Misy tsaiky lelahy araiky tia nan̈ampy olo. Timoty an̈arany. Izy nifindrafindra tanàna, baka izy mahavita man̈ampy olo. Timoty sambatra ndreky ravoravo fo. Tianao hahay tantarany Timoty io?...

Ta Lystra ry Timoty nipetraka. Rango izy mbala hely, izy efa nampianariny dadiny ndreky mamany raha momba Jehovah. Loisa an̈aran̈a dadiny, Eonika an̈aran̈a mamany. Timoty koa fa be, izy nahaitia nan̈ampy olo hahay Jehovah fo.

Apostoly Paoly nitaon̈o Timoty handeha hitory amy tany lavitry be. Timoty nivolan̈a tamy Paoly: ‘Ia, zaho handeha!’ Izy von̈ono handeha han̈ampy olo hafa.

 Timoty ndreky Paoly nandeha ta Tesalonika, tanàna araiky ta Makedonia. Lavitry tanàna io, fotony iro tsy maintsy mandeha vity, baka io mandeha sambo. Iro koa fa navy tan̈y, iro nampianatra olo raha momba Jehovah. Olo sasany nitandren̈y iro, fa sasany ndraiky neloko tamindro. Nisy koa nila hamono iro foeky. Paoly ndreky Timoty nifindra tamy tany hafa koa nitory.

Tsy ela tafaranizen̈y, Paoly nan̈iraka Timoty hipody ta Tesalonika, hamangy namandro tan̈y. Izy tamy zen̈y nila tsy navozo, fotony olo tan̈y tsaiky hamono iro in̈y! Timoty nandeha tan̈y fo, fotony izy niasa loha tamindry namany. Izy koa fa tafimpody, izy nivolan̈a tamy Paoly fa mbala mazoto manompo Jehovah namandro nipetraka ta Tesalonika tan̈y.

Timoty niaraka niasa tamy Paoly tan̈atiny taon̈o maro. Paoly nanoratra taratasy mivolan̈a fa izy mbala tsiary nahita olo karaha Timoty in̈y. Timoty ten̈a tia nan̈ampy olo amy fiangonan̈a, fotony izy tia Jehovah ndreky tia olo.

Anao ma mba tia olo ndreky tia mampianatra olo raha momba Jehovah?... Anao koa man̈ano zen̈y, anao ho sambatra ndreky ravoravo fo, karaha Timoty in̈y!