Fan̈amezan̈a antsitrapo amiany Vavolombelon̈o Jehovah fo mampandeha asa fitorian̈a ataonay. Zahay tsy man̈ano tanty rakitry izikoa fa mivory. Zahay koa tsy tiren̈y han̈ano ampahafolo. (Matio 10:7, 8) Isaka tany fivorianay, misy boaty andatsahan̈a zay vola tindry. Tsy tonon̈iny an̈aranolo mandatsaka vola ao.

 Zahay tsy lany vola be, fotony aminay tsisy pitondra fivavahan̈a karamain̈y. Vavolombelon̈o Jehovah jiaby mitory io koa tsy karamain̈y. Tran̈o fivorian̈a amboarinay koa tsotra.

 Vola jiaby azonay, alefa amy birony sampan̈a Vavolombelon̈o Jehovah. Izio ampiasain̈y han̈ampian̈a olo amy tany nandalovany antambo, misionera ndreky pitory pitety faritany, hiasan̈a tran̈o fivavahan̈a amy tany andalampandrosoan̈a, ndreky han̈anovan̈a Baiboly ndreky boky momba Baiboly.

 Amy fan̈amezan̈a io misy atokan̈a ikarakaran̈a fiangonan̈a antoeran̈a, misy koa ikarakaran̈a asa erantany. Anjarany tsiaraikiaraiky manapakevitry, na izy han̈ano aminy araiky amindro io, na izy hanohan̈a iroroe io. Ambara fiangonan̈a fo vola misy ao, baka olo jiaby ao mahay raha ampiasan̈a izy.