Ra Yib Gelngidad Ngad Gelgad ko Pi N’en Ma Waliyey nge Pi N’en Ma Meewarnagey

“Bay yib gelngimed ko ngiyal’ ni bay yib [“gelngin Got nib thothup,” NW] riy nga dakenmed.”​—ACTS 1:8.

1, 2. Mang ayuw e micheg Jesus ngak pi gachalpen, ma mang fan nib t’uf rorad?

 MANANG Jesus ndabiyog ni nge rin’ pi gachalpen e tin ke tay chilen ni ngar rin’ed u gelngirad. Faan gad ra lemnag ga’ngin yang ni ngar machibgad riy, nge pi toogor rorad, nge pi meewar rorad, mab tamilang nib t’uf reb e gelngin ni gathi gelngin e girdi’ ni nge ayuwegrad. Aram fan nu m’on ni nge yan Jesus nga tharmiy, me gaar ngak pi gachalpen: “Bay yib gelngimed ko ngiyal’ ni bay yib [“gelngin Got nib thothup,” NW] riy nga dakenmed, ma aram mi gimed weliy murung’ageg u lan yu Jerusalem, ngu lan yu Judea ni polo’, ngu lan yu Samaria, nge yan i mada’ ko yungi n’en ni yan i mus e fayleng ngay.”​—Acts 1:8.

² Re thin ni micheg nem e tabab ni nge lebug ko Pentekost ko duw ni 33 C.E. u nap’an ni yib gelngin Got nib thothup nga daken pi gachalpen Jesus Kristus, ngar machibgad u lan yu Jerusalem i yan. Dariy ban’en ni yog ni nge talegrad. (Acts 4:20) Pi gachalpen Jesus ni yad ba yul’yul’ ni gad ba muun ngay e rib t’uf gelngin Got ni nge ayuwegdad nge yan i mada’ ko ‘tomur.’​—Matt. 28:20.

3. (a) Mu weliy e n’en nib thil u gelngin Got nib thothup nge gelngin. (b) Mang e ra ayuwegdad gelngin Jehovah ni ngad rin’ed?

³ I micheg Jesus ngak pi gachalpen nra ‘yib gelngirad ko ngiyal’ ni bay yib gelngin Got nib thothup riy nga dakenrad.’ Fa gal bugithin ni “gelngin” nge ‘gelngin nib thothup’ e ba thil fan. Gelngin Got nib thothup ara gelngin ni ma maruwel e aram gelngin ni ma pi’ ko girdi’ ara ban’en ni nge lebguy e tin nib m’agan’ ngay. Machane, fare bugithin ni gelngin e be yip’ fan “gelngin ni nge rin’ ban’en nra yib angin.” Re gelngin nem e rayog ni nge par u fithik’ be’ ara ban’en ndabi maruwel nge yan i mada’ ko ngiyal’ ni ke t’uf ni nge maruwel. Ere gelngin Got nib thothup e taareb rogon ko gamig ni be maruwel u fithik’ e battery, ma gelngin e taareb rogon ko gamig ni bay u fithik’ e battery nder maruwel. Fare gelngin ni ma pi’ Jehovah ko pi tapigpig rok u daken gelngin nib thothup e ma pi’ gelngidad ni ngad rin’ed e n’en nib milfan ngodad ni gadad e Kristiano, ma gad gel ko pi n’en ni ma meewarnagdad.​—Mu beeg e Mikah 3:8; Kolose 1:29.

4. Mang e gad ra weliy ko biney e article, ma mang fan?

⁴ Uw rogon ni ma gagiyel gelngin Got nib thothup u dakendad? Ba miti mang ngongol e ra ud rin’ed u nap’an ni be pow’iydad gelngin Got nib thothup? Gad ra athamgil ni ngad pigpiggad ngak Got ni gad ba yul’yul’, ma boor e skeng nra i yib ngodad, ni boch e ra yib rok Satan nge re m’ag rok ney, ma boch e ra yib ngodad ni bochan e dawor da flontgad. Ba ga’ fan ni ngad gelgad ko pi skeng ney ya nge dab da mulgad, mu ud uned ko machib ni gubin ngiyal’, me par nib fel’ e tha’ u thildad Jehovah. Ere chiney e ngad guyed rogon ni ma ayuwegdad gelngin Got nib thothup ngad gelgad ko pi n’en ni ma waliydad ko kireb, nge pi n’en ni ma tomalnag lanin’dad, nge pi n’en ni ma meewarnagdad.

Ra Yib Gelngidad Ngad Gelgad ko Pi N’en ni Ma Waliydad

5. Uw rogon nra gelnagdad e meybil?

⁵ I fil Jesus ngak pi gachalpen ni ngar meybilgad  ni nge lungurad: “Dab mfekmad i yan ko skeng nib mo’maw’, machane ngam ayuwegmad rok Faanem nib Kireb.” (Matt. 6:13) Dabi pag Jehovah e pi tapigpig rok ni yad ba yul’yul’ ni yad be wenignag e re n’ey. Ka immoy bayay ni yog Jesus ni “en ni Chitamangiy ni bay u tharmiy e ri ra pi’ [“gelngin nib thothup,” NW] ngak e piin ni yad ra ning ngak!” (Luke 11:13) Ri be pagan’dad ni ke micheg Jehovah nra pi’ e re gelngin nem nge ayuwegdad ngad rin’ed e tin nib mat’aw! Machane, re n’ey e gathi be yip’ fan nra taleg Jesus ndab ki yib e skeng ngodad. (1 Kor. 10:13) Ya nap’an nra yib e skeng ngodad, ma aram e ngiyal’ ni ngad p’eyn’iyed e meybil.​—Matt. 26:42.

6. Nap’an ni guy Satan rogon ni nge waliy Jesus, ma uw rogon ni fulweg Jesus lungun?

⁶ Nap’an ni guy Moonyan’ rogon ni nge waliy Jesus, me fulweg Jesus lungun ni be fanay e thin nu Bible. Ba tamilang e thin rok Got u wan’ Jesus u nap’an ni gaar: “Fare babyor nib thothup e be gaar, . . . Ki yog e babyor nib thothup ni gaar, . . . Satan, mman ngam chuw! Ya babyor nib thothup e be gaar, ‘Mu ta’ fan Somol ni Got rom ma yigo ir e ngam pigpig ngak!’” Bochan nib t’uf Jehovah nge Thin rok u wan’ Jesus ma aram fan ni yog ni nge siyeg e n’en ni waliy Satan ngay. (Matt. 4:1-10) Nap’an ni nang Satan ndabiyog ni nge waliy Jesus, ma aram me digey nge yan.

7. Uw rogon ni ma ayuwegdad e Bible ni ngad siyeged e pi n’en nra waliydad ko kireb?

⁷ Faanra ke taga’ Jesus ko thin rok Got ni nge ayuweg nge siyeg e pi n’en ni waliy Moonyan’ ngay, me ere ku errogodad! Machane, faanra ngad gelgad ngak Moonyan’, ma som’on e thingar da nanged e n’en ni baadag Got ni ngad rin’ed ma gad fol riy. Boor e girdi’ ni yad be fol ko pi motochiyel nu Bible ni bochan e kar filed kar nanged fan ma ke ga’ fan e gonop rok Got u wan’rad nge feni mat’aw. Riyul’ nib gel gelngin e “thin rok Got” ma rayog ni nge “pufthinnag e n’en ni yima yim’ ni bochan nge tin ni yima lemnag.” (Heb. 4:12) Faanra i beeg be’ e thin nu Bible ma be fal’eg i lemnag ni gubin ngiyal’, ma aram e rayog ni nge nang e ‘tin ni ke yog Jehovah ni aram e tin nib riyul’.’ (Dan. 9:13) Bochan e re n’ey ma aram fan nib fel’ ni ngaud fal’eged i lemnag e pi thin nu Bible nra ayuwegdad ko pi n’en ni gad ba meewar riy.

8. Mang boch e kanawo’ ni ma yib gelngin Got nib thothup riy ngodad?

⁸ I gel Jesus ko skeng ni bochan e manang e thin nu Bible nib fel’ rogon, maku ba sugnag “gelngin Got nib thothup.” (Luke 4:1, NW) Ere faanra nge yib gelngidad ni bod Jesus, mab t’uf ni ngad chugurgad ngak Jehovah ni aram e ngad maruwelgad ko pi n’en ni ma fanay ni nge pi’ gelngin nib thothup riy ngodad, ni bod e fol Bible, nge meybil, nge chag ni gad ma tay pi walagdad u taabang. (Jas. 4:7, 8) Maku boor e girdi’ ni kar felfelan’gad ya ke yog ni ngar pared ni yad ba gel ko tirok Got ban’en ni bochan e yad be mon’eg e pigpig ni yad be tay ngak u gubin ban’en, ma re n’ey e ke ayuwegrad ni ngaur lemnaged e pi n’en nra pi’ e athamgil nga lanin’rad.

9, 10. (a) Mang boch e skeng nib ga’ ni ma yib ko Kristiano ko gin ni ga ma par riy? (b) Faan ga ra fal’eg i lemnag e thin rok Got ma ga be meybil, ma uw rogon nra pi’ gelngim ni ngam gel ko skeng ngki mada’ ko ngiyal’ ni kam meewar?

⁹ Mang boch e skeng ni ma yib ngom? Bay bayay ni kam thin ni gosgos ngak be’ ni gathi mabgol rom, fa? Ma faanra dawor mu un ko mabgol, ma bay bayay ni kam adag ni ngam un ngak be’ nde taareb e michan’ romew, fa? Nap’an ni be yaliy be’ ni Kristiano e TV fa ke yan ko Internet, ma rayog ni nge m’ug yaan ban’en nib kireb ni dabkiyog ni nge fek owchen riy. Ke buch rom bayay ni aray rogon? Faanra ke buch, ma mang e mu rin’? Ba fel’ ni ngam lemnag ni faanra mu rin’ ban’en ndam gonopiy, maku rayog ni ngkum rin’ bayay, ma ra munmun ma ga rin’ ban’en nib gel e kireb riy. (Jas. 1:14, 15) Mu lemnag e kireban’ nra tay Jehovah, nge ulung, nge tabinaw rom ni faan ga ra rin’ reb e denen ni ubchiya’. Machane, faan ga ra fol ko pi motochiyel rok Got ma aram e rayog ni ngam par nib beech e nangan’ rom. (Mu beeg e Psalm 119:37; Proverbs 22:3.) Ere nap’an nra yib e skeng ni aram rogon ngom, ma ngam meybil ya nge yib gelngim ni ngam siyeg.

¹⁰ Ku bay ban’en ni ngad lemnaged u murung’agen e skeng ni yib ngak Jesus. I yib Satan ngak u tomuren ni ke pag e abich u lan 40 e rran.  Dariy e maruwar riy ni ke guy Moonyan’ ni aram e ngiyal’ nib fel’ ni nge skengnag e yul’yul’ rok Jesus. (Luke 4:13) Ku errogodad ni ma yaliy Satan e ngiyal’ nib fel’ ni nge skengnag e yul’yul’ rodad. Ere rib ga’ fan ni ngad pared ni gad ba gel ko tirok Got ban’en, ya Satan e ba ga’ ni ma cham ngodad ko ngiyal’ ni ke guy ni kad meewargad. Ere nap’an ni gad ra thamiy ni ke tomal lanin’dad ara ke mulan’dad, ma ngad ninged gelngin Jehovah nib thothup ni nge ayuwegdad.​—2 Kor. 12:8-10.

Ra Yib Gelngidad Ngad Gelgad ko Pi N’en ni Ma Meewarnag Lanin’uy

11, 12. (a) Mang fan ni boor e girdi’ ni ma mulan’rad e ngiyal’ ney? (b) Mang e ra pi’ gelngidad nge dab ki mulan’dad?

¹¹ Bochan ndawor da flontgad, ma aram fan ni ma mulan’dad. Riyul’ e re n’ey ni bochan e gad be par u ba ngiyal’ nib gel e mochuch riy ma kari mo’maw’ e par. (2 Tim. 3:1-5) Nap’an ni be chugur i yib e Armageddon ma be gel i yan e magawon ko salpiy, nge magafan’ ko par, nge ku boch e magawon. Ere dab da gingad ngay ni bay boch e girdi’ nib mo’maw’ ni ngar pied e tin nib t’uf ko tabinaw rorad. Bochan e re n’ey ma aram fan ni yad be guy ni be mo’maw’ ni ngar rin’ed e tin nib milfan ngorad. Faanra ireray e magawon rom, ma uw rogon ni ngam athamgil u fithik’?

¹² Dab mu pagtalin ni micheg Jesus ngak pi gachalpen nra pi’ ban’en ni nge ayuwegrad, ni aram gelngin Got nib thothup. (Mu beeg e John 14:16, 17.) Ireray e re gelngin th’abi gel ni bay u palpalth’ib. Rayog ni nge fanay Jehovah e re gelngin ney u reb e kanawo’ ndawori “taw e lem rodad ngay” ni nge pi’ gelngidad ngad k’adedan’dad ko pi skeng ni ma yib ngodad. (Efe. 3:20) I yog apostal Paul ni faan gad ra taga’ ngay ma aram e ra yog ngodad e “re gelngin nem ni ir e ba th’abi gel” ni yugu aram rogon ni ke ‘ingdad e gafgow ke pir’iydad u gubin yang.’ (2 Kor. 4:7, 8) Dawori micheg Jehovah nra chuweg e mochuch rodad, machane ke micheg nra fanay gelngin nib thothup ni nge pi’ gelngidad ngad gelgad ngay.​—Fil. 4:13.

13. (a) Uw rogon ni yib gelngin reb e rugod nge yog ni athamgil u fithik’ e magawon rok? (b) Ga manang be’ ni ki buch ban’en rok ni aram rogon, fa?

¹³ Mu lemnag e n’en ni buch rok Stephanie ni ir reb e pioneer ni 19 e duw rok. Nap’an ni ke gaman 12 e duw rok me stroke, miki yog e togta ni bay e cancer ko man’ey rok. Ke mada’ ko chiney ma nga l’agruw yay ni kan sey, ma ke yan nga tan e masin ni ngan urfeg e cancer rok, ma ki stroke ni l’agruw yay, ma ke par ni ke mo’maw’ ni nge mithmitheg e ba’ ni gilay’ i downgin. Machane ma thamiy gelngin Got nib thothup ni ma ayuweg ni nga i athamgil u boor e kanawo’. Ma ki ayuweg boch e babyor nib puluw e thin riy ko thin nu Bible ni murung’agen e n’en ni i rin’  boch e Kristiano, maku ma ayuweg e pi n’ey u nap’an ni ke mulan’. Ma pi’ e pi walag e athamgil nga laniyan’ ko babyor ni yad ma yoloy nge yan ngak, nge rogon ni yad ma non ngak u m’on ngu tomuren e muulung. Mus ko girdi’ ni yad baadag e machib maku yad ma dag ni yad be pining e magar ni bochan e n’en ni ma fil Stephanie ngorad, ya yad ma yan nga tafen ni ngar filed e Bible. Ri ma pining Stephanie e magar ngak Jehovah ni bochan e pi n’ey. Ri baadag fare thin nu Bible ni bay ko Psalm 41:3, ya ba mich u wan’ nib puluw ngak.

14. Faanra ke meewar lanin’dad, ma mang e thingar dab da rin’ed, ma mang fan?

¹⁴ Faanra kaygi yoor pa’ nga puluwdad, ma dab da lemnaged ni ngad buchuuwnaged e n’en ni gad be rin’ ni fan ko pigpig rodad ngak Got. Aram e n’en nth’abi kireb ni ngad rin’ed. Mang fan? Ya bochan ni pi n’en ni gad ma rin’ ni fan ko pigpig rodad ngak Got ni bod e fol Bible ni goo gadad, nge fol Bible ni tabinaw, nge machib, nge muulung e aram rogon ni ma ayuwegdad gelngin Got nib thothup. Pi n’en ni ma rin’ e piin Kristiano u taabang e ma baudnag lanin’uy. (Mu beeg e Matthew 11:28, 29.) Ba ga’ nra yib reb e walag ko muulung ni ke meewar laniyan’, ma ra tomuren e muulung ma ke sul gelngin bayay!

15. (a) Ke micheg Jehovah ni piin Kristiano e dabi yib e magawon ngorad, fa? Mu weliy rogon ni be yog e Bible. (b) Mang e ke micheg Got ngodad, ma mang e deer ni ke sum?

¹⁵ Gathi yibe yog u roy ni piin Kristiano e dariy e magawon rorad. Ya ga ra mang reb e Kristiano ma thingar mu athamgil ngam par ni gab yul’yul’. (Matt. 16:24-26; Luke 13:24) Machane, rayog ni nge pi’ Jehovah gelngin e en ni ke meewar u daken gelngin nib thothup. I yoloy Isaiah ni profet ni gaar: “Piin ni yad be tor ngak Somol ni nge ayuwegrad e bay ra pirieged ni ke yib gelngirad bayay. Bay ra changeggad ni bod rogon e eagle; yad ra mil, ma dab ra magargad; ma yad ra yan, ma dabi m’ay gelngirad.” (Isa. 40:29-31) Ere ba fel’ ni ngad fithed gadad ko, Ri mang fan ni gad ma lemnag yu ngiyal’ ni kaygi mo’maw’ ni ngad rin’ed e maruwel rodad ni gadad e Kristiano?

16. Mang e rayog ni ngad rin’ed ya nge dab kud thamiyed ni gowa dabkiyog ni ngad rin’ed e tin nib milfan ngodad?

¹⁶ Be yog e Thin rok Jehovah ni ngad mon’eged e tin nib ga’ fan. (Fil. 1:10) I taarebrogonnag apostal Paul e par ko Kristiano ko sagreng ni gaar: “Ngad paged urngin ban’en ni be magawon ngodad . . . , ngad athamgiliyed e gin ni ka ba’ ni ngad milgad riy ngad tawgad ko gin ni gad be nameg.” (Heb. 12:1) N’en ni be yip’ fan e thingar dab da paged boch ban’en nde ga’ fan nge magawonnagdad. Sana bay boch i gadad ni boor pa’ u puluwon ma ka be yon’ daken. Ere faanra ga be guy ndakir yog ni ngam rin’ e tin nib milfan ngom, mab fel’ ni ngam fal’eg i lemnag urngin e tayim ni ga be fanay ko maruwel ni nge yog e salpiy riy, nge chur ni ga be tay ni ga be fafel, nge gosgos ni ga be un ngay, nge ku boch ban’en. Faanra ke tamilangan’dad ma kad nanged e gin ni ngad musgad riy, ma aram e rayog ni ngad nanged e tin rayog rodad nge tin dabiyog.

17. Mang fan ni ma mulan’ boch e girdi’, machane mang e ke micheg Jehovah?

¹⁷ Sana bay boch i gadad ni ke mulan’ ni bochan e ke n’uw nap’an ni be lemnag ni bayi yib e tomur ma dawori yib. (Prov. 13:12) Machane, faanra bay be’ ni be lem ni aram rogon, ma fare thin ni bay ko Habakkuk 2:3 e rayog ni nge pi’ e athamgil nga laniyan’. Be gaar: “Dawori taw nga nap’an ni nge yib i m’ug. Machane ngal’an e be yib nib machreg, ma n’en ni ku gog ngom e bay yib i m’ug. Bay mu lemnag nib sowath ni be yib, machane ngam sonnag; ya ra yib i m’ug ko ngiyal’ ni kug dugliy, ma dabi sowath.” Ke micheg Jehovah nra yib e tomur ko ngiyal’ ni ke dugliy riy!

18. (a) Mang boch ban’en ni be micheg e Bible nra pi’ gelngim? (b) Uw rogon ni nge yib angin e bin migid e article ngodad?

 ¹⁸ Gubin e tapigpig rok Jehovah ni yad ba yul’yul’ e yad be athapeg e ngiyal’ ni yad ra “pagel bayay” ma dab ki meewar lanin’rad mar pared ni yad ba felfelan’. (Job 33:25) Mus ko ngiyal’ ney nrayog ni nge gel lanin’dad bayay u daken gelngin Got nib thothup u nap’an ni gad be rin’ boch ban’en ni fan ko pigpig rodad ngak Got. (2 Kor. 4:16; Efe. 3:16) Dab mu pag e pi n’en ni ma tomalnag lanin’uy nge talegem ndab ki yog e tow’ath ngom nra par ndariy n’umngin nap’an. Gubin e skeng ni ma yib ngodad e goo ra chuw, ni faanra gathi chiney, mu lan fare m’ag nib beech. Bin migid e article e gad ra weliy riy rogon ni ma ayuweg gelngin Got nib thothup e piin Kristiano ni ngar gelgad ko togopuluw, mar siyeged e towasar ko pi taab yangar rorad, maku ra k’adedan’rad u fithik’ boch e gafgow.

Uw Rogon ni Ga Ra Fulweg?

• Faanra ud beeged e Bible, ma uw rogon nra pi’ gelngidad?

• Faanra ud meybilgad ma gad be fal’eg i lemnag ban’en, ma uw rogon nra ayuwegdad?

• Uw rogon ni nge dab ki mulan’dad?

[Study Questions]

[Caption on page 26]

Pi muulung ni gad ma un ngay e ma gelnagdad ko tirok Got ban’en