Naga tukusaganisyaga kuti m’weji tuli ŵakulekangana ni ŵane, mpaka tutande kuyiwona yakulepela ya ŵandu ŵanewo. Yakuyichisya yakwe, mpaka tutande kwawona jemanjaji kuti ali ŵakutuluka. Naga tukukusya mtima welewu mpaka yiŵe yakusawusya kola mtima wakwaganichisya ŵane. Yeleyi mpaka yitendekasye kola mtima wa lusagu.

“Msengwe ni ŵali mkusengwa, mlile pampepe ni ŵali mkulila.”—ALOMA 12:15.

Ana tukulijiganya chichi palilembali? Fundo jajili palilembali jili jakuti tukusosekwa kwaganichisya ŵane. Kwaganichisya ŵane kuli kulipikana mpela mwakupikanila mundujo.

Naga tukusamganichisya mundu jwine, tukusamanyilila kuti tuli ŵakulandana ni mundujo. Tukusamanyililaga kuti mwatukusapikanila mumtima soni katende ketu kayindu kali kakulandana. Kwaganichisya ŵane kukusatukamuchisya kumanyilila kuti wosopewe tuli ŵampepe. Naga tukusitwawona ŵanduwo kuti ali ŵakulandana ni m’weji, ngasitutanda kwawona mwakulemwecheka.

Kwaganichisya ŵane kuchitukamuchisyasoni kuti twachimbichisyeje. Anne-Marie, jwa ku Senegal, ŵawuwonaga mtundu winewakwe wa ŵandu kuŵa wakutuluka. Kwaganichisya ŵane kwamkamuchisye jwalakwe. Anne-Marie jwatite, “Panawonaga ŵandu ŵamtunduwo ali mkulaga naliwusisye kuti, Ana yakusimana nayo jemanjaji pakulaga yikaŵe kuti ndili uneji ngapikene wuli mumtima. Yeleyi yangamuchisye kumanyilila kuti unejo nganimba jwapenani kwapunda jemanjajo. Pangali chinatesile chachangamuchisye kuti mbe pambone kwapunda jemanjajo.” Naga tukusalingalinga kupikanichisya yakusawusya yakusimana nayo ŵane, tuchitendaga yindu yakwaganichisya jemanjajo mmalo mwakwanyosya.

Naga akusawuwona mtundu wine wa ŵandu kuŵa wakutuluka alinjeje kupata yindu yambone ya mtunduwo. Mwachisyasyo, aganichisye mwakusapikanila ŵandu ŵa mtunduwu pakutenda yakuyichisyayi:

• pakulya yimpepe ni maŵasa gawo

• pamalisisye kamula masengo gakupesya

• pakukunguluka ni achimjawo

• pakupikanila nyimbo syawo syakusasinonyela

Kaneko, alinje kuganichisya wawojo ali mundamo mpela ja jemanjajo. Aliwusye kuti:

• ‘Ana mpaka mbikane wuli naga ŵandu ŵane akumbona mpela jwangali mate?’

• ‘Ana mpaka mbikane uli naga ŵane akumbona mwakulemwecheka ali ngakumanyilila ata panandi?’

• ‘Yikaŵe kuti ndili jwa mtundu welewu, ana nganonyele kuti ŵandu ŵane amboneje wuli?’