UW ROGON u wan’um fare deer u keru’ e re ke babyor ney, ban’en ni ngan gin ngay, fa? Boch e girdi’ e yad ma lemnag e re n’ey, maku boor e girdi’ ni yad ma lemnag ni Got e be’ nder ma runguy e girdi’. Mang fan?

Boch e girdi’ ni kar mageygad ni yad ba fas u tomuren e yoko’ ara durru’ ara boch ban’en ni yima gafgow riy e yad ma fith ni nge lungurad: “Mang fan ni ke pag Got e pi n’ey ni nge buch? Gur, dariy fan e girdi’ u wan’? Fa, ir be’ nder ma dag e runguy?”

Maku bay yugu boch e girdi’ ni ke balyangan’rad u nap’an ni yad ra beeg e Bible. Yad ma beeg murung’agen Noah nge fare Ran ni tharey e fayleng, ma yad ma lemnag ko ‘Mang fan nreb e Got ni ma dag e t’ufeg e ke k’aring e yam’ ngak boor e girdi’? Gur, ir be’ nder ma dag e runguy?’

Gur, bay yu ngiyal’ ni ga ma fith e pi deer ney? Ara kam pirieg nib mo’maw’ ni ngam pi’ e fulweg ngak e piin ni yad ma lemnag ko ir reb e Got nder ma runguy e girdi’ fa? Yugu demtrug rogon, machane ba fel’ ni ngad lemnaged yugu reb e deer ni ku rayog ni nge ayuwegey.

Gad ma fanenikay e biney e ngongol ni bochan ni gad manang e tin nib fel’ nge tin nib kireb. Gadad ba thil ko gamanman. Ke sunmiydad Got ni gadad “bod yaan.” (Genesis 1:27) Mang e be yip’ fan e re n’em? Ke sunmiydad Jehovah u reb e kanawo’ nrayog ni ngad daged pi fel’ngin, ma gad manang e tin nib fel’ nge tin nib kireb ni ngad rin’ed. Mu lemnag e re n’ey: Faanra ke ayuwegdad Got ni ngad nanged e tin nib fel’ nge tin kireb ma dubdad e ngongol ko girdi’ nder dag e runguy, ma gathi be m’ug riy ni ku dabun Got e re ngongol ney?

Be tamilangnag e Bible nriyul’ ni aram rogon ya yog Got ni gaar: “Aram feni thil e tirog e kanawo’ nge lem rog ko tiromed.” (Isaiah 55:9) Faanra nga dogned ni Got e der ma runguy e girdi’, ma gathi gad be togopuluw ko n’en ni be yog e Bible ni gowa gad be yog ni boor ban’en ni gad manang ngak. Ba fel’ ni ngkud nanged boch murung’agen e re n’ey u m’on ni ngad dugliyed ban’en. Sana bfel’ ni ngad fithed ko mang fan ni ma rin’ Got boch ban’en ni gowa be m’ug riy nder runguy e girdi’. Ra tamilang u wan’dad e re n’ey nfaan gad ra nang fan fare thin ni “der dag e runguy.”

Faanra gad be yog murung’agen be’ nder ma runguy e girdi’, ma aram e gad be yog ni ir be’ nib kireb e lem rok. Be’ nder ma runguy e girdi’ e ma felfelan’ nra guy ni yad be gafgow, ma dariy farad u wan’. Ere reb e matam ni be gechignag e bitir rok nbochan ni baadag ni nge kirebnag laniyan’ e ir be’ nder dag e runguy. Machane reb e matam ni ma llowan’nag e bitir rok ya nge fil ban’en ngak ara nge ayuweg e ir be’ nib manigil. Bochan ni gathi gubin e ngiyal’ ni gad manang fan ni ke rin’ be’ ban’en, ma aram e ba mom ni nga dogned nde puluw e n’en ni ke rin’, mab mom ni ngam nang fan e re n’ey nfaanra bay be’ ni ke yog ban’en u murung’agen e n’en ni kam rin’ nde puluw.

Gad ra weliy l’agruw i fan ni ma lemnag e girdi’ ni Got e be’ nder ma dag e runguy, u daken e pi yoko’ ara durru’ ara boch ban’en ni yima gafgow riy ni ma yib ngodad nge pufthin ni i tay Got ngak e girdi’ ni kan yoloy murung’agen nga Bible. Gur, riyul’ ni bay e mich riy nder ma runguy Got e girdi’?