Olo tia mandray andraikitry zen̈y olo mety atokisan̈a. Anao koa man̈iraka izy han̈ano raha, hainao fa izio tsy maintsy ataony tsara sady vitainy amy fotoan̈a.

Nata tsaiky mbala hely efa afaka mianatra mandray andraikitry. “Tsaiky araiky izikoa fa feno taon̈o araiky sy telo fanjava, izy efa afaka man̈ano raha an̈irahany raimandreniny izy. Lera izy efa kadiriny taon̈o araiky sy tapany iô ndraiky, tiany hatao aby lan̈iany raha ataondry olobeny”, volan̈iny boky Fitaizan̈a Zanaka amy Tany Isankarazany (angiley). Karaha ty koa volan̈iny boky io: “Amy tany maro, tsaiky izikoa fa ampy dimy taon̈o firaka fito taon̈o, iro efa ampianarindry olobendro man̈ano asa antran̈o. Tsaiky nata mbala hely karaha zen̈y, efa mahavita raha tsara.”

Amy toeran̈a sasany, maro tanora izikoa fa bebe mandeha mitokantran̈o. Fa baka io, iro mimpody miaraka mipetraka amy raimandrenindro fo fotony tsy mahatondra ten̈a. Mahavy raha karaha zen̈y, misy tanora sasany tsiary nampianarindry olobendro hahay hitantambola, han̈ano asa antran̈o, na koa handray handraikitry.

Ke tsara izikoa rango mbala hely tsaiky efa ampianarin̈y mandray andraikitry, karaha io lera izy be efa hainy raha tokony hataony. Karaha ty volan̈iny boky araiky zay: “Tsy mety izikoa zanakanao zarinao mitavandra anao fo amy raha jiaby. Lera izy feno 18 taon̈o amy zay, izy ambelanao miatriky fiain̈ana zaraiky an̈y, kanefa tsisy raha hainy foeky.”

Ameza asa izy ataony.

TORO LALAN̈A BAIBOLY: “Asa mare jiaby azahoan̈a tombony.”​—Ohabolana 14:23.

Tsaiky hely farandraha tia miaraka man̈ano raha aminolobeny eky. Afaka araraotinao raha zen̈y mba han̈amezan̈a asa zanakanao, antran̈onaro ao.

Misy raimandreny sasany tsy tia mampan̈ano asa zanakandro, fotony efa maro zen̈y devoara mila ataony tsaiky io.

Kanefa, tsaiky man̈ano asa antran̈o ny ten̈a mahay raha, fotony iro efa zatra mamita asa ampan̈anaovin̈y iro. Boky Fitaizan̈a Zanaka amy Tany Isankarazany mivolan̈a karaha ty: “Izikoa lera iro mbala hely, tsaiky aby io efa tsy ambelantsika man̈ampy atsika, kanefa aminin̈y edy iro tihan̈ampy mare, iro manjary mahatsiaro ten̈a fa tsy ilain̈y man̈ampy olo zen̈y ... Iro koa manjary efa tsy han̈ano raha eky fotony miambin̈y olo han̈ano izio amy pilasindro.”

Hitantsika baka amy zen̈y, fa zanakantsika izikoa fa hampan̈anaovin̈y asa antran̈o, iro loso tia man̈ampy olo fa tsy tia ten̈a. Salakady loso tsapany fa izy ten̈a ilain̈y an̈aty tran̈o ao, ndreky tokony han̈ampy fianakavian̈anany.

Ataova tsapany fa tsy maintsy misy vokany fo izikoa izy man̈ano raha tsy mety.

TORO LALAN̈A BAIBOLY: “Tandrin̈esa torohevitry, baka io man̈araha anatra, baka anao ho hisy jery aminy amaray an̈y.” ​—Ohabolana 19:20.

Izikoa ohatra, zanakanao nandrobaka rahanolo, aza asitriky raha zen̈y. Ambilà izy hibaby vokatrany raha nataony, ke mandeha man̈ano azafady na hisolo raha nirobatiny io.

Izikoa fa hainy tsaiky fa iro fo mitanty vokatrany raha tsy mety ataondro, iro manjary...

• ho zatra hivolan̈a ny marin̈y ndreky han̈eky diso

• tsy han̈amia tsin̈y olo

• tsy han̈amarinten̈a

• han̈ano azafady izikoa ilain̈y