Tin Riyul’ u Murung’agen e Armageddon

“Yad e kan ni moonyan’ ni . . . ka ranod ngak e pi pilung u fayleng ni polo’ ni ngar kunuyed yad nga taabang . . . , nga bang ni ka nog yu Armageddon ngay ni thin ni Hebrew.”​—REVELATION 16:14, 16.

ARMAGEDDON e fithingan bangi ban’en. Machane, gathi riyul’ ni bangi binaw ni bay u bang u fayleng.

Ere, mang fan nib ga’ ni yima fanay fare bugithin ni “Armageddon” u nap’an ni yibe weliy murung’agen ban’en ni ke buch ara bay fini buch ni bod e mahl? Mang e be yip’ fan e re bugithin ney?

Kar Kunuyed Yad nga Taabang nga Bang ni Ka Nog yu Armageddon Ngay

Fare bugithin ni Hebrew ni Har–Magedon e be yip’ fan e “Burey nu Megiddo.” Yugu aram rogon ndariy bburey ni aram rogon fithingan, machane bay reb e binaw ni ka nog yu Megiddo ngay. Re binaw nem e bay u bangi ban’en ni yib i thil l’agruw pa’ i kanawo’ riy ko lel’uch ni ngal ko gin’en ni i par piyu Israel riy kakrom. Boor e cham ni un tay nib chugur ko gin’em. Aram fan ni yima fanay fare bugithin ni Megiddo u nap’an ni yibe weliy murung’agen e mahl. *

Machane, bin riyul’ i fan yu Megiddo e gathi cham ni un tay u rom, ya fan ni un cham.  Megiddo e bang ko fare Binaw ni Kan Micheg ni faani pi’ Jehovah Got ngak piyu Israel. (Exodus 33:1; Joshua 12:7, 21) I micheg ngorad nra ayuwegrad u pa’ e pi toogor rorad. (Deuteronomy 6:18, 19) Bod nu Megiddo e aram e gin ni ayuweg Jehovah piyu Israel riy u pa’ Jabin ni Pilung nu Kanaan nge Sisera ni ir e ga’ ko salthaw rok.​—Judges 4:14-16.

Ere, fare bugithin ni “Har–Magedon,” ara “Armageddon” e be yip’ fan ban’en. Re n’ey e gathi be yip’ fan reb e binaw, ya be yip’ fan ban’en nra buch. Re n’ey e bay rogon ko cham nra sum u thilin l’agruw e ulung nib gel gelngin.

Fare yiiy ni bay u Revelation e be weliy murung’agen ba ngiyal’ boch nga m’on nra k’aring Satan nge pi moonyan’ rok e pi am nu fayleng ni ngar kunuyed yad nge pi salthaw rorad ko re ngi n’ey ni be yip’ fan ban’en. Ma nap’an ni yad ra rin’ e re n’ey, ma aram e kar togopuluwgad ko girdi’ rok Got nge maruwel rorad. Nap’an nra cham Got ko pi toogor rok nem ma bokum milyon e girdi’ nra yim’.​—Revelation 19:11-18.

Mang fan nra li’ Got e girdi’ ni aram urngin ni yugu aram rogon ni be yog e Bible ni ir reb e Got ni ‘ba gol ma ba t’uf e girdi’ rok, ma ba sowath ni nge damumuw’? (Nehemiah 9:17) Ra ngad nanged fan nra rin’ Got e re n’ey, mab t’uf ni ngad nanged e fulweg u dalip e deer ni aram e: (1) Mini’ e ra tababnag e re mahl nem? (2) Mang fan nra un Got ngay? (3) Mang angin nra yib ko fayleng nge girdi’ riy?

1. MINI’ E RA TABABNAG E RE MAHL NEM?

Gathi Got e ir e ra tababnag fare mahl ni Armageddon. Ya kemus nra ayuweg e girdi’ nib fel’ u pa’ e piin ni yad be guy rogon ni ngar lied yad. Piin ni yad ra tababnag e re cham ney e aram e “pi pilung u fayleng.” Mang fan? Bochan nra n’igin Satan ni nge cham e pi am nge pi salthaw nu fayleng ngak e piin ni yad be pigpig ngak Jehovah Got.​—Revelation 16:13, 14; 19:17, 18.

Ngiyal’ ney e ba mo’maw’ ni nge mich u wan’ e girdi’ nra taw nga ba ngiyal’ ma ra togopuluw e pi am nu fayleng ko pi yurba’ i teliw ni bochan e kab puf rogon e girdi’ ni ngar weliyed lanin’rad mar uned ko bin yad baadag e teliw. Machane aray e n’en ni i buch u nap’an e bin 20 e chibog, maku er rogon e chiney. * Yugu aram rogon ma bay l’agruw ban’en  nib thil u thilin e n’en ni i buch e ngiyal’ nem nge n’en nra buch u nap’an e Armageddon. Bin som’on e, cham ni yira tay u nap’an e Armageddon e yira tay u ga’ngin yang e fayleng. Bin migid e, ba gel e magothgoth nra tay Jehovah Got boch nga m’on ko magothgoth ni i tay kakrom. (Jeremiah 25:32, 33) Be yog e Bible nre mahl ney e aram “fare rran ni ba ga’ fan, ni Rran rok Got ni Gubin ma Rayog Rok.”

2. MANG FAN NRA UN GOT NGAY?

Ke yog Jehovah ngak e piin ni yad ma liyor ngak ni ngaur pared nib gapas thilrad e girdi’ ma ngaur t’ufeged e pi toogor rorad. (Mikah 4:1-3; Matthew 5:43, 44; 26:52) Ere nap’an e re mahl nem ma dab ra uned ko cham ni ngar ayuweged e pogofan rorad. Faanra dabi ayuweg Got e girdi’ rok, ma yira li’rad ni yad gubin ma aram e ra kireb thin Jehovah Got. Faanra li’ e pi toogor rok Got e pi tapigpig rok ni gubin, ma aram e ra m’ug nder ma t’ufegey Jehovah, ara de mat’aw e ngongol rok, ara dariy gelngin. Dabiyog ni nge buch ban’en ni aram rogon!​—Psalm 37:28, 29.

Dabun Got ni nge thang be’, ere aram fan ni ke yog u m’on riy e n’en nra rin’. (2 Peter 3:9) Ke puguran ngodad u Bible ni kakrom e ki ayuweg e girdi’ rok u pa’ e pi toogor rorad. (2 Kings 19:35) Ku be yog e Bible nra boch nga m’on u nap’an nra cham Satan nge piin ni yad ba muun ngak ko girdi’ rok Jehovah, ma ra yib ni nge ayuweg e girdi’ rok. Bin riyul’ riy e ke n’uw nap’an ni ke yiiynag e Bible nra thang Jehovah e piin ni yad ba kireb. (Proverbs 2:21, 22; 2 Thessalonika 1:6-9) Ra taw ko ngiyal’ nem ma ra nang e pi toogor nem ni kar chamgad ngak e En ni Gubin ma Rayog Rok.​—Ezekiel 38:21-23.

3. MANG ANGIN NRA YIB KO FAYLENG NGE GIRDI’ RIY?

Bokum milyon e girdi’ ni yira ayuweg e yafas rorad u nap’an fare mahl ni Armageddon. Bin riyul’ riy e aram tabolngin e gapas nra yib nga fayleng.​—Revelation 21:3, 4.

Fare babyor ni Revelation e be weliy murung’agen e “girdi’ ni ke muulung ni pire’ ni pire’” ni yad ra magey ni yad ba fas u tomuren e re mahl ney. (Revelation 7:9, 14) Ra pow’iy Jehovah e pi girdi’ nem ni ngar ngongliyed e re fayleng ney nge mang Paradis ni bod rogon ni lemnag ko som’on.

Gad manang ko wuin e yira cham ko girdi’ rok Got, fa?

[Footnotes]

[Picture on page 6]

I ayuweg Jehovah Got e girdi’ rok kakrom

[Picture on page 7]

Ku ra ayuweg Jehovah e girdi’ rok bayay u nap’an fare mahl ni Armageddon