Got e dariy leengin ni nge gargelnag e bitir. Machane ir e ke Sunmiy urngin ban’en nib fas. Maku kan sunmiy e girdi’ nrayog ni ngar daged pi fel’ngin Got u daken e ngongol rorad. Aram fan ni Adam ni ir e bin som’on e girdi’ ni sunmiy Got e kan pining “fak Got” ngak. Maku arrogon Jesus ni kan pining “Fak Got” ngak, ya kan sunmiy ni bay pi fel’ngin e Chitamangin rok.​—Mu beeg e Luke 3:38; John 1:14, 49.

Ke sunmiy Got Jesus u m’on ni nge sunmiy Adam. Bin riyul’ riy, e ke sunmiy Got Jesus, ma pa’ e ke sunmiy urngin ban’en nib muun e pi engel ngay. Aram fan ni be yog e Bible ni “ir e bin ni m’on i Fak, ni ir e ba tolang ngak urngin ban’en ni sunumiy Got.”​—Mu beeg e Kolose 1:15, 16.

U m’on ni kan gargelnag Jesus u Bethlehem ma immoy ni reb e engel u tharmiy. Ma nap’an ni ke taw nga nap’an, me ngal’uweg Got e yafas rok Jesus nga yin Maria ya nge yag ni ngan gargelnag nib girdi’.​—Mu beeg e Luke 1:30-32; John 6:38; 8:23.

Mang fan ni ke gagiyegnag Got Jesus ni ngan gargeleg ngaray nga fayleng nreb e girdi’? Mang maruwel ni yugub thil ni ke lebguy Jesus? Rayog ni ngam pirieg e fulweg ko pi deer ney u Bible, ma ra ayuwegem e pi n’ey ni nge yoor e tamilangan’ rom, mag felfelan’ ko n’en ni ke rin’ Got nge Jesus ni fan ngom.