Olo manetry ten̈a zen̈y man̈aja olo, tsy poerapoera, baka io tsy man̈anten̈a hindesin̈y amy fomba miavaka. Izy mitady raha hahatsara olo fo, baka io mangala leson baka amy raha ataonolo.

Olo sasany mieritreritry fa olo manetry ten̈a zen̈y olo kapotro, fa zen̈y tsy marin̈y. Ny marin̈y aminany, manan̈a korazy izy matoa mahay fa izy diso ndreky mahay erany raha mety ho vitany.

• Fanetrenten̈a io mankatsara fihavan̈ana. Karaha ty volan̈iny boky Fitiavanten̈a io Mahaimitombo Mare Miran̈a Aretin̈y In̈y (angiley): “Olo manetry ten̈a farandraha mora mahazo naman̈a eky, fotony iro mora mifandray aminolo.”

• Fanetrenten̈a io mankatsara fiain̈anany tsaiky io aminy amaray. Zanakanao izikoa mianatra manetry ten̈a, tsy zioty fo izy mahazo hatsaran̈a amy zen̈y fa afara an̈y koa. Tsy ho sarotro aminany, ohatra, hahita asa lera izy be. Karaha ty nisoratiny Pr. Leonard Sax: “Tanora araiky izikoa mieritreritry be momba ain̈inany, avio tsy mandiniky fa misy erany raha mety ho vitany, mety ho sarotro aminany hahita asa. Fa izikoa ndraiky alainy onon̈o tsarabe raha ten̈a tadiaviny pampiasa io, azony edy asa io.” a

Ampia zanakanao tsy han̈ambony ten̈a

TORO LALAN̈A BAIBOLY: “Izikoa misy olo mihevitry izy raha mare kanefa izy tsisy atà, dikanizen̈y ain̈inany fo fitahiny.”​—Galatianina 6:3.

• Aza fitahin̈y izy. Anao mety mba tihandrisiky zanakanao han̈ano raha ke volan̈inao aminany “ho tanteraka fan̈irian̈anao jiaby” na koa “ho vitanao aby zay raha tianao hatao.” Kanefa tsy karaha zen̈y aby fiain̈ana. Hahomby izy amy raha ataony izikoa izy manan̈a tanjon̈o mora takarin̈y salakady mifen̈y mare manakatra iro io.

• Ataova voafaritry tsarabe raha hideranao izy. Izikoa anao mivolan̈a amy zanakanao fa izy ten̈a “miavaka” mare, zen̈y tsy handrisiky izy hanetry ten̈a. Sitrany ataova voafaritry tsarabe ino amy raha nataony izy namparavoravo anao io.

• Asiava erany fampiasany tranonkala fifaneraserana. Matetiky olo amy tranonkala fifaneraserana aby io tia mipoera fahaizan̈andro ndreky raha tsara vitandro. Kanefa raha zen̈y mifanohitry mare amy fanetrenten̈a.

• Ampirisiha zanakanao tsy hirekireky han̈ano azafady. Zanakanao koa fa man̈ano raha tsy mety, ampia izy hahatsapa fa tsy mety raha nataony io, ndreky han̈eky fa diso marin̈y izy.

Ampia izy hahay hankasitraka.

TORO LALAN̈A BAIBOLY: “Ke aboaha fa anaro mahay mankasitraka.” ​—Kolosianina 3:15.

• Mahay mankasitraka zavaboary. Tsaiky mila mianatra hahay hankasitraka zavaboary. Tokony tsapandro fa fiain̈anantsika miankin̈y amy fisiany zavaboary aby io. Atsika mila tsiko iain̈ana, mila rano igiahan̈a, ndreky hanin̈y hoanin̈y. Ampiasà ohatra aby io han̈ampian̈a izy hahay hankasitraka ndreky ho varian̈a aminy hatsaran̈any zavaboary.

• Mahay mankasitraka olo. Ampatsiarova zanakanao fa kila olo amy raha mampiavaka izy. Ke izy tsy tokotro ho be fô izikoa misy olo mahaihay raha tozay izy na mahavita raha tsara tozay ninany. Aboaha izy fa izy afaka mianatra raha baka aminolo aby io.

• Mahay man̈ano mersy. Zanakanao ampianara hahay han̈ano “mersy” baka amy fô, fa tsy atao tsianjery fo. Hanetry ten̈a fo olo araiky izikoa mahay mankasitraka.

Ampianara zanakanao fa tsara man̈ampy olo.

TORO LALAN̈A BAIBOLY: “Mahaiza manetry ten̈a, ke olo hafa ataova an̈abon̈abo mandilatra anao. Irarian̈a anaro tsiaraikiaraiky samy hizaha raha mahatsara namanaro, fa tsy raha mahatsara anaro tompiny fo.”​—Filipianina 2:3, 4.

• Zanakanao iraha mitahitahy anao man̈ano asa antran̈o. Izikoa anao mivolan̈a amy zanakanao fa izy tsy voatery man̈ampy anao man̈ano asa antran̈onaro ao, an̈aty jerinany raha tiany hatao fo ten̈a raha maventy aminany, fa tsy asa antran̈o. Kanefa tokony ho asa antsendriky raha bebe, zay vo saoma. Aboaha izy fa izikoa izy man̈ano asa antran̈onaro ao, raha zen̈y hitondra hatsaran̈a aminolo, salakady olo hahaihankasitraka ndreky han̈aja izy fo noho izy nan̈ano izio.

• Aboaha fa tsara man̈ano raha han̈ampian̈a olo. Hanjary matotro tsarabe zanakanao izikoa zatra man̈ano han̈ampian̈a olo. Ampia izy hahita azovy olo mila fan̈ampian̈a. Koràn̈a aminany raha mety ataony han̈ampian̈a iro. Deray izy izikoa fa man̈ampy olo salakady tohàn̈a izy.