1, 2. (a) Mang fanathin e ka fini mu’ Jesus i weliy murung’agen ngak pi gachalpen nri yad ba chuchugur? (Mu guy e sasing ni bay u tabolngin e re article ney.) (b) Mang e ba t’uf ni ngad nanged ko fare fanathin ni murung’agen fapi saf nge kaming?

 NGIYAL’ nem e be non Jesus ngak Peter, Andrew, James, nge John, ni aram boch i gachalpen nri yad ba chuchugur. Ka fini mu’ i weliy fapi fanathin ngorad ni murung’agen fare tapigpig nib yul’yul’ ma ba gonop, nge fa ragag i rugod, nge fapi salpiy ni ka nog e talent ngay. Tomuren e re n’ey, miki weliy Jesus taareb e fanathin ngorad. I weliy murung’agen ba ngiyal’ nra yib e “en ni Fak e Girdi’” ni nge pufthinnag “urngin girdien e pi nam nu fayleng.” Dariy e maruwar riy ni kari ngat pi gachalpen nga rogon ni ke weliy e pi fanathin ney! U lan e re fanathin rok Jesus ney e weliy riy murung’agen l’agruw ulung i girdi’. Reb e ulung e taareb rogorad ko saf, ma reb e taareb rogorad ko kaming. Miki tamilangnag ni ku bay reb e ulung nib ga’ farad, ni yad ‘pi walagen’ “fare pilung.”​—Mu beeg e Matthew 25:31-46.

² Kab kafram i yib nri ma lemnag e pi tapigpig rok Jehovah e re fanathin ney, ma bay rogon ni ngar rin’ed e re n’ey ni bochan nre fanathin ney ni weliy Jesus murung’agen e be weliy murung’agen e n’en nra buch ko  girdi’ boch nga m’on. Ki tamilangnag fan nra yag e yafas ndariy n’umngin nap’an ngak boch e girdi’ nge fan ni yira thang boch e girdi’. Aram fan nrib ga’ fan ni ngad nanged fan e re fanathin ney nge n’en nthingar da rin’ed me yag e yafas ndariy n’umngin nap’an ngodad. Bochan e re n’ey, ma thingar da fithed ni nge lungudad: Uw rogon ni ke ayuwegdad Jehovah ni nge tamilang e re fanathin ney u wan’dad ni buchuuw ma buchuuw? Mang fan nrayog ni nga dogned nre fanathin ney e be tamilangnag feni ga’ fan fare maruwel ni machib? Mini’ e kan tay chilen fare maruwel ni machib ngak? Ma mang fan ni ireray e ngiyal’ ni ngad pared ni gad ba yul’yul’ ngak “fare pilung” nge piin ni ma yog ni yad ‘pi walagen’?

3, 4. (a) Mang boch ban’en nib t’uf ni nge tamilang u wan’dad mfini yag ni ngad nanged fan fare fanathin ni murung’agen fapi saf nge kaming? (b) Uw rogon nni weliy e re fanathin ney u lan fare Zion’s Watch Tower u nap’an e duw ni 1881?

³ Faanra ngari tamilang u wan’dad fare fanathin ni murung’agen fapi saf nge kaming, mab t’uf ni nge tamilang dalip ban’en u wan’dad ni bay murung’agen ko re fanathin ney, ni aram e: piin ni kan weliy murung’agrad, ngiyal’ ni yira pufthin riy, nge fan ni yira dugliy ni boch e girdi’ e yad bod e saf ma boch e yad bod e kaming.

⁴ Nap’an e duw ni 1881, me yog fare Zion’s Watch Tower ni fa “en Fak e Girdi’” ni ku yima yog “fare pilung” ngak e be yip’ fan Jesus. Miki yog e re ke babyor nem ni “pi walagen” fare Pilung e gathi kemus ni be yip’ fan e piin ni yad ra un ngak Kristus ko gagiyeg u tharmiy, ya kub muun ngay e piin ni yad ra par u fayleng ko ngiyal’ ni kar flontgad. Kur lemnaged nu lan fare Biyu’ i Duw ko Gagiyeg rok Kristus e aram e ngiyal’ nra yan i gagiyel ko mini’ e saf ma mini’ e kaming. Ma kur lemnaged ni piin ni yad ra fol ko motochiyel rok Got u murung’agen e t’ufeg e aram e piin ni yira dugliy ni ngar manged saf.

5. Uw rogon ni tamilang boch ban’en u wan’ e pi tapigpig rok Got u nap’an e duw ni 1923?

⁵ Boch nga tomuren me ayuweg Jehovah e pi tapigpig rok ni nge tamilang boch e re fanathin ney u wan’rad. Kan tamilangnag u lan Fare Wulyang ko Damit ko October 15, 1923 ko thin ni Meriken, ni fa “en ni Fak e Girdi’” e aram Jesus. Machane, kun fanay boch e thin nu Bible riy ni be weliy ni fapi cha’ ni walagen Kristus nni weliy murung’agrad ko fare fanathin e be yip’ fan e piin ni yad ra un ngak ko gagiyeg u tharmiy, ma fapi saf e be yip’ fan e piin ni yad be athapeg e par u fayleng u tan e gagiyeg nra tay Gil’ilungun Kristus. Ma uw rogon e ngiyal’ ni yira kieg fapi saf u fithik’ fapi kaming? I tamilangnag e re article nem nra taw nga nap’an e Gagiyeg nra tay Kristus u Lan fare Biyu’ i Duw, ma ra un pi walagen Kristus ngak ko gagiyeg. Ere ra taw ko ngiyal’ nem ma dabkiyog ni nge ayuwegrad reb e ulung u fayleng. Ere, ba mudugil ni yira kieg e saf u fithik’ e kaming u m’on ni nge tabab e Gagiyeg rok Kristus u Lan fare Biyu’ i Duw. Ki tamilangnag e re article nem ni piin ni yira dugliyrad ni ngar manged saf e aram e piin ni mich Jesus u wan’rad ma ki mich u wan’rad ni Gil’ilungun Got e ir e ra fal’eg urngin ban’en nge fel’.

6. Uw rogon ni kun tamilangnag boch ban’en u wan’dad u nap’an e duw ni 1995?

⁶ Bochan e re n’ey, ma aram me lemnag e pi tapigpig rok Jehovah ni aram e kan tabab i dugliy ko mini’ e piin ni yad bod e saf ma mini’ e piin ni yad bod e kaming u nap’an e ngiyal’ ni ke chugur nga tungun e re m’ag ney. Ma yira dugliy e re n’ey ni be yan u rogon ko mini’ e ra motoyil ko fare thin nib fel’ ni yibe machibnag ni murung’agen Gil’ilungun Got, ma mini’ e danga’. Machane, nap’an e duw ni 1995, ma aram mu kun tamilangnag e re n’ey u wan’dad. Immoy l’agruw e article ko Fare Wulyang ko Damit ko October 15, 1995 ko thin ni Meriken ni taarebrogonnag fapi thin ni yog Jesus ni bay ko Matthew 24:29-31 (mu beeg) ko Matthew 25:31, 32. (Mu beeg.) * Ma mang e tamilang riy? I yog e bin som’on  ko gal article ney ni gaar: “Fin boch nga m’on e yira pufthinnag e piin ni yad bod e saf nge piin ni yad bod e kaming.” Wuin e ra buch e re n’em? “Ra buch u tomuren fare ‘gafgow’ nib ga’ ni kan weliy murung’agen ko Matthew 24:29, 30, ma aram e ngiyal’ nra yib e en Fak e Girdi’ riy ‘ni ke pilung.’ . . . Ma aram me tabab ni nge pufthinnag urngin e girdi’.”

7. Mang e ke tamilang u wan’dad e chiney?

⁷ Chiney e ke tamilang fare fanathin ni murung’agen fapi saf nge kaming u wan’dad. Ke tamilang u wan’dad ni fa “en Fak e Girdi’” ara fare Pilung e be yip’ fan Jesus. Ma fapi cha’ ni yog fare pilung ni yad ‘pi walagen’ e be yip’ fan e pi pumoon nge ppin ni kan dugliyrad ni yad ra un ngak Kristus ko gagiyeg u tharmiy. (Rom. 8:16, 17) Ma fapi “saf” nge “kaming” e be yip’ fan girdien e pi nam. Machane, pi girdi’ ney e dabin dugliyrad nga gelngin Got nib thothup. Ma uw rogon e ngiyal’ ni yira pufthin riy? Yira rin’ e re n’ey u ba ngiyal’ u tungun fare gafgow nib ga’ ni bay yib ndab ki n’uw nap’an. Ma mang fan ni yira dugliy ni boch e girdi’ e yad bod e saf ma boch e yad bod e kaming? Yira dugliy e re n’ey ni be yan u rogon e ngongol rorad ngak pi walagen Kristus ni kan dugliyrad ni ka yad bay u fayleng. Chiney ni kari chugur nga tungun e re m’ag ney e ri gad be pining e magar ngak Jehovah ni ke ayuwegdad ni kab kafram i yib ni ngad nanged fan e re fanathin ney nge ku boch e fanathin ni bay rogon ngay ni bay ko Matthew ko guruy ni  24 nge 25!

8, 9. Mang fan ni ka nog ni “mmat’aw” fapi saf?

⁸ Gathi rri tamilangnag Jesus murung’agen fare maruwel ni machib ko fare fanathin rok ni murung’agen fapi saf nge fapi kaming. Ere, mang fan nrayog ni nga nog ni be tamilangnag e re fanathin ney nrib ga’ fan fare maruwel ni machib?

⁹ Som’on e ngam tay fanam i yan riy ni be fil Jesus ban’en ngak pi gachalpen u daken e fanathin. Ere, ba tamilang ni gathi ri saf nge kaming e be weliy murung’agen ni kan kiegrow, ya ba mudugil ni be fanay e re n’ey ni nge yip’ fan ban’en. Ku arrogon nnap’an ni yog ni piin ni yad bod e saf e yad ra pi’ gan pi walagen ko ngiyal’ ni kar m’ad ko bilig, mar pied e mad ni nga ron’ed ko ngiyal’ ndariy e mad rorad, mar taliliyniged yad ko ngiyal’ ni kar m’argad, ma ranod ra guyed yad u kalbus u nap’an ni yad bay u rom, ma be yip’ fan rogon e ngongol nra i dag e piin ni yad bod e saf ngak pi walagen. I yog ni piin ni yad bod e saf e yad “mmat’aw” ni bochan e ke mich u wan’rad ni bay boch i walagen Kristus ni kan dugliyrad ni ka yad bay u fayleng, ma ur ayuweged yad u nap’an e tin tomuren e rran.​—Matt. 10:40-42; 25:40, 46; 2 Tim. 3:1-5.

10. Uw rogon ni nge ayuweg yugu boch e saf pi walagen Kristus?

¹⁰ Bin migid e ngam lemnag e n’en ni yog Jesus u m’on ngu tomuren e pi thin ney. Ke weliy u m’on riy murung’agen e pow ko ngiyal’ ni bay riy nge ngiyal’ ni ke chugur nga tungun e re m’ag ney. (Matt. 24:3) Boch nga tabolngin e re welthin rok ney, me tamilangnag ni ku bay ban’en nib muun ko re pow ney. Re n’em e aram fare thin nib fel’ ni murung’agen Gil’ilungun Got ni yira “machibnag u gubin yang u fayleng.” (Matt. 24:14) Ma u m’on ni nge weliy murung’agen fapi saf nge kaming, me weliy fare fanathin ni murung’agen fapi salpiy ni ka nog e talent ngay. Ma kad weliyed ko fa binem e article ni ke weliy Jesus e re fanathin ney ni nge tamilangnag nthingari pasig pi gachalpen ni kan dugliyrad ara ‘pi walagen’ ko fare maruwel ni machib. Machane, ra yan i taw ko ngiyal’ ni bay Jesus riy, ma ri ka buchuuw i walagen e ka yad bay u fayleng, ma boor e maruwel ni ka bay nib t’uf ni ngan rin’. Re maruwel nem e aram fare maruwel ni ngan machibnag “urngin e girdi’” u fayleng u m’on ni nge taw ko tomur. Machane, ba tamilang ko fare fanathin ni murung’agen fapi saf nge fapi kaming ni ku bay boch e girdi’ ni yad ra ayuweg e piin ni kan dugliyrad. Ere, reb e kanawo’ ni nge rin’ e piin ni yad bod e saf e re n’ey riy e aram e ngar ayuweged pi walagen Kristus ko fare maruwel ni machib. Machane, mang e ba muun ko re ayuw ney? Gur, kemus ni be yip’ fan ni ngaun pi’ e salpiy ni ayuw ngorad ma yibe pi’ e athamgil nga lanin’rad, fa ka bay ban’en nib t’uf ni ngan rin’?

11. Mang reb e deer nrayog ni nge sum, ma mang fan?

¹¹ Yooren ko fa meruk i milyon i gachalpen Jesus ni yad bay e ngiyal’ ney e dawor ni dugliyrad nga gelngin Got nib thothup. Dawor ni pi’ fapi salpiy ni talent ngorad ni faan ke pi’ Jesus ko pi tapigpig rok ni kan dugliyrad. (Matt. 25:14-18) Ere, rayog ni nge sum e re deer ni baaray ni gaar, ‘Gur, rib milfan ko piin ndawor ni dugliyrad nga gelngin Got nib thothup ni ngar uned i rin’ fare maruwel ni machib?’ Arrogon. Baaray boch i fan.

12. Mang e kad filed ko fapi thin ni yog Jesus ni bay ko Matthew 28:19, 20?

¹² I tay Jesus chilen ngak pi gachalpen ni ngar machibgad. Tomuren nni faseg Jesus ko yam’, me yog ngak pi gachalpen ni nga ranod ngar pingeged e girdi’ ngar manged boch i gachalpen, mar filed ngorad rogon ni ngar folgad u ‘gubin e tin ni ke yog ngorad ni nguur rin’ed.’ Ma kub muun fare maruwel ni machib ko pi n’em ni yog ngorad ni ngaur rin’ed. (Mu beeg e Matthew 28:19, 20.) Ere, ba milfan ngak urngin i gachalpen Kristus ni ngar machibgad ndemtrug ko athap rorad e ngar uned ko gagiyeg u tharmiy ara ngar pared u fayleng.​—Acts 10:42.

13. Mang e be tamilangnag e n’en nni pilyeg e changar rok John nge guy, ma mang fan?

¹³ Be tamilangnag fare babyor ni Revelation ni gubin i gachalpen Jesus ni tin ni kan dugliyrad nge tin ndawor ni dugliyrad e yad ra rin’ fare maruwel ni machib. I pingeg Jesus e changar rok apostal John nge guy “fare pin ni nge mabgol,” ni aram fare 144,000 e girdi’ ni kan dugliyrad ni yad ra un ngak Kristus ko gagiyeg u tharmiy, ni yad be pining e girdi’ ni ngar feked “fare ran ko yafos nib tow’ath.” (Rev. 14:1, 3; 22:17) Re ran nem ni kan weliy murung’agen nib fanathin e be yip’ fan fare biyul ni maligach ni ke pi’ Jehovah u daken Kristus ni ir e rayog ni nge chuweg e girdi’ ko denen nge yam’. (Matt. 20:28; John 3:16; 1 John 4:9, 10) Re biyul nem e ku aram reb e ban’en nib ga’ fan ni gad ma machibnag murung’agen, ma piin ni kan dugliyrad e aram e piin ni yad be pow’iy rogon ni yibe ayuweg e girdi’ ni ngar filed murung’agen e re biyul ney nge rogon nrayog ni nge yib angin ngorad. (1 Kor. 1:23) Machane,  nap’an nni pilyeg e changar rok John, miki guy ba ulung i girdi’ ni yugu ba thil ni gathi yad ba muun ko piin ni kan dugliyrad, machane yad be athapeg e par u fayleng. Re ulung i girdi’ ney e ku yibe yog ngorad ni nge lungurad, “Moy!” Ma yad be fol ko n’en ni ka nog ngorad ya ku yad be pining boch e girdi’ ni ngar unumed fare ran ni ma pi’ e yafas. Biney e ulung e aram e piin ni yad be athapeg e par u fayleng. Ere, ba tamilang ko n’en nni pilyeg e changar rok John nge guy ni urngin e piin ni yad ra fol ko fare thin ni yibe yog ni be lunguy “moy,” e kub milfan ngorad ni ngar machibgad.

14. Mang e ba muun nga rogon ni gad ma fol ko “fare motochiyel ni pi’ Kristus”?

¹⁴ Gubin e piin ni yad be fol ko “fare motochiyel ni pi’ Kristus” e thingar ra machibgad. (Gal. 6:2) Der ma thilthilyeg Jehovah e motochiyel rok. Bod ni yog ngak piyu Israel ni gaar: “Re motochiyel ney e taareb rogon ngak e piin ni gargelegrad u Israel nge piin nu bang ni yad be par u fithik’med.” (Ex. 12:49, BT; Lev. 24:22) Daki moy e piin Kristiano u tan fare Motochiyel rok Moses. Machane, gad gubin ndemtrug ko kan dugliydad fa danga’, ma gad bay u tan “fare motochiyel ni pi’ Kristus.” Re motochiyel nem e ba muun ngay urngin ban’en ni fil Jesus. Reb e ban’en nib ga’ fan ni i machibnag Jesus ngak pi gachalpen e aram e ngaur daged e t’ufeg. (John 13:35; Jas. 2:8) Ma reb e kanawo’ nrib manigil nrayog ni ngad t’ufeged Got, nge Jesus, nge piin ni yad ba migid ngodad riy e aram e ngad machibnaged fare thin nib fel’ ngorad ni murung’agen Gil’ilungun Got.​—John 15:10; Acts 1:8.

15. Mang fan nrayog ni nga nog ni fare thin ni tay Jesus chilen e fan ngak urngin i gachalpen?

¹⁵ Thin ni yog Jesus ngak fachi ulung e ku rayog ni nge yib fan ngak fare ulung nib ga’. Bod ni ngongliy Jesus ba m’ag u thilrad fa 11 i gachalpen ni fan nga Gil’ilungun Got, machane re m’ag nem e fan ngak urngin fare 144,000 i gachalpen. (Luke 22:29, 30; Rev. 5:10; 7:4-8) Ere, ku arrogon ni kemus nri in i gachalpen Jesus e tay chilen ngorad ni ngar machibgad u nap’an ni m’ug ngorad u tomuren ni kan faseg ko yam’. (Acts 10:40-42; 1 Kor. 15:6) Machane, gubin i gachalpen ni yad ba yul’yul’ ni ur moyed u nap’an e bin som’on e chibog ni yad manang nre thin nem ni tay Jesus chilen e ku fan ngorad, ni yugu aram rogon ni gathi yad e yog Jesus ngorad. (Acts 8:4; 1 Pet. 1:8) Maku arrogon e ngiyal’ ney ndawori non Jesus ngak fa meruk i milyon i gachalpen ni yad ma machibnag murung’agen Gil’ilungun Got. Machane, yad gubin ni yad manang nib milfan ngorad ni ngar daged nib mich Kristus u wan’rad, ma kub milfan ngorad ni ngar daged e re michan’ nem u daken fare maruwel ni machib.​—Jas. 2:18.

16-18. Uw rogon ni ngad ayuweged pi walagen Kristus? Mang fan ni ngad rin’ed e re n’ey ni ka chiney?

¹⁶ Be cham Satan ngak e tin ni ka bay i walagen Kristus u fayleng ni kan dugliyrad nga gelngin Got nib thothup, ma bochan ni manang “ndaki n’uw nap’an ni nge par,” ma aram e ri bayi gelnag e cham ni bay i tay ngorad i yan. (Rev. 12:9, 12, 17) Yugu aram rogon ni be cham Satan ngak e piin ni kan dugliyrad, machane ka yad be ulul i pow’iy rogon ni yibe rin’ fare maruwel ni machib ma ke yoor e girdi’ ni yad be rung’ag fare thin nib fel’ ko kafram. Ere, dariy e maruwar riy ni bay Jesus rorad ni be pow’iyrad.​—Matt. 28:20.

¹⁷ Ma tay yugu boch e saf nri yad ba tow’ath ni yad be un i ayuweg pi walagen Kristus ko fare maruwel ni machib, nge ku boch e maruwel ni yad be rin’. Bod ni yad ma pi’ e salpiy ni ayuw ni ngan fanay ni ngan toy boch e Kingdom Hall, Assembly Hall, nge branch ofis, maku yad ma pi’ e ayuw ko pi maruwel ney ni yima rin’. Ku yad ma fol rok e piin ni ke dugliyrad “fare tapigpig nib yul’yul’ ma ba gonop” ni ngar yarmiyed rogon ni yibe rin’ e pi maruwel ney.​—Matt. 24:45-47; Heb. 13:17.

¹⁸ Dabki n’uw nap’an me pag fapi engel fapi nifeng ko magothgoth, ma aram e ngiyal’ nra tabab fare gafgow nib ga’. Ireray e n’en nra buch u tomuren ni kan tay e bin tomur e pow ngak pi walagen Kristus ni ka yad bay u fayleng. (Rev. 7:1-3) Ma u m’on nra tabab e Armageddon, ma aram e yira fek e piin ni kan dugliyrad nga tharmiy. (Matt. 13:41-43) Ere, urngin e piin ni yad baadag ni ngar manged e piin ni yad bod e saf e ireray e ngiyal’ ni ngar ayuweged pi walagen Kristus u fithik’ e yul’yul’.