1. Ana Mlungu ŵatupanganyisye m’litala lyatuli kuti tupakomboleje kumsyasya?

YEHOFA ŵatupanganyisye m’litala lyakuti tupakomboleje kumanyilila mwakupikanila acimjetu, atamose nganitusimaneje ni yakusimana nayo. (Aŵalanje Aefeso 5:1, 2.) Ana mpaka tukamulicisye masengo catuli mtuka waŵatupele Mlunguwu? Ligongo cici tukusosekwa kuŵa ŵakusamala patukamulicisya masengo mtukawu?

2. Ana Yehofa akusapikana wuli patusimene ni yipwetesi?

² Wosopewe tukusasangalala ligongo lyakuti Mlungu ŵalinganyisye yakuti ŵasagulwe ni msimu ŵakulupicika akapocele umi wangawa kwinani, soni kuti ‘ŵangondolo sine’ capocele umi wangamala pacilambo pano. (Yoh. 10:16; 17:3; 1 Akoli. 15:53) Tukumanyilila kuti pandaŵijo ŵacaciŵa kwinani, soni ŵacacipocela umi wangamala pacilambo pano ngasasimanaga ni yipwetesi yatukusimana nayo masiku agano. Nambo Yehofa akusapikanicisya yipwetesi yatukusimana nayo. Yampwetekagasoni mumtima Ayisalayeli paŵasimanaga ni yipwetesi ku Iguputo, mwati jwalakwe “ŵalasile pakuyiwona yisawusyo yawo yosope.” (Yes. 63:9) Soni pali papite  yaka yejinji ŵandu ŵa Mlungu paŵataŵaga nyumba jakulambilila, ŵakwete woga ligongo lya acimmagongo ŵawo nambo Yehofa ŵapikanicisyaga mwaŵapikanilaga jemanjajo. Jwalakwe ŵasalile kuti, “Jwalijose jwakumlagasya jemanja, akulagasya cindu ca mtengo wapenani kwa une.” (Zek. 2:8) Mpela mwakusatendela mama pakumsamalila mwanagwe mwacinonyelo, nombe najo Yehofa akusiŵakamucisya ŵandu ŵakwe mwacinonyelo. (Yes. 49:15) Mpaka tupakombole kumsyasya Yehofa naga tukupikanicisya mwakupikanila acimjetu.—Sal. 103:13, 14.

3. Ana cici cacikulosya kuti Yesu ŵatendelaga ŵane canasa?

³ Yesu ŵamanyililaga mwakupikanila ŵane atamose mu yindu yakuti nganasimaneje nayo. Mwambone, acimlongola ŵa dini ŵalambusyaga, soni kwapa ŵandu malamusi gamajinji gakulipanganyicisya. (Mat. 23:4; Maliko 7:1-5; Yoh. 7:13) Yesu ŵaliji jwangali woga, soni pangali jwakamlambwisye, nambo ŵamanyililaga mwaŵapikanilaga ŵanduwo. M’yoyo, “piŵagaweni makuga ga ŵandu, ŵatendele canasa, ligongo jemanjajo ŵaliji ŵakudandawula nipo ŵaliji ŵakusoŵa cikamucisyo mpela ngondolo syangali mkucinga.” (Mat. 9:36) Yesu ŵanonyelaga ŵandu soni kwatendela canasa mpela mwaŵatendelaga Atatigwe.—Sal. 103:8.

4. Ana Yesu yamkwayiye catuli pakwawona ŵane ali mkulaga?

⁴ Yesu paŵaweni ŵandu ali mkulaga, ŵakamucisyaga ligongo lyacinonyelo. Jwalakwe ŵajigalilaga cenene cinonyelo ca Atatigwe. Lisiku line Yesu ni ŵandumetume paŵawusile kukulalicila, ŵasakaga kwawula kumalo kwa jika kuti akapumule ligongo lya kupela. Nambo paŵaweni ŵandu ali mkumjembeceya, ŵatendele canasa ni “ŵatandite kwajiganya yindu yejinji.”—Maliko 6:30, 31, 34.

5, 6. Kuti tusyasyeje cinonyelo ca Mlungu, ana tukusosekwa kutenda cici? Asale cisyasyo. (Alole ciwulili cacili kundanda kwa nganiji.)

⁵ Ana tukusosekwa kutenda cici kuti tusyasyeje cinonyelo ca Yehofa? Kwende tuwanicisye m’yi. Tujile kuti mcanda jwine lina lyakwe Alani, akuganicisya ya m’bale jwine jwamcekulupe jwakusalajila kuŵalanga ligongo lya ungalola cenene. Yikusamlemasoni kulalicila ku nyumba ni nyumba ligongo lya kucekulupaku. Sambano Alani akuganicisya ya maloŵe ga Yesu gakuti, “Mwatendeleje ŵandu ŵane mpela mumkusacila kuti ŵane amtendeleje jemanja.” (Luk. 6:31) Sano Alani akuliwusya kuti, ‘Ana ngusaka kuti ŵandu andendeleje yatuli?’ Akulijanga kuti, ‘Ngusaka kuti aputeje mpila ni une!’ Nambo m’bale jwamcekulupeju ngaŵa mkupakombola kuputa mpila. M’yoyo, mwakamulana ni maloŵe ga Yesu gala, tukusosekwa tuliwusyeje kuti, ‘Ana mpaka sace ŵane ali andendele yatuli naga ndili simene ni yasimene nayo jemanjajo?’

⁶ Alani ngaŵa jwamcekulupe, nambo mpaka amanyilile mwakupikanila jwamcekulupejo. Jwalakwe akupata ndaŵi jakuŵa yimpepe ni m’bale jwamcekulupejo ni kumpikanilaga pakuŵeceta. Mkupita kwa ndaŵi, Alani mpaka apikanicisye ligongo lyakwe jwamcekulupejo yikumlema kuŵalanga Baibulo kapena kwawula kukulalicila ku nyumba ni nyumba. Alani papikanicisye mwakupikanila m’bale jwamcekulupeju, mpaka amanyilile yakusosecela yakwe kaneko ni kumkamucisya. M’wejisoni ŵakwe tukusosekwa kutenda m’yoyo. Kuti tupakombole kusyasya cinonyelo ca Mlungu, tukusosekwa kuganicisya mwakupikanila ŵane.—1 Akoli. 12:26.

7. Ana tukusosekwa kutenda cici kuti tupikanicisyeje mwakupikanila Aklistu acimjetu?

⁷ Kupikanicisya mwakupikanila ŵane kuli  kwakusawusya. Abale ŵetu ŵajinji akusimana ni yipwetesi yakuti ngatukuyimanyilila. Ŵane akulaga ligongo lya ulwele, soni ucekulu. Ŵane akusalaga ni nganisyo kapena ni yindu yangali cilungamo yayatendecele. Ŵanesoni ali m’liŵasa lyele ŵandu ŵane nganaŵa ŵa Mboni, soni ŵane akulela jika ŵanace. Jwalijose akusimana ni yipwetesi, yine yakuti m’wejo nganitusimaneje nayo cipagwile. Pakwalosya cinonyelo ni kwakamucisya, ana tukusosekwa kutenda cici? Tukusosekwa kwapikanicisya cenene pakuŵeceta, yampaka yitukamucisye kumanyilila mwakupikanila. Pambesi pakwe tucakamucisya cenene, pakusyasya cinonyelo ca Yehofa. Atamose kuti m’weji ngaŵa mkombola kumkamucisya mundu jwalijose mwakamulana ni yakusosecela yakwe, nambo mpaka tukombole kwakamucisya mwausimu, soni kwasalila yine yampaka atendeje.—Aŵalanje Aloma 12:15; 1 Petulo 3:8.

8. Ana cici cacamkamucisye Yesu kutenda yindu yambone?

⁸ Yesu ŵasasile kuti, “Mlungu jwakupunda yosope . . . akusiŵatendela yambone ŵandu ŵangatogolela ni ŵaulemwa wosope.” (Luk. 6:35) Yesu ŵajigalile cisyasyo ca Atatigwe cakwatendela yambone ŵane. Ana cici cacakamucisyaga kutenda yeleyi? Jwalakwe ŵaganicisyaga mwampaka ŵanduwo apikanile paŵasalile kapena kwatendela yine yakwe. Mwambone, jwamkongwe jwine juŵatendaga yakulemweceka yejinji ŵayice kwa Yesu ali mkulila mwati mpaka ŵanyoŵesye sajo sya Yesu ni misosi. Yesu ŵamanyilile kuti munduju akulitendela canasa soni kuti apitikwice mtima. Jwalakwe ŵamanyililagasoni kuti naga ngakumtendela yindu yambone catenguce mnope. M’yoyo, Yesu ŵam’yamicile ni kumsalila kuti amkululucile yakulemwa yakwe. Yesu ŵaŵecetesoni mwakuwusimana mtima kwa m’Falisi jwine juŵalosisye kuti ngakusangalala ni yeleyi.—Luk. 7:36-48.

9. Ana tukusosekwa kutenda cici kuti tusyasyeje umbone mtima wa Mlungu? Asale cisyasyo.

⁹ Ana mpaka tusyasye catuli umbone mtima wa Mlungu? Ndumetume Paulo ŵalembile kuti, “Jwakutumicila jwa Ambuje ngakwenela kose kukangana ni ŵandu, nambo aŵeje jwakuwusimana mtima kwa ŵandu wosope.” (2 Tim. 2:24) Mundu jwakuwusimana mtima akusamanyilila mwampaka atendele kuti akakuŵasya ŵane atamose yinduyo yiyice pakusawusya. Aganisye mwampaka tutendele yeleyi. Mwambone, tujile kuti abwana ŵawo ngakukamula cenene masengo, ana mpaka atende wuli? M’bale jwine ayice ku misongano nambo pali papite miyesi jejinji ciyicile, ana mpaka amsalile yatuli? Mu undumetume, msyenenyumba akuti, “Nganingola lipesa lyakuŵecetelana ni wawojo,” ana mpaka ampikanicisye? Mwine ŵamkwawo ŵawusisye kuti, “Ligongo cici nganimusalila yamkusaka kutenda Lyakuŵeluka?” Ana mpaka ŵajanje mwakuwusimana mtima? Kuti tujigalile umbone mtima wa Yehofa tukusosekwa kuganisya mwakupikanila acimjetu, soni mwampaka apikanile patuŵecete kapena kutenda yine yakwe.—Aŵalanje Miyambo 15:28.

10, 11. Ana cici campaka citukamucisye kujigalila cisyasyo ca Mlungu cakutenda yindu mwalunda? Asale cisyasyo.

¹⁰ Yehofa ali jwalunda mnope, mwati akusasagula kumanyilila yindu yapaujo. Atamose kuti m’weji ngaŵa mkumanyilila yapaujo, nambo mpaka tupakombole kutenda yindu mwalunda. Catuli? Tukusosekwa kuganicisya yakuyicisya ya yindu yatukusaka kutenda. Ayisalayeli ŵalepele kuganisya yakuyicisya ya ungapikanila Mlungu. Mose ŵamanyililaga  kuti Ayisalayeli cacitenda yakusakala pameso pa Yehofa atamose kuti ŵatendele yejinji. Jwalakwe ŵatite, “Ayisalayeli ali ŵandu ŵa lukosyo ŵangaganisya cenene, soni ŵangali lunda. Ligongo akaŵe ŵandu ŵa lunda akapikanicisye, soni akamanyilile yakomboleka kwagwila.”—Deut. 31:29, 30; 32:28, 29.

¹¹ Kuti tupakomboleje kutenda yindu mwalunda pakumsyasya Mlungu, tukusosekwa kuganicisya yakuyicisya yampaka yipagwe mkanitutende cindu cine cakwe. Mwambone, naga tuli pa uganja tukusosekwa kalamuka kuti tukatanda kumbila yagonana. Ngatukusaka kutenda cilicose campaka cijonanje unasi wetu ni Yehofa. M’malo mwakwe tukusosekwa kutenda yindu mwakamulana ni maloŵe ga m’Baibulo gakuti, “Mundu jwakalamuka pati aciweni cindu cakogoya akusajuŵaga, nambo mundu jwakuloŵela akusagambaga kupelenganya ni kutanda kuligamba panyuma pakwe pati asimene ni yisawusyo.”—Miy. 22:3.

12. Ana yindu yatukusaganisya mpaka yitujonaje catuli?

¹² Mundu jwakalamuka akusasamala ni yakusaganicisya. Yatukusaganisya mpaka yitukamucisye kapena kutuwulasya, mpela mwawukusatendela moto. Moto tukusatelecela yakulya, nambo naga ngatukuwusamala mpaka ujoce nyumba atamose kutuwulaga. M’yoyosoni, kuganicisya yindu yambone mpaka kutukamucisye kujigalila cisyasyo ca Yehofa. Nambo kuganicisya yindu yakusakala kuli kwakogoya. Mwambone, naga ndaŵi syosope tukusaganisya ya kutenda yindu yakusakala, pambesi pakwe mpaka tuyitende. Kutenda yeleyi mpaka kutujonanjile unasi wetu ni Yehofa.—Aŵalanje Yakobo 1:14, 15.

13. Ana Hawa ŵaganisyaga kuti umi wakwe uciŵa watuli naga akulya cisogosico?

¹³ Mwambone, Hawa ŵatandite kusacilila kuti alye cisogosi ca “citela cakumanyisya yindu yambone ni yakusakala” caŵamlekasisye. (Gen. 2:16, 17) Lijoka lyamsalile Hawa kuti, “Ngasim’wa. Mlungu akumanyilila kuti, pandaŵi jitimcilya yisogosi yeleyi, meso genu tigaciwuguka ni timciŵa mpela mwaŵelele Mlungujo, timcimanyilila yindu yambone ni yakusakala.” Hawa “ŵaciweni citelaco kuti caliji cakusalala, ni soni kuti yisogosi yakwe yikomboleka kuŵa yakunong’a kulya.” Ana kaneko catendekwe cici? “Ŵakaŵile yisogosi yine ya m’citelaco ni ŵalile. Ni ŵajigele yinesoni kuja kukwapa ŵamkwawo, nipo jwalakwejo ŵalile.” (Gen. 3:1-6) Mwangakayicila, Hawa ŵajigalice ni yaŵasasile Satanayi. Hawa ŵaganisyaga kuti yindu yicimjendelaga cenene naga cacilisagulilaga yakutenda. Yeleyi yaliji yakogoya mnope! Ligongo lya kulemwa kwa Adamu, ŵakwakwe Hawa, “ulemwa wayice pacilambo  capasi, . . . nipo ulemwawo wayice naco ciwa.”—Alo. 5:12.

14. Ana Baibulo jikusatukamucisya catuli kuti tuŵambale kutenda yakusakala?

¹⁴ Tukusamanyilila kuti kulemwa kwa Hawa nganikuŵa kutenda msese. Nambope, Yesu ŵasasile kogoya kwa ganicisya yindu yakusakala. Jwalakwe ŵatite, “Mundu jwalijose jwakumlolecesya jwamkongwe ni kumkumbila, atesile najo kala cikululu mumtima mwakwe.” (Mat. 5:28) Paulo ŵatukalamwisye kuti, “Mlece mtima wakusosasosa yakusangalasya cilu, soni mkapeleka cilu cenu kuti citende yakusaka yakwe.”—Alo. 13:14.

15. Ana tukusosekwa kusunga kwinani yipanje yatuli, soni ligongo cici?

¹⁵ Cindu cinesoni cakusakala, cili ganicisya mnope yakuti tusicile m’malo mwakuganicisya ya Mlungu. Mundu jwakusicila akusaciwona cipanje cakwe mpela msinda wakumcenjela. (Miy. 18:11) Yesu ŵasasile ngani jakulosya kogoya kwa ‘kuliwunjicila yipanje, nambo ngaŵa ŵakusicila pameso pa Mlungu.’ (Luk. 12:16-21) Yehofa akusasangalala naga tukutenda yindu yakumsangalasya jwalakwejo. (Miy. 27:11) Naga tukusunga “yipanje kwinani,” Yehofa akusasangalala, nombe m’weji tuciŵa ŵakusangalala. (Mat. 6:20) Mwangakayicila, unasi wambone ni Yehofa uli cipanje cetu capenani.

16. Ana cici campaka citukamucisye kuti tukadandawulaga mnope?

¹⁶ Naga tukulinjilila mnope kuliwunjicila “yipanje pacilambo capasi” tuciŵa ŵakudandawula mnope. (Mat. 6:19) Yesu ŵasasile citagu cakulosya kuti “kudandawula ni yakusosekwa ya umi awuno, soni kunonyela mnope yipanje” mpaka kusokonasye maloŵe gakwamba ya Ucimwene. (Mat. 13:18, 19, 22) Ŵandu ŵajinji akusaŵa ŵakudandawula ndaŵi syosope ligongo lyaganicisya yindu yampaka yatendecele. Nambo kwambaga kudandawula yiliyose mpaka kutuwulasye mwakucili, soni mwausimu. Kwende tumkulupilileje Yehofa, soni tukumbucileje kuti ‘kudandawula kwa mundu kukusaŵa mpela msigo wa usito mumtima mwakwe, nambo maloŵe gambone gakusamsangalasya.’ (Miy. 12:25) M’yoyo, naga akudandawula ligongo lya cine cakwe, amsalile yeleyo jwakutumicila jwa Yehofa jwampaka ŵapikanicisye. Komboleka kwasalila acinangolo ŵawo, ŵamkwawo, kapena mjawo jwampaka ŵalimbikasye kumkulupilila Yehofa, soni kwakamucisya pa yipwetesi yawo.

17. Ana Yehofa akusatukamucisya catuli kuti tukadandawulaga mnope?

¹⁷ Nambo pa wosope ŵene, Yehofa ni jwampaka apikanicisye mnope kudandawula kwetu. Ndumetume Paulo ŵalembile kuti, “Mkadandawula ni kandu kane kalikose, nambo pandaŵi jimkupopela mum’ŵendeje Mlungu yindu yayikumsoŵa, nipo ndaŵi syosope m’yiŵendeje yindu yeleyi ni mitima jakutogolela. Mtendele wa Mlungu, wele uli wakupunda umanyilisi wosope wa ŵandu, tiwucisunga cenene mitima jenu ni nganisyo syenu kupitila mukulumbikana kwenu ni Klistu Yesu.” (Afi. 4:6, 7) M’yoyo patutandite kudandawula, kwende tuganicisyeje ya cikamucisyo cakusatupa Yehofa kuti unasi wetu ni jwalakwejo uŵe wakulimba, kupitila mwa abale ni alongo, acakulungwa ŵa mumpingo, kapolo jwakulupicika ni jwalunda, malayika, soni Yesu.

18. Ana kuganicisya mpaka kutukamucisye catuli?

¹⁸ Mpela mwatuyiwonele munganiji, kuganicisya mpaka kutukamucisye kusyasya ndamo sya Mlungu, mpela cinonyelo. (1 Tim. 1:11; 1 Yoh. 4:8) Tuciŵa ŵakusangalala mnope naga tukulosya cinonyelo cisyesyene, ganicisya yakuyicisya ya yitendo yetu, soni kuŵambala kudandawula. Kwende tuganicisyeje mwawuciŵela umi pasi pa ulamusi wa Ucimwene, soni tulinjilileje kumsyasya Yehofa.—Alo. 12:12.