M’Baibulo ngani ja kulilemba pachilu jikusasimanikwa malo gamo pa Lefitiko 19:28. Pelepa pakusati, “Mkalikatakata pachilu kapena kulemba nembo sya mtundu uliwose.” Mlungu ŵapele Aisalaeli lilamusili pakusaka kwalekanganya jemanjaji ni ŵandu ŵamitundu jine ŵele ŵalilembaga mena soni yimanyilo ya milungu jawo pachilu pawo. (Detulonomo 14:2) Atamose kuti lilamusili ŵapele Aisalaeli, nambope mfundo jakwe jili jakusosekwasoni kwa Aklistu ŵa masiku agano.

Ana Mklistu akusosekwa kulilemba pachilu?

 Mavesi ga m’Baibulo gakuyichisyaga mpaka gakamuchisye panganiji:

•   “Jwamkongwe akusosekwa kulisalalisya . . . mwakuŵajilwa.” (1 Timoteo 2:9, New American Bible) Mfundo ja palilembali jikusakamula masengo kwa wosope achalume ni achakongwe. Myoyo tukusosekwa kuchimbichisyaga nganisyo sya ŵane soni ngatendaga yindu yampaka yatendekasye ŵane kuganichisyaga mnope ya m’weji.

•   Ŵandu ŵane akusalilemba pachilu pakusaka kumanyika, pele ŵane akusatenda yeleyi pakwamba kulosya kuti akwete ufulu wakutenda yiliyose yakusaka. Nambope Baibulo jikusalimbikasya Aklistu kuti, “Mpeleche yilu yenu kuti yiŵe mbopesi ja chijumi, jajiswela, ni jakwitichika pameso pa Mlungu jajili utumiki wa pajika pakamulichisya masengo lunda lwakuganisya.” (Aloma 12:1, NWT) Myoyo akamulichisyeje masengo “lunda lwakuganisya” kuti amanyilile ligongo lyakwe akusaka kulilemba pachilu. Naga lili ligongo lyakuti akujigalila ŵandu ŵakumanyikwa kapena pakulosya kuti ali membala jwa kagulu kanekakwe, amanyilileje kuti mkupita kwa ndaŵi mpaka achenje nganisyo syawo nambo yiŵayilembileyo nganiŵa yityosile. Kuliwungunya mpaka kwakamuchisye kuti asaguleje yindu mwalunda.—Misyungu 4:7.

•   Baibulo jikusati, “Nganisyo sya mundu jwa mtawu sikusapindula, nambo mundu jwakusatenda yakwe mwakuwutuka mkanaganisye chenene, mbesi jakwe jikusaŵa kulaga.” (Misyungu 21:5) Ndaŵi syejinji mundu jwakusalilemba pachilu jwangapataga ndaŵi jakuganichisya yakusaka kutendayo. Kulilemba pachilu mpaka kutendekasye mundu ngapata ŵandu ŵakunguluka nawo soni masengo. Mundu jwalilembile, mpaka yimjigalile mbiya syejinji kuti atyosye soni pakutyosya akusapikana kupweteka mnope. Ŵakuwungunya soni ŵakusakamula masengo gakutyosya yalilembile ŵandu pachilu akusasala kuti ŵandu ŵajinji ŵaŵalilembile akusaligamba kuti yikaliji chenene yikaŵe kuti nganalilemba.