Rango taloha tan̈y, efa tiany Jehovah edy olo tran̈o araiky miaraka man̈ano fotoampivavahan̈a. Izio mankatsara fihavan̈ana amy Jehovah, ndreky mampifankatia olo tran̈o araiky. (Deoteronomia 6:6, 7) Zen̈y mahavy Vavolombelon̈o Jehovah mifidy hariva araiky isaka herin̈andra an̈anovan̈a fotoampivavahan̈a ataonolo tran̈o araiky. Iro mety mandiniky toro lalan̈a baka amy Baiboly, arakaraka raha ilaindro. Izikoa anao zaraiky fo tran̈o araiky, anao fo mifidy raha ianaranao. Zen̈y fianaran̈a manokan̈a zen̈y.

Izio an̈isany fomba han̈aton̈ana Jehovah. Atsika koa man̈aton̈o Zan̈ahary, izy han̈aton̈o atsika. (Jakoba 4:8) Atsika koa mianatra raha momba izy, ho haintsika tsarabe toetrinany ndreky raha efa nataony taloha tan̈y. Anaro koa vo sambany han̈ano fotoampivavahan̈a io, tsara anaro miaraka man̈oman̈a vaky Baiboly atao aminy Fianaran̈a momba Fanompoan̈a. Anaro mety mifandimby mamaky, baka io samy mivolan̈a raha nianarany baka aminy andininy aby io.

Izio ten̈a mampifankatia olo tran̈o araiky. Fianaran̈a Baiboly miaraka karaha io mampifankatia olo fivadiany ndreky zanaka. Tokony hatao tsara izio, baka olo jiaby ravoravo izikoa fa avy lera io. Tokony arakaraka taon̈ony tsaiky hifidianany raimandreny raha ianaran̈a. Anaro mety mizaha hevitry amy boky Tilikambo Fiambenana na Mifohaza! na amy jw.org. Diniha raha mety manahiran̈a zanakanaro mbala mianatra. Anaro mety mizaha tele JW (tv.ps8318.com), baka io miaraka mikoran̈a raha hitanaro tao. Anaro koa mety mianatra hira atao amy fivorian̈a an̈y. Koa fa vita fotoampivavahan̈a io, anaro mety man̈ano fety hely.

Anaro koa maharaka man̈ano fotoampivavahan̈a io, mahay tianaro fo mianatra Baiboly. Zan̈ahary koa hitahy anaro.—Salamo 1:1-3.

• Karakory ma atao man̈ano fotoampivavahan̈a ataonolo tran̈o araiky io?

• Ino raha mety ataony raimandreny, baka olo jiaby ravoravo koa fa han̈ano fotoampivavahan̈a io?