AŴEJE MESOPE
Tusimene ni Yakusawusya Yejinji M’chaka cha 2022—Ana Baibulo Jikusasala Yamtuli?
M’chaka cha 2022, tuŵele tuli kupikana mnope ngani syakwamba ngondo, kusawusya kwa mbiya nambosoni konasika kwa chilengedwe. Nambotu Baibulope ni jajikusasala ngopolelo jisyesyene ja yindu yayikutendekwayi.
Ana yayitendekwe mu 2022 yikugopolela chichi kusyesyene?
Yakusawusya yejinji yatusimene nayo m’chaka chimasile, uli umboni wakuti tukutama mundaŵi jele Baibulo jikusati “masiku gakumalisya.” (2 Timoteyo 3:1) Mwamti ndaŵiji jatandite mu 1914. Alole kukamulana kwakupali pasikati pa yindu yajasasile Baibulo ni yindu yayikutendekwa masiku agano:
“Ngondo.”—Mateyu 24:6.
“Chaka cha 2022 Chaliji Chaka Chele Ŵandu ŵa ku Europe Ŵasimene ni Yakusawusya Yejinji Yayayiche Ligongo Lyakutandilasoni kwa Ngondo.” a
Alole ngani jakuti, “Asilikali ŵa Chilambo cha Russia Ajinjile m’Chilambo cha Ukraine Kukuputa Ngondo.”
“Sala.”—Mateyu 24:7.
“Chaka cha 2022 Chaliji Chaka Chele Kwapali Sala Jakogoya.” b
Alole ngani jakuti, “Ngondo ja ku Ukraine Jitendekasisye Kusoŵa kwa Yakulya Pachilambo Chosope.”
“Milili.”—Luka 21:11.
“Ulwele wa poliyo watandilesoni. Ulwele wa monkeypox walagasisye ŵandu. Konjechesya pelepa ulwele wa COVID-19 ukupitilisya kwalagasya mnope ŵandu. Yeleyi yikulosya kuti yilwele yakupelegana yili yakogoya mnope nambosoni yili yangasawusya kwapela ŵandu ŵane.” c
Alole ngani jakuti, “Ŵandu 6 Miliyoni Awile ni Ulwele wa COVID.”
“Yakutesya woga.”—Luka 21:11.
“Kwatesile chilala, moto wakogoya, kusewuchila kwa mesi, nambosoni chilambo chapasi chatesile mnope chitukuta. Kuchenga kwa nyengoku kwatendekasisye kuti nyengo jachitukuta mnope ja m’chaka cha 2022 jiŵe jangaliŵalichika ligongo lya yindu yejinji yayajonasiche. Mwamti ŵandu masawusande gejinji ŵawile soni ŵandu ŵane mamiliyoni ŵasoŵile malo gakutama.” d
Alole ngani jakuti, “Pachilambo Chosope Pakuŵaga Nyengo ja Chitukuta Mnope.”
“Yipolowe [kapena kuti, “yachiwawa,” maloŵe gamwiŵanda].”—Luka 21:9.
“M’chaka cha 2022 ŵandu ŵajinji ŵatumbile mnope ligongo lya kusawusya kwa mbiya, mnopemnope pangani ja kukwela mitengo kwa yindu. Yeleyi yatendekasisye kuti ŵanduŵa atende yachiwawa yejinji yakulosya ungakamulana ni yagakutenda maboma.” e
Alole ngani jakuti, “Yajikusasala Baibulo Pangani ja Kukwela Mitengo kwa Yindu Ligongo Lyakunandipa Machili kwa Mbiya.”
Ana chaka chamalaŵi kuchiŵa yamtuli?
Pangali jwampaka asale mwakusimichisya yayichitendekwa m’chaka cha 2023. Yatukumanyilila ni yakuti pamkaŵapa, Uchimwene wa Mlungu kapena kuti boma jakwinani chijichenje mnope yindu pachilambopa. (Daniele 2:44) Bomaji jichimasya yayikusatendekasya kuti ŵandu alajeje soni jichilolechesya kuti chakulinga cha Mlungu chikutendekwa pachilambo chapasi.—Mateyu 6:9, 10.
Tukwalimbikasya kuti apikanileje malangiso ga Yesu Klistu soni ‘aŵeje mesope’ pakuyiwona yayikutendekwa pachilambopa yili mkwanilisya yakulochesya ya m’Baibulo. (Maliko 13:37) Aŵechetane ni m’weji kuti amanyilile yejinji yakwamba Baibulo yampaka yakamuchisye wawojo apano, soni yampaka yikamuchisye liŵasa lyawo kola chembecheyo chisyesyene cha sogolo jambone.
a Ngani ja Chisungu jiŵalembile Jill Lawless jakuti, AP News, “2022 Was Year the Horror of War Returned to Europe,” by Jill Lawless, December 8, 2022.”
b Ngani ja Chisungu jakuti, World Food Programme, “A Global Food Crises.”
c Ngani ja Chisungu jiŵalembile Lawrence O. Gostin, JD pa Sepitemba 22, 2022 jakuti, “Living in an Age of Pandemics—From COVID-19 to Monkeypox, Polio, and Disease X,” JAMA Health Forum)
d Ngani ja Chisungu jiŵalembile Martina Igini pa Okotoba 24, 2022 jakuti, Earth.Org, “What’s Behind the Record-Breaking Extreme Weather Events of Summer 2022?”
e Ngani ja Chisungu jaŵalembile Thomas Carothers soni Benjamin Feldman pa Disemba 8, 2022 jakuti, Carnegie Endowment for International Peace, “Economic Anger Dominated Global Protests in 2022.”
You May Also Like
SANJA JA MLONDA
Mlungu Camasye Yipwetesi Yosope Pacangakaŵapa
Ana tukumanyilila camtuli kuti Mlungu camasye yipwetesi yosope soni yindu yangali cilungamo pacangakaŵapa?
ESSENTIAL BIBLE TEACHINGS
Ana Uchimwene wa Mlungu Uli Chichi?
Pa utumiki wakwe wosope, Yesu ŵajiganyisye mnope ngani jakwamba Uchimwene wa Mlungu kupunda ngani sine. Kwa yaka yejinji ŵandu aŵele ali mkuwupolela Uchimwenewu kuti uyiche.
NGANI SINE
Chembecheyo Chisyesyene Chikusatukamuchisya Kola Sogolo Jambone
Ana ligongo chichi yajikusasalaga Baibulo yikusaŵaga yakulekangana ni yakusatusalilaga ŵandu pakwamba yamsogolo?
