ENOKI jwatemi ni umi kwa yaka 365. Yeleyi yili yaka yejinji mnope, pakujigalila yaka yatukusatama masiku agano. Nambo pandaŵijo, Enoki nganaŵa jwamkalambale mnope. Kalakalako, yaka yakupunda 5,000 yipiteyo, ŵandu ŵatamaga ni umi kwa ndaŵi jelewu kulekangana ni apano. Enoki pajwapagwaga, Adamu, mundu jwandanda, jwaliji ali atemi ni umi kwa yaka yakupunda 600. Nambosoni Adamu jwatemi kwa yaka yine yakupunda 300. Yisukulu yine ya Adamu yatemi ni umi kwa yaka yejinji kupunda pelepa. M’yoyo, pa yaka 365, Enoki jwakwetepe macili, mwati yikakombolece kutama ni umi kwa yaka yine. Nambo yeleyi nganiyitendekwa.

Umi wa Enoki waliji pangosi. Awanicisye ali mkum’wona Enoki munganisyo mwawo ali mkutila kuti akajuŵe. Jwalakwe akukumbucilape yiŵatesile ŵandu ali apikene utenga wakutyocela kwa Mlungu uŵasalilaga. Ŵanduwo ŵatumbile mnope, ligongo ŵaŵenganaga najo. Jemanjajo ŵaŵenganagasoni ni utenga wakwe nambosoni Mlungu juŵamtumisye. Ŵanduwo ngamkanakombola kulimbana ni Yehofa, Mlungu juŵamlambilaga Enoki. Nambo akakombwele kum’wulaga Enokijo. Komboleka kuti Enoki jwaganicisyaga naga caciliwonasoni liŵasa lyakwe. Ana jwaganicisyaga ya ŵamkwakwe ni ŵanace ŵakwe ŵacakongwe, kapena mwanace jakwe jwamlume Metusela, kapenasoni cisukulu cakwe Lameki? (Genesis 5:21-23, 25) Ana ciwa cakwe caliji celeci?

Baibulo jangasala yejinji ya Enoki. Ngani jakwe jikusimanikwa m’malemba gamnono. (Genesis 5:21-24; Ahebeli 11:5; Yuda 14, 15) Nambope, malembaga mpaka gatukamucisye kumanyilila kulimba kwa cikulupi cakwe. Ana wawojo ni ŵakusasamalila liŵasa lyawo? Ana pakwete palasile ligongo lyakutenda yindu yambone? Naga yili m’yoyo, mpaka alijiganye yejinji pa cikulupi ca Enoki.

Pajwapagwaga Enoki, ŵandu ŵaliji ali asakele mnope. Jwalakwe jwaliji jwa mpago wa 7 kutandila pa Adamu. Pandaŵiji paliji pali pamasile yaka yamnono kutyocela ndaŵi jele Adamu ni Hawa ŵaliji ŵamlama. Ni ligongo lyakwe ŵandu ŵatamaga ni umi kwa yaka yejinji. Nambope, ndamo sya ŵandu ŵajinji syaliji syakusakala soni ŵaliji ŵakutalicilana mnope ni Mlungu. Ŵandu ŵajinji ŵatendaga yaciwawa. Yindu mpela yeleyi yatandile mu mpago waŵili, pandaŵi jele Kaini ŵam’wuleje Abele juŵaliji mpwakwe. Pandaŵi jine cisukulu cine ca Kaini calilapililaga mnope pakutenda yaciwawa, soni cakwete mtima wakuwucisya kupunda wa Kaini. Mu mpago watatu, ŵandu ŵatandite kutenda cindu cine cakusakala mnope. Ŵatandite kamulicisya masengo lina lya Yehofa pa kulambila kwaunami. Komboleka kuti ŵatendaga yeleyi mwangalicimbicisya.—Genesis 4:8, 23-26.

Kulambila kwaunamiku kwaliji kwakuwanda mnope mu ndaŵi ja Enoki. Jwalakwe pajwakusile jwasosekwaga kusagula yakutenda. Ana akasagwile kuti atendeje yaŵatendaga ŵandu ŵajinji? Kapena ana akasagwile kumsosasosa Yehofa, Mlungu jusyesyene, juŵapanganyisye kwinani ni cilambo? Komboleka kuti Enoki jwalijiganyisye ya cisyasyo cambone ca Abele, juŵawulajidwe ligongo lya cikulupi cakwe pa Yehofa. Yeleyi yamlimbikasisye kuti akuye cisyasyo ca Abele. Lilemba lya Genesis 5:22 likusasala kuti, “Enoki jwajendelecele kwenda ni Mlungu jusyesyene.” Maloŵe gelega gakulosya kuti Enoki jwaliji mundu jwa Mlungu m’cilambo ca ŵandu ŵangayikosya ya Mlungu. Jwalakwe ali mundu jwandanda kumkolanga m’Baibulo kuti jwajendelecele kwenda ni Mlungu.

 Enoki ŵalombele, nambo Baibulo jangasala lina lya ŵamkwakwewo. Lilemba lya Genesis 5:22 lila likusasalasoni kuti Enoki jwajendelecele kwenda ni Yehofa panyuma pakuŵeleka mwanace jwamlume, Metusela. Mwanaceju jwapagwile Enoki ali ni yaka ciŵandika 65. Enoki jwaŵelecesoni “ŵanace ŵacalume ni ŵacakongwe” ŵele Baibulo jangasala ciŵalanjilo cawo. Mtati jwa liŵasa kwikana pakolanjikwa kuti akwenda ni Mlungu, nikuti jwalelaga ŵanace ŵakwe mwakusasacila Mlungu. Enoki jwamanyililagasoni yakusasaka Mlungu kuti jwamlume akaleka ŵamkwakwe. (Genesis 2:24) Nambosoni jwatesile yakomboleka pakwajiganya ŵanace ŵakwe ya Yehofa Mlungu. Ana yakuyicisya yakwe yaliji yatuli?

Baibulo jikusasala yamnono panganiji. Nambo pangani ja cikulupi ca Metusela, mwanace jwa Enoki, Baibulo jangasala cilicose ata panandi. Pa ŵandu wosope ŵakolanjikwa m’Baibulo, Metusela ni juŵatemi yaka yejinji kupunda jwalijose. Jwalakwe jwawile m’caka cicayice cigumula. Nambope, Metusela jwaŵelece mwanace jwamlume lina lyakwe Lameki. Pandaŵiji, Enoki jwaliji ciŵela umi, mwati jwatemipe kwa ya yakupunda 10 kutyocela pajwapagwile Lameki. Lameki jwaŵelece mwanace jwamlume lina lyakwe Nowa. Yeleyi yikugopolela kuti Nowa jwaliji cisukulu cam’mawuja ca Enoki. Ngani ja Lameki jikusalosya kuti pandaŵi jine jwakwete cikulupi. Yehofa jwamtendekasisye Lameki kulocesya yakwamba Nowa. Yakulocesyayi yakwanilicikwe pambesi pa cigumula. Malemba gakusasala kuti Nowa nombenajo jwajesile ni Mlungu, mpela mujwatendele Enoki. Enoki jwawile Nowa mkanapagwe, nambope jwalesile cisyasyo cambone cakulupicika. Komboleka kuti Nowa jwapikene ya cisyasyo celeci kutyocela kwa baba ŵakwe, ŵaŵaliji Lameki, kapena kutyocela kwa anganga ŵakwe, ŵaŵaliji Metusela. Mwinesoni jwapikene kutyocela kwa Yaledi, ŵaŵaliji babagwe Enoki, ŵaŵawile Nowa ali ni yaka 366.—Genesis 5:25-29; 6:9; 9:1.

Aganicisye kulekangana kwa pasikati pa Enoki ni Adamu. Adamu atamose jwaliji jwamlama, nambo jwalemwisye pameso pa Yehofa ni kuyilecela yisukulu yakwe cisyasyo cakusakala cakwimucila soni umi wakutesya canasa. Enoki atamose jwaliji jwangali umlama jwajesile ni Mlungu ni kuyilecela yisukulu yakwe cisyasyo cambone cakulupicika. Adamu jwawile Enoki ali atemi yaka 308. Adamu paŵawile, ana ŵam’liŵasa mwakwe ŵamlisile? Ngatukumanyilila. Nambope Enoki nganatenguka ni yeleyi, mwati “jwajendelecele kwenda ni Mlungu jusyesyene.”—Genesis 5:24.

Naga wawojo akusamalila liŵasa, aganicisye yampaka alijiganye ku cisyasyo cakulupicika ca Enoki. Atamose kuti kuli kwakusosekwa kulipatila liŵasa lyawo yakusosecela yakucilu, nambo cindu cakusosekwa mnope cili kulijiganya ya Mlungu. (1 Timoteo 5:8) Mpaka atende yeleyi mu kaŵecete soni mu yitendo yawo. Naga akusajenda ni Mlungu mpela mujwaŵelele Enoki, pakuya maloŵe ga Mlungu paumi wawo, nikuti cacileka cisyasyo cambone cakuti liŵasa lyawo lisyasyeje.

Komboleka kuti Enoki jwatendaga lipowo ligongo lyakuti jwaliji jika mundu jwakulupicika m’cilambo ca ŵandu ŵangakulupicika. Nambo ana Yehofa, Mlungu jwakwe, jwakuweni kulupicika kwakweku? Elo. Lisiku lyakwanile lyakuti Yehofa aŵecete ni jwakutumicila jwakwe jwakulupicikaju. Mlungu jwampele Enoki utenga wakuti akasalile ŵandu ŵa mu ndaŵi jakwe. Pelepatu, Mlungu jwamtendekasisye jwalakwe kuŵa jwakulocesya, soni jwaliji mundu jwandanda kuti yakulocesya yakwe yisimanikwe m’Baibulo. Tukumanyilila yeleyi ligongo lyakuti pali papite yaka yejinji ciwile Enoki, Yuda  m’balegwe Yesu, jwalongoleledwe kulemba yakulocesya ya Enoki. *

Ana yakulocesya ya Enoki yaliji yatuli? Yaliji yakuti, “Alole! Yehofa jwayice ni malayika gakwe geswela gamajinji kukupeleka cilango, soni kukulamula kuti wosope ŵangajokopa Mlungu asimanikwe ni magambo ligongo lya yitendo yawo yakunyosya Mlungu, nambosoni ligongo lya yindu yosope yakusakala soni yakulemwa yele ŵandu ŵangajokopa Mlungu ŵam’ŵecetele.” (Yuda 14, 15) Apa mpaka ayiwone kuti Enoki jwaŵecete mpela kuti yinduyo yatendekwe kala. Ŵakulocesya ŵajinji ŵaŵapagwile panyuma pa jwalakwe ŵasalagasoni yindu m’litala lyeleli. Yeleyi yigopolela kuti jwakulocesyaju jwaliji jwakusimicisya kuti yinduyo yicitendekwa.—Yesaya 46:10.

Komboleka kuti Enoki jwajendaga ni kwalalicilaga ŵandu ŵaŵampikanilaga. Nambo ana jwalalicilaga ŵandu ŵatuli? Jwalakwe jwasasile kuti ŵanduwo ŵaliji “ŵangajokopa Mlungu” soni kuti yitendo yawo yaliji “yakusakala” nambosoni “yakunyosya Mlungu.” Yakulocesyayi yatendekasisye ŵanduwo kumanyilila kuti, kutyocela mu ndaŵi ja Adamu mpaka pandaŵi jeleji, yitendo yawo yaliji yili yisakele mnope. Ŵanduwo ŵaliji ŵakuti Mlungu cacajonanga pacaciyika ni “malayika gakwe geswela gamajinji.” Enoki mwakulimba mtima jwasasile utenga wa Mlungu, soni pakutenda yeleyi jwaliji jika. Komboleka kuti Lameki ali jwacinondipile ŵam’wonaga Enoki ali mkulalicila mwakulimba mtima. Naga yaliji m’yoyo, nikuti m’weji mpaka tumpikanicisye Enoki.

Cikulupi ca Enoki mpaka citulimbikasye kuliwusya naga tukusayiwona yayikutendekwa m’cilamboci mpela mwakusayiwonela Mlungu. M’wejisoni tukwete utenga watukusosekwa kulalicila mwakulimba mtima mpela Enoki. Mwakamulana ni yaŵalocesye Enoki, Yehofa jwatendekasisye kuti pacilambo cosope payice cigumula cekulungwa. Nambo conasiko celeci catendelaga ciwulili conasiko cekulungwa cacikwisa kusogoloku. (Matayo 24:38, 39; 2 Petulo 2:4-6) Moŵa aganosoni, Mlungu ali jwakoseka yimpepe ni malayika gakwe geswela gamajinji kuti apelece cilango kwa ŵandu ŵakusakala. Jwalijose jwa m’weji akusosekwa kumbucila yeleyi, soni kwasalila ŵane. Ŵamwiŵasa mwetu soni acimjetu mpaka atuŵenjeje. Ndaŵi sine komboleka kulipikana kuti tuli jika. Nambo Yehofa nganamleka Enoki, m’yoyo, jwalakwe ngasiŵaleka ŵakutumicila ŵakwe ŵakulupicika.

Ana umi wa Enoki wamalile kwapi? Jwalakwe jwawile mwakusimonjesya mnope. Panganiji, buku ja Genesis jikusati, “Enoki jwajendelecele kwenda ni Mlungu jusyesyene. Kaneko nganawonekasoni, ligongo Mlungu ŵamjigele.” (Genesis 5:24) Ana Mlungu jwamjigele Enoki mwatuli? Mkupita kwa ndaŵi, ndumetume Paulo jwatite, “Mwa cikulupi, Enoki ŵamsamisye kuti akaciwona ciwa. Jwalakwe nganasimanikwa kulikose ligongo lyakuti Mlungu ŵamsamisye. Pakuŵa mkanamsamisye, ŵamtendele umboni wakuti jwatesile yakumsangalasya Mlungu.” (Ahebeli 11:5) Ana Paulo pajwaŵecete kuti “Enoki ŵamsamisye kuti akaciwona ciwa” jwagopolelaga cici? Mabaibulo gane gakusati yigopolela kuti Mlungu jwamjawisye Enoki kwinani. Nambo yeleyi ngaŵa yisyene. Baibulo jikusalosya kuti Yesu Klistu ni juŵaliji jwandanda kwimuka kuŵawe ni kwawula kwinani.—Yohane 3:13.

Sano, ana Enoki “ŵamsamisye” catuli kuti “akaciwona ciwa”? Yehofa jwatyosisye umi wa Enoki mwati nganapikana kupweteka paŵawaga. Jwatesile yeleyi ni cakulinga cakuti ŵandu ŵakusisya akam’wulaga mwangalwe. Nambo mkaniyitendekwe yeleyi, “ŵamtendele umboni wakuti jwatesile yakumsangalasya Mlungu.” Mwatuli? Enoki mkanawe, komboleka kuti Mlungu jwamlosisye mesomkulola ga cilambo capasici  cili paladaiso. Pambesi pakumlosya yeleyi, Enoki jwawile. Pakwamba ya Enoki ni ŵandu ŵane ŵakulupicika, ndumetume Paulo jwalembile kuti, “Wosopeŵa ŵawile ali akwete cikulupi.” (Ahebeli 11:13) Kaneko, komboleka kuti acimmagongo ŵakwe ŵawungunyisye mtembo wakwe, nambo ‘nganiwusimanikwa kulikose.’ Mwine Yehofa jwawusicile kwakusisika kuti ŵanduwo akawujonaga kapena kuwukamulicisya masengo pakulambila kwaunami. *

Yindu yatusasileyi mpaka yitukamucisye kuganicisya yayatendekwe kumbesi kwa umi wa Enoki. Awanicisye kuti akuyiwona yosope yayamtendecele Enoki, nambo akaliŵalila kuti pangali cilicose cakatesile pakulikulupusya kulekapo Mlungu ali ajinjilile. Awanicisye kuti akum’wona Enoki ali mkutila, nambo asigele panandi kupela. Acimmagongo ŵakwe akum’wutusya ali atumbile mnope ligongo lya utenga waŵalalicilaga. Enoki akwika panepakwe ni kuuŵa kuti apumule panandi, nambo akumanyilila kuti ngakombola kutila palutando lwelewu. Jwalakwe asigele panandi kuwulajidwa mwangalwe. Pakupumula, akupopela kwa Mlungu. Ali atesile yeleyi akupikana mtendele wamumtima. Kaneko Mlungu akumlosya mesomkulola gakutesya lung’wanu ga cilambo capasi cili paladaiso ni akuliwanicisya ali m’cilambomo.

Awanicisye kuti akum’wona jwalakwe ali mkusimonga mnope pakukuwona kulekangana kwa cilambo cakutama ni cilambo cakuciwonaco. Kusalala kwa cilamboco akukuwanicisya ni mgunda wa Edeni, wawakwete malayika gakolanjikwa kuti akelubi gagacenjelaga mgundawo kuti ŵandu akajinjilamo. Nambo cilambo cakuciwonaci nganicikola akelubi, nambosoni cigumbele ni acalume soni acakongwe ŵakwete yilu yambone soni yamacili. Ŵanduwo ali pamtendele, kwangali uŵengani wakwika ligongo lya lusagu atamose kulagasika ligongo lya dini, mpela yaŵele ali mkuyiwona. Yeleyi yikumtendekasya Enoki kusimicisya kuti Yehofa akumnonyela soni akusangalala najo. Jwalakwe akuŵa jwakusimicisya kuti lisiku line cacitama m’cilambo celeci mpaka kalakala. Pakwendelecela kupikana mtendele wamumtima, kaneko akuwugala meso ni kugona, ciwa cakwe ni kuŵa cicoco.

Kutyocela pandaŵi jeleji mpaka apano jwalakwe agonile mu ciwa. Yehofa Mlungu jwakwete macili gakupunda pakumbucila, akumkumbucila cenene jwalakwe. Mpela mwaŵaŵecetele Yesu, jikwisa ndaŵi jele ŵandu wosope ŵakwakumbucila Mlungu cacipikana maloŵe ga Klistu ni cacijimuka m’malembe. Ŵanduŵa cacijimucila m’cilambo capasi cakusalala soni camtendele.—Yohane 5:28, 29.

Ana wawojo akusaka kuti casimanikwe m’cilambo celeci? Aganicisye ya yindu yakusangalasya yatucilijiganya kutyocela kwa Enoki! Jwalakwe cacitusalila yisyesyene yakwe pangani josope jakwamba mwaŵawilile. Nambo atamose yili m’yoyo apano mpaka tulijiganye cindu cine cakusosekwa kutyocela kwa jwalakwejo. Paulo pajwamalisisye kutagulila ya Enoki, jwasasile kuti, “Naga ngakola cikulupi ngakomboleka kumsangalasya Mlungu.” (Ahebeli 11:6) Ligongo lya yeleyi, tukusosekwa kumsyasya Enoki mwakuŵa ŵakulimba mtima pakulosya cikulupi!