Mpela Alex, ŵandu ŵajinji masiku agano ŵanganonyela kamula masengo mwakulimbicila. Mundu jwine jwakulinganya magalimoto lina lyakwe Aaron ŵasasile kuti, “Ŵandu ŵajinji ŵangasaka kamula masengo gakutuluka. Jemanjajo akusati, ‘Ngwamba kamula masengoga mwakwembeceya, pacinjipata gane gambonepo cinjileka.’”

Nambo ana ligongo cici ŵandu ŵajinji ŵanganonyela kamula masengo mwakulimbicila? Mwine lili ligongo lya yakusaŵeceta ŵakwenesya ngani, ŵakusalosya kuti kola umi wambone kuli kwangasawusya. Matthew, jwakusalinganya yindu yayijonasice, ŵasasile kuti, “Ŵandu akusaganisya kuti naga akamula masengo mnope, ŵangapata yindu yejinji.” Shane, jwakusakamula masengo gakulolela nyumba ŵasasilesoni yakamulana ni yeleyi. Jwalakwe ŵatite: “Ŵandu ŵalesile kamula masengo gakamulana ni mbiya syakusapocela.”

Nambope ŵandu ŵane akusasangalala ni kamula masengo mwakulimbicila. Daniel jwa yaka 25, jwakusakamula masengo gakutaŵa ŵasasile kuti, “Nguganisya kuti kamula masengo mwakulimbicila kuli kwambone, mnopemnope naga ukamula masengogo ni yakulinga yambone.” Andre jwa yaka 23, ŵajiticisye yeleyi pakusala kuti, “Ngukulupilila kuti, kuti mundu aŵe jwakusangalala akusasosekwa kamula masengo. Nambo kwamba kutama ngakamula masengo kapena ngakola yakutenda kuli kwangasangalasya!”

Ligongo cici ŵandu mpela Daniel ni Andre akusakuwona kamula masengo mwakulimbicila kuŵa kwakamucisya? Lili ligongo lyakuti akusakamulicisya masengo yajikusasala Baibulo. Baibulo jikusalimbikasya kulipeleka ni kupilila pamasengo. Nambo ngajikusagamba kutusalila yeleyipe. Jikusatusalilasoni yampaka tutende kuti tusangalaleje ni masengo getu.

Ana songa syapi sya m’Baibulo syampaka syakamucisye kuŵa ŵakusangalala ni masengo gawo? Aŵalanje ngani jakuyicisyaji kuti alole sine mwa songa syelesi.