1. Ana cikulupi cili cakusosekwa mwatuli? (Alole ciwulili cacili penanipa.)

Ana pakwete paliwusisye kuti, ‘Ana ndili mundu jwele Yehofa cacimkulupusya pa yisawusyo yakogoya ni kumjinjisya m’cilambo casambano?’ Yili yisyene kuti pana yindu yejinji yayicitukamucisya kuti tukulupuce, nambo cindu cakusosekwa mnope ni caŵacisasile ndumetume Paulo. Jwalakwe ŵatite, “Pali pangali cikulupi ngakomboleka kumsangalasya Mlungu.” (Ahe. 11:6) Yeleyi mpaka yiwonece kuŵa yangasawusya, nambo yisyesyene yakwe yili yakuti, “ngaŵa ŵandu wosope ŵakusakola cikulupi.” (2 Ates. 3:2) Malemba gaŵiliga gakutukamucisya kulola kusosekwa kwakulimbisya cikulupi cetu.

2, 3. (a) Ana Petulo ŵalosisye catuli kusosekwa kwa cikulupi? (b) Ana citutagulilane yiwusyo yapi?

² Ndumetume Petulo ŵalosisye kusosekwa kwa cikulupi. Jwalakwe ŵasasile kuti cikulupico cikusosekwa ‘kucilinga’ kuti “cicitutendekasye kupocela lumbili soni ucimbicimbi, Yesu Klistu pacaciwonecela.” (Aŵalanje 1 Petulo 1:7.) Yisawusyo yakogoya yiŵandicile mnope. M’yoyo, tukusosekwa kulingalinga kola cikulupi cacicitutendekasya kupocela lumbili pandaŵi jele Mwenye jwetu jwaucimbicimbi caciwonecela. Mwangakayicila, tukusacilila kuŵa “mtundu wa ŵandu ŵakola cikulupi cakusunga umi.” (Ahe. 10:39) Kuti tukombole kutenda yeleyi, tukusosekwa kuŵenda mpela muŵatendele mundu jwine juŵatite, “Alimbisye cikulupi cangu.” (Maliko 9:24) Kapena, mwakulandana ni ŵakumkuya ŵa Yesu mpaka tuŵende kuti, “Atujonjecesye cikulupi.”—Luk. 17:5.

 ³ Mungani ajino citutagulilane yiwusyo ayi: Ana mpaka tutende yatuli kuti tukusye cikulupi cetu? Ana mpaka tulosye catuli kuti tukwete cikulupi? Ana mpaka tusimicisye catuli kuti Mlungu cacitujanga patum’ŵendile kuti atujonjecesye cikulupi?

4. Ana yisyasyo ya ŵandu ŵapi yampaka yitukamucisye kuti tulimbisye cikulupi cetu?

⁴ Mpaka tulijiganye yejinji kutyocela ku yisyasyo ya ŵandu ŵaŵalosisye cikulupi ŵakusakolanjidwa m’Baibulo, pakuŵa “yindu yosope yaŵayilembile kalakala ŵayilembile kuti yitukamucisyeje.” (Alo. 15:4) Patukuŵalanga ya ŵandu mpela Abulahamu, Isaki, Yakobo, Mose, Lahabu, Gideoni, Balaki, soni ŵane ŵajinji, yikusatulimbikasya kuti tuciwungunyeje cikulupi cetu. (Ahe. 11:32-35) Konjecesya pelepa, kuŵalanga yisyasyo ya abale ni alongo ŵakulosya cikulupi moŵa agano, mpaka kutulimbikasye kuti tulinjelinjeje kulimbisya cikulupi cetu. *

5. Ana Eliya ŵalosisye catuli kuti ŵakwete cikulupi cakulimba mwa Yehofa, soni ana yeleyi yikutulimbikasya kutenda cici?

⁵ Kwende tulole cisyasyo ca m’Baibulo ca jwakulocesya Eliya. Aganicisye ya yakutendekwa yakuyicisyayi yayikulosya kuti jwalakwe ŵakwete cikulupi cakulimba mwa Yehofa. Eliya paŵamsalile Mwenye Ahabu kuti Yehofa ngagwisya wula, jwalakwe ŵasasilesoni mwakusimicisya kuti, “Papali Yehofa Mlungu jwacijumi,  . . ngakugwa mangame kapena wula yaka yikwisayi akaŵe naga une ngulamula.” (1 Maf. 17:1) Eliya ŵakulupililaga kuti Yehofa camkamucisyeje jwalakwejo soni ŵane kupata yakusosecela pandaŵi janganijigwaga wulajo. (1 Maf. 17:4, 5, 13, 14) Ndaŵi jine, Eliya ŵakulupililesoni kuti Yehofa camjimusye mwanace juŵawile. (1 Maf. 17:21) Pandaŵi jaŵapelekaga mbopesi pa litumbi lya Kalimeli, jwalakwe nganakayicila kose kuti Yehofa catumisye moto waciwutinisye mbopesi jakwe. (1 Maf. 18:24, 37) Pajakwanile ndaŵi jakuti Yehofa ayikasye wula, atamose kuti kwaliji kwangali cimanyilo cilicose cakuti cikugwe wula, Eliya ŵamsalile Ahabu kuti, “Ajawule, akalye ni kumwa, ligongo kukupikanika kukokoma kwa wula.” (1 Maf. 18:41) Ana yeleyi ngayikututendekasya kuliwungunya kuti tulole naga cikulupi cetu cili cakulimba mpela ca Eliya?

6. Ana tukusasosecela cici kuti tupakombole kusya cikulupi cetu?

⁶ Nganituŵa tukombwele kusya cikulupi cetu mwajikape. Cikulupi cili mbali jimo ja cisogosi ca msimu weswela wa Mlungu. (Aga. 5:22) M’yoyo mpaka tutende cenene kuya yaŵatusalile Yesu kuti tuŵendeje msimu weswela. Jwalakwe ŵasasilesoni kuti Atati ‘cacipeleka msimu weswela kwa ŵandu ŵakum’ŵenda.’—Luk. 11:13.

7. Asale cisyasyo cakulosya yatukusosekwa kutenda kuti cikulupi cetu cijendelecele kuŵa cakulimba.

⁷ Cikulupi cetu pacikusile, tukusasosekwa kwendelecela kucilimbisya kuti cikamala. Cikulupi cetu mpaka tuciwanicisye ni moto. Patuwukolesisye, ukusatanda kolela mnope. Nambope, naga ngatukuwukwisilila sasu, ukusasimaga panandipanandi ni kusigala liwupe. Nambo naga tukuwukwisilila sasu, motowo ukusajendelecela kolela. Mwakulandana ni yeleyi, cikulupi cetu mpaka cijendelecele kuŵa cakulimba naga tukucikwisilila ni Maloŵe ga Mlungu. Patukulijiganya Baibulo ndaŵi syosope, mpaka tutande kujinonyela mnope Baibulojo soni Mkulemba jwakwe. Yeleyi mpaka yitukamucisye kuti tukusyejepe cikulupi cetu.

8. Ana tukusosekwa kutenda cici kuti tujendelecele kulimbisya cikulupi cetu?

⁸ Ana akusosekwasoni kutenda cici kuti ajendelecele kulimbisya cikulupi cawo? Ngakusosekwa kwikutilape ni yindu yaŵalijiganyisye  mkanabatiswe. (Ahe. 6:1, 2) Akusosekwa kwendelecela kulijiganya yakulocesya ya m’Baibulo yayakwanilicikwe kala. Kutenda yeleyi kucakamucisya kuti ajendelecele kulimbisya cikulupi cawo. Mpaka akamulicisyesoni masengo Maloŵe ga Mlungu kuti aliwungunye naga cikulupi cawo cili cakulimba yisyesyene.—Aŵalanje Yakobo 1:25; 2:24, 26.

9, 10. Ana yindu yakuyicisyayi mpaka yitukamucisye catuli kulimbisya cikulupi cetu: (a) kunguluka ni ŵandu ŵambone? (b) misongano jampingo? (c) kulalicila?

⁹ Ndumetume Paulo ŵasalile Aklistu acimjakwe kuti ‘alimbikasyaneje cikulupi.’ (Alo. 1:12) Kunguluka ni ŵakulambila acimjetu, mnopemnope ŵele cikulupi cawo ‘calinjikwe,’ mpaka kutukamucisye kulimbisya cikulupi ca jwine ni mjakwe. (Yak. 1:3) Kunguluka ni ŵandu ŵakusakala kukusajonanga cikulupi, nambo kunguluka ni ŵandu ŵambone kukusacilimbisya. (1 Akoli. 15:33) Ni ligongo lyakwe Baibulo jikusatulimbikasya kuti “tukaleka kusongana pampepe,” soni kuti “tulimbikasyaneje.” (Aŵalanje Ahebeli 10:24, 25.) Patusongene pampepe tukusalijiganya yindu yejinji yayikusatukamucisya kulimbisya cikulupi cetu. Yeleyi yikukamulana ni yaŵasasile Paulo kuti, “Mundu akusakola cikulupi ligongo lya yindu yapikene.” (Alo. 10:17) M’yoyo tukusosekwa kuliwusya kuti, Ana ngusasimanikwa pa misongano ja Ciklistu ndaŵi syosope?

¹⁰ Patukulalicila soni kwiganya ŵandu, tukusalimbisyasoni cikulupi cetu. Mwakulandana ni Aklistu ŵandanda, tukusalijiganya kumkulupilila Yehofa ni mtima wosope soni kuŵeceta mwakulimba mtima atamose tusimane ni yatuli.—Mase. 4:17-20; 13:46.

11. Ligongo cici Kalebi ni Yoswa ŵakwete cikulupi cakulimba, soni ana mpaka twasyasye catuli jemanjaji?

¹¹ Cikulupi cetu cikusalimbasoni patukuyiwona kuti Yehofa akutukamucisya soni akwanga mapopelo getu. Yeleyi ni yayamtendecele Kalebi ni Yoswa. Jemanjaji ŵalosisye cikulupi cawo mwa Yehofa paŵapite kukusonda Cilambo Celagucisye. Nambope, mkupita kwa ndaŵi paŵayiwonaga yaŵatendaga Yehofa pakwakamucisya mu yakutendekwa yakulekanganalekangana, cikulupi cawo cakusile mnope. Ni ligongo lyakwe Yoswa ŵaŵecete mwakusimicisya mtima kwa Ayisalayeli kuti, “Pangali maloŵe atamose gamo pa maloŵe gambone gosope gaŵaŵecete Yehofa Mlungu jwawo kwa jemanja, ganganigakwanilicikwa.” Kaneko jwalakwe ŵajonjecesye kuti, “Sambano mumjogope Yehofa soni mumtumicile mwagoloka ni mu usyesyene.  . . Nambo une ni ŵam’nyumba jangu, tucimtumicila Yehofa.” (Yos. 23:14; 24:14, 15) M’wejisoni patukulola yindu yambone yakututendela Yehofa, cikulupi cetu cicilimba.—Sal. 34:8.

12. Ana mpaka tulosye catuli kuti tukwete cikulupi cakulimba?

¹² Ana mpaka tulosye catuli kuti tukwete cikulupi cakulimba? Jwakulijiganya Yakobo ŵajanjile ciwusyo celeci paŵatite, “Cinamlosye cikulupi cangu mu yitendo yangu.” (Yak. 2:18) Yitendo yetu mpaka yilosye naga tukwete cikulupi cisyesyene. Kwende tulole yisyasyo.

13. Ana patukulalicila tukusalosya catuli kuti tukwete cikulupi?

¹³ Kamula masengo gakulalicila kuli litala lyambone lyakulocesya cikulupi cetu. Ligongo cici? Ligongo lyakuti patukukamula masengoga tukusalosya cikulupi cetu cakuti mbesi ja cilamboci jiŵandicile soni kuti ‘ngajicelewa.’ (Hab. 2:3) Kuti tumanyilile mwaciŵelele cikulupi cetu, tukusosekwa kulola yatukutenda pa masengo gakulalicila. Mwine mpaka tuliwusye kuti, Ana ngutenda yosope yampaka ngombole pa masengo gakulalicila? Ana ngusapata matala gakonjecesya undumetume wangu? (2 Akoli. 13:5) Kusala yisyene, ‘kuwandisya pelanga ya cikulupusyo’ kuli litala lyambone mnope lyakulocesya kuti tukwete cikulupi mumtima mwetu.—Aŵalanje Aloma 10:10.

14, 15. (a) Ana mpaka tulosye catuli cikulupi paumi wetu?(b) Asale cisyasyo cakulosya kuti cikulupi cikusakamucisya.

 ¹⁴ Patukupilila yakusawusya yatukusasimana nayo tukusalosyasoni kuti tukwete cikulupi. Naga tukusimana ni yakusawusya mpela ulwele, yakutengusya, kulagasika nganisyo, usawuci soni yine yejinji, tukulupilileje kuti Yehofa soni Mwanagwe catukamucisye “pandaŵi jatukusosecela cikamucisyo.” (Ahe. 4:16) Tukusalosya cikulupici mwa Yehofa patukum’ŵenda kuti atukamucisyeje. Yesu ŵasasile kuti mpaka tum’ŵende Mlungu kuti atupe yindu yakucilu, kupwatikapo “cakulya calelo mwakamulana ni cakulya catukusosecela palisikulyo.” (Luk. 11:3) Ngani sine sya m’Baibulo sikusatusimicisya kuti Yehofa mpaka atupe cilicose catukusosecela. Mwambone, pandaŵi jele wula jalesile kugwa ku Yisalayeli, Yehofa ŵampaga Eliya yakulya ni mesi. Baibulo jikusasala kuti, ‘Makungulu gayikaga ni mkate, soni nyama, kundaŵi ni kwigulo kulikose, nipo jwalakwe ŵamwaga mesi m’lusulo.’ (1 Maf. 17:3-6) Tukulupililasoni kuti Yehofa mpaka atupe yatukusosecela.

¹⁵ Tukwete cikulupi cakuti kamulicisya masengo songa sya m’Baibulo mpaka kutukamucisye kupata yindu yatukusosecela. Mlongo jwine jwamlombegwe jwa ku Asia, lina lyakwe Rebecca, ŵayiweni kuti yeleyi yakamucisye liŵasa lyawo. Jemanjaji ŵakamulicisye masengo lilemba lya Matayo 6:33 soni Miyambo 10:4 pa umi wawo mwakuŵika yindu yausimu pamalo gandanda soni kamula masengo mwamtawu. Rebecca ŵasasile kuti ndaŵi jine ŵamkwakwe ŵayiweni kuti masengo gakwe gasokonasyaga usimu wa liŵasalyo mwati ŵasagwile yakugaleka. Nambope, jemanjaji ŵakwete ŵanace mcece ŵaŵasosekwaga kwasamalila. Rebecca ŵasasile yaŵatendaga kuti, “Twatandite kupanganya maswiti ni kusumisyaga. Kwa yaka yejinji, yeleyi ni yayatukamucisyaga kupatila liŵasa lyetu yakusosecela. Twayiwonaga kuti Yehofa nganatuleka. Soni pangali lisiku atamose limo lyatwatemi ni sala.” Ana pakwete pasimene ni yakutendekwa mpela yeleyi yayalimbisye cikulupi cawo?

16. Ana mpaka paŵe yakuyicisya yatuli naga tukulupilila Mlungu?

¹⁶ Tukakayicilaga kuti naga tukuya yakusatusalila Yehofa, yindu yicitujendela cenene. Paulo  ŵakamwile maloŵe ga Habakuku, paŵalembile kuti, “Mundu jwakulungama akusakola umi mwa cikulupi cakwe.” (Aga. 3:11; Hab. 2:4) M’yoyo, yili yakusosekwa mnope kuti tukulupilileje Mlungu jwampaka atukamucisye yisyesyene. Paulo ŵatukumbwisye kuti Mlungu ni “jwampaka akombole kutenda yindu yekulungwa mnope kupunda yosope yampaka tuŵende kapena kuganicisya, mwakamulana ni macili gakwe gagakukamula masengo mwa m’weji.” (Aef. 3:20) Ŵakutumicila ŵa Yehofa akusatenda yosope yampaka akombole pakutenda lisosa lya Yehofa. Nambope, ligongo lyakuti akusamanyilila yakulepela yawo, akusajegamila kwa Yehofa kuti ajaliwe yosope yakutenda. Ana ngatukusasangalala kuti Mlungu jwetu akusatukamucisya?

17. (a) Ana Yesu ŵajanjile catuli ŵandumetume paŵam’ŵendile kuti ŵajonjecesye cikulupi? (b) Ligongo cici mpaka tukulupilile kuti Yehofa catujanje patum’ŵendile kuti atujonjecesye cikulupi?

¹⁷ Yatulijiganyisyeyi mpaka yitutendekasye kupikana mumtima mpela muŵapikanile ŵandumetume paŵam’ŵendile Yesu kuti, “Atujonjecesye cikulupi.” (Luk. 17:5) Yesu ŵajanjile yaŵaŵendileyi pa Pentekosite mu 33 C.E. pandaŵi jaŵapocele msimu weswela wawakamucisye kupikanicisya cenene lisosa lya Mlungu. Yeleyi yalimbikasisye cikulupi cawo. Yakuyicisya yakwe yaliji yakuti ŵatandite kamula masengo gamakulungwa gakulalicila. (Akolo. 1:23) Ana Mlungu mpaka atujanjesoni m’weji patukum’ŵenda kuti atujonjecesye cikulupi? Baibulo jikusatusimicisya kuti mpaka atujanje naga “tukum’ŵenda mwakamulana ni lisosa lya [Mlungujo].”—1 Yoh. 5:14.

18. Ana Yehofa akusiŵajaliwa catuli ŵandu ŵakusakusya cikulupi?

¹⁸ Yehofa akusasangalala ni ŵandu ŵakusamkulupilila mnope. Jwalakwe cacitujanga patum’ŵendile kuti atujonjecesye cikulupi, mwati cikulupi cetu cicikula mnope. Yeleyi yicitukamucisya kuti tuŵe “ŵakuŵajilwa kupocela Ucimwene wa Mlungu.”—2 Ates. 1:3, 5.