Yam’ e gathi ban’en nib mom ni ngan weliy murung’agen. Ma boor e girdi’ ni dubrad ni yima weliy e re n’ey. Machane, bay ba ngiyal’ nra taw ngay ma dabiyog ni ngad pilo’gad riy. Ma wenegan e yam’ e ma gafgownag lanin’uy.

Dariy ban’en nrayog ni ngad rin’ed ni ngad fal’eged rogodad u nap’an nra yim’ reb e gallabthir rodad, ara en mabgol rodad, ara reb e bitir rodad. Rayog ni nge buch ban’en rok be’ me yim’ nib tomgin ara yib reb e m’ar ngak me munmun me yim’. Yugu demtrug ko mang e n’en nra buch ma dabiyog ni ngad pilo’gad ko re amith nem ni ma k’aring e yam’, ma n’en nra buch nga tomuren e ra wageynag lanin’uy fa k’aring e kireban’ nib gel.

Antonio, e yim’ e chitamangin u nap’an ni chafin e karrow rok e ke weliy ni gaar: “Re n’em ni buch e bod ni ke loknag be’ e naun rom, me fek e kiy riy nge yan. Ma dakuriy e ngiyal’ nrayog ni ngam sul ko fare naun. Kemus ni pi n’en ni um rin’ew facha’ ni ke yim’ u taabang u nap’an ni kab fas e ka ga be lemnag. Re n’ey ni ke buch rom e ban’en nib riyul’. Ni yugu aram rogon ni ga be athamgil ni ngaum lemnag ndawori yim’ facha’ nib t’uf rom, machane dariy ban’en nrayog ni ngam rin’ ni ngam pithig e biney e magawon.”

Dorothy e 47 e duw rok u nap’an ni yim’ e pumoon rok, ma baadag ni nge nang ko mang e ra buch rok e piin ni kar m’ad. Ir reb e sensey ko Sunday-skul, ma dariy ba ngiyal’ ni lemnag nra yim’ be’ ma dakuriy e athap rok. Machane, gathi rib tamilang u wan’ ko mang e ma buch rok e piin ni kar m’ad. I fith reb e deer ngak e padrey ko teliw rok ni gaar: “Mang e ma buch rodad u nap’an ni kad m’ad?” Me fulweg fare padrey ni gaar: “Dariy be’ ni manang, ere ngad songad ngad guyed.”

Gur, bay n’umngin nap’an ni “ngaud songad ngad guyed”? Bay reb e kanawo’ nrayog ni nge ayuwegdad ngad nanged ko riyul’ nra yim’ be’ ma dakuriy e athap rok, fa?