Rahalahy ndreky Ranabavy aby,

Fitiavantsika Zan̈ahary ndreky fitiavantsika olo mahavy atsika ‘mandeha mampianatra olo baka amy firenena jiaby, baka io man̈ano batisa iro.’ (Mat. 28:19, 20; Mar. 12:28-31) Fitiavan̈a tsisy fitiavanten̈a io ten̈a mahery. Izikoa atsika manan̈a fitiavan̈a karaha zen̈y, atsika mety hahavita han̈ampy iro olo ‘manan̈a toetsain̈y tsara hazahoan̈a fiainan̈a mandrakizay.’​—Asa. 13:48.

Taloha raha ten̈a nataontsika, nan̈ano tsianjery fomba fitorian̈a baka io nan̈apetraka raha mety vakin̈a. Fa zioty ndraiky, fankatsaran̈a fahaizantsika mikoran̈a aminolo, raha ten̈a ifen̈antsika. Aboakantsika fa atsika tia olo izikoa ataontsika mifan̈araka amy raha ilaindro koran̈antsika. Dikanizen̈y, atsika mila mahay mandanjalanja baka io mandiniky tsarabe ino raha manahiran̈a iro ndreky raha tiandro tsiaraikiaraiky. Nan̈ino ma bokihely ty hahavy ty atsika hahavita raha zen̈y?

Misy fianaran̈a 12 aminany ty, mampianatra atsika iro toetry mila anan̈antsika baka atsika hahavita han̈aboaka fitiavan̈a ndreky hampianatra olo koa. Fianaran̈a tsiaraikiaraiky aminany ty miorin̈y amy tantara amy Baiboly momba Jesosy ndreky iro Kristianin̈y tamy taonjato voanalohany, nan̈aboaka toetry ten̈a nilain̈y tamy fanompoan̈a. Ke tanjon̈o aminany ty tsy han̈ano tsianjery fomba fitorian̈a fa hizaha fomba han̈aboahan̈a fitiavan̈a olo. Iro toetry tsiaraikiraiky io ndraiky samy ilain̈y amy karazan̈a fanompoan̈a jiaby ataontsika, fa misy amindro io fo ten̈a ilaintsika lera atsika manomboko koran̈a, na mitsidiky ndreky mitariky fampianaran̈a Baiboly.

Anao koa fa mandiniky leson tsiaraikiaraiky, iritrireta akory mety han̈aboahanao toetry aby io lera anao mikoran̈a aminolo aminaro an̈y. Ampitombosa fitiavanao Jehovah ndreky fitiavanao olo. Fitiavan̈a io mbala bebeny karazan̈a fomba fampianaran̈a jiaby, ke izio ten̈a hahavy anao hahavita hanakatra tanjon̈onao hampianatra olo.

Ten̈a tianay mare fiarahan̈a miasa aminaro. (Zef. 3:9) Irarian̈a Jehovah hitahy anaro fo, fotony anaro tsy voly mankatia olo ndreky mampianatra iro!