1, 2. Mang e ma lemnag e pi tapigpig rok Got u murung’agen e re fayleng ney? Mang tabinaw e bay rorad?

  BE PAGAN’UM u lan e re fayleng nib kireb ney ni bod ni ga bay u tabinaw rom fa? Faan ra danga’ maku aram rogon ni ma tafinaynag e pi tapigpig rok Jehovah. I tabab kakrom ke mada’ ko chiney, ma ma lemnag e piin nib t’uf Jehovah rorad ni yad e milekag u lan e re fayleng ney. Ni bod rogon e piin ni yad ma liyor ngak Got ni yad ba yul’yul’ ni yad ma lemnag ni yad e milekag u nap’an ni yad be yan u reb e binaw nga reb u lan yu Kanaan. Be yog e Bible murung’agrad ni “ur daged ko ngongol rorad ni yad e girdi’ nu bayang ma yad e milekag ni yad be par u roy u fayleng.”​—Heb. 11:13.

² Piin ni kan dugliyrad ni yad pi gachalpen Jesus e yad “girdien” yu tharmiy. Yad manang ni yad e “milekag” u lan e re fayleng ney. (Fil. 3:20; 1 Pet. 2:11) Ma pi gachalpen Jesus ni yad bang ko “yugu boch e saf” e “gathi yad e girdi’ nu roy u fayleng” ni bod Jesus ni gathi ir bang ko re fayleng ney. (John 10:16; 17:16) Machane, girdi’ rok Got e bay e tabinaw rorad. Re tabinaw rorad ney e dabiyog ni ngan guy nga owchey, machane ireray e bin th’abi fel’ e tabinaw, ya bochan ni bay e t’ufeg riy ma rayog ni gad ra par riy u fithik’ e gapas nib pagan’dad. Ere, mang tabinaw aray? I yoloy Moses murung’agen e re n’ey ni gaar: “Somol, ka faram i yib ke mada’ ko chiney ni ga be par ni gur e tabinaw ngomad.” (Ps. 90:1) Jehovah e be par ni ir ba “tabinaw” ko pi tapigpig rok ni yad ba yul’yul’. Ere, ga manang ko uw rogon ni ke par Jehovah ni nge mang ba tabinaw ko pi tapigpig rok kakrom? Ma uw rogon ni nge mang ba tabinaw ko girdi’ rok e ngiyal’ ney? Ma uw rogon ni nge mang ba tabinaw ko pi tapigpig rok nrayog ni nge pagan’rad ngay boch nga m’on?

3. Mang e kan taarebrogonnag Jehovah ngay ko Psalm 90:1, ma mang fan?

³ Yu ngiyal’ ma Bible e ma taarebrogonnag Jehovah nga boch ban’en ni gad ma guy, ya nge yag ni ngad nanged pi fel’ngin. Bod ni bay ko Psalm 90:1 ni be taarebrogonnag Jehovah nga reb e “tabinaw.” Ma nap’an ni gad ra lemnag ba tabinaw, ma gad ma lemnag e gin ni bay e t’ufeg nge gapas nge pagan’ riy. Ere, mang fan ni kan taarebrogonnag Jehovah nga ba tabinaw? Ya be yog e Bible ni Jehovah e t’ufeg. (1 John 4:8) Maku be yog ni ir e Got ko gapas ma ma yororiy e pi tapigpig rok. (Ps. 4:8) Ere, chiney e ngad weliyed rogon ni ke mang Jehovah ba tabinaw ngak Abraham, nge Isak, nge Jakob ni yad e pi tapigpig rok ni yad ba yul’yul’ ngak.

4, 5. Uw rogon ni ke tow’athnag Got Abraham me ayuweg?

⁴ Sana ra lemnag Abraham ko mang fan ni yog Jehovah ngak ni gaar: “Mpag e nam rom, nge girdi’ rom, nge tabinaw rok e chitamam ngam man nga ba nam ni bay fin gu dag ngom.” Ma dabisiy ni re thin ney ni yog Jehovah ngak e ke pi’ e athamgil nga laniyan’, ya yog ni gaar: “Bay gu gagiyeg nge yib owchem ni pire’ ni pire’, ni yad e bay ra manged girdien ba nam ni pire’ girdien. Bay gu fal’eg waatham mu gu gagiyeg nge gilbuguwan fithingam.” Miki yog ni gaar: “Gu ra fal’eg waathan e piin ni yad ra fal’eg waatham, ma gu ra bucheg waathan e piin ni yad ra yibiliyem ni nge kireb waatham.”​—Gen. 12:1-3.

⁵ I micheg Jehovah nra tow’athnag Abraham nge girdi’ rok, ma ireram e n’en ni rin’. (Gen. 26:1-6) Ni bod rogon ni taleg Farao ni pilung nu Egypt nge Abimelek ni Pilung ni nge dab ra li’ew Abraham nge yim’ min fek Sarah ni ppin rok. Maku aram rogon ni i ayuweg Isak nge Rebekah. (Gen. 12:14-20; 20:1-14; 26:6-11) Be yog e Bible ni Jehovah e “de pag be’ nge gafgownagrad, ma i puwan’ ngak e pi pilung ni bochrad. I gaar, ‘Dabi math pa’med ngak e pi tapigpig rog ni gag e gu mel’egrad; dab mu rin’ed ngak pi profet rog’”​—Ps. 105:14, 15.

6. Mang e yog Isak ngak Jakob ni nge rin’, ma uw rogon e tafinay rok Jakob riy?

⁶ Miki ayuweg Jehovah Jakob ni fak fak Abraham. Ma nap’an ni taw ko ngiyal’ ni nge un Jakob ko mabgol, me yog Isak ni chitamangin ngak ni gaar: “Dab mu leay reb e ppin ko pi girdi’ ni baara’ ni ka nog e Kanaanite ngorad. Mu fal’eg rogom ngam man nga Mesopotamia, nga tafen Bethuel, ni chitamangin e chitinam. Mu leay reb e ppin u rom, ni reb i fak Laban.” (Gen. 28:1, 2) Me fol Jakob ko n’en ni yog e chitamangin ngak. Ke pag e tabinaw rok u Kanaan, me milekag ni yigoo ir ni bokum e mayel ko fare binaw nu Haran. (Gen. 28:10) Dabisiy ni ke lemnag ko: ‘Uw n’umngin nap’an nra gu wan? Ra felfelan’ walagen e nina rog ni nge guyeg, fa? Gur, gu ra pirieg be’ ni nggu leengiy nib t’uf Jehovah rok?’ Machane, bay  ban’en ni buch ko fare binaw nu Luz ni 60 mayel palogin ko binaw nu Beer-sheba ni ayuweg Jakob ni nge dabki magafan’. Mang e re n’em?

7. Uw rogon ni ke fal’eg Got laniyan’ Jakob?

⁷ Nap’an ni immoy Jakob ko fare binaw nu Luz me m’ug Jehovah ngak u malik’ay me gaar: “Dab mu pagtalin, ni bay ug un ngom ng’ug yoror rom ko yungi n’en ni ga be yan riy, ma bay gu fulwegnem ko re nam ney. Dab gu pagem nge mada’ ko ngiyal ni kug ngongliy urngin e tin kugog ngom ni bay gu rin’.” (Gen. 28:15, BT) Ma pi thin nem e kari fal’eg laniyan’ Jakob. Tomuren e re n’ey, ma dabisiy ni baadag ni nge guy ni ke lebug e n’en ni ke micheg Jehovah. Ere, faanra gur be’ ni kam chuw ko binaw rom ni ngam pigpig u yugu reb e nam, ma rayog ni nge magafan’um ni bod rogon Jakob. Machane, kam guy ni boor e kanawo’ ni ke ayuwegem Jehovah riy.

8, 9. Uw rogon ma Jehovah e ke mang ba “tabinaw” ngak Jakob? Mang e rayog ni ngad filed u murung’agen Jehovah ko n’en i rin’ Jakob?

⁸ Nap’an ni taw Jakob ko fare binaw nu Haran, ma Laban ni walagen e chitiningin e pining e magar ngak ya ke felfelan’ ni ke yib, me tomur riy me pi’ Leah nge Rachel ni fak ni nge leay. Machane, me munmun me tabab Laban ni nge ngongol u fithik’ e sasalap ngak Jakob, me thilyeg puluwon ni ragag yay. (Gen. 31:41, 42) Machane, i athamgil Jakob ni bochan be pagan’ ngak Jehovah nra pi’ e tin nib t’uf rok. Ma bochan e re n’ey me tow’athnag Jehovah Jakob. Nap’an ni taw ko ngiyal’ ni yog Got ngak Jakob ni nge sul nga Kanaan, me ke mil fan ngak ‘yu ran’ i gamanman, nge sib, nge kamel, nge dongki.’ (Gen. 30:43, BT) Ere, kari gel e felfelan’ rok Jakob me pining e magar ngak Jehovah u fithik’ e meybil ni gaar: “I gag e tapigpig rom e dariy rogog nga urngin e runguy nge yul’yul’ rom ni kam dag ngog. Gu th’ab e lul’ ni Jordan nga baraba’ ndariy taa ban’en rog, ya ke mus ni sog rog e bay u paag, ma chiney e kug sul ni l’agruw ulung e girdi’ nge gamanman ni ke un ngog.”​—Gen. 32:10.

⁹ Pi n’ey ni kad weliyed e be micheg feni ba riyul’ fare thin rok Moses ni gaar: “Somol, ka faram i yib ke mada’ ko chiney ni ga be par ni gur e tabinaw ngomad.” (Ps. 90:1) Jehovah e dawori thil. Ku ma dag e t’ufeg ma ma yororiy e pi tapigpig rok ni yad ba yul’yul’, ya bochan ni ma lemnagrad. (Jas. 1:17) Ere, chiney e ngad weliyed ko uw rogon.

10. Mang fan nrayog ni nge pagan’dad ni be ulul Jehovah ni nge mang ba “tabinaw” ngak e pi tapigpig rok?

¹⁰ Mu lemnag e re n’ey. Ga bay u kourt ni ga be micheg boch ban’en ni ke rin’ be’ nib llowan’ mab gel gelngin. Ma cha’nem e be’ nib sasalap l’ugun, ma ma thang e fan ko girdi’, ma boor e girdi’ u ga’ngin yang e fayleng ni yad be maruwel rok. Ere, uw rogon e tafinay rom u nap’an ni ga ra chuw u kourt e rofen nem? Ga ra par nib pagan’um? Sana danga’! Ma bay rogon ni ngam ning e ayuw. Re n’ey e rayog ni ngan taarebrogonnag ko pi tapigpig rok Jehovah ni yad be micheg boch ban’en nib togopuluw ni ke rin’ e en toogor rok Jehovah ni aram Satan. (Mu beeg e Rev. 12:17.) Be gay Satan rogon ni nge taleg e girdi’ rok Got. Ke yag rok ni nge rin’ e re n’ey, fa? Danga’! Ya gad be ulul i machibnag e girdi’ u ga’ngin yang u fayleng. Uw rogon ni yibe rin’ e re n’ey? Kemus ni gad be rin’ ni bochan ni Jehovah e ke mang ba “tabinaw” ngodad. Ngiyal’ ney ko tin tomuren e rran ma Jehovah e be gelnag e ayuw ni be pi’ ko pi tapigpig rok ma be tow’athnagrad. (Mu beeg e Isaiah 54:14, 17.) Machane, Jehovah e ra ulul ni nge mang ba “tabinaw” ngodad ni faanra dab da paged Satan ni nge bannagdad.

11. Mang boch ban’en nrayog ni ngad filed rok Abraham, nge Isak, nge Jakob?

¹¹ Ere, chiney e gad ra fil ban’en ko n’en ni buch rok Abraham nge Isak nge Jakob. Yugu aram rogon ni kar pared ko fare nam nu Kanaan, machane yad be par ni yad ba thil ko pi girdi’ nem, ma kar fanenikayed e pi n’en nib kireb ni yibe rin’. (Gen. 27:46) De t’uf ni ngan pi’ bang i babyor ngorad ni kan yoloy urngin ban’en ngay nib kireb nge pi n’en nib fel’, ya ngar nanged e  n’en ni ngar rin’ed. Ya n’en nib ga’ fan u wan’rad e nge t’uf Jehovah rorad ma kar nanged e pi n’en ni dabun. Ere, kar rin’ed gubin nrayog rorad ni ngar pared ni yad ba thil ko re fayleng ney. Aram fan nib fel’ ni ngad folwokgad rorad. Ere, ga ma gay rogon ni ngam folwok rok e pi tapigpig rok Jehovah ni yad ba yul’yul’, fa? Ma m’ug ko ngongol rom ni dabum ni ngam mang reb i girdien e re fayleng ney u rogon ni ga ma mel’eg e piin ni ngam chag ngorad, nge pi n’en ni ga ma fanay ni fan ni ngam chuweg e chalban rom ngay, fa? Ba gel e kireban’ riy ya bay boch e Kristiano u lan e ulung rodad ni ma m’ug ko ngongol rorad nib fel’ u wan’rad e pi n’en ni yad be un ngay nib milfan ko re fayleng rok Satan ney. Faanra yu ngiyal’ ma ga ma lemnag ban’en ni aram rogon, mag ning e ayuw rok Jehovah u daken e meybil. Dab mu pagtalin ni re fayleng ney e ba mil fan ngak Satan ma ir be’ ni bay e lem rok nib fel’ ngak ma dariy fadad u wan’.​—2 Kor. 4:4; Efe. 2:1, 2.

12. (a) Uw rogon ni ma ayuweg Jehovah e pi tapigpig rok? (b) Uw rogon u wan’um e ayuw ni ma yib rok Jehovah?

¹² Faanra dubdad ni nge bannagdad Satan, mab t’uf ni ngad gayed e ayuw rok Jehovah ni ma pi’ ko pi tapigpig rok. Ni bod e ayuw ni ma yib ngodad u daken e pi muulung ni gad ma un ngay, nge fol Bible ni tabinaw, nge ayuw ni ma pi’ e piin piilal nrayog ni nge pi’ e athamgil nga lanin’dad, me ayuwegdad ni nge yag ni ngad k’adan’dad u fithik’ e pi magawon rodad. (Efe. 4:8-12) Ni bod ni yog reb e walag ni George Gangas fithingan, ni ke yoor e duw ni ke mang be’ ko fare Ulung ni Ma Pow’iyey ni weliy murung’agen rogon ni ngan chag ko girdi’ rok Got ni gaar: “Nap’an ni gu ma chag ko girdi’ rok Got ma bod ni gu bay u fithik’ girdien e tabinaw rog.” Aram rogon ni ga be tafinaynag e re n’ey, fa?

13. Mang e rayog ni ngad filed ko fare thin ni bay ko Hebrews 11:13?

¹³ Maku reb e ban’en nrayog ni ngad filed rok Abraham, nge Isak, nge Jakob e susun ndab da rusgad ni bochan ni gadad ba thil ngak e tin ni ka bay e girdi’ u toobdad. Ya taareb rogon ko n’en ni kad weliyed ni murung’agen e pi pumoon nib yul’yul’ n’ey ko  paragraph 1 ni “ur daged ko ngongol rorad ni yad e girdi’ nu bayang ma yad e milekag ni yad be par u roy u fayleng.” (Heb. 11:13) Ga ma dag ko ngongol rom ni gab thil ko girdi’ u roy u fayleng? Yu ngiyal’ mab mo’maw’ e re n’ey. Machane, rayog ni ngan rin’ ni faanra ayuwegem Got nge pi walag u lan e ulung. Dab mu pagtalin ni boor e pi walagdad u ga’ngin yang u fayleng. Gubin e girdi’ ni yad baadag ni ngar pigpiggad ngak Jehovah e thingar ra chamgad ngak Satan nge re fayleng ney. (Efe. 6:12) Machane, rayog ni ngad gelgad ni faanra pagan’dad ngak Jehovah ni nge mang ba tabinaw ngodad.

14. Mang fare “binaw” ni be sonnag Abraham?

¹⁴ Thingar da folwokgad rok Abraham, me l’agan’dad ko pi tow’ath nra pi’ Got ngodad boch  nga m’on. (2 Kor. 4:18) I yoloy apostal Paul murung’agen Abraham ni be “sonnag fare binaw ni Got e ke gonopiy yaan ke toy, ni fare binaw ni ba’ taan u but’ ndabi chuw biid.” (Heb. 11:10) Re “binaw” nem ni be sonnag Abraham ni nge yib e be yip’ fan Gil’ilungun Got. Ma gadad e dariy fan ni ngad sonnaged, ya re Gil’ilungun ney e ke gagiyeg e ngiyal’ ney u tharmiy. Ma pi yiiy u Bible e be tamilangnag ni dabki n’uw nap’an ma ra gagiyegnag e fayleng ni polo’. Ere, ga be dag ko ngongol rom nib mich u wan’um ni be gagiyeg e re Gil’ilungun ney, fa? Ga be m’oneg fare Gil’ilungun u lan e yafas rom, ma ga ma par ni gab dar ko re fayleng ney?​—Mu beeg e 2 Peter 3:11, 12.

15. Mang e ra buch ko piin ni be pagan’rad ko pi n’en ni bay ko re fayleng ney boch nga m’on?

¹⁵ Pi magawon u roy u fayleng e ba mudugil nra gel i yan u m’on ni nge yib e tomur. (Matt. 24:7, 8) Ma nap’an nra tabab fare gafgow nib ga’ ma ra gel e mo’maw’ ko par rodad. Ma yira gechignag e piin nib kireb u ga’ngin yang e fayleng, ma ra balyangan’rad ni bochan gelngin e marus. (Hab. 3:16, 17) Ya be yog e thin nu Bible ni bochan gelngin e marus rorad, ma aram e yad ra mith “nga lan e yiy nge nga tan e war u daken e burey.” (Rev. 6:15-17) Machane, dariy reb e yiy, ara reb e siyobay nib ga’, ara reb e ulung ko am nrayog ni nge ayuwegrad.

16. Uw rogon u wan’um e pi muulung ni gad ma un ngay, ma mang fan?

¹⁶ Ra ayuwegdad Jehovah u nap’an fare gafgow nib ga’. Gad ra bod Habakkuk ni profet nib felfelan’ ni bochan ni Got e ra ayuweg. (Hab. 3:18) Mang boch e kanawo’ nra ayuwegdad Jehovah riy e ngiyal’ nem? Susun ni ngad songad ngad guyed rogon e ayuw nra pi’ ngodad. Machane, be pagan’dad nra par e girdi’ rok Jehovah ni yad ba yaram, ma ra tamilangnag ko mang e ngad rin’ed ni bod rogon piyu Israel kakrom u nap’an ni kar chuwgad u Egypt. (Mu beeg e Exodus 13:18; Rev. 7:9) Uw rogon nra tamilangnag Jehovah ngodad e n’en ni ngad rin’ed? Dabisiy nra fanay e pi ulung ni nge yog e n’en ni ngad rin’ed. Ya i yog Isaiah 26:20 murung’agen e pi “naun” ni bay e ayuw ko girdi’ rok Got riy. Pi naun ney e rayog ni nge yip’ fan e pi ulung rodad u ga’ngin yang e fayleng. (Mu beeg e Isaiah 26:20, BT.) Ere, rib ga’ fan u wan’um e pi muulung rodad, fa? Ga ma gay rogon ni ngam fol ko pi n’en ni ma yog Jehovah ngodad u daken e pi muulung rodad, fa?​—Heb. 13:17.

17. Uw rogon ma Jehovah e ra mang ba “tabinaw” ngak e pi tapigpig rok ni kar m’ad ni yad ba yul’yul’?

¹⁷ Rayog rok Jehovah ni nge mang ba “tabinaw” ngak e piin ni yad ra yim’ ni yad ba yul’yul’ u m’on ko fare gafgow nib ga’. Ni uw rogon? Ya ra fasegrad ko yam’. Ki yog Jehovah ngak Moses murung’agen e fas ko yam’ ni yugu aram rogon mi ke n’uw nap’an ni ke yim’ Abraham, nge Isak, nge Jakob ni ir e Got rorad. (Ex. 3:6) Me sul Jesus u daken e pi thin ney miki ulul ngay ni gaar: “Fan e re n’ey e ir e Got rok e girdi’ nib fos, ma gathi Got rok e girdi’ nib yam’ ya rogon ni be guy Got e girdi’ e yad urngin ni yad ba fos.” (Luke 20:38) Rib mudugil u wan’ Jehovah e fas ko yam’ nra tay e pi tapigpig rok ni yad ba yul’yul’ ngak ni gowa ke fasegrad ko yam’.​—Ekl. 7:1.

18. Uw rogon me mang Jehovah ba “tabinaw” ko pi tapigpig rok u lan e bin beech e fayleng?

¹⁸ U lan fa bin nib beech e fayleng, ma ra mang Jehovah ba “tabinaw” ngak e girdi’ rok u reb e kanawo’ nib ga’ fan. I weliy e Revelation 21:3 ni be gaar: “Chiney e keb i par tafen Got nga fithik’ e girdi’! Bayi par rorad.” Ma ra fanay Jehovah Jesus ni nge gagiyegnag e fayleng u lan biyu’ e duw. Ma tomuren fare biyu’ e duw, ma ra lebguy e pi n’en nib m’agan’ Chitamangin ngay ni fan ko fayleng, ma aram e ra sulweg e re Gil’ilungun nem ngak Jehovah. (1 Kor. 15:28) Ma aram e ra gagiyegnag Jehovah e girdi’ ni yad ba flont ma ke fel’ e tha’ u thilrad. Ere, rib manigil e re athap rodad ney boch nga m’on! Ere, ngad folwokgad ko pi tapigpig rok Jehovah kakrom ni yad ba yul’yul’, ma ngad daged ni ba ga’ fan u wan’dad ni nge mang Jehovah ba “tabinaw” rodad e ngiyal’ ney.