Ku madela kwele ngondoji jikutendekwa mnope, mpela mtawuni ja Mariupol, yindu mpela magesi soni intaneti soni matelefoni ngayikukamula masengo. Mawindo ga Nyumba syejinji gajonanjidwe. Yakulya ni mesi yitandite kunandipa. Abale ni alongo ŵakupunda 2,500 akulepela kutila ku Mariupol. Nambo m’matawuni gamnono, mpela tawuni ja Bucha, Chernihiv, Hostomel, Irpin, Kyiv, soni Sumy, ŵandu ŵane ŵakombwele kutila. Yeleyi yikamuchisye kuti abale ni alongo atilile ku malo gambone.

Jwamkulungwa jwa mumpingo soni jwali mpainiya jwa yaka 36, jwakusatama ku Hostomel, jwakombwele kutila ni ŵamkwakwe soni achinangolo ŵakwe. Jwalakwe akulondesya ya ngondo jajikutendekwa mu tawuni ja kumangwakwe kuti:

“Ndege syagulukaga chiŵandika nyumba jetu. Yigalimoto ya Asilikali yajendaga m’misewu ndaŵi syosope. Asilikali ŵane ŵajinjile m’nyumba mwetu soni pandaŵiji twaliji mu chipinda chapasi. Msilikali jumo jwagombele wuti kwa maulendo gejinji mwamti yipolopolo yakwe yagwilaga pachikwama cha mama ŵangu, nambo nganiyituwulasya. Kwa maawala chiŵandika gatatu kapena mcheche, nganitujenda kapena kutenda masegwe galigose. Pandaŵiji asilikali ŵaliji mkuwulisya mabomba soni kugombelana. . . . Kundaŵi kwakwe patwatilaga, ngondo jatandite chiŵandika ni kumangwetu. Mwamti yikasinja yaliji palipose m’misewu . . . Yaliji yakogoya kwabasi, nambo kwamba kutama kukoko ni kwakwaliji kwakogoya mnope.

“Yindu yeleyi yitendekasisye kuti umi wetu uchenje mnope. Mwamti yitujiganyisye kukamulichisya masengo mfundo syakulekanganalekangana sya m’Baibulo. Mwachisyasyo, tulijiganyisye kuti ngatukusosekwa kudandawula ni ya malaŵi. Tulijiganyisyesoni kuti tukusosekwa kwikutilaga ni yindu yakusosekwa mnope yatukwete paumi wetu soni kumdalilaga mnope Yehofa mundaŵi jakusawusya mnope.”

Tukumanyilila kuti Mlungu jwetu Yehofa, akumanyilila soni akuyiwona yakusawusya yosope yakusimana nayo abale ni alongo ŵetu ku Ukraine. Jwalakwe ngasalepela kwakamuchisya jemanjaji.—2 Petulo 2:9.

Pakwikanaga pa 10 Malichi, 2022, twaliji tuli tupochele yiŵalanjilo yakuyichisyayi kutyochela ku Ukraine:

• Ŵakulalichila ŵakwana ŵaŵili ŵawile

• Ŵakulalichila ŵakwana 8 ŵawulele

• Ŵakulalichila ŵakwana 25,407 ŵatisile m’nyumba syawo ni kuja kupata malo gambone gakutama m’chilambo mwawo pemo

• Nyumba syakwana 25 syagumulidwe mwamti ngaŵa mkutamamo

• Nyumba syakwana 59 syajonanjidwe mnope

• Nyumba syakwana 222 syajonanjidwe panandi

• Nyumba sya Uchimwene syakwana 7 syajonanjidwe

• Makomiti Gakamuchisya Pasitendekwe Ngosi gakwana 27 gakukamuchisya ku Ukraine

• Makomitiga gakamuchisye ŵakulalichila ŵakwana 10,566 mwakwapatila malo gambone gakutama

• Ŵakulalichila ŵakwana 9,635 ŵatilile m’yilambo yine mwamti ŵakulupilila achimjawo akwakamuchisya