Vaovao Tsara Nisoratin’i Matio 9:1-38
-
Jesosy nampajanga lelahy malemy araiky (1-8)
-
Jesosy nitaon̈o Matio (9-13)
-
Fan̈ontanian̈a momba fifadian-kanin̈y (14-17)
-
Tsaiky man̈angy zanakan’i Jairo; nisy man̈angy nikasiky lamban’i Jesosy (18-26)
-
Jesosy nampahita olo gila ndreky nampivolan̈a olo moa (27-34)
-
“Be ankitin̈y vokatra, fa mpiasa vitsy” (35-38)
9 Jesosy niondran̈a sambo, baka iô izy koa fa tafitsaka tandaforehy, izy nandeha tamy tanàna nipitrahany.*
2 Nisy lelahy malemy nibatain̈a tamy brankara nindesin’olo taminany tiô. Jesosy koa fa nahita finoan̈andrô olo aby io, ho izy tamy lelahy malemy io: “Korazy anao, zanako! Voavela helokonao.”
3 Ke karaha ty ho sasany tamindrô mpanoratra lalàn̈a aby io tan̈atin’ny jerindrô tan̈y: “Mba tsy man̈isy fôtiny Zan̈ahary zalahy ty ay!”
4 Hain’i Jesosy raha tan̈atin’ny jerindrô, ke ho izy: “Nan̈ino ma anarô ratsy jery be karaha zen̈y?
5 Aia moramora volan̈iny: ‘Voavela fahotan̈anao’, sa: ‘Mitsangàna, baka iô mandihana’?
6 Fa baka ho hainarô fa Zanak’olo manan̈a fahifan̈a han̈ambela hadisovan̈a ambony tany eto...” Ho izy tamy lelahy malemy io: “Mitsangàna, indesa brankaranao, baka iô mindao mody.”
7 Ke lelahy io nitsangana, aviô lôso izy nody.
8 Lany fan̈ahy* irô olo aby io izikoa fa nahita raha nandalo zen̈y, ke irô nan̈amia voninahitry Zan̈ahary, fôtony Izy nan̈amia olombelon̈o fahifan̈a karaha zen̈y.*
9 Jesosy koa fa niala tiô, izy nahita lelahy araiky nipetraka tamy birô fan̈ifan̈a hetra. Matio an̈aran̈an’ny lelahy io. Ho Jesosy taminany: “Avia han̈araka zaho.” Direkty Matio nitsangana, baka iô nan̈araka izy.
10 Tafaran’izen̈y, Jesosy ndreky irô mpianatranany aby io nihina* tan-tran̈on’i Matio. Naro mpamory latety ndreky mpanota nihina niaraka tamindrô.
11 Hitandrô Fariseo aby io raha zen̈y, ke karaha ty ho irô tamy mpianatran’i Jesosy: “Nan̈ino ma mpampianatranarô miaraka mihina amy mpamory latety ndreky mpanota?”
12 Ren̈in’i Jesosy raha zen̈y, ke ho izy tamindrô: “Tsy olo salama mila dôkotera, fa olo marary.
13 Mindao ianara dikan’ny volan̈a ty: ‘Olo mamindra fô tiatiako tozay olo man̈ano sôron̈o.’ Tsy handeha hikaiky olo marin̈y antony naviako, fa handeha hikaiky mpanota.”
14 Baka iô mpianatran’i Jaony nan̈aton̈o izy, ke nan̈ontany karaha ty: “Nan̈ino ma zahay ndreky irô Fariseo aby io matetiky mifady hanin̈y, kanefa mpianatranao tsy man̈ano zen̈y?”
15 Ho Jesosy tamindrô: “Mpan̈ainga koa mbala ankilan-dry namany, tsisy antony tôkony hampalahelo irô namany aby io. Fa izikoa ndraiky efa avy andra han̈adosoan̈a mpan̈ainga io ankilandrô iô, iô irô vo hifady hanin̈y.*
16 Tsisy olo mangala tapaka lamba vao hikopandrian̈a lamba kay. Izikoa zen̈y edy atao, hahaihatriaka fo lamba kay io, fôtony izio hantsoritin’ny araiky vao.
17 Aviô tsisy olo man̈ano divain vao an̈atin’ny saka angôzy* efa kay. Izikoa zen̈y raha atao, ho robaka saka io fôtony izio hipaofaka, ke ho very divain jiaby. Ke divain vao atao an̈atin’ny saka angôzy vao, amy zen̈y saka io tsy ho robaka, aviô divain io tsy ho very.”
18 An̈atin’izy mbala nivolan̈a raha aby zen̈y tamindrô fo, nisy mpiandraikitry synagoga nan̈aton̈o izy ke nankôhoko nan̈oloan̈a izy, sady nivolan̈a: “Zanako* zay donko mety efa maty ay! Mba alô kony atsika handeha aminay an̈y e! Kasiha izy baka ho velon̈o ndraiky.”
19 Ke Jesosy nitsangana, baka iô izy ndreky mpianatranany nan̈araka lelahy io.
20 Aviô, nisy man̈angy nandeha lio tan̈atin’ny 12 taon̈o nan̈aton̈o izy baka tafara. Nijaly mare man̈angy io, ke nikasihiny kirômborômbo tamy lamban’i Jesosy,*
21 fôtony ho izy tan̈atin’ny jerinany tan̈y: “Zaho ndray mikasiky lambanany ambelan̈a fo, zaho efa janga edy.”
22 Jesosy koa fa nitodiky, man̈angy io hitany ke ho izy taminany: “Aza mavozo, zanako! Finoan̈anao nampajanga anao.” Tiô ny iô, man̈angy io janga.
23 Jesosy koa fa navy tan-tran̈on’ny mpiandraikitry synagoga in̈y, izy nahita olo nitsoko sodin̈y ndreky olo marobe niafatrafatra nitomoan̈y.
24 Ho Jesosy tamindrô: “Miboaha anarô. Tsaiky* io tsy maty fa mandry.” Kanefa Jesosy nimoezandrô sady nadroedroendrô.
25 Olo aby io koa fa tafiboaka, izy niditry. Nisambôriny tan̈anan’ny tsaiky man̈angy io, ke tsaiky io nitsangana.*
26 Ren̈in’olo tamy faritry jiaby man̈odidin̈y tiô raha nataon’i Jesosy zen̈y.
27 Jesosy koa fa niala tiô, nisy lelahy gila aroe nan̈araka izy sady nandronton̈o karaha ty: “Mamindrà fô aminay, Zanakan’i Davida e!”
28 Jesosy koa fa tafiditry tan-tran̈o, lelahy gila aroe io nan̈aton̈o izy. Ke Jesosy nan̈ontany irô: “Anarô ma matoky tsarabe fa vitako raha zen̈y?” Ho irô taminany: “Ia, Tômpo.”
29 Nikasihin’i Jesosy masondrô, baka iô ho izy: “Fôtony anarô manan̈a finoan̈a, hahita* masonarô.”
30 Ke irô nanjary nahita. Fa Jesosy namepetry irô mare karaha ty: “Aza ambara olo raha nataoko tiô in̈y!”
31 Fa irô koa fa tafiboaka tran̈o io, irô nikoran̈a raha momba Jesosy tamy faritry jiaby man̈odidin̈y.
32 Egy irô hiala in̈y, nisy lelahy moa nisazaohan’ny demony nindesin’olo taminany.
33 Demony io koa fa nadoson’i Jesosy taminany, nahavita nivolan̈a lelahy moa io. Lany fan̈ahy olo jiaby tiô, ke ho irô: “Zahay mbala tsiary nahita raha karaha ty foeky tan Israely teto.”
34 Kanefa irô Fariseo aby io nivolan̈a: “Angôvo baka amy sefondrô demony aby io ahavitany man̈aboaka demony.”
35 Jesosy baka tiô nandeha nitety tanàna jiaby, na be na hely, ke izy nampianatra tamy synagoga ndreky nitory vaovao tsara momba Fanjakan̈an’ny Zan̈ahary, aviô izy nampajanga karazan̈a aretin̈y ndreky antsa isan-karazany.
36 Jesosy koa fa nahita olo maro nan̈aton̈o izy tiô, izy nahinakinaka, fôtony irô olo aby io nampijalian̈a baka iô tsy nasian̈a fôtiny foeky, karaha ataon’ny ôndrikôndriky tsisy mpiambin̈y in̈y.
37 Aviô ho izy tamy mpianatranany: “Be ankitin̈y vokatra, fa mpiasa vitsy.
38 Ke iangavia Tômpin’ny vokatra han̈iraka mpiasa hangala* vokatra.”
Lamariky amy Pazy Ambany
^ Na: “ta Kapernaomy.”
^ Na: “Navozo mare.”
^ Na: “fahifan̈a han̈ambela hadisovan̈a.”
^ Na: “nandry nandriran̈a nihina”; fomban’olo tamin’ny andran’ny Baiboly nandry nandriran̈a nikodidin̈y latabatra koa fa nihina.
^ Na: “hifehy.”
^ Izio saka angôzy fasian̈a divain.
^ Na: “Zanako man̈angy.”
^ Abt: “lamban’i Jesosy ambelan̈a.”
^ Na: “Tsaiky man̈angy.”
^ Na: “nitsangana tamy maty; velon̈o ndraiky.”
^ Na: “hibiafin̈y.”
^ Na: “hamory.”
