ANA APALI JUŴAYIPANGANYISYE?
Lulumi lwa Chome
Yome yakulanga yikusamanyika ni ndamo jakulisalalisya. Ndaŵi syejinji yomeyi yikusaŵa yili mkulisalalisya. Nambo yomeyi yikusakombola kutenda yeleyi ligongo lyakuti lulumi lwawo lwapanganyidwe mwakusimonjesya mnope.
Aganichisye ayi: Penani pa lulumi lwa chome pana tuyindu twakwana 290 twakuwoneka mpela tumiŵa. Tuyindutu tukusapendamilaga munyuma mwa lulumi lwakwe soni tuli twakulimba mpela ngalaŵesa. Tuyindutu tukwete masimbo. Myoyo chome pachikopwesye lulumi lwakwe ni kulilapitaga, tuyindu tula tukusaŵa tuli tugumbele ni mata. Mwamti pachikulilapita, tuyindu twampela miŵa tula tukusajinjila mkati mwa ubweya wakwe. Yeleyi yikusatendekasya kuti mata gala gayicheje pa lipende lya chomecho.
Kachindu kakakusaŵa pa lulumi lwa chome ali akakusisye
Palisiku lililyose chome pachikulisalalisya, lulumi lwakwe mpaka lujigale mata gakwana mamililita 48 kutyochela mkamwa mwakwe. Mata gelega gakusatyosyaga likaku. Konjechesya pelepa, mataga pagakumula, yikusachikamuchisyaga chomecho kuti chipikaneje kusisimila chenene. Yeleyi yili myoyo ligongo lyakuti chome changakopoka mnope chitukuta.
Naga ubweya wakwe ulikolekenyekolekenye, chome chila pachikulilapita chikusalolechesyaga kuti tuyindu twampela miŵa tula tukwinjila mkati mwa ubweya wakwe. Yeleyi yikusakamuchisya kuti ubweyawo ugopokangane. Tuyindu twampela miŵatu patukukwaya lipende lya chomecho, yikusakamuchisyaga kuti lipendelyo liŵeje lyakufewa. Ŵandu ŵakuwungunya apanganyisye chisakulo pakujigalila lulumi lwa chome. Mundu mpaka akamulichisye masengo chisakulochi mwangasaka machili gejinji. Soni chisakulochi chili changasawusya kuchiswejesya. Konjechesya pelepa chikusagopolanyasoni umbo syekolekanekolekane. Ŵakuwungunyaŵa akulupilila kuti lulumi lwa chome mpaka lukamuchisye kuti apate matala gakupanganyichisya yindu yakamuchisya pakusamalila umbo. Matalaga gachikamuchisyasoni kuti ŵandu akalagaga pakutaga mtela wakusalalisya umbo. Uchikamuchisyasoni kuti ŵandu akalagaga kutaga mtela wakuposya yilwele ya mumtwe atamose muli mwana umbo.
Ana wawojo akuganisya wuli? Ana lulimi lwa chome lwapali mwajika jakwe? Kapena pana jwine jwakwe juŵalipanganyisye?
You May Also Like
MABUKU NI TUMABUKU
Ana Yaumi Yatesile Kupanganyidwa?
Ana yakusakulupilila pakwamba ya muwatandile umi yana masengo.
AJIMUCHE!
Manyunya ga Kausi
Yinyama yine ya m’mesi yikwete mauta m’cilu mwakwe gakamucisya kuti yipikaneje mtukuta, nambo Kausi jukwete manyunya gakumkamucisya kuti apikaneje mtukuta.