amy zen̈y fa efa marikitry asara.
33 Karaha zen̈y koa, izikoa fa hitanarô raha jiaby zen̈y, tsara hainarô fa izy* efa marikitry, ia, izy efa am-baravaran̈a ao.
34 Ambarako anarô mazava tsarabe fa, tsy ho lany foeky taranaka ty firaka raha jiaby zen̈y miboaka.
35 Lan̈itry ndreky tany ho ravan̈a, fa volan̈anaka ndraiky tsy ho ravan̈a foeky.
36 “Tsisy olo mahay andra ndreky lera zen̈y foeky, na anjely an-dan̈itry an̈y zen̈y, na Zanaka, izikoa tsy Baba zaraiky fo.
37 Fa tsisy ny hafa tamin’ny andran’i Noa raha hiboaka amy fotoan̈a himpodianan’ny* Zanak’olo.
38 Tamy fotoan̈a zen̈y* baka, talohan’ny navian’ny Safodrano, olo nihinan̈a ndreky nigiaka, lelahy nan̈ainga aviô viavy ningain̈y, mandrapavian’ny andra nidiran’i Noa tan̈atin’ny sambofiara tao.
39 Tsisy raha nijirendrô foeky firaka Safodrano navy ke nifaoko irô jiaby. Ho karaha zen̈y koa amy fimpodianan’ny Zanak’olo.
40 Hisy lelahy aroe an-tsabo an̈y, ke araiky hindesin̈y fa araiky hambela.
41 Hisy man̈angy aroe han̈odin̈y vato fandisanan̈a vary, ke araiky hindesin̈y fa araiky hambela.
42 Ke anarô miambesa fo, fôtony tsy hainarô andra havian’ny Tômponarô.
43 “Ty raha tsara hainarô: Izikoa hain’ny tômpin-tran̈o kelera alin̈y* mpangalatra ho avy, izy tsy maintsy niaritry tôromaso ke niambin̈y, fôtony tran̈onany tsy mety hambelany hivakian’olo.
44 Ke zen̈y mahavy anarô mila von̈ono fo koa, fôtony amy lera tsy iritriretinarô foeky havian’ny Zanak’olo.
45 “Azôvy marin̈y ma mpanompo atokisan̈a ndreky mahadiniky raha* nirahiny tômpony hikarakara mpiasa an-tran̈onany ke han̈amia hanin̈y irô amy fotoan̈a mety?
46 Sambatra mpanompo io izikoa lera tômpony avy, izy hitan’ny tômpony io man̈ano zen̈y!
47 Ambarako anarô mazava tsarabe fa, izy hirahiny hiandraikitry fanan̈ananany jiaby.
48 “Fa izikoa ndraiky mpanompo io ratsy fan̈ahy, ke izy mieritreritry karaha ty: ‘Mba ela tômpoko in̈y ay!’,
49 ke manomboko mamopoko mpanompo hafa izy, sady miaraka mihina ndreky migiaka amin’olo mamolava,
50 ho avy amin’ny andra tsy ampoiziny ndreky amy lera tsy iritriretiny foeky tômponany,
51 ke han̈asazy izy mare ndreky handefa izy amy tany misy irô mpihatsaravelatsihy aby io. An̈y izy hitomoan̈y aviô ho meloko ndreky ho diso fan̈antinan̈a.*
Lamariky amy Pazy Ambany
^ Abt: “tehotehokon’ny man̈angy pitihin’ny tsaiky.”
^ Abt: “hisy olo hanolotro anarô amy fahorian̈a.”
^ Na: “amy tany jiaby misy olo.”
^ Abt: “ho vavolombelon̈o amy firenena jiaby.”
^ Faminanian̈an’i Daniely izy tiany koran̈iny eto ty.
^ Ankamaraozan’ny tafon-tran̈on’olo tamy zen̈y nisy terasy nan̈anaovandrô raha isan-karazany.
^ Abt: “nôfotro.”
^ Na: “Izy amin’ny efitry farany an̈aty, an̈atin’ny tran̈o ao.”
^ Na: “Zanak’olo.”
^ Abt: “Tamin’ny andra aby zen̈y.”
^ Abt: “tômpin-tran̈o amy fotoan̈a fiambesan̈a fahafiry.”
^ Na: “misy jery; mahatsinjo lavitry.”
^ Abt: “aviô hampan̈ena nify.”
