1. Ino nahavy lelahy etiopianin̈y araiky nangataka hatao batisa?

NISY lelahy etiopianin̈y manankaja araiky nan̈azavany ­Filipo raha koran̈iny Soratra Masin̈y, ke nanjary hainy fa Jesosy Mesia io. Ten̈a tafiditry tan̈atiny fony lelahy io raha nianarany tamy Soratra Masin̈y, ke zen̈y nahavy izy nan̈iry hatao batisa. Volan̈iny karaha ty: ‘Io misy rano, ke ino koa raha mbala tsy han̈anovan̈a ­batisa zaho?’—Asan’ny Apostoly 8:26-36.

2. Nan̈ino anao tokony hieritreritry hatao batisa?

 ² Izikoa fa nianaranao niaraka tamy Vavolombelon̈o Jehovah toko aby talohany ty, anao mety hieritreritry karaha ty: ‘Ino koa raha mbala tsy han̈anovan̈a batisa zaho?’ Efa hainao baka amy Baiboly fa Zan̈ahary han̈amia olonany fiain̈ana tsisy farany amy paradisa. (Lioka 23:43; Apokalypsy 21:3, 4) Efa hainao koa fa olo maty tsisy raha vitany eky, fa Jehovah mbala hamelon̈o iro. (Mpitoriteny 9:5; Jaona 5:28, 29) Anao mety efa niaraka nivory tamy Vavolombelon̈o Jehovah, ndreky nahita raha ataondro an̈arehan̈a fivavahan̈a marin̈y. (Jaona 13:35) Fa ny ten̈a maharavoravo, anao efa manomboko mihavan̈a amy Zan̈ahary Jehovah.

3. a) Nirahiny Jesosy han̈ino ma pianatranany? b) Karakory atao man̈ano batisa?

³ Anao koa man̈iry hanompo Zan̈ahary, ino raha tokony hataonao? Jesosy nivolan̈a karaha ty tamy pianatranany: “Mandihana mampianatra olo amy firenena jiaby, baka io iro ataova batisa.” (Matio 28:19) Jesosy koa fa natao batisa, tsy rano natete tamy lohanany, fa izy najibiky tandrano. (Matio 3:16) Volan̈a “man̈ano batisa” io baka amy volan̈a griky. Dikanizio “man̈adeky.” Ke Kristianin̈y araiky koa fa atao batisa, mila adeky na ajibiky an̈aty rano.

4. Nan̈ino ma olo araiky tsy maintsy atao batisa an̈aty rano?

⁴ Batisa an̈aty rano io an̈isany raha takin̈y aminolo man̈iry hanompo Zan̈ahary. Izio koa man̈aboaka aminolo jiaby fa anao man̈iry hanompo Zan̈ahary ankitin̈y ndreky tihan̈ano sitraponany. (Salamo 40:7, 8) Fa misy raha tsy maintsy ataonao antsendriky, zay anao vo mety hatao batisa.

5. a) Ino raha voanalohany tokony hataonolo man̈iry hatao batisa? b) Nan̈ino anao tokony handeha hivory miaraka amy Vavolombelon̈o Jehovah?

⁵ Raha voanalohany tokony hataonao mianatra  Baiboly, baka anao mahay Jehovah ndreky Jesosy. ( Vakia Jaona 17:3.) Zen̈y raha ataonao izioty. Mbala maro koa raha mila ianaranao. Kristianin̈y jiaby tokony hahay tsarabe sitrapony Zan̈ahary. (Kolosianina 1:9) Han̈ampy anao han̈ano zen̈y fan̈aton̈ana fivorian̈a miaraka amy ­Vavolombelon̈o Jehovah. Ten̈a ilain̈y mivory. (Hebreo 10:24, 25) Arakaraka ny andihananao mivory tsy tapaka hahaizanao tsarabe Zan̈ahary.

6. Ino raha mila hainao alohany anao hatao batisa?

⁶ Olo araiky hatao batisa zen̈y tsy voatery hahay raha jiaby amy Baiboly ao. Karaha ataony lelahy etiopianin̈y in̈y, efa nisy raha sasany hainy, fa izy mbala nila nan̈azavan̈a raha sasany amy Soratra Masin̈y. (Asan’ny Apostoly 8:30, 31) Mbala maro koa raha tokony hianaranao, fotony fianaran̈a raha momba Zan̈ahary tsy mety ho tapitry. (Mpitoriteny 3:11) Fa alohany anao hatao batisa, mila hainao ndreky ikenao raha ten̈a ampianariny Baiboly. (Hebreo 5:12) An̈isanizen̈y ny marin̈y momba olo maty, momba an̈aran̈a Zan̈ahary ndreky Fanjakan̈anany.

7. Mety ho ino vokany izikoa anao mianatra Baiboly?

⁷ Mbala misy raha hafa koa ilain̈y ankoatrany fianaran̈a Baiboly, fotony Baiboly efa nivolan̈a: “Izikoa tsy raha baka amy finoan̈a, tsisy raha mety hatao eky hazahoan̈a sitraka amy Zan̈ahary.” (Hebreo 11:6) Olo sasany ta Korinto tan̈y koa fa naharen̈y hafatra nikoran̈indro Kristianin̈y aby io, iro ‘nanjary pino, baka io natao batisa.’ (Asan’ny Apostoly 18:8) Karaha zen̈y koa, anao koa fa mianatra Baiboly, anao hanjary mino tsarabe fa Volan̈a Zan̈ahary ankitin̈y izio, ke zay raha volan̈iny tsy maintsy tanteraka. Inoanao koa fa soron̈o Jesosy in̈y mahavita mamonjy anao.—Josoa 23:14; Asan’ny Apostoly 4:12; 2 Timoty 3:16, 17.

8. Ino mahavy anao han̈iry hikoran̈a aminolo raha nianaranao?

⁸ Manjary tsy din̈inao tsy hikoran̈a raha nianaranao tamy Baiboly, fotony efa mahaifatatra finoan̈anao. (Jeremia 20:9) Anao hitady fomba fo hikoran̈a aminolo raha momba Zan̈ahary ndreky raha mbala hataony.—Vakia 2 Korintianina 4:13.

9, 10. a) Azovy antsendriky tokony hikoran̈anao raha nianaranao tamy Baiboly? b) Izikoa tianao hitory miaraka amy Vavolombelon̈o Jehovah, ino raha tokony hataonao?

⁹ Tsara anao mikoran̈a aminolo efa fankazatra anao antsendriky. Koràn̈a ry havanao, jiraninao, olo miaraka miasa na miaraka mianatra aminao. Ndray zen̈y, mitandrema fo tsao anao tafivolan̈a raha mampameloko iro. Koa fa mandeha fotoan̈a, anao mety han̈iry hiaraka hitory amy Vavolombelon̈o Jehovah. Koràn̈a olo mampianatra Baiboly anao. Izikoa hitany fa afaka mitory miaraka amy fiangonan̈a anao, ho hisy antipan̈ahy aroe hikoran̈a aminao ndreky olo mampianatra anao io.

¹⁰ Anao hanjary hifankazatra amindro antipan̈ahy aby io. Jehovah nan̈iraka iro io hikarakara atsika. (Asan’ny Apostoly 20:28; 1 Petera 5:2, 3) Izikoa hitandro fa mazava aminao sady inoanao raha ten̈a ampianariny Baiboly, arehanao toro lalan̈a Zan̈ahary baka io anao man̈iry ho an̈isany Vavolombelon̈o Jehovah, hambarandro anao fa anao mahafeno fepetra ho loso pitory tsy vita batisa.

11. Ino aby raha tsy maintsy ialanolo sasany, zay izy vo mahazo mitory miaraka amy Vavolombelon̈o Jehovah?

¹¹ Anao tsy maintsy miala amy raha ratsy efa nahazatra anao, zay vo mahazo mandeha mitory. An̈isanizen̈y koa raha ratsy fataonao, kanefa nasitrikinao olo. Anao koa man̈iry ho loso pitory tsy vita batisa, anao mila miala amy fahotan̈a maventy. An̈isanizen̈y mijangajanga,  man̈ano mamo, mihina sigarety ndreky jamala.—Vakia 1 Korintianina 6:9, 10; Galatianina 5:19-21.

12. Nan̈ino ma anao mila mibebaka?

¹² Mbala misy raha hafa koa tokony hataonao, zay anao vo mahazo atao batisa. Apostoly Petera nivolan̈a karaha ty: ‘Ke anaro mila mibebaka ndreky mimpody hamonoan̈a fahotan̈anaro.’ (Asan’ny Apostoly 3:19) Dikany mibebaka zen̈y manen̈iny mare amy raha ratsy natao. Mila mibebaka koa olo araiky ndray tsy nan̈ano raha ratsy taloha, fotony atsika jiaby io panota, ke mila familankeloko baka amy Zan̈ahary. (Romanina 3:23; 5:12) Talohany nianaranao Baiboly, anao mbala tsendriky nahay sitrapony Zan̈ahary, ke tsy raha jiaby nataonao zay nifan̈araka tamy sitraponany aby. Zen̈y mahavy anao mila mibebaka.

13. Karakory ma miova zen̈y?

¹³ Olo araiky koa fa mibebaka zen̈y tsy maintsy “mimpody” na miova. Efa tsara olo araiky koa fa manen̈iny amy raha ratsy nataony, fa izy mbala mila man̈ova fomba fiain̈ananany baka izy ho tapakevitry han̈ano ny tsara fo. Ke izikoa anao man̈iry hatao batisa, anao tsy maintsy mibebaka ndreky miova antsendriky.

14. Ino koa raha maventy tsy maintsy ataonao, alohany batisa?

¹⁴ Misy raha koa tsy maintsy ataonao, alohany batisa. Anao tsy maintsy manokanten̈a amy Zan̈ahary.

15, 16. Karakory ma manokanten̈a amy Jehovah zen̈y? Ino mahavy olo araiky han̈ano zen̈y?

¹⁵ Dikany manokanten̈a amy Jehovah zen̈y man̈ano vavaka manokan̈a baka amy fo, mivolan̈a fa izy zaraiky fo hivavahanao mandrakizay. (Deoteronomia 6:15) Ino  ma mahavy olo araiky man̈iry han̈ano zen̈y? Ohatra izio misy lelahy araiky vo hiaraka amy man̈angy araiky. Arakaraka ny ahaizany toetriny man̈angy io hitiavany izy mare, ndreky farany hangatabady izy. Efa hainy lelahy io tsarabe fa ho maro andraikitrinany izy koa fa manambady, fa izy von̈ono fo hangala izy, fotony izy efa ten̈a tia.

¹⁶ Anao koa fa mahay Jehovah, anao ho von̈ono hanompo izy, na ino na ino raha mandalo. Anao koa von̈ono han̈amia zay raha anan̈anao hanompoan̈a izy. Zay olo man̈iry han̈aradia Jesosy, mila ‘tsy man̈eky ain̈inany.’ (Marka 8:34) Izikoa atsika ‘tsy man̈eky ain̈intsika’, atsika tsy han̈ano raha tiany ain̈intsika fo na hanakatra tanjon̈o hafa mety hahavy atsika tsy han̈eky Zan̈ahary amy fo jiaby. Ke anao koa man̈iry hatao batisa, tsy maintsy ataonao tanjon̈o han̈ano voalohantoeran̈a sitrapony Jehovah.—Vakia 1 Petera 4:2.

17. Nan̈ino ma olo sasany misalasala hanokanten̈a amy Jehovah?

¹⁷ Misy olo misalasala hanokanten̈a amy Jehovah, fotony iro mavozo han̈ano fanapahankevitry maventy io. Mavozo iro tsao tafan̈ano raha tsy tiany Jehovah, ke hampameloko izy. Zen̈y mahavy olo maro tsy manokanten̈a amy Jehovah.

18. Ino hahavy anao han̈iry hanokanten̈a amy Jehovah?

¹⁸ Anao koa fa mahay raha maro momba Jehovah, anao ho tia izy. Fitiavanao izy zen̈y hahavy anao hanokanten̈a aminany ndreky hitana volan̈a nataonao taminany. (Mpitoriteny 5:4) Anao koa fa vita fanokan̈anten̈a io, anao han̈iry han̈ano raha tiany Jehovah fo, baka izy hankasitraka anao. (Kolosianina 1:10) Nohony anao tia Jehovah, tsy ho sarotro aminao han̈ano sitraponany.  Anao han̈eky volan̈a apostoly Jaona ty: “Dikany tia Zan̈ahary zen̈y ­mitandrin̈y didinany, fa didinany io fo tsy mavesatra.”—1 Jaona 5:3.

19. Nan̈ino anao tsy tokony havozo hanokanten̈a amy Jehovah?

¹⁹ Anao ndray tsy lavorary, anao mety manokanten̈a amy Jehovah fo. Hainy fo raha mety ho vitanao ndreky tsy ho vitanao, ke izy tsy mitady raha mandilatra zen̈y. (Salamo 103:14) Anao tiany hahomby amy raha jiaby ataonao, ke zen̈y mahavy izy han̈ampy anao. ( Vakia Isaia 41:10.) Matokisa anao fa izy ‘handamin̈y lalan̈anao’, izikoa anao matoky izy amy fonao jiaby.—Ohabolana 3:5, 6.

20. Nan̈ino ma mila ataonao hainolo jiaby fa anao nanokanten̈a tamy Jehovah?

²⁰ Tsara anao mieritreritry raha jiaby nikoran̈intsika tamy toko araiky ty, fotony zen̈y mety han̈ampy anao hanokanten̈a amy Jehovah. Zay olo ten̈a tia Zan̈ahary, tsy maintsy man̈ano fan̈ambaran̈a hitanolo jiaby. (Romanina 10:10) Karakory ma han̈anovanao zen̈y?

21, 22. Amy fomba karakory ma han̈anovan̈a ‘fan̈ambaran̈a aminolo jiaby’ zen̈y?

 ²¹ Anao koa man̈iry hatao batisa, koràn̈a antipan̈ahy pandamin̈y amy fiangonan̈a. Hisy antipan̈ahy amy zay hiaraka handiniky aminao fan̈ontanian̈a maromaro momba raha ten̈a ampianariny Baiboly. Izikoa hitandro fa fenonao fepetra aminolo hatao batisa, anao efa mety hatao batisa edy koa fa avy fivoriambe. * Matetiky amy fivoriambe karaha zen̈y, misy kabaro baka amy Baiboly man̈azava dikany batisa. Koa fa vita zen̈y, misy fan̈ontanian̈a aroe hapetrakany olo pan̈ano kabaro io amindro hatao batisa. Iro mamaly fan̈ontanian̈a io mare han̈anovandro ‘fan̈ambaran̈a aminolo jiaby’ finoan̈andro.

²² Batisa io ahaizonolo maro fa anao efa nanokanten̈a tamy Jehovah, ke nanjary Vavolombelon̈o Jehovah. Izikoa olo araiky atao batisa, ain̈inany jiaby adeky an̈aty rano, baka ho hitanolo jiaby fa izy efa nanokanten̈a tamy Jehovah.

23. Ino ma dikany atao batisa “aminy an̈arany Baba andan̈itry an̈y”, ndreky “aminy an̈arany Zanaka”, ndreky “aminy an̈arany fan̈ahy masin̈y”?

²³ Jesosy nivolan̈a fa pianatranany mila atao batisa “aminy an̈arany Baba andan̈itry an̈y, ndreky aminy an̈arany Zanaka, ndreky aminy an̈arany fan̈ahy masin̈y.” (Matio 28:19) Dikany atao batisa “aminy an̈arany Baba andan̈itry an̈y” zen̈y man̈eky fahifan̈any Jehovah. Dikany atao batisa “aminy an̈arany Zanaka” ndraiky man̈eky fahifan̈any Jesosy Kristy. (Salamo 83:18; Matio 28:18) Dikany atao batisa “aminy an̈arany fan̈ahy masin̈y” koa man̈eky asany fan̈ahy masin̈y, na angovo ampiasainy Jehovah io.—Galatianina 5:22, 23; 2 Petera 1:21.

24, 25. a) Ino ma dikany batisa io? b) Ino fan̈ontanian̈a hivalin̈y amy toko farany amy boky ty?

 ²⁴ Misy dikany maventy batisa io. Anao ajibiky an̈aty rano in̈y karaha maty, fotony efa tapitry fiain̈ananao taloha. Anao aboaka in̈y ndraiky mivolan̈a fa velon̈o anao, han̈ano sitrapony Zan̈ahary. Tsarova fa tamy Jehovah anao nanokanten̈a fa tsy taminy asa na tanjon̈o hafa, na olo na fikambanan̈a. Anao koa fa nanokanten̈a tamy Jehovah ndreky natao batisa, anao efa an̈isany kamaradiny.—Salamo 25:14.

²⁵ Olo araiky ndray vita batisa tsy voatery voavonjy. Apostoly Paoly nivolan̈a: ‘Mifen̈a mare fo amy tahotro ndreky horohoro, hazahoanaro famonjian̈a anaro.’ (Filipianina 2:12) Batisa tsy farany fanompoan̈a Zan̈ahary. Karakory tokony hataonao izikoa anao tsy tihiala amy fitiavany Zan̈ahary? Zen̈y koran̈iny toko farany amy boky ty.