NGANI JA PANDANDA | YAMPAKA ATENDE KUTI ALIJIGANYE YEJINJI M’BAIBULO
Yampaka Atende Mkanatande Kuŵalanga Baibulo
Ana mpaka atende yatuli kuti asangalaleje ni kuŵalanga Baibulo soni kuti ajipikanicisyeje? Kwende tulole yindu msanu yayiŵele mkwakamucisya ŵandu ŵajinji.
Atameje pamalo gambone. Alinjeje kupata malo gangali masegwe. Aŵambaleje kutenda yindu yampaka yasokonasye pakuŵalanga Baibulo. Kutama pamalo gakulanguka soni gakupita lipuje lyakwanila mpaka kwakamucisye kupikanicisya mnope yakuŵalangayo.
Akoleje nganisyo syambone pakuŵalanga Baibulo. Ligongo lyakuti Baibulo jili jakutyocela kwa Atati ŵetu ŵakwinani, mpaka jakamucisye mnope naga akwete nganisyo mpela sya mwanace jwakusaŵa jwakoseka kulijiganya kwa nangolo jwakwe jwacinonyelo. Naga akwete nganisyo syakulemweceka pakwamba ya Baibulo, alinje kusityosya ni cakulinga cakuti Mlungu ŵajiganye.—Salimo 25:4.
Apopeleje mkanatande kuŵalanga Baibulo. M’Baibulo mwana nganisyo sya Yehofa, m’yoyo yili yangasimonjesya kuti tukusasosekwa cikamucisyo cakwe kuti tujipikanicisyeje. Mlungu akusatusalila kuti cacipeleka “msimu weswela kwa ŵandu ŵakum’ŵenda.” (Luka 11:13) Msimu weswela mpaka wakamucisye kupikanicisya yakusasaka Yehofa. Mkupita kwa ndaŵi, ucakamucisya kupikanicisya “yindu yakusokoka ya Mlungu.”—1 Akolinto 2:10.
Aŵalanjeje m’litala lyakuti ajipikanicisyeje. Akaŵalangaga kuti agambe kumalisya basi. Aganicisyeje yakuŵalangayo. Pamalisisye kuŵalanga, aliwusyeje yiwusyo mpela ayi: ‘Ana ngulijiganya cici kutyocela kwa mundu jwali mu nganiji? Ana mpaka nayikamulicisye masengo catuli paumi wangu?’
Aliŵicileje yakulinga. Kuti kuŵalanga kwawo Baibulo kuŵe kwakamucisya, akoleje cakulinga cakumanyilila yindu yampaka yakamucisye paumi wawo. Mpaka aliŵicile yakulinga mpela yakuyicisyayi, ‘Ngusaka kulijiganya mnope ya Mlungu.’ ‘Ngusaka mbe mundu jwambone.’ ‘Ngusaka mbe mundu jwambone mu ulombela wangu.’ Kaneko asagule ngani sya m’Baibulo syampaka syakamucisye kwanilisya yakulinga yawoyi. *
Yindu msanuyi mpaka yakamucisye kuti atande kuŵalanga Baibulo. Nambo ana mpaka atende yatuli kuti kuŵalanga Baibulo kwawo kuŵe kwakusangalasya? Ngani jakuyicisya jikusala yindu yine yakamucisya.
^ ndime 8 Naga ngakumanyilila ngani sya m’Baibulo syampaka syakamucisye pa mbali syelesi, Ŵamboni sya Yehofa ali ŵakoseka kwakamucisya.
