Thin nib Fel’ ni Fan ko Piin Gafgow

THIN ROK GOT e be micheg ngodad ni gaar: “Ma piin ba t’uf e ayuw rorad e gathi gubin ngiyal’ ni yira pagtilrad.” (Psalm 9:18) Maku be weliy e Bible murung’agen e En ni Sunmiydad ni gaar: “Ba gaman urngin ni be pi’ ngorad nge yan i aw ni ke fel’ u wun’rad ni yad gubin e tin ni ke yog ngorad.” (Psalm 145:16) Re athap ney ni be weliy e Thin Rok Got murung’agen e gathi ba lik’ay. Got ni Th’abi Gel Gelngin e rayog ni nge chuweg e gafgow. Mang e n’en nib t’uf ko piin nib gafgow?

Be’ nu Africa ni manang murung’agen e salpiy nge siyobay e ke yog ni pi nam nib gafgow e ba t’uf reb e pilung ngorad nib “gol.” Re n’ey e be yip’ fan ni faanra bay be’ nib gel gelngin mab gol ma rayog ni nge chuweg e gafgow ko girdi’. Ma susun nra gagiyegnag e fayleng ni ga’ngin ya faanra aram rogon ma rayog ni nge pithig e magawon e ngiyal’ ney ni bay boch e nam nib fel’ rogon ma boch e ba gafgow. Maku cha’ nra gagiyeg e susun ni bay gelngin ni nge chuweg tapgin e re magawon ney ni aram e lem ni chogow. Ere, uw e rayog ni ngan pirieg reb e pilung riy ni aray rogon?

Ke l’og Got Jesus ni nge fek fare thin nib fel’ ni fan ko girdi’ nib gafgow. Nap’an ni ke sak’iy Jesus ni nge beeg e thin nu Bible ni be weliy murung’agen e maruwel ni ke pi’ Got ngak me yog ni gaar: “[Gelngin Jehovah] e ke yib nga dakenag. Ke liyfeg ni nggu machibnag e Thin Nib Fel’ ni yib rok Got ngak e piin ni gafgow.”​—Luke 4:16-18.

Mang fare Thin nib Fel’?

Ke dugliy Got Jesus ni nge mang Pilung. Ma riyul’ ni ireram e thin nib fel’. Ir e pilung ni rayog ni nge chuweg e gafgow ya bin (1) e ra gagiyegnag urngin e girdi’ ma bay gelngin ni nge pithig e magawon; ma bin (2) e ma runguy e girdi’ nib gafgow ma be fil ngak pi gachalpen ni ngar ayuweged e pi girdi’ ney; ma bin (3) e bay gelngin ni nge chuweg tapgin e gafgow, ni ireram e lem ni chogow ni bay ko girdi’ ya dawor ra flontgad. Ngad yaliyed e dalip i n’ey ni aram bang ko fare thin nib fel’.

1. Kan pag fan urngin e nam ngak Jesus Thin rok Got e be yog murung’agen Jesus ni gaar: “Min pi’ mat’awun ko gagiyeg ni nge tay ma ngan tay fan, ma nge par ni ir e pilung, ya girdi’ u urngin e pi nam, nge pi racha’, nge pi thin e nguur folgad rok.” (Daniel 7:14) Gur, rayog ni ngam lemnag feni rib fel’ ni faanra kemus ni taareb e am ni be gagiyegnag urngin e girdi’? Dab kun chamnag e tin nu fayleng ban’en ni ma fel’ rogon e girdi’ riy ya urngin e girdi’ ma bay e f’oth rorad ni taab urngin. Ma ke micheg Jesus nra gagiyegnag e fayleng ni ga’ngin ma bay gelngin ni nge pithig e magawon. Ke yog ni gaar: “Kan pag fan urngin ban’en ngog u tharmiy ngu but’.”​—Matthew 28:18.

2. Ke runguy Jesus e piin ni gafgow N’umngin nap’an ni i machib Jesus mma runguy e girdi’ nib gafgow. Ni bod fare pin nib m’ar ni ke fanay urngin e salpiy rok nga puluwon e tafalay me math ko mad rok Jesus ya be athapeg ni nge gol. Ya ragag nge l’agruw e duw nib m’ar nib molul. Rogon ni bay ko motochiyel e faanra math ngak be’ ma ra taay. Machane Jesus e ba gol, ya yog ni gaar: “Fakag, michan’ rom ngak Got e ke golnigem. Mman ni ke pagan’um, ya kam gol ko m’ar rom.”​—Mark 5:25-34.

Pi n’en ni ke fil Jesus ngak e girdi’ e bay gelngin ni nge thilyeg e lem rorad ma ra k’aringrad ni ngaur golgad ngak e girdi’. Mu lemnag e fulweg rok Jesus ngak be’ ni baadag ni nge nang ko uw rogon ni nge fel’ u wan’ Got. Re moon nem e manang ni baadag Got ni ngad t’ufeged e en ni migid ngodad, machane ke fith ngak Jesus ni gaar: “Mini’ e en ni ir e mmigid ngog?”

Fulweg rok Jesus e weliy reb e fanathin u murung’agen reb e pumoon ni be milekag u Jerusalem ni be yan nga Jeriko me og e moro’ro’ ngak ngan li’ min iring boch ban’en rok min pag ni “ke chugur ni nge yim’.” Ma bay ba prist ni be yan nga  pe’ning u daken e re pa’ i kanawo’ nem ni be liyeg u baraba’ e kanawo’. Maku aram e n’en ni rin’ be’ nib Levite. “Machane be’ u Samaria ni be sor i yan ko gin’em e yib i pirieg, ma faani guy fare moon me taganan’ ngak.” Ke tafalaynag e maad’ad ko fare pumoon, me fek i yan nga ba naun ni tafen e milekag me pi’ puluwon e en nra ayuweg fare moon ni ke maad’ad. Me fith Jesus ni gaar: “Ere mini’ e arorad e dalip i girdi’ nem e ga be finey ni ir e ke mang e cha’ nib migid ngak faanem ni yib e moro’ro’ i pirdiiy”? Me fulweg fare moon ngak ni gaar: “Faanem ni runguy nge ayuweg”. Miki gaar Jesus: “Ere mman ma ga rin’ ni aram rogon.”​—Luke 10:25-37.

Piin ni kar manged Pi Mich Rok Jehovah e kar filed e re fanathin rok Jesus nem ma kar thilyeged e lem rorad u rogon ni yad ma ayuweg e piin ni gafgow. Ni bod reb e ppin ni ma par u Latvia ni ma yoloy e babyor e ke yoloy murung’agen e m’ar ni ke yib ngak u nap’an ni be maruwel u Potma penal camp u lukngun e pi duw ni 1960’s e gaar: “N’umngin nap’an ni kug m’ar ma [Pi Mich] e kar ayuweged gag nib fel’ rogon.” Miki yog ni gaar: “Pi Mich Rok Jehovah e yad be lemnag nib milfan ngorad ni ngar ayuweged gubin e girdi’ ni yugu demtrug e nam ara teliw rorad.”​—Women in Soviet Prisons.

Nap’an ni ke magawon boch e Pi Mich Rok Jehovah u Ancon, Ecuador ya dakuriy e maruwel rorad nge salpiy, ma pi walag u lan e ulung e kar lemnaged boch e kanawo’ u rogon ni nge yog e salpiy riy ngorad. Kar fal’eged boch e ggan ni ngar pied ni chuway’ ngak e piin tafita’ u nap’an ni kar sulod ko fita’ nnep’ (mu guy e sasing). Urngin e girdi’ u lan e ulung ni kar pied e ayuw nib muun e piin bitir ngay. Yad ma tabab i ngongliy e ggan ko taareb e kolok nnep’ ya nge aningeg e kolok ni ke sul e piin ni tafita’ u maday min pi’ e ggan ngorad ni chuway’. Salpiy ni ke yog ngorad e kar guyed nra be’ ma kan pi’ ni be yan u rogon e tin ba t’uf rok.

Re n’ey e be dag ni n’en ni rin’ Jesus nge tin ni ke fil ngak e girdi’ e riyul’ ni bay gelngin ni nge thilyeg e lem rorad u rogon ni rayog ni ngar ayuweged e piin nib gafgow.

3. Jesus e bay gelngin ni nge thilyeg rarogon e girdi’ ni dawor ra flontgad Gad manang ni girdi’ e bay e lem ni chogow rorad. Be yog e Bible ni aram e denen. Ke yoloy apostal Paul ni gaar: “Ere kug pirieg ni ba’ reb e motochiyel u fithik’ag ni be maruwel ni baaray rogon: faanra gub adag ni nggu rin’ e tin nib fel’, ma ke mus ntin nib kireb e rayog ni gu rin’.” Miki gaar: “I mini’ e ra chuwegeg u pa’ e re dowef ney ni ir e be fekeg i yan ko yam’? Ke magar Got u daken e Somol rodad i Jesus Kristus.” (Roma 7:21-25) U roy e be weliy Paul rogon ni nge ayuweg Got e pi tapigpig rok nib riyul’ u daken fare biyul ni pi’ Jesus nrayog ni ngar pithiged yad ko denen nib muun ngay e lem ni chogow ni ireray tapgin e gafgow. Uw rogon nra buch e re n’ey?

Boch nga tomuren ni kan taufenag Jesus, me weliy John ni Tataufe murung’agen Jesus ni gaar: “Baaram fare Fak e Saf rok Got ni ir e nge chuweg e denen rok e girdi’ nu fayleng.” (John 1:29) Dabki n’uw nap’an ma ra sug e fayleng ko girdi’ ni dab kur manged sib ko denen nib muun e lem ni chogow ngay. (Isaiah 11:9) Ra chuweg Jesus e n’en ni be k’aring e gafgow.

Ra ngan fal’eg i lemnag ma rib gel e felfelan’ u nap’an ni urngin e girdi’ e ra yog ngorad e tin nib t’uf rorad. Be gaar e Bible: “Gubin e girdi’ ni bayi be’ me par u fithik’ e gapas u tooben e woldug rok ni grapes nge woldug ni yu ke gek’iy ni fig, ma be par ndakuriy be’ nra k’aring e marus.” (Mikah 4:4) Pi thin ney e be weliy murung’agen ba ngiyal’ ni urngin e girdi’ e bay e maruwel rorad nib fel’, ma ke pagan’rad, ma dakuriy e gafgow ma urngin e pi n’ey e ra pining e sorok ngak Jehovah.