Pakwikanaga mu Januwale 2024, pamasile yaka 100 kutyochela pele magasini ja Sanja ja Mlonda jatandite kukopoka mu chiŵecheto cha Chiyukileniya. Ngani syambone syayiche mchilambo cha Ukraine cha kundanda kwa chaka cha 1891, mwamti ŵandu ŵajinji ŵapikanile mwachidwi utenga wa m’Baibulo. Pali pamasile yaka, ŵandu ŵajinji ŵakuŵecheta Chiyukileniya ŵatandite kusinonyela mfundo sya m’Baibulo. Nambope, ligongo lyakuti ku Ukraine kwaliji yakusawusya yandale, chili chimasile chaka cha 1900, ŵandu ŵajinji ŵakuŵecheta Chiyukileniya ŵatilile m’yilambo yine mnopemnope ku Canada ni ku United States.

Mu 1923, M’bale J. F. Rutherford ali ajawile ku Canada, ŵamŵendile M’bale Emil Zarysky jwele achinangolo ŵakwe ŵatyochele ku Ukraine kuti akakamuchisye kugopolela Sanja ja Mlonda mu Chiyukileniya. Emil ŵaliji ali agambile kutanda kutumichila pa utumiki wa upayiniya (pandaŵijo linali lyakolanjidwaga kuti akopotala) soni ŵatumichilaga pa utumiki wa jwakulolela dela (pandaŵijo linali lyakolanjidwaga kuti jwakulolela jwakwendajenda). Emil ni ŵamkwakwe Mariya ŵakwete yaka 5. Nambope, Emil jwajitichisye yele M’bale  Rutherford jwamŵendile, mwamti Sanja ja Mlonda jandanda ja Chiyukileniya jakopweche mu Januwale 1924. Emil jwakamwile mwakulupichika masengo gagopolela kwa yaka 40. Mwanache jwakwe jwamkongwe lina lyakwe Rose jwatitepitilisye kukamula mwakulupichika masengo gakugopolela kwa yaka 40. Mwamti mwanache jwakwe jwamkongwe lina lyakwe Rose jwatite, “Changukumbuchila kwejinji ni masegwe ga machini gele baba ŵangu ŵagakamulichisyaga masengo pakutayipa, gele gapikanikaga m’nyumba mwetu.”

Mu 1964, Emil ŵamjiganyisye M’bale Maurice Saranchuk ni ŵamkwakwe Anne kukamula masengo gagopolela Sanja ja Mlonda mu Chiyukileniya. Liŵasali lyakamwile masengoga mwakulipeleka soni ndaŵi sine ŵakamulaga masengo gagopelelaga ali atemi kunyuma kwa galimoto jawo pandaŵi jakupumula pali kumasengo gakulembedwa. Pali papite ndaŵi, palinganyidwe dongosolo jakuti akamulichisyeje masengo chipinda chamwana ku Nyumba ja Uchimwene kuti chiŵe mpela ofesi jagopolela mabuku. Mu 1977, liŵasa lya a Saranchuk lyaŵilanjidwe kuti likatumilichileje ku Nyambi ja ku Canada. Mkupita kwandaŵi, abale ŵane ŵa pa nyambiji ŵaŵaŵechetaga Chiyukileniya ŵajiganyidwe kuti agopoleleje mwakulondola Sanja ja Mlonda nambosoni mabuku gane gakusala ya Baibulo.

Chakumbesi kwa chaka cha 1940, masengo ga ŵa Mboni sya Yehofa ku Soviet Union ŵagalekasisye. Kwa yaka yejinji yele masengo getu ŵaliji ali agalekasisye, abale ŵetu ŵapatile matala gasambano gakutumichisya Sanja ja Mlonda soni mabuku gane ga Chiyukileniya ku Ukraine. Mabukuwa akafika ku Soviet Union, abale ŵagakopelaga mwakusamala ni kugagaŵa kuti abale wosope apochele chakulya chausimu. Kaneko ulamusi wa Soviet Union pawamasile mu 1991, abale ni alongo ŵetu ku Ukraine ŵatandilesoni kumtumichila Mlungu mwaufulu. Pangakaŵilisya, gulu ja ŵagopolela mu Chiyukileniya ŵajitamilikasisye ku ofesi ja nyambi ja ku Germany. Pali papite ndaŵi, ŵagopolelaŵa ŵasamile ku Poland mwamti ŵatemi kweleko mpaka pele ofesi ja nyambi jasambano ja ku Ukraine jamasile kutaŵidwa mchaka cha 2001. Mlongo jwine jwaŵele ali mkukamula masengo gagopolela kwa mu Chiyukileniya kwa yaka 30 jwaŵechete kuti,“Abale ni alongo ŵaŵatandite kugopolela, kukopela soni kugaŵila Sanja ja Mlonda ŵakamwile masengo gakuchimbichika gagakamuchisye kuti ŵandu ŵajinji ajinjile m’gulu ja Yehofa masiku agano. Pangukamula apano masengoga, ngusalimbikasidwa kwejinji panguganichisya ya kulipeleka kwawo.”

Masiku agano, ŵandu mamiliyoni gejinji ŵakusaŵecheta Chiyukileniya pachilambo chosope, akusasangalala kuŵalanga Sanja ja Mlonda m’chiŵecheto chawo. Apanopano m’chilambochi mwana magulu gakwana 67 gagakusaŵecheta chiŵechetochi nambosoni mwana mipingo jakwana 541. Magulu soni mipingo ja chiŵechetochi gakusimanikwasoni m’yilambo mpela Belgium, Britain, Canada, Croatia, Czech Republic, France, Germany, Ireland, Italy, Poland, Slovakia, Spain, Sweden, soni United States.

Tukuyamichila kwejinji Yehofa ligongo lyakamuchisya kuti Sanja ja Mlonda jisimanikweje mu Chiyukileniya kuti ŵandu ŵajinji aŵicheje “chikulupi chawo” mwa jwalakwe.—Salimo 78:7.