Napagwile m’musi wine mu upande wa Saxony, m’cilambo ca German Democratic Republic (GDR). Acinangolo ŵetu ŵatusamalilaga mwacinonyelo soni ŵatujiganyaga ndamo syambone. Cilambo ca GDR caliji ca Cikomyunisimu, ni ligongo lyakwe ŵandu ŵajinji ku Saxony ngananonyelaga ya dini. Kwa une, nakulupililaga yakuti kwangali Mlungu. M’yoyo ndili ni yaka 18, cikulupi cakuti kwangali Mlungu soni Cikomyunisimu yatamilicice mnope mu nganisyo mwangu.

Nacinonyelaga mnope cikomyunisimu ligongo lyakuti casalaga kuti ŵandu wosope ali ŵakulandana. Yeleyi yandendekasyaga kukulupilila kuti yikaŵe kuti yipanje tukusagaŵana mwakulandana, pacilambopa ngamkanipapagwa ŵandu ŵane ŵakulaga mnope kapena ŵakusicila mnope, wosope tukaliji ŵakulandana. M’yoyo, nalipelekaga mnope pakamucisya nawo kakuga ka ŵacinyamata ka cikomyunisimu. Ndili ni yaka 14, natandite kamula masengo pa kampani jine jakupanganyasoni yipepela yakuti yikamwile kala masengo. Ŵakulolela tawuni ja Aue, ŵayamicilaga masengo ganakamulaga mwamtawu mwakuti ŵambele mbote. Atamose kuti naliji jwacinandipile, nakwete upile wakumanyigana ni acakulungwa ŵa cipani ca cikomyunisimu. Yeleyi yandendekasisye kulipikana kuti yakulinga yangu yaliji yambone soni kuti cinjikola sogolo jambone.

Kaneko yindu m’cilamboci yasokonecele. M’caka ca 1989, lipupa lyekulungwa lya ku Berlin lyalyaliji m’malile mwa cilambo ca German Democratic Republic (GDR) ni yilambo ya ku Eastern Europe lyagwile. Kaneko nayiweni kuti yindu yangali cilungamo yatupile mnope m’cilambo cosope ca German Democratic Republic (GDR). Mwambone, ŵandu ŵaŵakanaga kujigala nawo mbali mu cikomyunisimu ŵatendelaga yangalwe. Yeleyi yandendekasisye kuliwusya kuti ligongo cici pakutendekwa yeleyi? Ana ngati cikomyunisimu cikusasala kuti ŵandu wosope ali ŵakulandana? Ana cikomyunisimu cigambile kuŵa linape? Natandite kulagasika nganisyo ni yeleyi.

Ligongo lya yeleyi nacenjile yakulinga yangu ni kutanda kulijiganya yakwimba soni yakwambula. Kutandila pandaŵi janalijiganyisye ya nyimbo pa sekondale jine jakwe, nganisyo syangu syaliji syakuti ngayice ku koleji. Nasakaga kwanilisya cakulinga cangu cakuŵa jwakwimba. Kaneko yeleyi yandendekasisye kucenga ndamo syangu syambone syanalijiganyisye ndili mwanace. Cindu cakusosekwa kwa une caliji kusangalala, soni kola mauganja gejinji. Nambo kwimba, kwambula soni kusangalala m’matala gakulekanganalekangana nganikungamucisya kumalana ni kulagasika nganisyo. Atamose yiwulili yanajambulaga yalosyaga cenene kuti natendaga woga ni yamsogolo. Naliwusyaga kuti, ana kusogoloku kwana yindu yamtuli? Soni ana cakulinga ca umi cili camtuli?

 Lisiku lyanapatile kwanga kwa yiwusyo yeleyi, nasimonjile mnope. Cilo cine ndili kusekondale, nakungulukaga ni acimjangu. Twatagulilanaga yakwamba msogolo. Msikana jwine Jwamboni sya Yehofa lina lyakwe Mandy, * jwasalile yindu yakamucisya, jwalakwe jwatite, “Andreas, naga mkusaka kupata kwanga kwa yiwusyo yakwamba umi soni yamsogolo, m’ŵalanjeje Baibulo mwakusamala mnope.”

Atamose kuti nayikayicilaga, nambope yandendekasisye lung’wanu mwakuti nasakaga kupata kwanga kwakwe kutyocela m’Baibulo. Mandy jwasalile kuti ngaŵalanje caputala 2 ca buku ja Danieli. Yanaŵalasileyi yanjimice mtwe kwabasi. Yakulocesyayi yikusasala ya mpambo wa maulamusi gamacili mnope pacilambo capasi kutandila kalakala mpaka lelo jino. Mandy jwandosisye yakulocesya yine ya m’Baibulo yayikusasala yamsogolo. Pambesi pakwe, napatile kwangwa kwa yiwusyo yangu yila. Nambo naliwusyaga kuti, ana ŵani ŵaŵakombwele kulemba yakulocesya yisyesyene mpela yeleyi mkanipaŵe? Ana komboleka kuti Mlungu apali soni ni juŵalongolelaga kulemba yeleyi?

Mandy, jwalinganyisye yakuti Horst ni ŵamkwakwe Angelika ayiceje kukungamucisya kujipikanicisya cenene Baibulo. Nganipapita ndaŵi jelewu, kaneko nayimanyi kuti Mboni sya Yehofa jili dinipejo jajikusakamulicisya masengo lina lisyesyene lya Mlungu lyakuti Yehofa. (Salimo 83:18; Matayo 6:9) Nalijiganyisye kuti Yehofa Mlungu ŵapele ŵandu cembeceyo cakutama ni umi wangamala m’paladaiso pacilambo capasi. Lilemba lya Salimo 37:9 likusati, “Ŵakwembeceya Yehofa cacipocela cilambo capasi.” Napikanicisye kuti Mlungu apelece upilewu kwa ŵandu wosope ŵakwete ndamo syambone mwakamulana ni mwajikusaŵecetela Baibulo.

Nambope pandanda, yasawusyaga kucenga ndamo syangu kuti sikamulaneje ni yanalijiganyaga m’Baibulo. Ligongo lyakuti natendaga cenene pangani jakwimba, yeleyi yandendekasisye kuŵa jwakulikwesya. M’yoyo, nasosekwaga kulijiganya ndamo ja kulinandiya. Yasawusyagasoni mnope kuleka yakusangalasya yakusakala yanayinonyelaga. Ngusam’yamicila mnope Yehofa ligongo lya canasa soni kulitimalika kwaŵandosisye kupitila mwa ŵandu ŵaŵanjiganyaga Baibulo.

Cikomyunisimu soni cikulupi cakuti kwangali Mlungu, yalepele kucenga umi wangu kutandila ndili ni yaka 18, nambo apano Baibulo jingamucisye mnope kucenga umi wangu kupunda cilicose. Yanalijiganyisye yangamucisye kumalana ni kulagasika nganisyo pakwamba yamsogolo, soni yangamucisye kola umi wakola cakulinga cisyesyene. M’caka ca 1993, nabatiswe nikuŵa Jwamboni sya Yehofa, soni mu 2000, nalombene ni Tabitha, msikana jwamtawu pa yindu yausimu. Tukusamalila ndaŵi jetu jejinji pakwakamucisya ŵane kuti ajipikanicisyeje Baibulo. Ŵajinji ŵatukusitwalalicila umi wawo uli mpela muwaŵelele wa une pandanda. Munganisyo mwawo mwatamilicice ya cikomyunisimu soni yakuti kwangali Mlungu. Ngusalipikana kuŵa jwakwikutila mnope pangwakamucisya ŵandu ŵeleŵa kummanyilila Yehofa.

Panatandite kusongana ni Ŵamboni sya Yehofa, acinangolo ŵangu nganiyasangalasyaga. Nambope kutandila pandaŵiji, ayiweni kuti ngwete ndamo syambone kulekangana ni munaŵelele pandanda. Apano ngusasangalala kuti nombenawo akusaŵalanga Baibulo soni kutenda nawo misongano ja Ciklistu ja Mboni sya Yehofa.

Une ni Tabitha, tukwete liŵasa lyambone ligongo lyakuti tukusakuya cenenepe songa syakamucisya sya m’Baibulo pakwamba ya ŵalombane. Mwambone, kukuya lilamusi lyakuti ŵalombane aŵeje ŵakulupicika kwa jwine ni mjakwe, kukamucisye kuti liŵasa lyetu liŵeje lyakulimba.—Ahebeli 13:4.

Ngangusatendasoni woga ni yampaka yitendekwe paumi wangu soni kulaga nganisyo pakwamba yamsogolo. Apano ngusalipikana kuti ndili m’liŵasa lya ŵandu ŵakulupicika lya pacilambo cosope. Liŵasali lili lyakamulana nambosoni lyamtendele. M’liŵasa lyeleli mwangali lusagu. Yeleyi ni yanayisakaga kutandila ndili mwanace.