Seth * jwatite, “Une ni ŵamkwangu ŵatutyosisye pamasengo ndaŵi jimo. Kwa yaka yiŵili twalamilaga tumaganyu soni yindu yagaŵilidwa. Yakuyicisya yakwe, ŵamkwangu, Priscilla, ŵalagaga nganisyo. Yeleyi yandendekasisye kulipikana mpela jwangali mate.

“Kuti tukombole kupilila, ŵamkwangu ndaŵi ni katema ŵalikumbusyaga maloŵe ga Yesu ga pa Matayo 6:34. Yesu ŵatite tukalagaga nganisyo ni yamalaŵi ligongo lyakuti lisiku lililyose likwete yakusawusya yakwe. Soni ligongo lya kupopela mwakutyocela pasi pa mtima yatendekasisye ŵamkwangu, kwendelecela kuŵa ŵakulimba mtima. Une lilemba lya Salimo 55:22 ni lyalyangamucisye. Mwakulandana ni jwamalumbo, nayilesile yakusawusya yangu m’miyala mwa Yehofa, ni jwalakwe ŵangamucisye. Atamose kuti apano napatile masengo, tukwendelecela kutama ni umi wangasaka yejinji mwakamulana ni yiŵasasile Yesu pa Matayo 6:20-22. Kupunda yosope, apano ndili paunasi wakulimba mnope ni Mlungu soni ŵandu.”

Jonathan jwatite, “Malonda getu pagasokonecele, nadandawulaga mnope kuti citusoŵe pakamula. Yaka 20 yatwaŵele tuli mkutenda malonda yajinjile m’mesi. Une ni ŵamkwangu twatandite kangana pangani ja mbiya. Nganitukongolaga yindu ligongo twajogopaga kuti citulepele kuwusya.

“Nambo Maloŵe ga Mlungu soni msimu weswela yatukamucisyaga kuti tutendeje yindu mwalunda. Nalijiganyisye kamula masengo galigose soni nganitugambaga kusuma yindu mwacisawawa. Nombe nawo Ŵamboni acimjetu ŵatukamucisyaga.”

Raquel jwatite, “Ŵamkwangu paŵandesile, yambwetece mnope mumtima soni yasakalisye  kwabasi. Nambo namjegamile mnope Mlungu, mwati jwangamucisye. Napopelaga kwa jwalakwe lisiku lililyose. Pambesi pakwe mtendele wa Mlungujo watamilikasisye pasi mtima wangu.

“Ngusangalalasoni kuti Baibulo jangamucisye kutyosya nganisyo syakutumbila soni kuti yikambwetekaga mumtima. Nakumbucile maloŵe ga ndumetume Paulo ga pa Aloma 12:21 gakuti, ‘Akakunda kose kuti cakusakala cilicose cagomece. Nambo acigomeceje cakusakalaco mwakutenda cambone.’

“Mjangu jwine jwapamtima jwangamucisyesoni. Jwalakwe jwandosisye lilemba lya Mlaliki 3:6, kaneko ŵasasile kuti ndaŵi sine tukusasosekwa kwamba ‘kulisinga.’ Yaliji yakusawusya kutenda yeleyi, nambope ni yinasosecelaga. Sambano nalesile ganicisya mnope ya kumala kwa ulombela yila.”

Elizabeth jwaŵecete kuti, “Ulombela paumasile, mkusasosekwa cikamucisyo. Pawamasile ulombela wangu, mjangu jwine jwapamtima jwangamucisyaga lisiku lililyose. Jwandendelaga canasa, kundondoya, soni jwanonyelaga mnope. Nalipikanaga kuti ndili jwakusosekwa. Ngukulupilila kuti Yehofa ni juŵamkamulicisye masengo mjanguju kuti nganiji jikambwetekaga mumtima.”

Luis, jwatumkolasile mungani jandanda jula, akwete ulwele wekulungwa wa mtima, mwati kaŵili kose ŵasigele panandi kuwa ni ulwelewu. Apano, kwa maawala 16 palisiku, akusasosekwa kuŵa pa macini gakumkamucisya kupumula. Jwalakwe jwatite, “Ngusapopela kwa Yehofa ndaŵi syosope. Pamalisisye kupopela kwa Mlungu, ngusalipikana kuti msimu wakwe umbele macili. Lipopelo likusangamucisya kuti mbilileje. Ngusakulupilila kuti Mlungu apali soni kuti akusasamalila.”

Jwamkongwe jwine jwa yaka ya m’ma 80, lina lyakwe Petra jwatite, “Apano ngusalepela kutenda yindu yejinji. Ngusadandawula kuti jwangali macili mpela kala. Ndaŵi syosope ngusajegamila kumwa mitela basi. Ndaŵi sine ngusinam’ŵenda Yehofa, mpela muŵaŵendele Yesu, kuti andyocesye yakupwetekayi naga yili yakomboleka. Nambo Yehofa ŵampele Yesu macili, yeleyi ni yakutendasoni kwa une. Lipopelo lili mpela mtela wangu wa lisiku lililyose. Pamalisisye  kuŵecetana ni Mlungu, mtima wangu ukusatama pasi.”—Matayo 26:39.

Julian, jwaŵele ali mkulaga ni ulwele wakuwulaga yiŵalo kwa yaka 30, jwatite, “Sambano ngusagamba kutama pa njinga ja ŵalemale. Atamose yili m’yoyo, ngusaŵaga jwakusangalala ligongo lyakuti ngusinakamucisya ŵane. Yeleyi yikusangamucisya kupilila, nambosoni Yehofa akusangamucisya pakuŵa ni yaŵatusalile. Ngusaŵeceta maloŵe gakulandana ni ga ndumetume Paulo, gakuti, ‘Ngusakombola kutenda yosope yene kupitila mwa jwalakwe jwakusamba macili.’”—Afilipi 4:13.

Antonio jwatite, “Baba paŵagambile gundidwa ni galimoto, yaliji yakusawusya kwiticisya, ligongo babawo ŵaliji ŵakusamala pakwenda pamsewu. Nambope yindu yasawisye basi. Ŵaŵele cikomocele kwa masiku msano kaneko ŵajasice. Pandaŵijo, nalingaga kulilimbisya mtima kuti ngalila pameso pa mama ŵangu, nambo kumbali nalilaga mnope. Mumtima natiga, ‘Ligongo cici yeleyi yitendekwe?’

“Mu ndaŵi jakusawusyajo, nam’ŵendaga Yehofa kuti andamice mtima pasi. Jwalakwe ŵangamucisyaga mwapanandipanandi. Nakumbucile kuti Baibulo jikusasala kuti ‘yindu yangayijembeceya’ yikusamgwilila jwalijose. Nambo pakuŵa Mlungu ngaŵa mkutulambusya, ngukulupilila kuti baba ŵangu tinjawona pacacijimuka kuŵawe.”—Mlaliki 9:11; Yohane 11:25; Tito 1:2.

Robert jwatumkolasile mungani jandanda jila, jwaŵecetesoni yakulandana ni yeleyi. Jwalakwe jwatite, “Mwanace jwetu pajwawile pangosi ja ndege, une ni ŵamkwangu Maribel twapopelaga mnope kwa Yehofa. Jwalakwe ŵatupele mtendele wamumtima walikusasala lilemba lya Afilipi 4:6, 7. Mtendelewu watukamucisye kuŵeceta mwakulimba mtima kwa ŵakulokota ngani pakwamba ya cembeceyo cakuti ŵawe cacijimuka. Atamose kuti twalusile mwanace pangosiji, nambope tukusakumbucila yindu yakusangalasya yatwatendelaga pampepe. Tukusaganicisya mnope yindu yeleyo.

“Ŵamboni acimjetu ŵatusalile kuti lisiku line ŵatuweni pa TV tuli mkuŵeceta ya cikulupi cetu mwakulimba mtima. Twasalile kuti twakombwele kutenda yeleyo ligongo lya mapopelo gawo. Ngukulupilila kuti Yehofa ŵatutondoyaga kupitila m’mautenga ga acimjetuŵa.”

Yatutagulileneyi, yilosisye kuti Mlungu mpaka ŵatondoye soni kwakamucisya ŵandu ŵakusimana ni yakusawusya yamtundu wuliwose. Nambi wuli wawojo? Cinga akusimana ni yakusawusya yatuli, cikamucisyo cipali. * Yehofa mpaka ŵatondoye, ligongo jwalakwe ali “Mlungu jwakusatutondoya m’litala lililyose.”—2 Akolinto 1:3.