Ba Pasigan’um ni Ngaum Tayfan e Pi Walag, Fa?
Ba Pasigan’um ni Ngaum Tayfan e Pi Walag, Fa?
“Nge bigimed me t’uf bigimed rok nrogon e walag ni girdien Kristus, ma nge pasigan’med ngay ni nge bigimed mi i ta’ fan bigimed.”—ROM. 12:10.
1, 2. (a) Mang fonow e pi’ Paul ko babyor ni yoloy ngak piyu Roma? (b) Mang boch e deer ni gad ra weliy?
U LAN e babyor ni pi’ Paul ngak piyu Roma e tamilangnag riy feni ga’ fan ko piin Kristiano ni ngaur t’ufeged yad u lan e ulung. I yog ni t’ufeg rodad e “thingari yan i aw nib riyul’.” Ki yog ni nge ‘bagadad me t’uf bagadad rok nrogon e walag.’—Rom. 12:9, 10a.
2 Ra nge t’uf pi walagdad rodad ma gathi kemus ni ngaud lemnaged yad, ya thingar ki m’ug ko ngongol rodad. Dabiyog ni nge nang be’ nib t’uf rodad ni faanra dabda daged ngak. Aram fan ni ki gaar Paul: “Nge pasigan’med ngay ni nge bigimed mi i ta’ fan bigimed.” (Rom. 12:10b) Mang e ba muun ngay ni ngaud ted fan pi walagdad? Mang nib ga’ fan ni nge pasigan’dad ngay ni ngaud ted fan pi walagdad? Ma uw rogon ni ngad rin’ed e re n’ey?
Mang e Ba Muun Ngay ni Ngaud Ted Fan Pi Walagdad?
3. Mang fan fare bugithin ni “tayfan” ko thin ni Hebrew nge Greek?
3 Fare bugithin ni Hebrew ni kan fek fare bugithin ni “tayfan” riy e be yip’ fan “ban’en nib tomal.” Be’ ni yima tayfan e yima tay ni ir be’ nib ga’ fan. Fare bugithin ni Greek ni kan pilyeg fare bugithin ni “tayfan” riy u Bible e be yip’ fan ban’en nib ga’ fan mab tolang puluwon. (Luke 14:10) Arrogon, piin ni gad ma tay farad e ba ga’ farad u wan’dad.
4, 5. Mang e ba muun ko ngan tayfan e girdi’? Mu susunnag.
4 Mang e ba muun ngay ni ngad ted fan e girdi’? Tayfan e ma tabab u rogon ni gad ma lemnag e girdi’. Lem rom e ir e ma gagiyegnag rogon e ngongol rom ngak e girdi’. Ere som’on e ngad ted fan pi walagdad u lanin’dad, mfin aram e rayog ni nge m’ug ko ngongol rodad.
5 Uw rogon ni nge tay reb e Kristiano fan e pi walag u lan e ulung ni faanra de sum u gum’irchaen? (3 John 9, 10) Faan yira yung e woldug ko but’ nib yong’ol ma ra dammal, ere ku arrogon e tayfan ni rayog ni nge aw nib riyul’ ni faanra ke sum u gum’irchaey. Faanra tayfan ni gad ma dag e de sum u gum’ircha’dad, ma ra munmun me bod ba woldug ni ke mororoy ni bochan e kan yung ko but’ nib kireb. Aram fan ni yog Paul ni gaar: “Rogon nib t’uf e girdi’ rodad e thingari yan i aw nib riyul’.”—Rom. 12:9; mu beeg e 1 Peter 1:22.
Ngaud Ted Fan e Piin ni Kan Sunmiyrad ni Yad “Bod Yaan Got”
6, 7. Mang fan nib t’uf ni ngaud ted fan e girdi’?
6 Bochan ni tayfan ni ngaud daged e nga i sum u gum’ircha’dad, ma aram fan ni susun e dab da paged talin fan ni be yog e Bible ni ngaud ted fan pi walagdad. Chiney e ngad weliyed l’agruw i fan.
7 Girdi’ e yad ba thil ko pi n’en ni kan sunmiy u fayleng ni bochan e yad “bod yaan Got.” (Jas. 3:9) Aram fan ni bay pi fel’ngin Got rodad ni bod e t’ufeg, gonop, nge mat’aw. Kum tay fanam i yan u ban’en ni bay ko En Tasunmiy maku bay rodad. I yog fare psalmist ni gaar: “A Somol . . . . Rogon feni gilbuguwam e ke yan ka pag e yu thal i tharmiy nga lang. . . . Kam tay ni ke mus ni gur Got e gab tolang ngak e girdi’; kam teeliyawnag ko ta’fan nge flaab.” (Ps. 8:1, 4, 5; 104:1) * Nap’an ni gad ra tayfan be’ ma aram e gad be gagiyelnag ni Jehovah e ir Tabolngin e tayfan. Ere faanra bay fan ni ngaud ted fan e yug girdi’, me ere pi walagdad ni taareb e michan’ rodad e thingar ud ted farad.—John 3:16; Gal. 6:10.
Gad Taab Tabinaw
8, 9. Mang fan ni yog Paul ni ngaud ted fan e piin taareb e michan’ rodad?
8 Ki yog Paul reb i fan ni ngaud ted fadad. U m’on ni nge weliy murung’agen e tayfan me gaar: “Nge bigimed me t’uf bigimed rok nrogon e walag ni girdien Kristus.” Fare bugithin ni Greek ni kan pilyeg “nrogon e walag” e rayog ni ngan taarebnag ko tha’ nib fel’ ni bay u thilin girdien reb e tabinaw. Ere re bugithin nem ni fanay Paul e be tamilangnag ni tha’ u thilin e girdi’ u lan e ulung e susun ni nge par nib gel mab fel’ ni bod reb e tabinaw. (Rom. 12:5) Ku dab mu pagtalin ni yoloy Paul e pi thin nem nge yan ngak e pi Kristiano ni kan dugliyrad ni ke pofrad Jehovah. Ere pi Kristiano nem e yad girdien taab tabinaw. Aram fan ni ngaur ted farad, maku aram rogon ni susun e nga i rin’ e pi Kristiano ni kan dugliyrad e ngiyal’ ney.
9 Ma uw rogon “yugu boch e saf”? (John 10:16) Yugu aram rogon ni dawori pofrad Got ma rayog ni nga u rogned ni yad walag ni bochan e yad ba ulung i Kristiano ni kar taab tabinawgad. (1 Pet. 2:17; 5:9) Faanra ba felfelan’ e piin ni yad ba muun nga yugu boch e saf ni nga u rogned fare bugithin ni “brother” ara “sister,” me ere bay fan ni ngaur ted fan pi walagrad ni taareb e michan’ rorad.—Mu beeg e 1 Peter 3:8.
Mang nrib Ga’ Fan?
10, 11. Mang nrib ga’ fan ni ngaud ted fan pi walagdad?
10 Mang nrib ga’ fan ni ngaud ted fan pi walagdad? Baaray fan: Faanra ud ted fan pi walagdad u lan e ulung, ma aram e rayog ni nge par e ulung nib taareb.
11 Gad manang ni tha’ u thildad Jehovah nib chugur nge ayuw ni ma pi’ ngodad u daken gelngin nib thothup e aram e n’en ni ma pi’ gelngidad. (Ps. 36:7; John 14:26) Ma yib e athamgil nga lanin’dad u nap’an nra dag e piin taareb e michan’ rodad nib ga’ fadad u wan’rad. (Prov. 25:11) Nap’an nra yog be’ ban’en fa rin’ ban’en ni be m’ug riy ni be tay fadad ma ma felfelan’dad ngay. Ma pi’ gelngidad ni nga u darod u daken fare pa’ i kanawo’ ni sor ko yafas ni gad ba felfelan’ mab pagan’dad. Dariy e maruwar riy ni kam thamiy e biney e felfelan’ ba ngiyal’.
12. Uw rogon ni ngad ayuweged e ulung nga i par ni bay e t’ufeg riy?
12 Bochan ni manang Jehovah ni gad gubin ni gad baadag ni ngaun tay fadad, ma aram fan ni ke fonownagdad u daken e Thin rok ni ‘nge pasigan’dad ngay ni nge bagadad mi i ta’ fan bagadad.’ (Rom. 12:10; mu beeg e Matthew 7:12.) Gubin e Kristiano nra fol ko re fonow ney e be ayuweg e ulung ni nga i par ni bay e t’ufeg riy. Ere ba fel’ ni nge bagadad ma nge fith ir ni nge gaar, ‘Wuin e tomur ni kug dag ngak reb e walag u lan e ulung ko thin nge ngongol rog ni gu be tayfan?’—Rom. 13:8.
Ban’en nib Milfan Ngak Urngin e Girdi’
13. (a) Mini’ e som’on ni nge tayfan e girdi’ u lan e ulung? (b) Mang e be dag fapi thin ni yog Paul ni bay ko Roma 1:7?
13 Susun ni mini’ e som’on ni nga i tayfan e pi walag u lan e ulung? U lan e babyor ni pi’ Paul ngak piyu Hebrew e yog riy ni piin piilal ni Kristiano e ‘yad be yog e thin rodad.’ (Heb. 13:17) Riyul’ ni piin piilal e yad ma yog e thin u lan e ulung. Machane bochan ni yad e yad ma gafaliy e saf rok Got ma aram fan ni susun ni yad e som’on ni ngaur ted fan e piin taareb e michan’ rorad ni ku yad ba muun ngay. Bod ni nap’an nra mada’ e piin piilal ni ngar weliyed murung’agen ban’en ni fan ko ulung, ma susun ni nge bagayad me motoyil ngak bagayad u nap’an ni be weliy faanem laniyan’, ya faan yad ra rin’ ni aram rogon ma aram e be m’ug riy ni yad be tay farad. Maku reb e, u m’on ni ngar dugliyed ban’en ma susun ni ngar pied e tayim ngorad ni nge bagayad me weliy laniyan’. (Acts 15:6-15) Machane dab da paged talin ni fagi babyor ni yoloy Paul nga yan ngak piyu Roma e gathi kemus ni fan ngak e piin piilal, ya ku fan ko ulung ni ga’ngin. (Rom. 1:7) Ere fare fonow ni nge bagadad me pasigan’ ngay ni nga i tayfan bagadad e fan ngodad e ngiyal’ ney ni gad gubin.
14. (a) Mu susunnag e n’en nib thil u thilin ni nge bagadad me tayfan bagadad nge bin ni nge pasigan’dad ngay ni nge bagadad me tayfan bagadad. (b) Mang deer e susun ni ngad fithed gadad riy?
14 Kum lemnag ban’en u murung’agen fare fonow ni pi’ Paul. I yog ngak e piin taareb e michan’ rorad u Roma ni gathi kemus ni nge bagayad me tayfan bagayad, ya ngki pasigan’rad ngay ni nge bagayad me tayfan bagayad. Mang fan nib thil e gali n’ey? Am lemnag. Ra yog reb e sensey ko bitir ni be skulnag ni ngar filed rogon e beeg babyor ni faanra manang fapi bitir rogon i beeg e babyor? Danga’, ya n’en nra rin’ e ra ayuwegrad ni ngar salapgad boch ko beeg babyor. Ere ku arrogon ni t’ufeg ni bay u thildad e ir e ma k’aringdad ni ngaud ted fadad, ma aram e pow ko tin riyul’ e Kristiano. (John 13:35) Machane rayog ni ngad mon’oggad i rin’ e re n’ey ni faanra pasigan’dad ngay ni bod fapi bitir. (1 Thess. 4:9, 10) Biney e maruwel e kan pi’ ngodad nthingar da rin’ed. Ere rayog ni ngad fithed gadad ni nge lungudad, ‘Ba pasigan’ug ngay ni nggu tayfan e pi walag u lan e ulung, fa?’
Ngad Ted Fan e Piin ni Yad Ba “Sobut’”
15, 16. (a) Mini’ e susun ni ngkud ted fan, ma mang fan? (b) Mang e ra dag ni gad be tayfan pi walagdad u lan e ulung?
15 Mini’ e susun ni ngkud ted fan u lan e ulung? Be gaar e Bible: “Ra pi’ be’ ban’en ngak be’ nib sobut’ ma bod ni ke pi’ ngak Jehovah, ma ra pi’ puluwon ngak.” (Prov. 19:17, NW) Uw rogon ni ngad folgad ko pi thin ney u nap’an ni gad be athamgil ni ngaud ted fan pi walagdad u lan e ulung?
16 Yooren e girdi’ e yad ma tayfan e piin yad ba tolang ngorad, ma yad ma darifannag e piin nib sobut’. Machane gathi aram rogon Jehovah, ya ke gaar: “Bay gu tay fan e piin ni yad be tay fag.” (1 Sam. 2:30; Ps. 113:5-7) Ma tay Jehovah fan e piin ni yad ma pigpig ngak ma yad ma tayfan. Ma der ma fek owchen ko piin ni yad ba “sobut’.” (Mu beeg e Isaiah 57:15; * 2 Kron. 16:9) Gad baadag ni ngad folwokgad rok Jehovah. Ere faanra gad baadag ni ngad nanged rogon ni gad ma tayfan e girdi’, mab fel’ ni ngad fithed gadad ni nge lungudad, ‘Uw rogon e ngongol rog ngak e piin nde milfan reb e maruwel ngorad u lan e ulung?’ (John 13:14, 15) Fulweg rom ko re deer ney e be dag rogon ni ga ma tayfan e girdi’.—Mu beeg e Filippi 2:3, 4.
Gad Ra Tay e Tayim ni Fan Ngak Be’ Ma Gad Be Tayfan
17. Mang e bin th’abi fel’ e kanawo’ ni ngad ted fan e girdi’ riy u lan e ulung, ma mang fan ni aram rogon?
17 Mang e bin th’abi fel’ e kanawo’ ni ngad ted fan e girdi’ riy u lan e ulung? Aram e ngaud ted e tayim ni fan ngorad. Mang fan? Gadad e Kristiano e boor pa’ u puluwdad, maku boor e maruwel nib ga’ fan u lan e ulung ni gad ma rin’ ni ma fek e tayim rodad. Ere tayim e ban’en nib ga’ fan u wan’dad. Ku gad manang ni susun e dab da lemnaged ni nge tay pi walagdad gubin e tayim rorad ni fan ngodad. Machane gad ma felfelan’ nfaanra kad guyed ni ke nang pi walagdad e re n’ey.
18. Uw rogon nra m’ug nib m’agan’dad ngay ni ngad ted e tayim ni fan ngak pi walagdad u lan e ulung nrogon ni bay ko sasing ko page 22?
18 Ku gad manang (nib ga’ ni pi arodad ni yad ma yog e thin u lan e ulung) ni faanra m’agan’dad ngay ni ngad digeyed boch ban’en ni gad be rin’ ni fan e ngad ted e tayim ni fan ko piin taareb e michan’ rodad, ma aram e be m’ug riy ni gad be tay farad. Ni uw rogon? Faanra da paged boch ban’en ni gad be rin’ ya ngad ted e tayim ni fan ngak reb e walag ma bod ni gad be gaar ngak, ‘Ri kab ga’ fan ni ngad rin’ew boch ban’en u taabang ko bin ni nggu ulul ko n’en ni gu be rin’, ya rib ga’ fam u wan’ug.’ (Mark 6:30-34) Machane faanra dubdad ni ngad digeyed e n’en ni gad be rin’ ni fan ngak reb e walag, ma rayog ni nge lemnag de ga’ fan u wan’dad. Riyul’ ni bay yu ngiyal’ ndabiyog ni ngad digeyed e n’en ni gad be rin’. Machane tayim ni gad ma tay ni fan ngak yugu boch e girdi’ e be dag feni ga’ farad u wan’dad.—1 Kor. 10:24.
Mu Turguy ni Nge Pasigan’um Ngay
19. Ku mang reb e kanawo’ nrayog ni ngad ted fan pi walagdad riy?
19 Ku bay boch e kanawo’ nib ga’ fan nrayog ni ngad ted fan pi walagdad riy. Bod ni faanra ngad ted e tayim ni fan ngorad, ma susun e ngkud motoyilgad ngorad. Ke dag Jehovah e kanawo’ ni ngad folwokgad riy. I yog David ni gaar: “I Somol e ma matanagiy e piin ni yad mmat’aw, ma ma motoyil ngorad ko tin ni yad ma wenignag ngak.” (Ps. 34:15) Gad ra sap ngak pi walagdad u nap’an ni kar ninged e ayuw ngodad ma aram e gad be folwok rok Jehovah, maku gad be tay farad.
20. Mang e kad filed u murung’agen e tayfan ni dab da paged talin?
20 Rogon ni kad filed e ba ga’ fan ni ngaud lemnaged fan ni ngaud ted fan pi walagdad. Maku reb e, ngad guyed rogon ni nge mang gadad e som’on ni ngad ted fan e girdi’ nib muun e piin nib sobut’ ngay. Faan gad ra rin’ ni aray rogon ma aram e gad be gelnag e t’ufeg nge taareban’ ko pi walag u lan e ulung. Ere ngad ululgad ngaud ted fadad, machane ngki pasigan’dad ngay ni nge bagadad me tayfan bagadad. Ireray e n’en ni kam turguy u wan’um ni ngam rin’, fa?
[Footnotes]
^ par. 7 Fapi thin ni yog David ko bin 8 e Psalm e thin ko profet ni be weliy murung’agen Jesus Kristus.—Heb. 2:6-9.
^ par. 16 Isaiah 57:15, NW: “Baaray e n’en ni ke yog Faen nib Tolang mab Thothup, ni be par nib fas ndariy n’umngin nap’an: ‘Gu ma par ko gin nib tolang mab thothup, ma kug ma par ko piin nib sobut’ ni ke mulan’rad, ni fan e nge yog ni gu fulweg e pagan’ nge l’agan’ ngorad.’”
Ka Ga Manang?
• Mang e ba muun ngay ni ngad ted fan e girdi’?
• Mang fan ni ngaud ted fan pi walagdad u lan e ulung?
• Mang nib ga’ fan ni ngaud ted fadad?
• Mang boch e kanawo’ nrayog ni ngad ted fan pi walagdad riy?
[Study Questions]
[Picture on page 22]
Uw rogon ni ngad ted fan pi walagdad u lan e ulung?