Nûa támaa daâ kpera liî ɣâla pɛ́rɛ mu kpɛ́ni fêi, dífa lia-woo lɛ́lɛɛ sɔlɔ ɓó naa da ŋa-nɛnɛ. Kɛ́lɛ nyaŋ, lé mɛni ɓé nɛ́lɛɛi la à gɛ́ɛ I lí Ziova Ŋɔsêre-faa kɛ́-ɓelai díkoyâŋ-ŋai su? Lé mɛni lɛ́lɛɛ ɓé ya pâi zɔlɔ ɓói naai?

Ya pâi lii-nɛ̃ɛ sɔlɔ ɓói wɛli-kɛ-maa-ɓela sáma. Zia-ɓelai dítãi ma, Kôrai-pôlu-ɓelai díkɛ a dí ŋa kɔlɛ kôrai-toli-kpɔŋ-ŋai su. Nyaŋ kôrai-toli-kpɔŋ-ŋai kélee da káa koyâŋ too à gɛ́ɛ dí ɣâla mɛni maa-kɔ́ri, dí Ɣâla láa maa tɛ́, dí díkîe-ni fɔrɔ máŋ naa-lai su. (Ibulu 10:24,25) Da díŋá-tɛ́ díkîe ma a wɛli-kɛ-maa pere kɛ́ɛ ŋí, gɛ̀ ní, da gɔ́lɔŋ à gɛ́ɛ díwɛli-kɛ-maa ɓela káa ma—díɓarâŋ Kôrai-ɓelai. (2 Tɛsɛloniɛŋ 1:3; 3 Zɔ̂ŋ 14) Bere nɔ́ ɓé kwa kúkoyâŋ-ŋai too la, nyaŋ kwa lii-nɛ̃ɛ támaa sɔlɔ ɓó máŋ yɛ̂ɛ dia.

Ya pâi berei maa-kɔ̂rii ya pɔri Ŋâla-kɔlɔi ŋɔtɔ̂ŋ-ŋai dûa kɛ́i la. Yɛ̂ɛ berei Ŋâla-kɔlɔi è mò la wɔlɔ-wɔlɔ tí kɛ́i, sinâa, nɛyâa da nî̃a-pɛlɛɛ da káa díŋá-tɛ́ díkîe ma Ɣâla mɛni maa-kɔ̂rii. Bere nɔ́ ɓé kwa gɛ la sâa. Zinâa nyii-ŋai sɛŋ lɛ́ pere kɔ́lɔŋ a nɛ́lɛɛ, da Ŋâla-kɔlɔi ŋá-lɛ́ kwa da berei kwa pɔri siai la a Ŋâla-kɔlɔi wóo ɣele kélee. (Dutɛrɔnome 31:12; Niɛmaya 8:8) Núu kélee a pɔri kúɣâla-wulei ta tooi; ǹúui kélee a ŋwɛ̂li a pɔri m̀arê-kɛ́i ta sukulai, m̀arê-kɛ́i da zukula tãi ma. Nyíŋi a gɛ̀ kú lóno é pîlaŋ gili-kɛ-zui kúyéeì ma.—Ibulu 10:23.

Ílaa-lai su a pâi kpananii. Zia-nuui Pɔ̂ɔ è wɔlɔ mò Kôrai-toli-kpɔŋ dɔnɔ ma nyɛɛi: “ŋa ŋ̀wɛ̂lii kpɔ́ à gɛ́ɛ ŋá kákaa . . . à gɛ́ɛ kú kúkîe-ni ŋá nɛnɛ a kúlaa-lai, ká wɔi é pɛ́lɛ ŋ̀wɔi ma.” (Lomaŋ 1:11,12) Tɔ̃yâ ma, kwa pa goyâŋ su a tãi kélee, kúɓarâŋ kôrai-ɓelai dílaa-lai a kú wɔi laa-lai su kpanáŋ; dí kúkili kpanáŋ à gɛ́ɛ kú tɔ́ɔ a gbanaŋɔɔ dɔ̃yâi su.

Kwa ŋwɛ̂lii I pa kúkoyâŋ su nɔ́ɔ-kuui ŋí su, à gɛ́ɛ I m̀ɛni lɛ́lɛɛ-ŋai ŋí káa yá kpîŋ. Kúlii a pâi nɛ̃ɛi à gɛ́ɛ kú I káa, nyaŋ kwa pâi kúyée seei ímu. Kúkoyâŋ-ŋai kélee lá ɓoɔi núu kélee mi. E tee nyíti ma, ífa kâpa kpɛɛ I lɛɛ pâi lɔi naa—pɛ̂nɛ pu mɛni fé naa.

• Gbɛ̂ɛ-ni ɓé kwa dí pɔ́ɔ-kɔɔŋ kúkoyâŋ too pere mai?

• Lé mɛni lɛ́lɛɛ ɓé kwa pɔri zɔlɔ ɓói kwa li kúkoyâŋ-ŋai su?