Rayog ni Ngam Cham ngak Satan​—Ngam Gel!

“Um pired nib mudugil e michan’ romed ngak Kristus mi gimed togopluw ngak fare moonyan’.”​—1 PET. 5:9.

UW ROGON NI NGAD TOGOPULUWGAD NGAK SATAN MA GAD SIYEG E . . .

ufanthin?

chogowen e chugum?

ngongol ndarngal?

1. (a) Mang nrib ga’ fan ni ngad chamgad ngak Satan e ngiyal’ ney? (b) Uw rogon ni kad nanged nrayog ni ngad gelgad ko cham ni gad be tay ngak Satan?

 BE CHAM Satan ngak e tin ni ke magey ko girdien fachi ulung nge “yugu boch e saf.” (John 10:16) Bochan ni manang Moonyan’ ndaki n’uw nap’an ni nge par, ma ri be nameg ni nge kirebnag e michan’ rok urngin e tapigpig rok Jehovah nrayog. (Mu beeg e Revelation 12:9, 12.) Ere gur, rayog ni ngad gelgad ko cham ni gad be tay ngak Satan? Arrogon, ya be yog e Bible ni gaar: “Mi gimed togopluw ngak fare moonyan’, me mil romed.”​—Jas. 4:7.

2, 3. (a) Mang fan ni baadag Satan ni nga i lemnag e girdi’ nde riyul’ ni bay? (b) Uw rogon ni kam nang nriyul’ ni bay Satan?

² Boor e girdi’ nde riyul’ Satan u wan’rad. Yad ma lemnag ni kemus ni yigoo lan yu ken e babyor, nge kachido, nge video games e ir e yima weliy murung’agen Satan nge pi moonyan’ rok riy. Ma lemnag e pi girdi’ ney ni girdi’ nib tamilangan’rad e de mich u wan’rad ni bay boch e kan ni yad ba kireb. Machane, ga be lemnag ni be magawon laniyan’ Satan ngay ni bay boch e girdi’ nde mich u wan’rad nriyul’ ni yad bay e pi moonyan’ rok ni yad be bannag e girdi’? Ba mudugil ni danga’! Ya bin riyul’ riy e, faanra de mich u wan’ be’ nriyul’ ni bay Satan, ma aram e ba mom ni nge tay laniyan’ facha’ u fithik’ e lumor ndabi nang e tin riyul’. (2 Kor. 4:4) Ku ma n’igin Satan ni nga i lemnag e girdi’ e re n’ey ni bochan e nge mom ni nga i bannagrad.

 ³ Machane, gadad e kad nanged e tin riyul’ u murung’agen Satan ni bochan e gad be pigpig ngak Jehovah. Gad manang nriyul’ ni bay Satan, ya ir e non ngak Efa u l’ugun ba porchoyog. (Gen. 3:1-5) Ku ir e i moningnag Jehovah u murung’agen Job. (Job 1:9-12) Maku ir e guy rogon ni nge waliy Jesus ko kireb. (Matt. 4:1-10) Ma tomuren ni tabab Gil’ilungun Got ko gagiyeg ko duw ni 1914, ma ku ir e tabab ni nge “cham” ngak e tin ni ke magey ko piin ni kan dugliyrad ni ka yad bay u fayleng. (Rev. 12:17) Ka be ulul e re cham nem ke mada’ ko chiney, ya ka be guy Satan rogon ni nge kirebnag e michan’ ko tin ni ke magey ko fare 144,000 nge yugu boch e saf. Ere, faanra ngad gelgad ko re cham ney, ma thingar kud chamgad ngak Satan ma gad par nib mudugil e michan’ rodad. Re article ney e ra weliy dalip e kanawo’ nrayog ni ngad rin’ed e re n’ey riy.

NGAD SIYEGED E UFANTHIN

4. Mang fan ni Satan e ir be’ nrib ufanthin mab tolangan’?

⁴ Satan e ir be’ nrib ufanthin. Bin riyul’ riy e, n’en ni rin’ ni aram e guy rogon ni nge togopuluw nga mat’awun Jehovah ko gagiyeg miki n’igin ni ngan liyor ngak ni bod rogon ni yibe liyor ngak Jehovah e be m’ug riy nrib ufanthin mab tolangan’. Ere, reb e kanawo’ nrayog ni ngad togopuluwgad riy ngak Satan e aram e ngad siyeged e ufanthin ma gad maruweliy e lem nib sobut’. (Mu beeg e 1 Peter 5:5.) Machane gur, gubin ngiyal’ nib kireb ni ngad felfelan’gad ara ngad ufgad ngodad, ara ngak be’, ara ban’en?

5, 6. (a) Ba kireb ni ngad ufgad ngodad, ara ngad ufgad ngak be’, ara ban’en, fa? Mu weliy rogon. (b) Mang e ufanthin, ma mini’ boch e girdi’ ni bay murung’agrad u Bible ni aray rogorad?

⁵ Gad ra felfelan’ ara da ufgad ngodad, ara ngak be’, ara ban’en ma rayog ni nge ayuwegdad ni nga i pagan’dad ngodad ma gad be tay fadad. Re n’ey e kub lem ni gad ma tay u nap’an ni gad ra rin’ ara yag ban’en nib fel’ ngodad, ara ngak be’ nib t’uf rodad. Ma dariy ban’en nib kireb ko biney e lem. Ya yog apostal Paul ngak piyu Thessalonika ni gaar: “Erera’ fan ni gamad be weliy murung’agmed ngak girdien e galesiya rok Got i yan ni gamad be felfelan’ nga rogon ni gimed be k’adan’med ma mmichan’med ngak Kristus u fithik’ urngin e gafgow ni be tay e girdi’ ngomed nge gafgow ni gimed be pirieg.” (2 Thess. 1:4) Ere, dariy ban’en nib kireb riy ni ngad ufgad ko maruwel nib fel’ ni ke rin’ boch e girdi’ ara ngad ufgad ngodad. Maku reb e susun ndab ud tamra’gad ni bochan rarogon e re tabinaw ni kad bad riy, ara yalen, ara nam ni kad ilalgad riy.​—Acts 21:39.

⁶ Machane, ba kireb e ufanthin ni bochan e rayog ni nge kirebnag thildad boch e girdi’ miki kirebnag e tha’ u thildad Jehovah. Ufanthin e rayog ni nge k’aringdad ni ngad damumuwgad u nap’an ni yira fonownagdad. Ku rayog ni nge k’aringdad ni nge dab da sobut’niged lanin’dad ngad folgad ko fonow ni kan pi’ ngodad. (Prov. 9:8) Be’ nib ufanthin e “kemus ni yigoo ir e ma lemnag ir” ara “ir be’ nib tolangan’, ma ma lemnag ni kab fel’ ngak e tin ni ka bay e girdi’.” Rib fanenikan Jehovah e ufanthin nib chagil e tolangan’ ngay. (Ezek. 33:28; Amos 6:8) Machane, dariy e maruwar riy nri ma felfelan’ Satan u nap’an nra guy e girdi’ ni yad be ngongol u fithik’ e ufanthin ni bochan e yad be folwok rok. Am lemnag gelngin e felfelan’ ni tay u nap’an ni rin’ Nimrod, nge Farao, nge Absalom boch ban’en nib kireb ni bochan gelngin e ufanthin nge tolangan’ nra ted! (Gen. 10:8, 9; Ex. 5:1, 2; 2 Sam. 15:4-6) Ku aram e n’en ni k’aring Kain ni nge kireb e tha’ u thilrow Got. I fonownag Got, machane bochan gelngin feni ufanthin nge feni tolangan’ ma aram ma de fol ko fonow nni pi’ ngak. I siyeg ni nge fol ko fonow rok Jehovah, ma aram me denen nib togopuluw ngak.​—Gen. 4:6-8.

7, 8. (a) Uw rogon fare lem ni ngan sap nga but’ ko girdi’ nib thil raen dowrad ara ba thil e nam rorad? Uw rogon ni bay rogon e re lem ney ko ufanthin? (b) Mu weliy rogon nrayog ni nge kirebnag e ufanthin e gapas u lan e ulung.

⁷ Ngiyal’ ney e boor e kanawo’ ni ma dag e girdi’ e re lem ney riy. Ufanthin nge tolangan’ e ku bay rogon ko n’en ni ma rin’ boch e girdi’ ni aram e yad ma sap nga but’ ko girdi’ nib thil raen dowrad ara ba thil e nam rorad. I yog reb e dictionary ni ireray e “laniyan’ ni bay u thilin e girdi’ nib thilthil  ramaen dowrad ara nam rorad.” Re n’ey e kub muun ngay ni “ngan lemnag ni girdi’ u boch e nam e ba thil rarogorad nga boch e girdi’ ara bay boch ban’en ndabiyog rorad, ara ba tolang e girdi’ u boch e nam nga boch.” Ma re n’ey e ba ga’ ni ma k’aring e cham nge mahl u thilin yu ulung i girdi’.

⁸ Riyul’ nsusun e dab un lem ni aray rogon u lan e ulung ni Kristiano. Machane, rayog ni nge sum e maluagthin u thilin boch e walag ni bochan e ufanthin nge tolangan’, ma re n’ey e rayog ni nge sum boor e magawon riy. Ireray e n’en ni buch rok boch e Kristiano ko bin som’on e chibog. Aram fan ni fith James e re deer ni baaray ngorad ni gaar: “U uw e ma yib urngin e cham nge tugthin u fithik’med riy?” (Jas. 4:1) Faanra ud fanenikayed boch e girdi’ ara ud lemnaged ni ka gad ba fel’ ngorad, ma rayog ni nga dogned ara da rin’ed ban’en nra kirebnag lanin’rad. (Prov. 12:18) Ere, ufanthin u fithik’ e tolangan’ e rayog ni nge kirebnag e gapas u lan e ulung.

9. Uw rogon ni ma ayuwegdad e thin nu Bible ni ngad siyeged fare lem ni ngan sap nga but’ ko girdi’ nib thil raen dowrad ara ba thil e nam rorad nge ku boch e ngongol ni yima rin’ u fithik’ e ufanthin nge tolangan’? (Mu guy e sasing ni bay u tabolngin e re article ney.)

⁹ Faanra ba ga’ ni gad ma lemnag ni gad ba tolang ara ka gad ba fel’ ngak boch e girdi’, ma susun e dab da paged talin ni “Somol e dabun gubin e piin tolangan’.” (Prov. 16:5, BT) Kub fel’ ni ngaud fal’eged i lemnag rogon ni gad ma sap ngak e girdi’ nib thil raen dowrad, ara nam rorad, ara yalen rorad ngodad. Ya faanra gad ma laniyan’ ko pi girdi’ ney, ma aram e kad paged talin ni “taareb e pumoon ni sunumiy [Got], me sum rok e re moon nem girdien urngin e nam.” (Acts 17:26) Faan ga ra par ngam lemnag ma gad gubin ni taareb rogodad ni bochan e taabe’ e kad bad rok ni aram, Adam. Ere, gad bbalyang ni faan gad ra lemnag ni bay boch e girdi’ ni ka yad ba tolang nga boch. Ma faanra ud lemgad ni aray rogon, ma aram e gad be pag Satan ni nge kirebnag e t’ufeg nge taareban’ ni bay u thildad e piin Kristiano. (John 13:35) Faanra nge yag ni ngad chamgad ngak Satan ngad gelgad, ma thingar da siyeged e ufanthin nge tolangan’.​—Prov. 16:18.

MU SIYEG CHOGOWEN E CHUGUM MA DABI T’UF E TIN NU FAYLENG ROM

10, 11. (a) Mang fan nib mom ni nge t’uf e tin nu fayleng ban’en rok be’? (b) Mang e buch rok Demas ni bochan e adag e pi n’en ni bay u fayleng?

¹⁰ Satan e ir e “be gagiyegnag e girdi’ nu fayleng” nge pi n’en ni bay riy. (John 12:31; 1 John 5:19) Ere, boor ban’en ni ma ognag e re fayleng ney ngodad nib togopuluw ko pi motochiyel nu Bible. Riyul’ ni gathi gubin ban’en ni bay ko re fayleng ney nib kireb. Machane, gad manang ni ma fanay Satan e pi n’en ni bay ko re fayleng ney ni nge k’aringdad ni ngad adaged boch ban’en nde puluw, miki guy rogon ni nge k’aringdad ni ngad denengad. Maku reb e, rayog ni ngki fanay e pi n’ey ni nge guy rogon ni nge k’aringdad ni ngad adaged e tin nu fayleng ban’en ma dab kud tedan’dad ko pigpig ni gad be tay ngak Jehovah.​—Mu beeg e 1 John 2:15, 16.

¹¹ Ireray e magawon rok boch e Kristiano ko bin som’on e chibog. Bod ni yoloy Paul ni gaar: “Demas e ke t’uf rok e ngongol nu roy u fayleng, ma ke pageg ke yan.” (2 Tim. 4:10) Der yog e Bible ko mang e pi n’em ni adag Demas, ma aram me k’aring ni nge pag Paul. Sana tabab ni nge adag e chugum me tomur u wan’ e pigpig ni be tay. Faanra aram rogon e n’en ni buch, ma de yag ngak Demas boch e tow’ath ko pigpig ni i tay ngak Got. Ere gur, bay angin e n’en ni mel’eg? Danga’. Ya faan gomanga de tal ko pigpig ni i tay ngak Got, ma rayog ni ngki ulul nga i ayuweg Paul. Ma gad manang ndariy ban’en nrayog ni nge pi’ e re fayleng ney ngak be’ ni kab gel e fel’ riy ko tow’ath nra pi’ Jehovah ngak be’.​—Prov. 10:22.

12. Uw rogon nrayog ni nge bannagdad “chogowen e fel’ rogon”?

¹² Ku rayog ni nge buch ban’en ni aray rogon rodad e ngiyal’ ney. Bochan ni gad boch e Kristiano, ma gad baadag ni ngad yognaged e tin nib t’uf rodad nge chon e tabinaw rodad. (1 Tim. 5:8) Gad manang ni baadag Jehovah ni nge fel’ e par rodad ni bochan e nap’an ni sunmiy Adam nge Efa, me pi’ bangi milay’ ngorow ni ngar parew riy nrib fel’ yaan. (Gen. 2:9) Machane, ku rayog ni nge fanay Satan “chogowen e fel’ rogon” ni nge k’aringdad ni ngad adaged boch ban’en nde puluw. (Matt. 13:22)  Boor e girdi’ ni yad ma lemnag ni salpiy nge chugum e ra yibnag e felfelan’ ngorad ara ra ayuwegrad ni nge fel’ rogon e par rorad. Machane, mit ney e lem e rayog ni nge bannagdad, maku rayog ni nge k’aringdad ni nge mul u pa’dad e bin th’abi fel’ e tow’ath ni bay rodad, ni aram e tha’ u thildad Jehovah. I puguran Jesus ngak pi gachalpen ni gaar: “Dariy be’ nrayog ni nge mang sib rok l’agruw i masta: ya ra fanenikay bagayow me t’uf bagayow rok; ya ra yul’yul’ ngak bagayow me darifannag bagayow. Dabiyog ni ngam manged tapigpig rok Got ma ki gimed e tapigpig rok e salpiy.” (Matt. 6:24) Faan gad ra mang tapigpig rok e Salpiy, ma aram e gathi ka gadad e tapigpig rok Jehovah, ma gad manang ni aram e n’en ni baadag Satan ni ngad rin’ed! Ere, ngad athamgilgad ndab da paged e salpiy ara chugum ni nge kirebnag e tha’ u thildad Jehovah. Ra ngad chamgad ngak Satan, ma thingar dab da lemnaged e chugum nge pag rogon.​—Mu beeg e 1 Timothy 6:6-10.

MU SIYEG E NGONGOL NDARNGAL

13. Mang boch ban’en nde puluw ni ma lemnag e girdi’ ko re fayleng ney u murung’agen e mabgol nge par ko pumoon nge ppin?

¹³ Ku reb e wup ni ma fanay Satan e aram e ngongol ndarngal. Boor e girdi’ ni yad ma lemnag ni mabgol nge yul’yul’ u lan e mabgol e ban’en ndaki puluw ko par e ngiyal’ ney, maku reb e ku ma taleg e girdi’ u boor ban’en ni yad baadag ni ngar rin’ed. Bod ni bay reb e ppin ni yima pag yaan u boch e kachido ni yog ni gaar: “Dariy be’ nrayog rok ni nge par nib yul’yul’ ngak taabe’. Dariy be’ ni gu manang nib yul’yul’ ara baadag ni nge par nib yul’yul’.” Maku reb e pumoon ni ku yima pag yaan u boch e kachido e yog ni gaar: “Da gur lemnag nrayog ni ngam parew taabe’ u taabang u n’umngin nap’an e yafos romew.” Ere, dariy e maruwar riy nri ma felfelan’ Satan u nap’an nra guy boch e girdi’ ni aray rogon nib gilbuguwrad ni yad be darifannag fare tow’ath ni ke pi’ Got ni aram e mabgol. Ma dabun Moonyan’ e biney e yaram ni ke ngongliy Got rogon ke tay, maku dabun e piin ni kar mabgolgad ni ngar pared nib fel’ e mabgol rorad. Ere, faanra nge yag ni ngad chamgad ngak Satan ngad gelgad, ma thingar da ted fan e yaram rok Got u murung’agen e mabgol.

14, 15. Uw rogon nrayog ni ngad siyeged e ngongol ndarngal?

¹⁴ Demtrug ko kad mabgolgad fa dawor, ma thingar da siyeged urngin mit e ngongol ndarngal. Gur, ba mom ni ngad rin’ed e re n’ey? Danga’! Ya faanra gur reb e fel’ yangaren, ma dabisiy ni kam rung’ag ni ke weliy boch e bitir nu skul murung’agrad ni kar uned ko ngongol ndarngal, ara kar guyed boch e sasing ni yaan e puwlag ara boch ban’en ko cell phone rorad ni ke pi’ be’ ngorad, ara yad e kar pied ku be’. Maku ba ga’ ni yad ma weliy e pi n’ey ni yad ba uf ngay. Bin riyul’ riy e bay boch e nam nib kireb e re n’ey riy ni bochan e yima yog ni pi sasing ney ni yima pi’ ngak boch e girdi’ ko cell phone ni ku yaan boch e fel’ yangaren e bod ni yibe wereg yaan e piin bitir ni yad be un nga boch e ngongol ni puwlag yibe fek yaarad. Be gaar e Bible: “Cha’ nra ngongliy e ngongol ko darngal e ke denen nib togopluw ko birok e dowef.” (1 Kor. 6:18) Boor e girdi’ ni kar gafgowgad ara kar m’ad ni bochan boch e m’ar ni ma af ko par ko pumoon nge ppin. Maku boor e fel’ yangaren ni kar uned ko par ko pumoon nge ppin ni ka rogned ni kar kalgadngan’rad ni kar uned ko re ngongol ney. Yima dag u TV, ngu Internet, nge ku boch ban’en ni faan gad ra th’ab e pi motochiyel rok Got ma dabi yib wenegan ngodad. Machane, mit ney e lem e rayog ni nge bannag e girdi’ ngar ‘denengad.’​—Heb. 3:13.

¹⁵ Faanra kam adag ni ngam un ko ngongol ndarngal, ma mang e rayog ni ngam rin’? Som’on e, thingar mu nang ni bay e meewar rom. (Rom. 7:22, 23) Ere, mmeybil ngak Got ni nge pi’ gelngim. (Fil. 4:6, 7) Ma ga siyeg boch ban’en nrayog ni nge waliyem i yan ko ngongol ndarngal. (Prov. 22:3) Ma faanra kam guy ni bay ban’en ni be waliyem ko re ngongol ney, mag gur ngam siyeg ni ka ngiyal’ nem.​—Gen. 39:12.

16. Mang e yog Jesus u nap’an ni guy Satan rogon ni nge waliy ni nge denen, ma mang e rayog ni ngad filed ko n’en ni rin’?

¹⁶ Jesus e ir e dag e bin th’abi fel’ e kanawo’ ngodad u rogon ni ngad siyeged e pi n’en nib  kireb ni yima waliydad ngay. De yag rok Satan ni nge bannag. Maku reb e ku de par nga i lemnag e pi n’em ni micheg Satan nra pi’ ngak. Ya ka ngiyal’ nem me non ngak Satan ni gaar: “Babyor nib thothup e be gaar.” (Mu beeg e Matthew 4:4-10.) Manang Jesus e n’en ni bay ko Thin rok Got, ere aram fan nnap’an ni guy Satan rogon ni nge waliy ko kireb me fanay e thin nu Bible ni nge fulweg lungun. Ra nge yag ni ngad chamgad ngak Satan ngad gelgad, ma thingar dab da paged gadad ni ngan waliydad ngad uned ko ngongol ndarngal.​—1 Kor. 6:9, 10.

MU ATHAMGIL YA NGE YAG NIM GEL KO RE CHAM NEY

17, 18. (a) Mang boch e wup ni ku ma fanay Satan, ma mang fan ndab da gingad ko re n’ey? (b) Mang e ra buch rok Satan, ma uw rogon ni be ayuwegem e re n’ey ni ngam athamgil?

¹⁷ Ufanthin, nge chogowen e chugum, nge ngongol ndarngal e aram dalip e wup ni ma fanay Satan. Machane, ku boor e wup ni ma fanay. Bod ni bay boch e Kristiano ni ma togopuluw chon e tabinaw rorad ngorad, ara ma moningnagrad e piin yad nga skul, ara ma talegrad e am ndab kur machibgad. Pi n’ey e bogi ban’en ni gad manang nra i buch. Ya yog Jesus ngak pi gachalpen ni gaar: “Gubin e girdi’ ni bay ra fanenikayed gimed ni bochag. Machane en nra athamgil nge par nge mada’ ko tomur e ra fos.”​—Matt. 10:22.

¹⁸ Ere, uw rogon ni ngad chamgad ngak Satan ngad gelgad? I yog Jesus ngak pi gachalpen ni gaar: “Mpired ni gimed mmudugil, ya ereray rogon me yog e yafos ngomed.” (Luke 21:19) Dabiyog ni nge gafgownagdad e girdi’ ndariy n’umngin nap’an. Maku reb e, faanra dab da paged gadad ma dariy be’ nrayog ni nge kirebnag e tha’ u thildad Got. (Rom. 8:38, 39) Mus ni faanra bay boch e Kristiano ni kar m’ad ni bochan e kar pared ni yad ba yul’yul’ ngak Jehovah, ma gathi aram e be yip’ fan ni ke gel Satan, ya ku ra fasegrad Jehovah ko yam’. (John 5:28, 29) Bin riyul’ riy e yira thang Satan. Tomuren ni yira thang e re m’ag nib kireb ney, ma yira kalbusnag u lan 1,000 e duw. (Rev. 20:1-3) Mu tomuren e re Biyu’ i Duw Nem ni Ke Gagiyeg Jesus riy, ma aram e yira “pag Satan bayay u kalbus” nib ngoch nap’an ni ngki skengnag e girdi’ ni kar flontgad. Ma tomur riy ma aram min thang. (Rev. 20:7-10) Ere, Satan e dariy e athap rok, machane gur e bay! Ere, mu par nib gel e michan’ rom, mag togopuluw ngak Satan, ya rayog ni ngam gel ngak!

[Deer ni ngan pi’ e fulweg riy]