NGANI JAKULIJIGANYA 35
NYIMBO NA. 123 Tupikanileje Mwakulupichika Mwakusajendechesya Yindu Yehofa
Yampaka Atende Achakulungwa Pakwakamuchisya Ŵandu Ŵatyosyedwe Mumpingo
“Kwinani kuchiŵasoni chisangalalo chekulungwa ligongo lya jwakulemwa jumo jwagalawiche mtima kulekangana ni ŵandu 99 ŵakulungama ŵele ngakusosekwa kugalawuka mtima.”—LUK. 15:7.
CHAKULINGA CHA NGANIJI
Chitulole ligongo lyakwe ŵandu ŵane akusasosekwa kwatyosya mumpingo soni yampaka atende achakulungwa pakwakamuchisya jemanjaji kuti agalawuche mtima nambosoni kuti aŵe paunasi wambone ni Yehofa.
1-2. (a) Ana Yehofa akusiŵawona chamti uli ŵandu ŵatesile ulemwa wekulungwa soni ŵanganagalawuka mtima? (b) Ana Yehofa akusajembecheya chichi kwa ŵandu ŵatesile ulemwa wekulungwa?
YEHOFA jwangasechelela ndamo jilijose. Jwalakwe akusaŵengana mnope ni ulemwa. (Sal. 5:4-6) Mwamti jwalakwe akusasaka kuti tupikanileje malamusi gakwe gagakusasimanikwa m’Baibulo. Nambotu, Yehofa jwangajembecheyaga kuti ŵandu ŵangali umlama atendeje yindu mpela ŵandu ŵamlama. (Sal. 130:3, 4) Nambosoni, jwalakwe jwangasangalalaga ni ŵandu ŵangakusamjogopa ŵakusajigala umbone mtima wakwe wekulungwa kuŵa ‘ligongo lyakutendela ndamo syakulijasilila.’ (Yud. 4) Ni ligongo lyakwe Baibulo jikusasala ya lisiku lyakwajonanga ŵandu ŵangampikanila Mlungu pa ngondo ja Alamagedo.—2 Pet. 3:7; Chiw. 16:16.
2 Nambotu, Yehofa jwangasaka kuti mundu jwalijose ajonanjidwe. Mpela mwatulijiganyichisye mu ngani sipite sila, jwalakwe “akusasaka kuti wosope agalawuche mtima.” (2 Pet. 3:9) Achakulungwa ŵa mumpingo akusamsyasya Yehofa mwakutenda yindu mwakuwusimana mtima soni mwachinonyelo pakumkamuchisya mundu juŵatesile chakulemwa kuti aŵesoni paunasi wambone ni Yehofa. Nambope, ndaŵi sine mundu jwatesile chakulemwa chekulungwa mpaka alepele kugalawuka mtima. (Yes. 6:9) Ŵane akusapitilisyape kutenda yakusakala, atamose kuti achakulungwa ŵa mumpingo ŵakamuchisye mwakuwilisyawilisya kuti agalawuche mtima. Ana achakulungwa akusasosekwa kutenda chichi payitendekwe yeleyi?
“MUMTYOSYE MUNDU JWAKUSAKALAJO”
3.(a) Mwakamulana ni yajikusasala Baibulo, ana achakulungwa ŵa mumpingo akusasosekwa kutenda yamti uli ni mundu jwangagalawuka mtima? (b) Naga mundu ngakugalawuka mtima, ligongo chichi mpaka tujile kuti asagwile jika kuti atyosyedwe mumpingo?
3 Naga mundu juŵatesile chakulemwa chekulungwa ngakugalawuka mtima, achakulungwa ŵa mumpingo akusasosekwa kukuya malangiso gagakusasimanikwa pa 1 Akolinto 5:13. Malangisoga gakusasala kuti, “Mumtyosye mundu jwakusakalajo pasikati penu.” Mundu jwatesile chakulemwa chekulungwa akusamanyilila kuti naga ngakugalawuka mtima chatyosyedwe mumpingo. Mwamti payitendekwe yeleyi, mpaka tuŵechete kuti mundujo agowele yajwapandile. (Agal. 6:7) Tukuŵecheta yeleyi ligongo lyakuti jwalakwejo alepele kupikanila malangiso gakuwilisyawilisya gaŵampaga achakulungwa gakumkamuchisya kuti agalawuche mtima. (2 Ayi. 17:12-15) Mwamti yitendo yakwe, yikusalosya kuti jwalakwejo asagwile kuti akapikanila malamusi ga Yehofa.—Det. 30:19, 20.
4. Ligongo chichi pakusapelechedwa chimanyisyo mundu jwakulemwa jwangagalawuka mtima patyosyedwe mumpingo?
4 Mundu jwakulemwa jwele ngakugalawuka mtima patyosyedwe mumpingo, pakusapelechedwa chimanyisyo chakusala kuti jwalakwejo nganaŵasoni jwa Mboni sya Yehofa. Chakulinga cha chimanyisyochi changaŵaga kumtesya sooni jwakulemwajo. Mmalomwakwe, chimanyisyochi chikusapelechedwa pakusaka kwakamuchisya abale ni alongo kukuya malangiso ga m’Malemba gakuti “mleche kukamulana” ni mundu jwelejo, “atamose kulya mkalya najo.” (1 Akoli. 5:9-11) Pana magongo gambone gaŵapelechele Yehofa malangisoga. Ndumetume Paulo jwalembile kuti, “Chakusasaŵisya chamnono chikusasasaŵisya mtanda wosope.” (1 Akoli. 5:6) Mundu jwakulemwa jwangakugalawuka mtima, mpaka jwasokonasye Aklistu ŵane ŵakulingalinga kukuya malamusi ga Yehofa gakulungama.—Mis. 13:20; 1 Akoli. 15:33.
5. Ana tukusosekwa kumwona chamti uli mundu juŵatyosyedwe mumpingo? Ligongo chichi tukusosekwa kumwona myoyo?
5 Nambo ana tukusasosekwa kumwona chamti uli mundu jwatyosyedwe mumpingo? Atamose kuti ngatukusasosekwa kunguluka ni munduju, tukusasosekwa kumwona mpela ngondolo jesokonechele. Naga ngondolo jisokonechele mpaka yikomboleche kuwujilasoni. Tukumbuchileje kuti mundujo jwalipeleche kuti amtumichileje Yehofa. Nambo chakutesya chanasa chili chakuti jwalakwejo ngakutenda yindu mwakamulana ni chilanga chajwatesile yayitendekasisye kuti umi wakwe uŵe pangosi. (Esek. 18:31) Nambope, ligongo lyakuti mundujo akwete ndaŵi soni Yehofa ali jwakusachilila kumtendela chanasa, tukusajembecheya kuti lisiku line mpaka awujile. Sano, ana achakulungwa mpaka apeleche chamti uli chembecheyochi kwa mundu jwakulemwa juŵatyosyedwe mumpingo?
YAMPAKA ATENDE ACHAKULUNGWA PAKUMKAMUCHISYA MUNDU JWATYOSYEDWE MUMPINGO
6. Ana achakulungwa akusasosekwa kutenda chichi pakusaka kumkamuchisya mundu jwatyosyedwe mumpingo?
6 Ana achakulungwa akusosekwa kumleka mundu jwatyosyedwe mumpingo kuti alikamuchisye jika kuwujila kwa Yehofa? Jemanjaji ngakusosekwa kutenda yeleyi. Achakulungwaŵa pakummanyisya mundu jwangagalawuka mtima kuti chatyosyedwe mumpingo, akusosekwa kumsalilasoni yindu yosope yakusosekwa kutenda kuti chawujile. Nambope, panasoni yindu yine yampaka atende achakulungwaŵa. Jemanjaji mpaka amsalile jwakulemwajo kuti chachiwonegana najo panyuma pa miyesi jakuŵalanjika kuti chalole naga juchenjile ndamo syakwe. Naga mundujo akundile kusimana ni achakulungwawo panyuma pa miyesi jakuŵalanjika, jemanjajo chachilingalinga kumlimbikasya mundujo kuti agalawuche mtima ni chakulinga chakuti awujile mumpingo. Atamose yili yisimanikwe kuti mundujo nganaŵepe kuchenga pandaŵijo, achakulungwawo akusosekwa kulinganya yakupitilisya kulumbikana najo ni chakulinga chakuti amlimbikasye kuti agalawuche mtima.
7. Ana achakulungwa mpaka alosye chamti uli chanasa cha Yehofa pakumkamuchisya mundu juŵatyosyedwe mumpingo? (Yelemiya 3:12)
7 Achakulungwa akusasosekwa kumsyasya Yehofa mwakulosya chanasa pakutenda yindu ni mundu jwatyosyedwe mumpingo. Mwachisyasyo, Yehofa nganajembecheyaga kuti Ayisalayeli atande kutendapo kandu jwalakwejo mkanaŵe kwakamuchisya. Mmalomwakwe, jwatandaga kwakamuchisya mwachitema atamose yili mkuti nganalosya chimanyisyo chilichose chakuti agalawiche mtima. Mpela mwatwayiwonele mungani jaŵili jakulijiganya jajili m’magasini ajino, Yehofa jwamsalile jwakulochesya Hoseya kuti ŵakululuchile ŵamkwakwe atamose kuti ŵapitilisyaga kutenda yakusakala. Nganiji jikusatukamuchisya kumanyilila kuti Yehofa akusiŵalosya chanasa chekulungwa ŵakutumichila ŵakwe. (Hos. 3:1; Mala. 3:7) Achakulungwa pakumsyasya Yehofa, akusalingalinga kumkamuchisya mundu juŵatesile ulemwa wekulungwa kuti awujile mumpingo. Konjechesya pelepa, jemanjaji akusatenda yakuti mundujo akayiwona kuŵa yakusawusya kuwujila mumpingo.—Aŵalanje Yelemiya 3:12.
8. Ana ngani jaŵasasile Yesu jakwamba mwanache jwamsokonechele jikusalosya chamti uli chinonyelo soni chanasa chakwete Yehofa? (Luka 15:7)
8 Aganichisye ngani jaŵasasile Yesu jakwamba mwanache jwamsokonechele jatwakambilene mungani jakulijiganya jaŵili jila. Babagwe mwanache jula paŵam’weni ali mkuwujila, ŵamwutuchile ni kumkumbatila mwachinonyelo. (Luk. 15:20) Chakusangalasya ni nganiji chaliji chakuti babagwe ŵala nganajembecheya kuti mwanachejo jwaŵende kaje kuti amkululuchile. Mmalomwakwe babagwewo ŵamwutuchile mwanachejo ligongo lyakuti ŵamnonyelaga. Mwakulandana ni yeleyi, nombe achakulungwa akusosekwa kutenda yampaka akombole pakumkamuchisya mundu jwasokonechele. Jemanjaji akusasaka kuti ŵandu ŵaŵalesile kumtumichila Yehofa awujile kwa jwalakwe. (Luk. 15:22-24, 32) Mwamti kwinani kukusapagwa chisangalalo chekulungwa mundu jwakulemwa pawujile kwa Yehofa. Nombe mpingo wosope ukusasangalalasoni.—Aŵalanje Luka 15:7.
9. Ana Yehofa akwaŵenda kutenda chichi ŵandu ŵaŵatesile ulemwa wekulungwa?
9 Kutyochela pa yindu yatugambile kambilana kweneyi, tuyiweni kuti Yehofa jwangasakaga kuti ŵandu ŵakulemwa ŵangakugalawuka mtima apitilisye kuŵa mumpingo. Nambope, jwalakwe akusapitilisya kwakamuchisya jemanjaji kuti awujile. Pa Hoseya 14:4 pakusasala mwakusapikanila Yehofa mundu jwakulemwa pagalawiche mtima. Lilembali likusati, “Tinjiyika nawo ŵandu ŵangu kwa une. Tinjanonyela ni mtima wangu wosope, soni ngasinatumbilila jemanjajo.” Kumanyilila yeleyi kukusikwakamuchisya achakulungwa ŵa mumpingo kulola yiliyose yakulingalinga kutenda mundu kuti agalawuche mtima. Konjechesya pelepa, maloŵega mpaka gakamuchisye ŵandu wosope ŵaŵalesile kumtumichila Yehofa kumanyilila kuti jwalakwejo akupitilisyape kwanonyela soni kuti akusaka kuti jemanjajo awujile mwachitema.
10-11. Ana achakulungwa ŵa mumpingo mpaka ŵakamuchisye chamti uli ŵandu ŵaŵatyosyedwe yaka yejinji yipiteyo?
10 Nambi uli pakwamba ya ŵandu ŵaŵatyosyedwe mumpingo mwine yaka yejinji yipiteyo? Komboleka ŵane mwa jemanjaji ngakutendasoni ulemwa wawatendekasisye kuti atyosyedwe mumpingo. Kombolekasoni kuti ŵayikene pakuliŵalila chichatendekasisye kuti atyosyedwe mumpingo. Mulimose mwampaka yiŵele, achakulungwa akusasosekwa kwajendela ŵandu ŵeleŵa. Achakulungwaŵa pasimene ni jemanjaji mpaka apopele nawo yimpepe soni kwalimbikasya kuti awujile mumpingo. Yisyene kuti naga papitile yaka yejinji kutyochela pajwatyosyedwe mumpingo mundujo, jwalakwejo mpaka aŵe jwangalimba mwausimu. Myoyo, naga mundujo alosisye kuti akusaka kuwujila mumpingo, achakulungwawo mpaka alinganye yakuti mundu jwine amjiganyeje Baibulo atamose mkanawe kuwujila mumpingo. Nambope, achakulungwa ŵa mumpingope ni ŵakusosekwa kulinganya dongosolo ja kulijiganya Baibulo ni ŵandu mpela ŵeleŵa.
11 Achakulungwa ŵa mumpingo pakulingalinga kusyasya chanasa cha Yehofa, chachitenda yampaka akombole pakwakamuchisya ŵandu ŵajinji kumanyilila kuti yili yakomboleka kuwujilasoni mumpingo. Naga mundu jwakulemwajo alosisye kugalawuka mtima soni alesile kutenda yakusakala, mpaka awujile mumpingo ndaŵi jijojo.—2 Akoli. 2:6-8.
12. (a) Ana ni yakutendekwa yapi yele achakulungwa ŵa mumpingo akusasosekwa kuŵa ŵakusamala mnope? (b) Ligongo chichi tukusosekwa kuŵambala kuganisya kuti Yehofa nganaŵa ŵatendele chanasa ŵandu ŵatesile ma ulemwa gane gakwe? (Alolesoni maloŵe gamwiŵanda.)
12 Nambope pa yakutendekwa yine, achakulungwa akusasosekwa kutenda yindu mwakusamala mkanaŵe kumwuchisya mundu mumpingo. Yakutendekwa yakwe mpaka yiŵe mpela, kumtendela ngasa mwanache, kuŵa jwa mpatuko, soni kutenda pulani pakusaka kumasya ulombela. Pa yakutendekwa mpela yeleyi, achakulungwa akusasosekwa kusimichisya kuti mundujo agalawiche mtima yisyesyene. (Mala. 2:14; 2 Tim. 3:6) Achakulungwaŵa akusasosekwa kwachenjela abale ni alongo mumpingo. Nambope, tukusasosekwa kumbuchilasoni kuti Yehofa akusaŵa jwakoseka kumpochela mundu jwalijose juŵatesile ulemwa jwagalawiche mtima naga alesile kutenda yakusakala. Myoyo, atamose kuti achakulungwa akusasosekwa kutenda yindu mwakusamala pakwakamuchisya ŵandu ŵatesile maulemwa mpela gelega, jemanjajo akusasosekwa kuŵambala ganisya kuti Yehofa nganaŵa ŵatendele chanasa ŵandu mpela ŵeleŵa ni kuwujila mumpingo. a—1 Pet. 2:10.
YAMPAKA ATENDE ABALE NI ALONGO
13. Ana pana kulekangana kwamti uli pakwamba mwatukusatendela yindu ni mundu jwapochele chamuko soni mundu jwatyosyedwe mumpingo?
13 Mpela mwatwalijiganyichisye mu ngani jipite jila, naga papelechedwe chimanyisyo chakuti mundu apochele chamuko tukusapitilisya kutenda najo yindu yine. Naga yeleyi yitendekwe, mpaka tupitilisye kutenda najo yindu ligongo tukusamanyilila kuti jwalakwejo agalawiche mtima soni alesile kutenda yakusakala. (1 Tim. 5:20) Mundu jweleju akusaŵa kuti ali chiŵela mu gulu ja Yehofa, mwamti akusasosekwa kulimbikasidwa ni Aklistu achimjakwe. (Aheb. 10:24, 25) Nambope, yeleyi yili yakulekangana mnope ni mundu jwatyosyedwe mumpingo. Mundu jweleju ‘tukusaleka kukamulana’ najo ‘atamosesoni kulya, ngatukusalyaga najo.’—1 Akoli. 5:11.
14. Ana Mklistu mpaka asagule kutenda chichi ni mundu jwamtyosyedwe pakamulichisya masengo chikumbumtima chakwe chejiganyidwe chenene Baibulo? (Alolesoni chiwulili.)
14 Ana yindu yatukambileneyi yikugopolela kuti ngatukusosekwa kutenda najo chilichose mundu jwatyosyedwe mumpingo? Iyayi, ngaŵa myoyo. Yisyene kuti ngatukusasosekwa kunguluka ni mundu jweleju. Nambope, Mklistu jwalijose mpaka akamulichisye masengo chikumbumtima chakwe chejiganyidwe chenene Baibulo kusagula kumŵilanjila ku misongano mundu juŵatyosyedwe mumpingo, naga ali jwachibale jwakwe kapena ŵakungulukaga najo munyumamu. Nambi uli naga mundu jwamtyosyedwe ayiche pamisongano ja mpingo? Munyumamu, nganitumkomasyaga mundu jweleju. Nambo apano, Mklistu jwalijose mpaka akamulichisye masengo chikumbumtima chakwe chejiganyidwe chenene Baibulo pakusagula yakutenda pangani jeleji. Ŵane mpaka asagule kumpochela soni kumkomasya mundu jweleju payiche ku misongano ja mpingo. Nambope ngatukusosekwa kunguluka kapena kuŵechetana najo kwandaŵi jelewu mundu jweleju.
Mklistu mpaka akamulichisye masengo chikumbumtima chakwe chejiganyidwe chenene Baibulo pakumŵilanjila ku misongano ja mpingo mundu juŵatyosyedwe, kapena pakumpochela mwakumpa moni wakata munduju payiche ku misongano ja mpingo (Alole ndime 14)
15. Ana pa 2 Yohane 9-11 pakusasala ya ŵandu ŵatesile ma ulemwa gapi? (Alolesoni libokosi lyakuti “ Ana Yohane Soni Paulo Ŵalondesyaga ya Ulemwa Wakulandana?”)
15 Nambope, ŵane mpaka aŵecheteje kuti, ‘Ngati Baibulo jikusasalaga kuti naga Mklistu akumkomasya mundu mpela jweleju nikuti akugaŵana najo masengo gakwe gakusakalago?’ (Aŵalanje 2 Yohane 9-11.) Mfundo ja palilembali jikusasala ya ŵandu ŵa mpatuko soni ŵane ŵakusiŵachisya achimjawo kutenda yakusakala. (Chiw. 2:20) Myoyo, naga mundujo ali jwampatuko kapena akusiŵachisya ŵane kutenda yakusakala, achakulungwa ŵa mumpingo ngakusosekwa kumjendela mundu mpela jwelejo. Yisyene kuti mundu mpela jweleju mpaka agalawuche mtima, nambope pandaŵi jele jwalakwejo nganaŵe kugalawuka mtima ngatukusasosekwa kumkomasya kapena kumŵilanjila ku misongano.
ASYASYEJE CHINONYELO SONI CHANASA CHAKWETE YEHOFA
16-17. (a) Ana Yehofa akusasaka kuti ŵandu ŵatesile ulemwa atende chichi? (Esekiele 18:32) (b) Ana achakulungwa ŵa mumpingo akusakamula chamti uli masengo yimpepe ni Yehofa pakulinga kwakamuchisya ŵandu ŵatesile ulemwa?
16 Ana tulijiganyisye chichi mungani msano syelesi? Tuyiweni kuti Yehofa ngakusaka kuti jwalijose ajonanjidwe. (Aŵalanje Esekiele 18:32.) Yehofa akusasaka kuti ŵandu ŵatesile ulemwa ajilanesoni ni jwalakwe. (2 Akoli. 5:20) Ni ligongo lyakwe kutandila kalakala, jwalakwe aŵele ali mkwalimbikasya mwakuwilisyawilisya ŵandu ŵasokonechele kuti agalawuche mtima soni kuwujila kwa jwalakwe. Mwamti achakulungwa ŵa mumpingo akwete upile wekulungwa wakukamula masengo yimpepe ni Yehofa pakwakamuchisya ŵandu ŵatesile ulemwa kuti agalawuche mtima.—Alo. 2:4; 1 Akoli. 3:9.
17 Kusala yisyene, kwinani kukusaŵa chisangalalo chekulungwa mundu jwakulemwa pagalawiche mtima. Ndaŵi syosope, Atati ŵetu ŵakwinani Yehofa akusasangalala mnope naga mundu juŵalesile kumtumichila jwalakwe awujilesoni mumpingo. Tukusatanda kumnonyela mnope Yehofa patukumsyasya jwalakwe mwakwalosya ŵane chinonyelo, chanasa soni umbone mtima.—Luk. 1:78.
NYIMBO NA. 111 Magongo Gakuŵela Ŵakusangalala
a Baibulo jikusasala kuti pana ŵandu ŵane ŵakusatenda ulemwa wakuti Mlungu nganaŵa ŵakululuchile. Ŵandu ŵeleŵa akusaŵa kuti ŵasagwile jika kumusya mitima jawo mwakutenda yindu yakusisyana ni Mlungu. Chinga mundu atesile ulemwa welewu, Yehofa ni Yesupe ni ŵampaka asagule naga mundujo ngakusosekwa kumkululuchila.—Maliko 3:29; Aheb. 10:26, 27.
