Karaha hitantsika amy sary io fiheveranolo andra fitsaran̈a zen̈y. Misy olo maro hindesin̈y manoloan̈a sezy fiandrianany Zan̈ahary. Tsarain̈a arakaraka raha nataondro tambony tany teto zen̈y iro. Ke lan̈iany nan̈ano ny tsara, hipetraka andan̈itry an̈y zen̈y, fa lan̈iany nan̈ano ny ratsy zen̈y mandeha amy motrobe. Fa tsy karaha zen̈y raha koran̈iny Baiboly. Andra Fitsaran̈a io koran̈iny ao, fotoan̈a hamonjiany Zan̈ahary olonany, han̈adosoan̈a raha tsy rariny jiaby mahazo iro.​—Vakia Isaia 11:1-5; Asan’ny Apostoly 17:31.

Adama, lelahy voanalohany niasainy Zan̈ahary koa fa tsy nan̈araka volan̈a Zan̈ahary, taranakanany jiaby nanjary panota, nijaly ndreky maty. (Romanina 5:12) Tsy rariny raha zen̈y, ke baka hialanizio, Jesosy hamelon̈o olo maty antapitrisany. Koran̈iny bokiny Apokalypsy fa amy fanjakan̈a arivo taon̈ony Jesosy han̈anaovany zen̈y.​—Vakia Apokalypsy 20:4, 11, 12.

Iro olo aby io koa fa velon̈o, tsy baka amy raha nataondro talohany iro naty hitsaran̈a iro. Raha nataondro voasoratra aminy “horonamboky” koran̈iny Apokalypsy ao hitsaran̈a iro. (Romanina 6:7) Misy amindro io mbala hampianarin̈y raha momba Zan̈ahary. Iro io “olo marin̈y ndreky tsy marin̈y” koran̈iny apostoly Paoly in̈y.​—Vakia Asan’ny Apostoly 24:15.

Misy olo nan̈ano ny ratsy talohany nifatesany, fotony iro tsy nahay raha momba Zan̈ahary zen̈y foeky ke tsy nanompo izy. Hambelany Zan̈ahary hiova iro io ke hanjary olo man̈ano ny tsara. “Hatsangana amy fiain̈ana” an̈aranizen̈y. Fa hisy ndraiky olo sasany nata efa hivilomin̈y, mbala tsy han̈eky hianatra fitsipikiny Zan̈ahary fo iro. “Hatsangana amy fitsaran̈a” ivolan̈any Baiboly zen̈y.​—Vakia Jaona 5: 28, 29; Isaia 26:10; 65:20.

Izikoa fa tapitry andra fitsaran̈a mahadin̈y arivo taon̈o io, efa vitany Jehovah man̈ova olo jiaby manjary lavorary amy zen̈y. (1 Korintianina 15:24-28) Ten̈a hatsaran̈a maventy ho azonolo man̈araka volan̈a Zan̈ahary raha zen̈y! Izikoa fa vita fitsapan̈a farany, Zan̈ahary han̈aboaka Satana baka amy lavaka tsy hita farany. Tsy nahavita namitaka olo foeky Satana tan̈atiny arivo taon̈o. Fa izikoa izy fa haboakany Zan̈ahary io, izy mbala hahavita hamitaka olo maro hivadiky amy Jehovah. Fa lan̈iany tsy man̈eky hifitahiny Satana ndraiky ho velon̈o tsisy farany.​—Vakia Isaia 25:8; Apokalypsy 20:7-9.

“Andra fitsaran̈a” koa ivolan̈any Baiboly fotoan̈a han̈adosoany Zan̈ahary raha ratsy jiaby. Ho tampoko favianizio, karaha tamy Safodrano tamy faha Noa in̈y. Olo ratsy fan̈ahy na olo “tsy mavozo” Zan̈ahary fo hofoaty aminio. Lan̈iany ‘olo marin̈y’ fo ho tavela ambony tany eto. Tany vaovao koa ivolan̈ana iro io.​—Vakia 2 Petera 3:6, 7, 13.