Baibulo jili jakulekangana ni mabuku gane ligongo jikwete maloŵe gakutyocela kwa Mkupanganya jwetu. (2 Timoteo 3:16) Utenga wakwe uli wakusosekwa mnope. Ni ligongo lyakwe jikusati, “Maloŵe ga Mlungu gali ga umi soni gamacili.” (Ahebeli 4:12) Baibulo jikwete macili gakutukamucisya paumi wetu m’matala gaŵili gekulungwakulungwa. Jikusatulongolela paumi wetu wa lisiku lililyose soni kutukamucisya kummanyilila Mlungu ni yilanga yakwe.—1 Timoteo 4:8; Yakobo 4:8.

Jikusatukamucisya paumi wetu. Baibulo mpaka jimkamucisye mundu jwalijose pajika. Jikusakamucisya pa yindu yakuyicisyayi.

• Kuŵa paunasi wambone ni ŵandu ŵane.—Aefeso 4:31, 32; 5:22, 25, 28, 33.

• Kola cilu cambone soni kuti tukalagaga nganisyo.—Salimo 37:8; Miyambo 17:22.

•   Kola ndamo syambone.—1 Akolinto 6:9, 10.

• Kulimbicila masengo.—Miyambo 10:4; 28:19; Aefeso 4:28. *

Liŵasa line lyacinyamata lya ku Asia likusayamicila mnope yajikusasala Baibulo. Mwakulandana ni maŵasa gejinji gasambano, liŵasali lyalepelaga kupikanicisyana soni gopocelana. Nambo kaneko lyatandite kamulicisya masengo yajikusasala Baibulo. Ana yakuyicisya yakwe yaliji yatuli? Vicent, jwamlume jwam’liŵasali jwatite, “Yinaŵalangaga m’Baibulo yangamucisye kumalana ni yakusawusya ya m’liŵasa lyetu m’litala lyacinonyelo. Kuya yajikusasala Baibulo kutukamucisye kuŵa ŵakusangalala.” Annalou, jwamkongwe jwam’liŵasali jwajiticisye kuti, “Kulijiganya yisyasyo ya m’Baibulo kwatukamucisye. Sambano ngusasangalala soni ndili jwakwikutila ni yakulinga yetu mpela liŵasa.”

Jikusatukamucisya kummanyilila cenene Mlungu. Vicent jwasasilesoni kuti, “Kuŵalanga Baibulo kukusangamucisya kulipikana kuti ndili paunasi wakulimba ni Yehofa kupunda ni kala kose.” Mwakamulana ni yaŵasasile Vicent, Baibulo mpaka jakamucisye kummanyilila cenene Mlungu. Pambesi pakwe, Maloŵe gakwe mpaka gakamucisyeje, soni Mlungu mpaka aŵe mjawo jwapamtima. Nambosoni caciyiwona kuti jwalakwe akusasalaga yindu yakusangalasya ya msogolo. Ndaŵi jeleji cacisangalalaga ni ‘umi usyesyene’ soni wangamala. (1 Timoteo 6:19) Pangali buku jinesoni jampaka jitusalile yeleyi.

Naga akwendelecela kuŵalanga Baibulo, jicakamucisya paumi wawo, soni cacimmanyilila cenene Mlungu. Nambope, pacaŵalanjeje Baibulo komboleka kuti cacikola yiwusyo. Naga yili m’yoyo, akumbucileje cisyasyo ca nduna ja ku Itiyopiya jijapali yaka ciŵandika 2,000 yipiteyo. Jwalakwe jwakwete yiwusyo yejinji yakwamba Baibulo. Paŵam’wusisye naga jwakupikanicisya yaŵalasilejeyo, jwatite, “Ana mpaka mbikanicisye catuli pali pangali mundu jwakungamucisya?” * Kaneko mwakusacilila, jakundile cikamucisyo kutyocela kwa mundu jwakombola kwiganya ya Baibulo lina lyakwe Filipo juŵaliji jwakulijiganya jwa Yesu. (Masengo 8:30, 31, 34) Naga akusaka kumanyilila yejinji yakwamba Baibulo, tukwalimbikasya kuti aŵende lijiganyo lya Baibulo kupitila pa webusayiti ja www.ps8318.com/yao kapena atumisye cikalata ku jimo mwa maadilesi gagali papeji jaŵili m’magasiniji. Mpaka ŵamanyisye Ŵamboni sya Yehofa kapena ajawule ku Nyumba ja Ucimwene ja mumkuli mwawo. Wuli apano atande kuŵalanga Baibulo soni kujikunda kuti jalongoleleje paumi wawo?