AZA VÔLY MIAMBIN̈Y!
Nan̈ino ma Olombelon̈o Tsy Mahavita Mampijanon̈o Ady?—Ino Raha Koran̈in’ny Baiboly Momba Zen̈y?
Na mpitondra na fikambanan̈a iraisam-pirenena samby tsy mahavita mampijanon̈o ady. Ady amy ziôty mbala misy mareren’ny ady jiaby tafaran’ny Ady Lehibe II. Mandeha aroe arivo tapitrisa olo mipetraka amy toeran̈a misy ady karaha zen̈y, dikan’izen̈y ampahefatran’olo ambony tany.
Nan̈ino ma olombelon̈o tsy mety mahavita mampijanon̈o ady? Ino raha koran̈in’ny Baiboly momba zen̈y?
Misy antony telo mahavy olombelon̈o tsy mahavita mampijanon̈o ady
1. Baka amy toetrindrô fo mahavy olombelon̈o tsy mahavita man̈ano raha hisian’ny fiadan̈ana. Baiboly nivolan̈a fa amy ziôty ‘olo tia ten̈a, tia vola, sarotiny, man̈ambony ten̈a, ... tsy men̈atra mivadiky, ... tsy mety hifan̈arahan̈a, ... tsy mahafehy ten̈a, masiaka mare, ... mierin̈y olo, poerapoera.’—2 Timoty 3:2-4.
2. Na olo araiky na olo maromaro, samby tsy mahavita mamaha prôblemo izikoa tsy ampian’i Jehovah a Zan̈ahary niasa raha jiaby. Baiboly man̈ambara fa “olombelon̈o tsy mahay lalan̈a imboany. Olo koa tsy natao hitondra fiain̈ananany manokan̈a.”—Jeremia 10:23.
3. Satana Devoly mamehy donia ty. Izy mpitondra ratsy fan̈ahy salakady misy angôvo mare aviô “mamitaka tany jiaby misy olo.” (Apokalypsy 12:9) Izikoa donia ty mbala “ambany fahifan̈an’ny araiky ratsy in̈y” fo, ady ho hisy fo.—1 Jaona 5:19.
Azôvy afaka hampijanon̈o ady?
Baiboly man̈amia toky atsika fa tsy maintsy ho hisy fiadanan̈a. Zan̈ahary han̈ano zen̈y fa tsy olombelon̈o.
“‘Haiko tsarabe raha efa niritriretiko hatao aminarô’, volan̈in’i Jehovah. ‘Zaho mieritreritry han̈amia anarô fiadan̈ana fa tsy antambo, baka anarô hanan̈a hoavy tsara ndreky fan̈antinan̈a.’”—Jeremia 29:11.
Akôry fomba han̈atantirahan’ny Zan̈ahary fampan̈antinan̈anany zen̈y? “Zan̈aharin’ny fiadan̈ana hanôrotôro Satana.” (Romanina 16:20) Misy fanjakan̈a araiky an-dan̈itry kahian̈a “Fanjakan̈an’ny Zan̈ahary,” izio hampiasain’ny Zan̈ahary hampisy fiadanan̈a eran-tany. (Lioka 4:43) Jesosy Kristy Mpanjakan’ny Fanjakan̈a io. Olo hindesiny jiaby samby hampianariny hahay hiaraka hiain̈y am-pilaminan̈a.—Isaia 9:6, 7.
Izikoa anao tihahita sôsoko fan̈azavan̈a, vakia lahatsoratra “Inona no Hataon’ny Fanjakan’Andriamanitra?”
a Jehovah io an̈aran̈an’ny Zan̈ahary.—Salamo 83:18.
Mety ho Tianao Koa
FAMPIANARAN̈A FOTOTRO AMY BAIBOLY
Karakory ma Fanjakan̈any Zan̈ahary Zen̈y?
Tamy Jesosy tambony tany teto, raha momba Fanjakan̈any Zan̈ahary io raha ten̈a nampianariny. Rango efa ela, pianatranany mivavaka haviany Fanjakan̈a io.
RAHA MOMBA ZAHAY
Mangataka Vangian̈a
Miaraha mandiniky fan̈ontanian̈a amy Baiboly aminay, na mianara raha maromaro momba Vavolombelon̈o Jehovah.
