Kadiriny efa folo taon̈o loso zay, fitaovan̈a fampirantian̈a io ten̈a man̈antsory olo maro. Erantany, ten̈a mora aminolo mahay iro io. Miavaka endrikinany io kanefa ten̈a mety tsarabe. Zahay matoky fa mitovy hevitry amy Asenata, ranabavy baka a Pologne ty anaro. Volan̈iny: “Fitaovan̈a io ten̈a tsotra, fa tsara. Mora ahorin̈y ndreky mora afindrafindra.”

 Asa anao mba efa nan̈ontany ten̈a, asa karakory nifidianan̈a endrikinany io ndreky fomba nan̈amboaran̈a izio?

 Tamy 2001, Filankevipitantan̈ana nan̈amia lalan̈a iro rahalahy ta France han̈amboatra fitaovan̈a fan̈anovan̈a fampirantian̈a io isankarazany an̈isany zen̈y fitaovan̈a mety afindrafindra. Nan̈amboatra modely maro iro. Ohatra izio, namboarindro valizy ndreky raha fitondrasan̈a entan̈a mba han̈apitrahan̈a boky ndreky gazety baka io ikajianan̈a iro boky sasany tsy aboaka amy fampirantian̈a io. Ke tamy farany la France nifidy modely araiky ten̈a niavaka ke nampiasain̈y tan̈atiny fotoan̈a lavabe.

 Iro rahalahy ta France tan̈y nahita tsara salakady ravoravo nivolan̈a fa ten̈a nahitan̈a vokatra tsara fitaovan̈a io. Tamy 2011 ndraiky, nikeny Filankevipitantan̈ana fa a New York han̈anovan̈a fandaharan̈a io, atao modely amy fitorian̈a amy tany maro olo ampiasan̈a iro fitaovan̈a fan̈anovan̈a fampirantian̈a mety indesindesin̈y ndreky latabatra. Lan̈iany pisava lalan̈a nandray anjara tamizio nahita fa ten̈a maro hatsaran̈a azo baka amy fampiasan̈a iro fitaovan̈a aby io. Iro nan̈amia sosokevitry momba endrikiny fitaovan̈a aby io. Namboarin̈y tamy tan̈ana fitaovan̈a fan̈anovan̈a fampirantian̈a voanalohany fa kakazo izio, tsy ten̈a nety fotony mavesatra loatra. Sarotro nampanonga ndreky nampijotso izio tamy leskalie. Zen̈y nahavy iro rahalahy aby io nieritreritry han̈amboatra izio aminy endriny hafa. Izio amy zay mba mahivankivan̈a kanefa tsy mora indesiny tsiko. Nisy laroa maventiventy koa izio baka io tsy mora robaka. Ke mety tsara izio tamy tany misy bongobongo. Izio koa nisy pilasy maromaro mety an̈apitrahan̈a boky ndreky gazety.

 Ten̈a nahomby fan̈andraman̈a modely natao ta New York in̈y. Zen̈y nahavy Filankevipitantan̈ana tamy 2012 nan̈amia lalan̈a fiangonan̈a jiaby erantany hampiasa izio. Nan̈ano komandy maro amy zay atsika tamy tany man̈amboatra izio. Ke izio mila natao tsara ankitin̈y baka io mora indesin̈y avio tsy mora robaka.

 Koa fa nandeha fotoan̈a, nisy fankatsaran̈a madinidiniky natao tamy modelinizio. Ohatra izio tamy 2015, nasin̈a sase alohanizio baka tsy idirandrano. Kahara ty volan̈iny Dina mipetraka a Géorgie momba fitaovan̈a io: “Tsy len̈iny mahalen̈y foeky fitaovan̈a io ke voaharo iro boky ndreky gazety ao.” Tamy 2017 ndraiky, nasian̈a afisy misy panjakamby izio tamy volan̈a maromaro. Karaha ty volan̈iny Tomasz, rahalahy baka a Pologne: “Taloha ten̈a tsy mora misolo iro afisy taminany io. Afisy misy panjakamby io ten̈a hevitry tsara.” Tamy 2019, nisy fan̈ovoan̈a koa tamy fitaovan̈a io ndreky fan̈amboaran̈a izio baka io hatanjaka tsarabe.

 Araiky fo pan̈amboatra fitaovan̈a fan̈anovan̈a fampirantian̈a io fa fitaovan̈a vitany fo rasain̈y man̈erantany. Izioty, vidiny araiky aminany io 43 dollar amerikain tsy an̈atinizen̈y frais andifasan̈a izy ndreky depansy hafa. Firaka izio ty, 16 tapitrisa dollar amerikain vola lanintsika nividianan̈a fitaovan̈a io ke mandilatrany 420 000 fitaovan̈a io nividin̈y ndreky nalefa amy fiangonan̈a man̈erantany.

 Baka hitsitsian̈a vola, direkty mividy maro atsika amy fitaovan̈a io. Ankoatranizen̈y, izikoa misy robaka fitaovan̈a io, tsy direkty soloan̈a fa lan̈iany raha robaka fo soloan̈a fotony mety man̈afatra piesinany io. Rahalahy antoeran̈a fo amizay manolo piesy robaka in̈y.

 Tiany piaramanompo erantany mampiasa fitaovan̈a io. Karaha ty volan̈iny Martina mipetraka a Ghana an̈y: “Lera atsika mitory andavanandra, atsika fo manomboko koran̈a. Fa raha itiavako fampirantian̈a ndraiky, olo foeky avy man̈aton̈o atsika. Atsika afaka mitory aminolo mandalo amy lalan̈a foeky.”

 Tamy tany araiky tan Afriky tan̈y, nisy lelahy araiky nan̈aton̈o fampirantian̈a ke nahazo gazety tamy volan̈anany. Herin̈iandra araiky tafaranizen̈y, izy nimpody baka io nivolan̈a karaha ty: “Nivakiko lahatsoratra jiaby tamy gazety in̈y. Ten̈a tsara raha tan̈atinizin̈y. Handeha ambanivolonay an̈y zaho ke mba hikoran̈iko amy fianakavian̈anaka raha hitako tao. Fianakavian̈anany io mipetraka 500 km miala io. Fanjava aroe tafaranizin̈y, izy navy baka io nitantara: “Nivakindro tambanivolonay tan̈y gazety jiaby in̈y. Ten̈a namparavoravo iro raha nivakindro tao. Iro nivolan̈a fa tiandro hanjary Vavolombelon̈o Jehovah. Fa iro misy fan̈ontanian̈a. Ohatra, izikoa iro atao batisa, iro tsy maintsy ajibiky an̈aty rano? Kanefa tsisy ten̈arano man̈odidin̈y zahay aty. Zahay ma mila man̈aton̈o anaro an̈y izikoa hatao batisa?” Iro pitory nikoran̈a tamy lelahy io nampifandray lelahy io tamy pisava lalan̈a mahay volan̈anany io. Nanomboko tio iro manohy mikoran̈a fo.

 Ten̈a mankahery mahita fa fitaovan̈a io ampiasain̈y hitorian̈a “amy firenena jiaby ambony tany!” (Matio 24:14) Akory avitan̈a man̈amboatra fitaovan̈a fampirantian̈a io? Nohony fan̈amezan̈a nataonaro hanohanan̈a asa man̈erantany baka tamy donate.ps8318.com. Mankasitraka anaro zahay fotony anaro tia man̈amia.