“MODIA aminy havanao an̈y, ke volàn̈a amindro raha jiaby nataony Jehovah taminao ndreky namindrany fô taminao.” Volan̈a Jesosy izio. Nety ta Gadara, tatsimo antin̈ianany Ranomasin̈y Galilia tan̈y izy taminio, nikoran̈a tamy lelahy araiky tihan̈aradia izy. Hita baka amy volan̈any Jesosy io fa hainy tsarabe toetrinolombelon̈o. Tianolo mare hikoran̈a aminy havany raha mahalian̈a iro.​—Mar. 5:19.

Tsisy hafa amy zen̈y koa toetrinolo izioty, ndray mety ho hita mare niny sasany fa niny sasany mety ho kirikiry hely. Olo araiky koa baka manjary panompony Jehovah Zan̈ahary marin̈y io, matetiky efa tsy din̈iny hikoran̈a aminy havany raha hainy tamy Baiboly. Fa karakory ma tokony han̈anaovany zen̈y? Akory hataony hanohin̈y fony havany, na efa manan̈a fivavahan̈anany havany io, na mbala tsy mino Zan̈ahary? Misy torohevitry tsara momba zen̈y amy Baiboly.

Tamy taonjato voanalohany, Andrea an̈isanolo voanalohany nahita fa Jesosy io Mesia. Azovy olo voanalohany nivolan̈any izio? “Nahita Simona rahalahiny izy ke nivolan̈a: ‘Zahay efa nahita Mesia (dikany Mesia zen̈y ‘Kristy’).” Nindesiny Andrea tamy Petera tan̈y Jesosy, ke Petera nanjary pan̈aradia Jesosy koa.​—Jaona 1:35-42.

Kadiriny tsiota taon̈o tafaranizen̈y, tamy Petera nidoko ta Jopa tan̈y, nirahin̈y nandeha nan̈avaratra ta Kaisaria tan̈y izy, hamangy Kornelio olo sefony tafiky. Azovy aby olo tojiny Petera tantran̈ony Kornelio tao? Mazava ho azy fa Kornelio, Petera ndreky iro dia araiky taminany. “Efa navoriny Kornelio tantran̈onany tao koa iry havany ndreky iry kamaradiny.” Baka tamy Kornelio nahavy iro havany aby io naharen̈y raha nivolan̈iny Petera ndreky nan̈ano fanapahankevitry tsara nifan̈araka tamy raha ren̈indro.​—Asa. 10:22-33.

Ino raha ianarantsika baka aminy Andrea ndreky Kornelio momba fitiavan̈a havan̈a?

Tsy raha nandeha hoazy fo raha nataony Andrea ndreky Kornelio io. Karaha ataony Andrea, izy nitondra Petera tamy Jesosy, baka io Kornelio ndraiky namory iry havany hitandren̈y raha hikoran̈iny Petera tamindro. Fa ndray zen̈y, Andrea ndreky Kornelio tsy niforise havandro hanjary pan̈aradia Kristy. Ino raha ianarantsika baka amy zen̈y? Karaha zen̈y koa ataontsika. Mety hahavita hikoran̈a aminy havantsika koa atsika, ke hahavy iro hanjary hianatra fahamarin̈ana amy Baiboly amy Vavolombelon̈o Jehovah. Fa tokony hajaintsika fo safidindro, ke atsika tsy han̈ohatra hiforise iro foeky. Diniha baka ohatranolo fivadiany an Allemagne ty, Jürgen ndreky Petra, misy ahitanao akory hatao man̈ampy havan̈a.

Petra nianatra Baiboly tamy Vavolombelon̈o Jehovah. Efa vita batisa izy. Vadiny ndraiky, Jürgen, sefony tafiky. Tamy voanalohany, tsy tiany fanapahankevitriny vadiny in̈y. Fa izikoa fa nandeha fotoan̈a, hitany fa marin̈y ankitin̈y raha ampianarin̈y Vavolombelon̈o Jehovah baka amy Baiboly. Nanokanten̈a tamy Jehovah koa izy, ke izioty efa antipan̈ahy. Ino torohevitry amiany olo izikoa izy tihanohin̈y fony havany tsy Vavolombelon̈o Jehovah?

Ho Jürgen: “Atsika tsy tokony han̈ohatra hiforise olo han̈eky raha ampianarintsika sady tsy tokony totofantsika fan̈azavan̈a maro koa iro. Manjary mahaihalandro fo atsika koa man̈ano karaha zen̈y. Tsara izikoa ataontsika tsihelihely koran̈a momba Baiboly ataontsika amindro. Tsara koa izikoa atsika mitondra piaramanompo mitovitovy taon̈o amindro ndreky mitovy raha tian̈a amindro. Hilamin̈y tsarabe koran̈a amy zen̈y.”

Karaha nataony Petera ndreky Kornelio ndreky ry havany in̈y, direkty nan̈ano raha iro izikoa fa nahay ny marin̈y. Fa nisy olo sasany tamy taonjato voanalohany ndraiky, elaela iro vo nanapakevitry han̈araka fahamarin̈ana.

Tamy Jesosy nitory tambony teto, nisy havany nino izy. Ohatra amy zen̈y, apostoly Jakoba ndreky Jaona rahalahiny Jesosy, baka io Salome mamandro roe lahy io mety mbala angovaviny Jesosy. Salome io mety mbala an̈isandro ‘man̈angy maromaro nampiasa fanan̈anandro hikarakaran̈a Jesosy ndreky pianatranany aby io.’​—Lioka 8:1-3.

Fa tsy karaha zen̈y ndraiky sasany tamy rahalahiny Jesosy. Elaela iro vo nino izy. Ohatra amy zen̈y, kadiriny taon̈o araiky tafarany nivitany batisany Jesosy, nisy olo maro nivory tamy tran̈o araiky nitandren̈y izy. “Iro havany aby io koa fa naharen̈y momba raha zen̈y, iro nivolan̈a: ‘Izio efa nanjary adala. Ke iro navy handeha hanambotro izy.’” Tsy ela tafaranizen̈y, Jesosy ndreky iro rahalahiny aby io koa fa nan̈ontany han̈aia izy, Jesosy tsy direkty namaly iro. Fotony nan̈ino? Fotony “iro rahalahiny aby io tsy nino izy.”​—Mar. 3:21; Jaona 7:5.

Ino ma raha ianarantsika baka amy fitondrasany Jesosy iro havany aby io? Izy ndray nataondro adala, izy tsy niady tamindro. Nata efa tafaranizy nivonen̈a ndreky nivilomin̈y in̈y, izy mbala nankahery iry havany fo. Izy niboaka tamy Jakoba rahalahiny. Baka tamy zen̈y nahavy Jakoba ndreky iro rahalahiny Jesosy hafa nan̈eky marin̈y fa Jesosy ankitin̈y Mesia. An̈isanolo ta Jerosalema nahazo fan̈ahy masin̈y tan̈abony etazy niaraka tamindro apostoly aby io iro io. Nahazo tombontsoa miavaka koa iry Jakoba ndreky Joda mbala rahalahiny Jesosy koa, izikoa fa nandeha fotoan̈a.​—Asa. 1:12-14; 2:1-4; 1 Kor. 15:7.

Karaha tamy taonjato voanalohany in̈y fo, mety elaela havantsika sasany vo man̈araka lalan̈a mengo amy fiain̈ana. Ohatra amy zen̈y Roswitha. Katoliky Romanin̈y nafana fô izy taminy 1978, tamy vadiny natao batisa tamy Vavolombelon̈o Jehovah. Ke tamy voanalohany izy nanohitry vadiny mare. Fa izikoa fa nafaka taon̈o vitsivitsy, voly izy nanohitry, fotony hitany fa marin̈y raha ampianariny Vavolombelon̈o Jehovah. Vita batisa koa izy tamy 2003. Ino ma raha nampiova izy? Fotony vadiny tsy nasiaka izy taminizy nanohitry in̈y, fa nambelany nandeha fo fotoan̈a. Ino torohevitry namezany Roswitha? “Ten̈a mila mahadin̈y miambin̈y atsika. Ten̈a maro raha tsara azo baka amy faharetan̈a io.”

Monika ndraiky natao batisa taminy 1974, fa zanany aroe lahy fo, kadiriny folo taon̈o tafaranizen̈y vo tapakevitry hanjary Vavolombelon̈o Jehovah. Vadiny ndraiky, Hans an̈arany, izy tsy manohitry fa efa tamy 2006 izy vo natao batisa. Ino torohevitry amezandro fianakavian̈a? “Aza miala amy Jehovah, avio aza man̈eky avadikinolo jery.” Tsy maintsy naboakandro Hans koa fa iro tia izy fo, avio iro nan̈anten̈a fa izy mbala hanjary panompony Jehovah fo.

Jesosy efa navy nivolan̈a fa fahamarin̈ana io mira rano mahavelon̈o tsisy farany in̈y. (Jaona 4:13, 14) Fahamarin̈ana io karaha rano madio sady manintsinintsy in̈y fo, ke tiantsika izio hamelombelon̈o iro havantsika aby io. Tsy tiantsika hiforise iro higiaka izio, fotony ho rofin̈iny iro. Ke arakaraka fomba fikoran̈antsika amindro haharofin̈iny iro na hampavelombelon̈o iro. Baiboly mivolan̈a fa “fônolo marin̈y mieritreritry antsendriky vo mamaly.” Karaha ty koa koran̈iny ao: “Fônolo misy jery mahavy izy hifidy tsarabe raha hivolan̈iny, ke resy lahatra olo amy raha volan̈iny.” Akory han̈arehantsika zen̈y?​—Ohab. 15:28; 16:23.

Miniminia hely baka man̈angy araiky manambady lelahy tsy Vavolombelon̈o Jehovah, mba tihikoran̈a raha inoany amy vadiny io. Izikoa izy “mieritreritry antsendriky vo mamaly”, izy tsy mekimeky hivolan̈a, fa izy hifidy tsarabe raha hivolan̈iny. Izy tsy tokony han̈ano raha hiheverany vadiny fa izy an̈abon̈abo tozay vadiny io. Izy koa man̈ano volan̈a avoadiniky tsarabe, hamelombelon̈o vadiny io raha zen̈y sady hampifankahazo iro tsarabe. Ho hainy ranabavy io raha tokony hivolan̈iny ndreky tokony hataony izikoa izy mieritreritry karaha ty: ‘Lera karakory ma ramoseko mba kalma ndreky mora ikoran̈ana? Ino koran̈a tiany, avio boky karakory ma tiany vakin̈a? Izy ma tia raha momba siansy, sa politiky, sa sport? Ino ma raha mety hataoko ke hahavy izy ho lian̈a amy Baiboly, kanefa zaho tsy hanafintohin̈y izy fa han̈aja hevitrinany fo?’

Fa tsy ampy izikoa atsika man̈azava tsihelihely raha inoantsika fo. Mila tsara fitondranten̈a koa atsika, izikoa tiantsika hanohin̈y fôny havantsika.

Karaha ty nivolan̈iny Jürgen: “Areha isanandra toro lalan̈a amy Baiboly. Ten̈a mety ho malaka aminy havanao raha zen̈y, ndray izy tsy hivolan̈a zen̈y aminao.” Karaha zen̈y Hans, natao batisa 30 taon̈o tafarany niny vadiny. Karaha ty ho izy: “Ten̈a ilain̈a manan̈a fitondranten̈a tsara, baka ho hitany havanao fa nahatsara anao ankitin̈y fahamarin̈ana io.” Ke tokony ho hitany havantsika fa nata tsy mira amy ninolo hafa finoan̈antsika, izio mahatsara olo fa tsy mandrobaka olo.

Petera nanoratra torohevitry ten̈a tsara handeha amindro ranabavy manambady olo tsy Vavolombelon̈o Jehovah. Karaha ty ho izy: “Anaro man̈angy mila man̈eky vadinaro fo, ndray izy tsy man̈araka volan̈a masin̈y io, baka izy voataon̈onaro tsy amy volan̈a, fa amy raha tsara ataonaro, fotony hitany fa anaro madio fitondranten̈a ndreky man̈aja izy mare. Sanjinaro, karaha ataony taly ndreky ravaka volamena io tsy tokony ho raha ambelany fo tsara, fa tokony ho toetry misitriky an̈atiny fônaro an̈y, toetry milamin̈y ndreky mora. Karaha sanjy tsy mahairobaka in̈y izio sady ten̈a misy valerany amy Zan̈ahary.”​—1 Pet. 3:1-4.

Hita amy volan̈any Petera io fa mety hiova hevitry fo lelahy io izikoa tsara fitondranten̈a man̈angy io. Karaha zen̈y nataony Christa. Nifen̈y izy nanohin̈y fôny vadiny baka tamy fitondranten̈anany, nanomboko tafarany nivitany batisanany, taminy 1972. Izy efa nianatra Baiboly tamy Vavolombelon̈o Jehovah, efa nivory, sady efa nifankahazo tamindro rahalahy ndreky ranabavy aby io tsarabe, fa fahamarin̈ana io tsy nanohin̈y fônany. Nan̈aja safidinany iro rahalahy ndreky ranabavy aby io. Ino raha nataony Christa hanohinan̈a fôny vadiny?

Ho izy karaha ty: “Zaho tapakevitry han̈ano zay raha takiny Jehovah aminaka. Mifen̈y zaho baka ho tsara fitondranten̈a fo, baka vadiko ho voataon̈o “ndray tsy amy volan̈a.” Ataoko fo zay raha tadiaviny aminaka, izikoa mbala tsy mandika toro lalan̈a Baiboly. Banjaiko izy man̈ano safidinany, fa sisanizay apetrako ampelantan̈any Jehovah.”

Izikoa tantarany Christa in̈y zahan̈a, hita fa ten̈a mila mahay mandefitry atsika. Izy mifen̈y fo koa manohy fanompoany Jehovah. Ohatra, izy zatra mivory sady mazoto man̈ano fanompoan̈a. Izy koa mahay mandanjalanja fotoan̈anany, fotony hainy fa vadiny io mila fitiavan̈a, fotoan̈a, ndreky mila karakarain̈y. Ke lan̈iany olo manambady olo tsy Vavolombelon̈o Jehovah mila mandefitry ndreky mandanjalanja karaha zen̈y. Baiboly mivolan̈a fa “raha jiaby samy amy fotoan̈a tokony an̈anovan̈a izy.” An̈atinizen̈y fotoan̈a iarasan̈a amy fianakavian̈a, sirto amy vady tsy Vavolombelon̈o Jehovah. Mahavita mifampikoran̈a tsarabe baka iro izikoa manokan̈a fotoan̈a han̈anaovan̈a zen̈y. Sady izikoa iro mifampikoran̈a karaha zen̈y, tsy hamarahy lelahy io, tsy hahatsiaro latsatokana koa izy sady hahatsapa fa vadiny tia izy.​—Mpito. 3:1.

Karaha ty nivolan̈iny Holger, nanan̈a baba natao batisa efa 20 taon̈ony nivitany batisandro jiaby tran̈o araiky: “Tokony haboakantsika aminy havantsika tsy Vavolombelon̈o Jehovah io fa tiantsika izy, avio atsika mila mivavaka ninany.” Nivolan̈a koa Christa fa ‘man̈anten̈a fo izy fa mbala han̈eky fahamarin̈ana fo vadiny io andra araiky an̈y, ke hanjary panompony Jehovah.’ Tsy tokony han̈ary toky foeky atsika izikoa tsy Vavolombelon̈o Jehovah havantsika, fa man̈anten̈a mare fo atsika.

Tanjon̈ontsika hifandray tsarabe fo aminy havantsika tsy Vavolombelon̈o Jehovah, hitady fomba jiaby han̈ampian̈a iro han̈eky fahamarin̈ana, avio hanohin̈y fôndro aminy hafatra amy Baiboly ao. Hifen̈y fo atsika baka ‘halemy fan̈ahy ndreky han̈aja iro mare’ fo.​—1 Pet. 3:15.