Asa anao mba an̈isandro olo antapitrisany niatriky fivoavoany toetrandra? Ten̈a ratsy izio fotony mandrobadraha mare. Maro fomba mety iboahanizen̈y. Iô tsiko miaro mahalen̈y maresaka be aby in̈y, avio sikilony matetiky mitondra mahalen̈y be mahavy tany maro dobondrano. Maro raha robaka indesiny tsiko be io. Mety ho hisy tany mitotro azony mahalen̈y be io, avio tselabaratra aby io mety hampirehitry atiala. Haintany, hafanan̈a man̈oro, avio tsiko miaro lanezy io koa ten̈a mandrobadraha mare.

 Amy faritry maro erantany, mahaimatetiky misy fo iro antambo aby io salakady mahaisarotro fo koa. Federasion iraisampirenenany Sosieteny Croix Rouge ndreky Croissant-Rouge nivolan̈a karaha ty: “Mahaimaro fo olo tatrany antambo aby io. Arakarakany mahamaro tondrandrano, sikilony ndreky haintany, mahaimaro fo koa olo maty, robaka velonten̈a, avio antapitrisany olo mifindra tanàna isaka taon̈o.”

 Izikoa misy antambo, olo mijaly mare. Tsy vatan̈a fo mijaly fa fô koa. Mety tsy afaka an̈aty jerindro foeky fanan̈anandro ravan̈a in̈y, iro nanjary tsisy tran̈o, na koa iro naty havan̈a.

 Izikoa anao nijaly vokatrany antambo baka amy fivoavoany toetrandra, Baiboly io afaka man̈ampy anao hahavita hiatriky zen̈y. Izio afaka mankahery anao, man̈amia fan̈antinan̈a, salakady man̈amia torohevitry tsara. Maro olo efa nampiany Baiboly io. (Romanina 15:4) Izio koa mamaly fan̈ontanian̈a maventy manahirantsain̈y olo maro: “Nan̈ino ma Zan̈ahary man̈ambela raha karaha io mandalo? Izy ma man̈asazy zaho?”

 Baiboly mampianatra fa jaly mavoa atsika io tsy baka amy Zan̈ahary. Izio man̈amia toky atsika fa “Zan̈ahary tsy mety atao ratsy, sady izy koa tsy man̈ano ratsy olo foeky na azovy izy na azovy.” (Jakoba 1:13) Dikanizen̈y, tsy baka aminany mahavy antambo misy izioty io.

 Baiboly mitantara fa nisy fotoan̈a Zan̈ahary nampiasa angovony natira nan̈asazian̈a olo ratsy fan̈ahy. Fa raha aby io tsy mira amindro antambo amy zioty. Antambo aby io baka tsy man̈onkon̈o foeky izikoa fa avy, sady na olo ratsy fan̈ahy na tsara fan̈ahy samy takanizio aby. Fa tantara amy Baiboly ao ndraiky ahitan̈a fa izikoa Zan̈ahary fa han̈ano raha, izy tsy maintsy mampitandrin̈y tsialohaloha fo, avio ambarany ino antony mahavy izy man̈ano izio. Salakady arovany fo olo tsara fan̈ahy. Nivolan̈iny, ohatra, ino antony nahavy izy nandefa Safodrano taminy andrany Noa in̈y, baka io izy koa efa nandefa fampitandreman̈a tsialohaloha, avio narovany Noa ndreky fianakavian̈anany.​—Genesisy 6:13; 2 Petera 2:5.

 Izikoa tianao ho hay akory ahaizan̈a fa tsy sazy baka amy Zan̈ahary antambo misy aminy andra zioty io, zahava lahatsoratra “Inona no Lazain’ny Baiboly Momba ny Loza Araka ny Natiora?”

 Ambarany Baiboly amintsika fa Jehovah a io Zan̈ahary tia olo ndreky mahinakinaka olo. Ty misy toko sy andininy mankahery:

•   Isaia 63:9: ‘Nampijaly Zan̈ahary jaly jiaby nahazo olonany aby io.’

   Dikanizen̈y: Mampalahelo Jehovah mahita olo mijaly.

•   1 Petera 5:7: “Izy mikarakara anaro.”

   Dikanizen̈y: Jehovah miasaloha aminao.

 Fitiavany Jehovah ndreky fahinakinahany atsika io mandrisiky izy han̈ano raha. Mampiasa Baiboly izy hankahirezan̈a atsika. Ao izy man̈amia torohevitry mahomby ndreky fan̈antinan̈a azo antoko momba ny amaray. Izio hoavy araiky efa tsisy antambo zen̈y eky.​—2 Korintianina 1:3, 4.

 Baiboly mivolan̈a fa Jehovah mampan̈anten̈a han̈amia anao “hoavy tsara ndreky fan̈antinan̈a.” (Jeremia 29:11) Fikasan̈anany, olo hankafy fiain̈ana amy paradisa ambony tany, fa efa tsy havozo tsao hiova tampoko toetrandra.​—Genesisy 1:28; 2:15; Isaia 32:18.

 Zan̈ahary hampiasa Fanjakan̈anany mba han̈antantirahan̈a hoavy tsarabe zen̈y. Izio fanjakan̈a araiky andan̈itry an̈y, indesiny Jesosy Kristy. (Matio 6:10) Jesosy manan̈a fahendrena ndreky angovo hisakanan̈a fisiany antambo. Taminizy tambony tany teto, naboakany fa izy manan̈a angovo mahakomandy angovony natira. (Marka 4:37-41) Izy hendry sady mahay raha mare, ke izy hampianatra olombelon̈o karakory atao miaro tontolo iain̈ana, baka izio tsy ho robaka. (Isaia 11:2) Lera Jesosy mitondra, efa tsy ho hisy eky antambo hampijaly olo zen̈y.

 Fa anao mety han̈ontany: “Ombian̈a ma Jesosy hampiasa angovonany hikomanden̈a angovony natira?” Hamalian̈a fan̈ontanian̈a zen̈y, zahava lahatsoratra: “Rahoviana ny Fanjakan’Andriamanitra no Hitondra ny Tany?”

 Torohevitry amy Baiboly ao afaka man̈ampy anao alohany hisiany antambo, lera izio avy, ndreky afaranizio.

•   Alohany hisiany antambo: Miomàn̈a han̈ano raha malaky.

   Raha volan̈iny Baiboly: “Olo misain̈y koa fa mahita raha mety hamono, izy miary. Fa olo matify jery ndraiky man̈aton̈o fo ke azondraha.”​—Ohabolana 22:3.

   Dikanizen̈y: Diniha ino aby antambo mety handalo amy faritry misy anao, amy zen̈y anao afaka man̈ano raha malaky ndreky miaro fianakavian̈anao.

   Fitantaran̈a: “Izikoa fa nirehitry atiala ke zahay tsy maintsy nilefa, zahay efa nan̈ano pare. Zahay efa nanan̈a saka misy raha ten̈a ilain̈a. Efa nataonay pare tao aody ndreky lamba. Olo jiaby nan̈odidin̈y zahay tio nialamboetry, tsy haindro raha samborin̈y. Fa zahay ndraiky efa nanan̈a raha ten̈a nilainay. Ravoravo mare zaho!”​—Tamara, Californie, a Etazonỳ.

•   Amy lerany antambo avy: Mifantoha amy raha ten̈a maventy.

   Raha volan̈iny Baiboly: “Ndray olo manandraha karakory, fanan̈ananany io tsy mahatana fahin̈ananany.”​—Lioka 12:15.

   Dikanizen̈y: Fahin̈ana ten̈a valera tozay fanan̈ana.

   Fitantaran̈a: “Tran̈onay izikoa fa ravan̈a Sikilony Lawin b in̈y, zaho sahirantsain̈y, tsy haiko raha atao. Ke raha nataoko, zaho nivavaka mare tamy Zan̈ahary Jehovah. Safe nanjary azoko onon̈o fa fanan̈ananay fo ravan̈a fa tsy fahin̈ananay.”​—Leslie, a Philippines.

•   Afarany isiany antambo: Niany fo zahava fa aza miasalohany amaray.

   Raha volan̈iny Baiboly: “Anaro aza miasaloha aminy amaray foeky, fa amaray koa mahita izy.”​—Matio 6:34.

   Dikanizen̈y: Aza miasaloha amy raha hiboaka amaray.

   Fitantaran̈a: “Dobondrano tran̈onaka, tafarany sikilony Irma in̈y. Maro fanapahankevitry tsy maintsy nataoko, ke zaho sahirantsain̈y. Zaho nifen̈y nan̈araka torohevitry Baiboly, mieritreritry ny niany fo. Baka tamy fan̈ampiany Jehovah nahavitako niatriky raha mandilatrany niritriretiko.”​—Sally, Floride, a Etazonỳ.

 Izikoa tihahita torohevitry maromaro, zahava lahatsoratra “Inona no Azo Atao mba ho Voaro Amin’ny Loza?.”