Ni gargelnageg u Paddington ni bangi ban’en ni bay u London u England ni boor e girdi’ ni ma par riy. Gu ma par ko nina’ rog nge dalip e ppin ni walageg ni yad ba ilal ngog. Bayi n’en me yib e chitamangimad i par ngomad, ngemu’ miki chuw ni bochan e ir be’ nib ta chingaw.

Nap’an ni ku gub bitir, me fil e nina’ rog ngog ni ngaug meybil ni gubin e nep’. Immoy bochi ke Bible rog ni kemus ni yigoo fare babyor ni Psalms e bay riy. Ere, gu ma susunnag lingan e pi tang nem u lanin’ug ya nge yag ni nggun’. Keb ngan’ug ba ngiyal’ nug beeg ba thin u lan ba ken e babyor ni immoy rog nde chuw u lanin’ug ni be gaar: “Ra yan i reb e rran ma dakuriy e gabul.” Pi thin ney e i k’aringeg ni nge da ku ug mol nnep’ ni gu be lemnag rarogog boch nga m’on. Ma lungug u wan’ug, ‘Ba mudugil ni gathi kemus chi rogon e yafos aray. Mang fan ni gu bay?’ Dabug ni nggum’!

Munmun ma aram mug adag boch ban’en ni bay rogon nga ngongolen e moonyan’. Gu ma guy rogon ni nggu non ngak e piin ni kar m’ad, maku gamad ma yan boch e fager rog u skul nga teliw, maku gamad ma yaliy e kachido ni yaan e kan u taabang. Gamad ma rin’ e pi n’ey ni bochan e gamad ma lemnag ni ban’en ni yira felfelan’ ngay, maku ra i k’aringey ni ngan rus.

Nap’an ni ka fini gaman ragag e duw rog ma aram e da ku ug fol. Gu tabab i thoy e tamagow, mab papey nug mecham ngay. Boch nga tomuren, mug un ko mathoy marijuana. Nap’an ni gaman 11 e duw rog, mug tabab ko muun alkul. Yugu aram rogon ni dabug lamen, machane gu baadag ni nggu chingaw. Kug baadag e musik nge churu’. Ere, faanra rayog ma gu ma yan nga boch e mur ni yima tay, ma kug ma yan nga yungi n’en ni tagil’ e churu’ nge muun rrum nnep’. Bayi nep’ mug mith nggu wan mug sul nga tabinaw ndawori yib ramaen e tamilang ni kakadbul. Ere, bayi kakadbul ni gub chuchuw ma dab gu wan nga skul, ma faanra kug wan mab ga’ ni gu ma chingaw u nap’an ni yibe skul.

Nap’an e bin tomur e duw rog u skul ma rib kireb e grade rog. Der ma nang e nina’ rog murung’agen urngin e kireb ni gu ma rin’. Ere bayi n’en ma ma par nib damumuw ngog. Immoy bayay nug tugthingow ma aram mug mil u tabinaw, mug wan gu par ngak reb e pagel nib fel’ e thin romow ni ka nog Tony ngak. Tony e ma un nga barba’ e teliw ni ke sum u Jamaica ni ka nog e Rastafari ngay. Ba ga’ ni ma rin’ nochi oloboch nde ga’, maku ma pi’ boch e falay ni kireb ni chuway’, ma kub wer thin ni ir be’ nib ta cham. De n’uw nap’an ma aram mug diyen nggu gargeleg bochi pagel ni fakmow u nap’an ni ka fini gaman 16 e duw rog.

Yay nth’abi som’on nug mada’nag e Pi Mich Rok Jehovah e nap’an nug be par u reb e naun ni ma yan i par boch e matin ndariy e pumoon rorad ngay ni yad ba gafgow nge bitir rorad. I pi’ girdien e am reb e singgil ngog u rom ni nggu par riy. Ere, ba ga’ ni ma yib l’agruw e ppin e ngaram ni yow l’agruw e Pi Mich ni ngar guyew boch e matin u rom ni ka yad bbitir. Ere, yan i reb e rran ma aram mug un ngorad ko motoyil. Gu rin’ e re n’em ni bochan e gu be guy rogon ni nggu micheg nde puluw e n’en ni be yog e gal ppin nem. Yugu aram rogon, mar fulwegew gubin e deer nug fith ngorow u fithik’ e sumunguy, ngu rogon nib puluw ko Bible. Gu baadag dakenrow ni bochan e ri yow ba gol ma ri yow ba sumunguy. Ere, m’agan’ug ngay ni nggu un ngorow ko fol Bible.

De n’uw nap’an ma aram mug fil ban’en u lan e Bible nri thilyeg e yafos rog. Ka nap’an ni gub bitir ma gu ma rus ni nggum’. Machane, aram e ngiyal’ nug fil e n’en ni yog Jesus u murung’agen e fos ko yam’! (John 5:28, 29) Kug fil nri ma lemnageg Got. (1 Peter 5:7) Maku reb e, ri taw fare thin ko Jeremiah 29:11 (NW) nga gum’irchaeg ni faan be gaar: “Ke yog Jehovah ni gaar, ‘Yigoo gag e gu manang e tin ni kug tanomnag ni fan ngomed, tanom ni nggu pi’ e gapas ngomed ma gathi nggu gafgownagmed, mug pi’ e athap ngomed ni fan ko gabul nge langlath.’” Aram e ngiyal’ ni tabab ni nge mich u wan’ug nrayog ni nge yag e athap ngog ko yafos ni manemus u Paradis u fayleng.​—Psalm 37:29.

I dag e Pi Mich Rok Jehovah e bin riyul’ e t’ufeg ngog. Yay nth’abi som’on nug un ko muulung ni yad ma tay e gguy nrib gol gubin e girdi’ u rom ma ri yad ba manigil! (John 13:34, 35) Rib thil e ngongol ko girdi’ u rom ko ngongol ni i dag e girdi’ ngog u barba’ e teliw ni ug un ngay kafram. Yugu aram rogon nib thil rarogog, machane ri yad ba gol ngog. Ur ted e tayim ni fan ngog, ma ur daged ngog ni yad be lemnageg, maku ur ayuweged gag ko pi n’en nib t’uf rog. Ra gu lemnag ma gowa gag reb i girdien ba tabinaw nib ga’ ni bay e t’ufeg riy.

Nap’an nug fil e Bible, ma aram mug nang nib t’uf ni nggu thilyeg rogon e par rog ya nge yag ni m’agan’ Got ko ngongol rog. De mom ngog ni nggu taleg e tamagow. Maku reb e, gguy ni bay ba mit e musik ni ma k’aringeg ni nggu adag ni nggu thoy e marijuana. Ere, gu thilyeg e re miti musik ni gu ma motoyil ngay. Maku reb e, gu tal nda ku ug wan nga boch e mur ni un tay nge yungi n’en ni tagil’ e churu’ nge muun rrum nnep’ ni bochan e gu baadag ni nggu tal ko chingaw. Kug gay yugu boch e girdi’ nib thil ni ngar manged fager rog nrayog ni ngar ayuweged gag ni nggu rin’ e tin nib fel’.​—Proverbs 13:20.

Nap’an e re ngiyal’ i n’em ma aram miki tabab Tony ni ngar filed e Pi Mich Rok Jehovah e Bible u taabang. Nap’an ni pi’ e Pi Mich e fulweg ko pi deer rok nrogon nib puluw ko Bible, ma aram miki mich u wan’ e tin riyul’ ni be fil. Boor ban’en ni thilyeg ko ngongol rok: i tal ndaki chag ko girdi’ ni yad ba ta cham, ma daki rin’ fa nochi oloboch ni i rin’ nde ga’, miki tal ndaki thoy e marijuana. Gu nangew ni faanra nggu fel’gow u wan’ Jehovah mab t’uf ni nggu talgow i rin’ e ngongol nib kireb ni ug rin’ew, ma gamow fal’eg e tabinaw romow nge manigil ya nge yag nug chuguliyew fakmow nib pagel nib fel’ rogon. Ere, nap’an e duw ni 1982 ma aram ma gamow mabgol.

Keb ngan’ug ni ug gay boch e article u lan yu ken e Wulyang ko Damit nge Awake! * ni be weliy murung’agen boch e girdi’ ni ke yag ni ngar talgad i rin’ e pi ngongol ni gu baadag ni nggu tal i rin’. Pi n’en nrin’ed e ri pi’ e athamgil nga lanin’ug! I pi’ e re n’ey gelngig ni nge yag ni nggu athamgil ndabi mulan’ug. Ug par ni gu be meybil ngak Jehovah ndabi pageg. Ere, nap’an e July ko duw ni 1982 ma aram ma gamow un Tony ko taufe mug mangew l’agruw e Pi Mich Rok Jehovah.

Bochan ni ke yag ni nge fel’ e tha’ u thilmow Jehovah Got, ma aram e n’en ni ke ayuweg e yafos rog. Bay boch e magawon nib mo’maw’ ni kug mada’nagew Tony ni kub gel e ayuw ni ke pi’ Jehovah riy ngomow. Ere, kug filew rogon ni nggu taga’gow ngak u nap’an ni kug mada’nagew boch e magawon, ma kug guyew ni gubin ngiyal’ ni ma ayuweg e tabinaw romow.​—Psalm 55:22.

Gub felfelan’ ni kug ayuweg reb e pagel nge reb e ppin ni fakmow ni ngar nangew Jehovah ni bod gag. Ere, chiney e gu ma felfelan’ ni gu ma guy pi fakrow ni yad be fil boor ban’en u murung’agen Got.

Chiney e dakugur ma od nnep’ nga i magafan’ug ko pi n’en nra buch rog boch nga m’on ara ug rus nri gum’. Gubin e wik ni gamow ma yan Tony nga boch e ulung nib thilthil ko Pi Mich Rok Jehovah ni nggu piew e athamgil nga laniyan’ e pi walag. Gamow ma un ngorad ngaug filed ko girdi’ ni faanra mich Jesus u wan’rad me m’ug ko ngongol rorad, ma aram e ku rayog ni nge yag e yafos ndariy n’umngin nap’an ngorad.