Mundaŵi ja ung’asi wa Olimpiki mu chaka cha 2024,ŵandu chiŵandika 5 biliyoni chachilolela ung’asi wa Olimpiki kutyochela myilambo yakwana 206. Pulesidenti jwa mu Komiti jakulola ya Olimpiki pachilambo chosope Thomas Bach jwasasile kuti, “M’weji tuli nawo mu chakukutendekwa cha mtendele chachikusichakamulanya ŵandu pachilambo chosope. Kwende wosopeŵenewe tusangalale ni Ung’asi wa Olimpikiwu wawukusatukamulanya soni kutukamuchisya kuti tuŵe pamtendele.”

 Nambo ana yilli yisyene kuti Ung’asi wa Olimpiki mpaka ukombole kwikasya mtendele? Ana pana chembecheyo chakuŵa pamtendele soni mkamulano usyesyene?

 Ung’asi wa Olimpiki wa chaka achino watendekasisye ŵandu kuganichisya yejinji kupunda pa masaŵela pega. Mang’asiga katendekasisye ŵandu kuganichisya mnope ya ndale yayikusiyagaŵikanganya ŵandu. Yeleyi yikupwatikapo maufulu ga ŵandu, kulekangana kwa mitundu, dini nambosoni kulekangana pasikati pa ŵalume ni ŵakongwe.

 Atamose kuti ung’asiwu ukusaŵa wakwasangalasya ŵandu, nambo mmalo mwa kwakamulanya ŵandu ukusalimbikasyaga lusagu.

 Baibulo jasasile mkanipaŵe ndamo syasikusisyalepekasya ŵandu kuti aŵeje ŵakamulana masiku agano. (2 Timoteyo 3:1-5) Kuti amanyilile yejinji yakwamba yakulochesya yeleyi, aŵalanje ngani ja Chichewa ja mtwe wakuti “Kodi Baibulo Linaneneratu za Mmene Anthu Adzidzaganizira ndi Kuchitira Zinthu Masiku Ano?”

 Baibulo jikusasala ya chembecheyo chisyesyene chakuti ŵandu chachiŵa ŵakamulana soni kuŵa pamtendele. Jikusasala kuti ŵandu pa chilambo chosope chachiŵa ŵakamulana pasi pa ulamusi wa boma jakwinani ja “Uchimwene wa Mlungu.”—Luka 4:43; Mateyu 6:10.

 Mwenye jwa Uchimwenewu, Yesu Klistu, chachiyikasya mtendele pa chilambo chosope. Baibulo jikusati:

•   “Mtendele uŵe wejinji . . . ni yindu yakupochela ŵandu kutyochela kwa Mlungu yitupe.”—Salimo 72:7.

•   “Tachimkulupusya jwakusoŵa jutachigumilagajo . . . Tachikulupusya umi wawo ku ŵandu ŵawukali ni ŵakwasawusya.”—Salimo 72:12, 14.

 Atamose masiku agano yindu yaŵajiganyisye Yesu yakamulenye ŵandu mamiliyoni gejinji ŵakutyochela myilambo yakwana 239 . Mboni sya Yehofa pachilambo chosope chapasi silijiganyisye kutama mwamtendele. Kuti amanyilile yejinji yakwamba yeleyi, aŵalanje Nsanja ja Mlonda ja mtwe wakuti “Yampaka Tutende Kuti Tuleche Kwaŵenga Ŵane.”