Ngosi kapena yakusawusya yine yatukusasimana nayo yikusakwaya umi wetu m’matala gejinji.

• Yindu yakogoya payitendekwe ŵandu akusalagasika nganisyo. Jemanjaji pakulagasika nganisyo kwa ndaŵi jelewu yakuyichisya yakwe akusalwala.

• Ulwele pawusawisye yikusaŵa yakusawusya kuti ŵachipatala ŵasamalile chenene ŵakulwala. Yili myoyo ligongo lyakuti jemanjaji akusasosekwa kwakamuchisya ŵandu ŵajinji pandaŵi jimo soni ngakusakola mtela wakwanila.

• Ngosi pasitendekwe ŵandu akusasoŵa mbiya, yayikusatendekasya kuti alepeleje kusuma yindu yakusosekwa mnope mpela yakulya kapena mtela.

• Naga akulwala ulwele wekulungwa soni akulagasika nganisyo mpaka alepeleje kuganisya chenene. Yeleyi mpaka yatendekasye kuti alepeleje kutenda yindu yakusosekwa mnope paumi wawo. Yakuyichisya yakwe mpaka alwaliche mnope.

• Naga akuwulechelela ulwele wakulwala ngawupatila mtela, ulwelewo mpaka ukule soni umi wawo mpaka uŵe pangosi.

• Naga akwete chilu chambone yikusaŵaga yangasawusya kusagula yindu chenene pasimene ni yakogoya.

• Chinga ali ŵakusichila kapena ŵakulaga mpaka akombolepe kuchisamalila chilu chawo.

Naga yakomboleka, mundu jwalunda akusamanyilila yakogoya soni akusatendapo kandu kuti ayiŵambale. Mpaka atende yeleyisoni pangani jakusamalila chilu chawo. Ndaŵi syejinji mpaka aŵambale ulwele naga akuŵa ŵachasa. Ligongotu kuli chenene kuyiŵambala yindu kulekangana ni kutendapo kandu mesi gali gayiche mlukosi.

“Patukulingalinga kuŵa ŵachasa ni kusamalilaga chenene pamlango petu, tukusaŵambala konanga mbiya syakulipilila ku chipatala.”—Jwaŵechete myoyo Andreas. a