KENNGIN E RE KE BABYOR NEY: PI N’EN NRAYOG NI NGAD FILED ROK MOSES
Mini’ Moses?
Mang e ra yib ngan’um u nap’an ni ga ra rung’ag fare ngachal ni Moses? Ga ra lemnag ni . . .
-
Ir fare tir ni tay e chitiningin nga lan e dug me mithag nga lan fare lul’ nu Nile?
-
Ara ir reb e pagal ni chuguliy fare rugod ni fak Farao u tafen e pilung u Egypt, machane de pagtalin ni ir be’ nu Jew?
-
Ara ir be’ nib ta gafaliy e saf ni i par u lan fare binaw nu Midian u lan 40 e duw?
-
Ara ir be’ ni non ngak Jehovah * u tooben fare ke gek’iy ni be daramram?
-
Ara ir fare moon ni der rus ni yog ngak fare pilung nu Egypt ni nge pag piyu Israel ni nge dabkur manged sib?
-
Ara ir fare moon ni fanay Got ni nge weliy murung’agen fa Ragag i Gafgow nra yib nga daken yu Egypt ni bochan ni togopuluw fare pilung ngak e bin riyul’ e Got?
-
Ara ir fare moon ni pow’iy fapi girdi’ nu Israel nga wuru’ e nam nu Egypt?
-
Ara ir fare moon ni ruw raba’nag fare day ni Red Sea?
-
Ara ir fare moon ni pi’ Got fa Ragag i Motochiyel ngak ni nge pi’ ngak piyu Israel?
MOSES e rin’ urngin e pi n’ey nge ku boch ban’en. Ere, aram fan nib ga’ ni piin Kristiano nge piyu Jew nge teliw ni Muslim e yad ma tayfan e re moon ney nib yul’yul’.
Dariy e maruwar riy ni Moses e ir reb e profet ni “ngongliy e maang’ang ni ba ga’ nge bogi n’en nib gel e marus riy.” (Deuteronomy 34:10-12) Ke pag fan ir ni nge fanay Got ni nge ngongliy boch e maruwel nib ga’ fan. Machane, Moses e be’ ni taareb rogon ngodad. Nap’an ni immoy Jesus u fayleng min piliyeg e changar rok pi gachalpen ngar guyed Elijah nge Moses ni yow bay u tooben Jesus, ma yow l’agruw ni yow “bod gadad e tiney e girdi’.” (James 5:17; Matthew 17:1-9) Ya Moses e ma mada’nag boor e magawon ni bod gadad, machane ke gel ko pi magawon nem.
Ga baadag ni ngam nang ko uw rogon ni ke yag ni nge rin’ e pi n’ey? Mu lemnag dalip e pi fel’ngin Moses ni dag, nge n’en nrayog ni ngad filed riy.
^ Jehovah e fithingan Got nrogon ni bay u Bible.
