Napagwile mumkuli wa Paddington wawuli mu msinda wa London, ku England. Natamaga ni mama pampepe ni acakuluŵangu ŵatatu. Baba ŵamwaga mnope ukana soni nganatamilisyaga pamlango. Ligongo lya yeleyi, ŵatutisile.

Panaliji mwanace, mama ŵanjiganyisye kuti mbopeleje cilo cilicose. Nakwete kabaibulo kamwana kakola buku ja Masalimope, soni nalinganyisye tunyimbo kutyocela m’maloŵe ga m’kabaibuloka. Ngukumbucila kuti pakwete pimbalasile m’buku jinejakwe maloŵe gakuti, “Lisiku line cilicose cicimala.” Maloŵega gandendekasyaga kulepela gona ligongo lyaganicisya mnope yindu yamsogolo. Nambo nganisakaga kuwa! Mwati mumtimamu natiga, ‘Umiwu ukwete cakulinga cakwe. Uli uneji napali?’

Natandite kulupilila yamisimu. Nalingaga kuŵecetana ni ŵawe, najawulaga kumalembe ni acimjangu ŵakusukulu, soni twanonyelaga kulolela mafidiyo gakogoya. Mafidiyoga gatusangalasyaga nambo pane gakutesyaga woga.

Panaliji ni yaka 10 natandite kutenda yangalondeka. Natandite kwemba sona, mwati cagambile kuŵa cisyoŵe. Kaneko mpaka natandite kwemba camba. Panakwanisyaga yaka 11, naliji ndili ndandite kala kumwa ukana. Nganinawupikanaga kunong’a, nambo nasangalalaga ni kolelwa. Nanonyelagasoni nyimbo ni kuŵina. Najawulaga ku bala soni kumadisiko cilo mwagwala ni kuwujaga kundaŵindaŵipe mkanikuce. Pakucele, nganinjawulaga kusukulu ligongo lyakupela ni kucesya. Nambo masiku gakuti nganinjesyaga, pambite kusukulu, nanonyelaga kumwa ukana pabuleki.

Panalembile mayeso ga fomu 4, nganingombola cenene. Ligongo lya yeleyi, mama ŵamanyilile kuti natendaga yangalondeka. Mamawo yasakalisye kwabasi mwati twakangene mnope. Kaneko nagambile kutyoka pamlango. Najile kutama ni uganja wangu, lina lyakwe Tony, juŵaliji lasi. Jwalakwe jwanonyelaga kwiŵa, soni kusumisya mitela jakusokonasya mtwe. Nambosoni jwaliji ni mbili jakuti ali jwangalwe. Mkupita kwa ndaŵi, nakwete citumbo, mwati naŵelece mwanace jwamlume ndili ni yaka 16.

Nasimene ni Ŵamboni sya Yehofa kandanda panatamaga ku nyumba syakusunjila acakongwe ŵanganaŵa peŵasa pampepe ni ŵanace ŵawo ŵacinandipile. Boma jambele malo kweleko gakuti ngoneje. Acakongwe ŵaŵili Ŵamboni sya Yehofa ŵayikaga kumaloku kukulijiganya Baibulo ni ŵane. Lisiku line, natandite kutagulilana nawo ya Maloŵe ga Mlungu. Cakulinga cangu caliji cakuti nawusye yiwusyo yejinji kuti nagomece. Nambo ŵanjanjile yiwusyo yangu yosope mwakuwusimana mtima kutyocela m’Baibulo soni mwakupikanika cenene. Ligongo lya yeleyi, najiticisye kuti nalijiganyeje nawo Baibulo.

Pandaŵi jeleji nalijiganyisye cindu cinecakwe cacacenjile umi wangu. Kutandila ndili mwanace, najogopaga kuwa. Nambo nasangalele kulijiganya m’Baibulo kuti Yesu cacajimusya ŵawe. (Yohane 5:28, 29) Nalijiganyisyesoni kuti Mlungu akusasamala ya une. (1 Petulo 5:7) Maloŵe ga pa Yeremiya 29:11 gangwayiye mnope mumtima. Gakusati, “Yehofa akusala kuti, ‘Une ngumanyilila cenene yangwaganicisya jemanja. Nguganisya yakwapa mtendele ngaŵaga yisawusyo kuti akole sogolo jambone, soni cembeceyo.’” Natandite kulupilila kuti mpaka ngole cembeceyo cakutama m’Paladaiso pacilambopa mpaka kalakala.—Salimo 37:29.

Ŵamboni sya Yehofa ŵanonyelaga kutyocela pasi pamtima. Panapite kumisongano kwawo kandanda, nakuweni kuti kuli kwa bata nambosoni ŵandu ŵakwe ŵaliji ŵakungulucika. (Yohane 13:34, 35) Nambo kucalici kwetu nganinayiwonaga yeleyi. Ŵamboni ŵambocele ni magasa gaŵili. Twakungulwice cenene, soni ŵasalile yindu yakamucisya. Pandaŵiji nalipikanaga kuti ndili m’liŵasa limo lyekulungwa lyakunonyelana.

Panalijiganyisye ya ndamo syambone syakusasaka Mlungu, nayiweni kuti ngusosekwa kucenga umi wangu. Kuleka kwemba sona kwaliji cindu cakusawusya kwabasi. Nayiwenisoni kuti pangupikanila nyimbo sine, nasacililaga mnope kwemba camba, m’yoyo nalesile kupikanila nyimbosyo. Pakogopela kolelwa, nalesile kwawula ku mabala ni ku madisiko. Napatilesoni acimjangu ŵasambano ŵampaka animbikasye kola ndamo syambone.—Miyambo 13:20.

Pandaŵiji, Tony, uganja wangu ula, walijiganyagasoni Baibulo ni Ŵamboni sya Yehofa. Ŵamjangaga yiwusyo yakwe kutyocela m’Baibulo, mwati jwatandite kuyiwonasoni kuti akulijiganya usyesyene. Tony jwacenjile umi wakwe. Jwalesile wiyi, kwemba camba, soni kunguluka ni acimjakwe ŵaciwawa. Kuti tumsangalasyeje Yehofa cenene, soni kuti mwanace jwetu akule cenene, twaganisisye yakuti tulombane mwakuya malamusi. M’yoyo twalombene mu 1982.

Ngukumbucila ndili mkuwungunya ngani sya m’magasini ja Sanja ja Mlonda ni ja Ajimuce! * syasikusasala ya ŵandu ŵaŵakombwele kucenga umi wawo. Unesoni nasosekwaga kucenga umi wangu. Yisyasyo ya jemanjaji yanimbikasisye mnope kuti ngawujila munyuma. Napopelaga kwa Yehofa kuti akandeka. Une ni Tony twabatiswe mu 1982.

Kuŵa paunasi wakulimba ni Mlungu kwakulupwisye umi wangu. Une ni Tony tuyiweni kuti Yehofa atukamucisye pandaŵi ja yipwetesi. Tulijiganyisye kumjegamila Yehofa patusimene ni yipwetesi, soni tukulipikana kuti jwalakwe akusatukamucisya ndaŵi syosope pakulisamalila liŵasa lyetu.—Salimo 55:22.

Waliji upile wangu kwakamucisya ŵanace ŵetu ŵaŵili, jwamlume ni jwamkongwe kuti ammanyilile Yehofa mpela munatendele une. Sambano ndili jwakusangalala kuyiwona yisukulu yangu nombe nayo yili paunasi wakulimba ni Mlungu.

Sambano ngulupata lugono, soni jwangajogopa ya msogolo kapena ciwa. Tony ni une cijuma cilicose tukusajawula kumipingo jakulekanganalekangana ja Mboni sya Yehofa kukujilimbikasya. Tukusakamula yimpepe masengo gakwajiganya ŵane kumkulupilila Yesu, kuti nombe nawo casangalale ni umi wangamala msogolo.