Ka Gad Manang Fan e Denen, Fa?

DAWORI n’uw nap’an faram ma girdien e galesiya e kar rung’aged e en ni tamachib rorad ni be weliy boch e thin nib togopluw ko n’en ni ka nog “fa medlip i denen nib ubchiya’” ngay. Pi n’ey e aram e ar’ar ko ngongol ni darngal, nge abich nib pag rogon, nge chogowen e salpiy, nge gamed, nge damumuw, nge awan’, nge tolangan’. Ba ga’ ni ma weliy fare tamachib wenegan e denen ma ma yog ngorad ni ngar kalgadngan’rad. Reb e en tayol babyor e yog ni gaar: “Chiney e pi tamachib u galesiya e daburad ni ngar weliyed boch ban’en ni ra k’aring e kireban’ ngak girdien e galesiya rorad ya yad ma weliy boch ban’en ni ma k’aring e felfelan’ ngorad.”

Boch e piin ni ma yoloy e shimbung e ku kar guyed ni aram rogon. Baaray boch e thin ni kan fek u boch e shimbung:

▪ “Fare thin ni denen, nge kalngan’, nge biyul, e gathi ri yima yog e ngiyal’ ney ma boch e thin ni ra fal’eg lanin’uy e kan tay nga lon.”​—Star Beacon, Ashtabula, Ohio.

▪ “Ke chuchugur ni nge dabki magafan’uy i lemnag e denen.”​—Newsweek.

▪ “Dabkud dogned ko ‘Mang e ba t’uf rok Got ni ngad rin’ed,’ ya gad ra gaar, ‘Mang e ra rin’ Got ni fan ngog?’”​—Chicago Sun-Times.

Ngiyal’ ney ni ke yoor mit e girdi’, e yad ma lemnag ni ngan pag e girdi’ ngaur rin’ed e tin ni yad baadag, ya yad be yog ni de fel’ ni ngan dugliy e kireb nga daken be’. Be yan ni m’ug ni faanra yira yog e kireb ni be rin’ be’ ma gowa aram e denen ni th’abi ubchiya’. Ere yibe lemnag ni: ‘Ban’en ni ga be lemnag nib fel’ e sana ra ayuwegem, machane dab mu towasariy be’ ni nge fol ko tin ni ga be lemnag nib fel’. Ba thilthil kenggin e motochiyel ni be fol e girdi’ riy e ngiyal’ ney. Gathi goo gur e ga manang e tin nib mat’aw ban’en. Ra bay boch ban’en ni ga be lemnag nib fel’ ma ku arrogon boch e girdi’.’

Bochan e pi n’ey ni ke buch ma ke thil rogon ni yad be yog boch ban’en. Fare bugithin ni “denen” e ba ga’ ni yima yog e ngiyal’ ney u fithik’ e thin ni gosgos. Kafram e yima lemnag ni reb e pumoon nge reb e ppin ni ngar parew ni dawora mabgolgow e “kar denengow” ma chiney e yad be lemnag ni dariy e kireb riy, ya kemus ni yibe “par u taabang.” Darur lemnaged ni yad be un ko “ngongol ni darngal”; ya kemus ni “yad be par.” Ma ku de kireb u wan’rad e ngongol ni “pumoon e be darngalnag e pumoon”; yad be lemnag ni kemus ni yad be un nga “reb e ngongol nib thil.”

Ere dariy e maruwar riy ni ke thil rogon ni ma lemnag e girdi’ e n’en nib “yalen” nge n’en nde yalen ara “denen.” Mang fan ni ke thil e lem rorad? Mang e ke buch ko denen? Ma gur, rib ga’ fan ko uw rogon e denen u wan’um?