Nan̈ino ma Jesosy nanon̈ono volan̈any Davida amy Salamo 22:1 ao, talohanizy hofoaty?

Taloha heliny nifatesany, Jesosy nanon̈ono volan̈a amy Matio 27:46 ty: ‘Zan̈ahariko ô, A Zan̈ahary e, nan̈ino zaho nialanao?’ Jesosy koa fa nivolan̈a zen̈y, tanteraka taminany raha nivolan̈iny Davida amy Salamo 22:1 ao. (Mar. 15:34) Nan̈ino Jesosy nivolan̈a raha aby zen̈y? Diso fan̈antinan̈a ma izy sa nisy fotoan̈a nihen̈y fatokisany Zan̈ahary? Tsy zen̈y foeky. Efa hainy Jesosy tsarabe nan̈ino izy tsy maintsy hofoaty, ary izy efa von̈ono amy zen̈y. (Mat. 16:21; 20:28) Efa hainy koa fa Jehovah tsy hiaro izy eky amy fotoan̈a amonoan̈a izy io. (Joba 1:10) Nambelany Jehovah i Jesosy han̈aporofo fa izy mahavita tsy mivadiky, ndray mafy karakory fomba hamonoan̈a izy.​—Mar. 14:35, 36.

Marin̈y ndraiky fa tsy haintsika tsarabe antony nahavy Jesosy nivolan̈a andininy amy salamo io. Kanefa mety misy antony vitsivitsy nahavy izy nivolan̈a zen̈y. Zen̈y raha hidinihintsika iziô. *

Tamy Jesosy nanon̈ono volan̈a aby io, mety tihivolan̈a fo izy fa lera izy hivonen̈a, Jehovah tsy hiaro izy. Jesosy tsy maintsy nan̈efa vidipan̈avotan̈a, ary Jehovah tsy nanakana izy hofoaty. Jesosy taminio mbala olombelon̈o, ke tsy maintsy hofoaty izy vo hahavita ‘han̈avotro olo jiaby.’​—Heb. 2:9.

Mety tiany Jesosy handiniky Salamo faha-​22 io donko olo, matoa izy nampiasa volan̈a vitsivitsy baka tamizio tao. Fombany Jiosy tamy zen̈y baka nan̈ano tsianjery salamo maromaro. Ke iro  koa fa naharen̈y andininy araiky baka tamy salamo, direkty efa azondro onon̈o tohiny raha koran̈iny salamo io. Izikoa zen̈y edy raha niritriretiny Jesosy, dikanizen̈y, izy tihan̈ampy iro Jiosy nan̈aradia izy aby io hahatsiaro faminanian̈a marobe amy Salamo faha-​22 io, fotony izio mikoran̈a momba raha handalo amy fotoan̈a hamonoan̈a izy. (Sal. 22:7, 8, 15, 16, 18, 24) Andininy farany amy salamo io koa midera Jehovah sady mivolan̈a fa Jehovah io Panjakany tany jiaby.​—Sal. 22:27-31.

Nanon̈ono volan̈a amy salamo io koa i Jesosy fotony mety tihivolan̈a izy fa tsisy raha ratsy nataony. Talohany hamonoan̈a izy, Jesosy voaheloko hofoaty tamy raha tsy nataony. Nivolan̈a iro tamy Fitsaran̈a Avo Jiosy fa Jesosy zen̈y tsy nan̈isy fotiny Zan̈ahary ke mila vonen̈a. (Mat. 26:65, 66) Taminy alin̈y iro nitsara izy, avio navorindro mekimeky tan̈y fo olo hitsara izy. Kanefa raha nataondro zen̈y tsy nifan̈araka tamy lalàn̈a foeky. (Mat. 26:59; Mar. 14:56-59) Ke Jesosy koa fa nan̈ontany: ‘Zan̈ahariko ô, A Zan̈ahary e, nan̈ino zaho nialanao?’, mety tihivolan̈a donko izy fa tsisy raha ratsy nataony ke tokony hamonoan̈a izy.

Jesosy taminio koa donko tihampatsiaro iro fa, ndray Davida panoratra salamo io nambelany Jehovah hijaly, zen̈y tsy mivolan̈a fa izy tsy nankasitrahiny Jehovah. Tsy midika Davida nan̈apetraka fan̈ontanian̈a io ke tsy ampy finoan̈a izy. Fotony tafara helinizy nan̈ontany izio, izy nivolan̈a fa izy matoky Jehovah. Natoky izy fa Jehovah hitahy izy fo sady hiaro panomponany jiaby. (Sal. 22:23, 24, 27) Karaha zen̈y koa Jesosy, ‘Zanaka Davida’ io. (Mat. 21:9) Ndray niaritry ny mafy izy taminy hazofijalian̈a, zen̈y tsy mivolan̈a fa Jehovah tsy nankasitraka izy eky.

Mety tihan̈aboaka alahelonany donko Jesosy taminio, fotony Jehovah tsy niaro izy baka izy afaka man̈aboaka tsy fivadihan̈anany. Tsy fikasan̈any Jehovah tamy voanalohany tan̈y foeky han̈ambela Zanany io hofoaty. Ny marin̈y aminany, tsy nilain̈a aby raha zen̈y izikoa Adama ndreky Eva nan̈araka volan̈anany. Jesosy ane tsy nan̈ano raha ratsy e! Kanefa tsy maintsy nijaly ndreky naty izy baka ho hita tsarabe fa diso volan̈any Satana. Tsy maintsy nan̈ano soron̈o ain̈inany koa i Jesosy, fotony zen̈y fomba han̈ampodianan̈a raha jiaby nariany Adama. (Mar. 8:31; 1 Pet. 2:21-24) Zen̈y nahavy Jehovah tsy niaro Jesosy foeky tamy fotoan̈a namonoan̈a izy; sambany taminio Jehovah nan̈ano zen̈y.

Nanon̈ono volan̈a aby io koa donko i Jesosy, baka ho azondro pan̈aradia izy aby io onon̈o antony nahavy Jehovah nan̈ambela izy hofoaty taminy hazofijalian̈a. * Efa hainy Jesosy fa ho maro olo ho tafintohin̈y koa fa mahita izy an̈abony hazofijalian̈a, fotony olondratsy fo nahanton̈o tamizio. (1 Kor. 1:23) Kanefa iro pan̈aradia izy aby io koa fa nifantoko taminy antony ten̈a nifatesany Jesosy, nazava tamindro tsarabe fa tsy olondratsy izy fa Pan̈avotro.​—Gal. 3:13, 14.

Na ino na ino antony nahavy i Jesosy hanon̈ono volan̈a aby io, hainy fa izy naty taminy hazofijalian̈a in̈y porofo fa nan̈ano sitrapony Jehovah izy. Tafaranizy nanon̈ono salamo io, izy nivolan̈a: “Vita!” (Jaona 19:30; Lioka 22:37) Vitany Jesosy aby raha nan̈irahan̈a izy tambony tany teto, fotony Jehovah tsy niaro izy tan̈atiny fotoan̈a fôhiky. Nanjary vitany Jesosy koa nan̈atanteraka raha jiaby voasoratra momba izy tan̈atiny “lalàn̈any Mosesy ndreky amy Paminan̈y ndreky Salamo” ao.​—Lioka 24:44.