1. Mang e susun nge rin’ be’ u m’on ni nge tabab i toy reb e naun?

MU SUSUNNAG ni be lemnag be’ ni nge toy reb e naun. Manang ko ba miti mang naun e nge toy. Machane gur, yugu rayog ni nga yigi yan nga reb e kantin ni ka chingiyal’ nem nge yan i chuw’iy boch i mam’en e dimow naun me tabab i toy fare naun? Dabiyog, ya bay ban’en nib ga’ fan nthingari rin’ u m’on ni nge tabab ko maruwel. Thingari sumarnag urngin puluwon fare naun ni nge toy. Mang fan? Ya ba t’uf ni nge nang ko ba gaman e salpiy rok nrayog ni nge toy fare naun nge m’ay fa danga’. Faanra sumarnag puluwon fare naun u m’on riy, ma aram e rayog ni nge toy fare naun nge m’ay nib fel’ rogon.

2. Mang e susun ni ngam fal’eg i lemnag u m’on ni ngam un ko taufe nrogon ni bay ko Luke 14:27-30?

² Ga be lemnag ni ngam un ko taufe ni bochan e ba t’uf Jehovah rom mab ga’ fan u wan’um e tin ke rin’ ni fan ngom, fa? Faanra arrogon, ma aram e taareb rogom ngak facha’ ni baadag ni nge toy reb e naun. Mang fan nrayog ni nga dogned e re n’ey? Am lemnag fapi thin ni yog Jesus ni bay ko Luke 14:27-30. (Mu beeg.) Be weliy Jesus e n’en be yip’ fan ni nge mang be’ reb i gachalpen. Ra ngad manged reb i gachalpen ma thingari m’agan’dad nga “rogon puluwon,” ara thingari m’agan’dad ngay ni ngad athamgilgad u fithik’ boch e magawon mu kud paged fan boch ban’en. (Luke 9:23-26; 12:51-53) Ere u m’on ni ngam un ko taufe, mab t’uf ni ngam fal’eg i lemnag urngin ban’en nib muun ko re n’ey. Faan ga ra rin’ ni aray rogon, ma aram e rayog ni ngam ulul ko pigpig ngak Got u fithik’ e yul’yul’ u nap’an ni kam mang reb e Kristiano ni kan taufenagem.

3. Mang e gad ra weliy ko re article ney?

³ Gur, bay fan ni ngam athamgil u fithik’ boch e magawon mu kum pag fan boch ban’en u nap’an ni ga ra un ko taufe ngam reb i gachalpen Kristus? Arrogon, ya nap’an nra un be’ ko taufe ma boor e tow’ath nra yag ngak e chiney nge boch nga m’on. Chiney e ngad weliyed boch e deer nib ga’ fan ni bay rogon ko taufe. Re n’ey e ra ayuwegem ni ngam pi’ e fulweg ko fare deer ni be gaar, “Ke bung rogog ni nggu un ko taufe, fa?”

4. (a) Mang e be yip’ fan ni ngam ognagem ngak Jehovah? (b) Mang e be yip’ fan ni ngam “pag” fam nrogon ni bay ko Matthew 16:24?

⁴ Mang e be yip’ fan ni ngam ognagem ngak Jehovah? U m’on ni ngam un ko taufe, ma thingar mu ognagem ngak Jehovah. Ga ra ognagem ngak Jehovah, ma aram e ngam meybil ngak ni keb u gum’irchaem nga mog ngak ni kam dugliy ni ngam fanay e yafos rom ni ngam pigpig ngak ndariy n’umngin nap’an. Nap’an ni ga ra ognagem ngak Got, ma aram e kam “pag” fam. (Mu beeg e Matthew 16:24.) Ke milfam ngak Jehovah, ni aram reb e tow’ath nrib manigil. (Rom. 14:8) Ga be yog ngak ni chiney i yan ngaram e aram e ngam fanay e yafos rom ni ngam pigpig ngak ma dab kum man nga tabon lanin’um. Ga ra ognagem ngak Got ma aram e kam micheg ban’en ngak nrib ga’ fan. Der ma towasariydad Jehovah ni ngad micheged ban’en ni aray rogon. Machane nap’an ni gad ra rin’, ma aram e ba m’agan’ ngay ni ngad ted u gil’ e n’en kad micheged.​—Ps. 116:12, 14.

5. Nap’an ni ga ra ognagem ngak Got, ma mang rogon ko taufe ni ga ra un ngay?

⁵ Nap’an ni ga ra ognagem ngak Got, ma mang rogon ko taufe ni ga ra un ngay? Ga ra ognagem ngak Got ma ban’en ni kam rin’ ndariy be’ ni manang; ya kemus nu thilmew Jehovah. Taufe ni ga ra un ngay e ban’en ni ga ra rin’ u fithik’ e girdi’ ni yoor u nap’an reb e assembly ara convention. Nap’an ni ga ra un ko taufe, ma aram e ga be dag ko girdi’ ni kam ognagem ngak Jehovah. * Ere taufe ni ga ra un ngay e ra dag ngak yugu boch e girdi’ nib t’uf Jehovah ni Got rom u polo’ i gum’irchaem, nge lanin’um, nge lem rom, nge gelngim, ma kam dugliy u wan’um ni ngam pigpig ngak ndariy n’umngin nap’an.​—Mark 12:30.

6-7. Mang l’agruw i fan nib t’uf ni ngad uned ko taufe nrogon ni bay ko 1 Peter 3:18-22?

⁶ Gur, rib t’uf ni ngam un ko taufe? Am lemnag fapi thin ni bay ko 1 Peter 3:18-22. * (Mu beeg.) Fare arke e aram e pow riy nib mich Got u wan’ Noah. Ere taufe ni ga ra un ngay e aram e pow riy ni kam ognagem ngak Jehovah. Machane gur, rib ga’ fan ni ngam un ko taufe? Arrogon. Baaray fan ni yog Peter. Som’on e yog ni taufe e ‘be thapegem.’ Taufe ni kad uned ngay e rayog ni nge yognag e yafos ngodad ni faan gad ra dag u daken e ngongol rodad nib mich Jesus u wan’dad ma kub mich u wan’dad ni ke yim’ ni fan ngodad, ma kan faseg ke yan nga tharmiy, ma bay e chiney u “ba’ ni mat’aw rok Got.”

⁷ Bin migid e faanra kad uned ko taufe, ma rayog ni nge ‘fel’ e nangan’’ rodad. Nap’an ni gad ra ognaged gadad ngak Got ngad uned ko taufe, ma aram e ke fel’ e tha’ u thildad Got u yugu reb e kanawo’ nib thil. Bochan nriyul’ ni kad kalgadngan’dad ko kireb rodad ma ke mich u wan’dad fare biyul, ma aram fan ni ke n’ag Got fan e denen rodad. Ere rayog ni nge fel’ e nangan’ rodad u p’eowchen Got.

8. Susun mang e bin th’abi ga’ i fan ni ngam dugliy ni ngam un ko taufe?

⁸ Susun mang e bin th’abi ga’ i fan ni ngam dugliy ni ngam un ko taufe? Bochan ni ga be tiyan’um ko fol Bible, ma boor ban’en ni ke yag ni ngam fil u murung’agen Jehovah. Ke yag ni ngam nang rarogon nge rogon ni ma rin’ boch ban’en. Pi n’en kam fil u murung’agen e ke taw nga gum’irchaem ma ke k’aringem ni ngari t’uf rom. Ere bin th’abi ga’ i fan ni ngam dugliy ni ngam un ko taufe e bochan nib t’uf Jehovah rom.

9. Mang e be yip’ fan ni ngan taufenag be’ nga fithingan e en Chitamangiy, nge Fak, nge gelngin Got nib thothup nrogon ni bay ko Matthew 28:19, 20?

⁹ Ku reb i fan ni ngam dugliy ni ngam un ko taufe e bochan ni kam nang e n’en be fil e Bible ma ke mich u wan’um. Am lemnag e n’en ni yog Jesus u nap’an ni tay chilen ngak pi gachalpen ni ngar  ayuweged yugu boch e girdi’ ngar manged boch i gachalpen. (Mu beeg e Matthew 28:19, 20. *) Rogon ni yog Jesus e piin yad ra un ko taufe e thingar ni taufenagrad nga “fithingan e en Chitamangiy nge Fak nge gelngin Got nib thothup.” Mang e be yip’ fan e re n’ey? Thingari mich u wan’um e tin riyul’ ni be yog e Bible u murung’agen Jehovah; nge Jesus ni Fak; nge gelngin Got nib thothup. Ireray boch e machib nrib gel gelngin nrayog ni nge taw nga gum’irchaem. (Heb. 4:12) Ngad weliyed boch ban’en u murung’agen e pi machib ney.

10-11. Mang boch ban’en nib riyul’ ni kam fil u murung’agen e en Chitamangiy ma ke mich u wan’um?

¹⁰ Am sul ngam lemnag e ngiyal’ nim fil boch ban’en nib riyul’ u murung’agen e en Chitamangiy: Kam fil ni fithingan e “Jehovah,” ma ir e “Th’abi Tolang u ga’ngin yang e fayleng,” ma kemus ni yigoo ir e bin riyul’ e “Got.” (Ps. 83:18, NW; Isa. 37:16, BT) Jehovah e Ir e Ke Sunmiydad, ma “kanawoen min thap ngak” e ir e mmil suwon ngak. (Rev. 19:1; Ps. 36:9) Bay boch ban’en ni ke yarmiy rogon ke tay nra chuwegdad ko denen nge yam’ ma ke pi’ e athap ko yafos ni manemus ngodad u fayleng. (John 17:3) Ga ra ognagem ngak Got ngam un ko taufe, ma ra m’ug ni kam mang reb e Pi Mich Rok Jehovah. (Isa. 43:10-12) Ga ra mang bang u ba tabinaw nib garer girdien u ga’ngin yang e fayleng ma yad ba felfelan’ ngay ni ngar feked fithingan Got maku yad be weliy murung’agen ko girdi’.​—Ps. 86:12.

¹¹ Ri gab tow’ath ni kam nang e n’en be fil e Bible u murung’agen e en Chitamangiy! Nap’an nra mich u wan’um e pi n’ey nib riyul’ mab ga’ fan, ma ga ra adag ni ngam ognag e yafos rom ngak Jehovah ngam un ko taufe.

12-13. Mang boch ban’en nib riyul’ u murung’agen e en Fak Got ni kam fil ma ke mich u wan’um?

¹² Mang e mu rin’ u nap’an nim fil e pi n’ey nib riyul’ u murung’agen e en Fak Got? Jesus e ir e ba migid ko en th’abi ga’ fan u ga’ngin e palpalth’ib. Ir e Ke Biyuliydad. Ba m’agan’ ngay ni nge pi’ e yafos rok ni fan ngodad. Ere nap’an ni gad ra dag u daken e ngongol rodad nib mich u wan’dad fare biyul, ma aram e rayog ni ngan n’ag fan e denen rodad, ma gad mang fager rok Got, me yag e yafos ni manemus ngodad. (John 3:16) Jesus e ir e Prist rodad Nth’abi Tolang. Baadag ni nge ayuwegdad ya nge yag ni yib angin fare biyul ngodad me chugur e tha’ u thildad Got. (Heb. 4:15; 7:24, 25) Bochan ni ir e Pilung u Gil’ilungun Got, ma ir e en ra fanay Jehovah ni nge thothupnag fithingan, me chuweg e kireb, me tow’athnag e piin yad ra par u Paradis ni manemus. (Matt. 6:9, 10; Rev. 11:15) Jesus e ir e en susun e ngad folwokgad rok. (1 Pet. 2:21) I fanay e yafos rok ni nge rin’ e tin nib m’agan’ Got ngay me dag e kanawo’ nrayog ni ngad folwokgad riy.​—John 4:34.

¹³ Nap’an nra m’agan’um ko pi n’en be fil e Bible u murung’agen Jesus, ma aram e rra t’uf Fak Got rom. Re t’ufeg nem e ra k’aringem ni ngam fanay e yafos rom ni ngam rin’ e n’en nib m’agan’ Got ngay ni bod ni rin’ Jesus. Angin nra yib riy e ga ra adag ni ngam ognag e yafos rom ngak Jehovah ngam un ko taufe.

14-15. Mang boch ban’en nib riyul’ u murung’agen gelngin Got nib thothup ni kam fil ma ke mich u wan’um?

¹⁴ Mang e mu lemnag u nap’an nim fil e pi n’ey nib riyul’ u murung’agen gelngin Got nib thothup? Kam fil nre n’em e gathi be’, ya aram gelngin Got ni ma maruwel. I fanay Jehovah gelngin nib thothup ni nge thagthagnag e thin nga laniyan’ boch e pumoon ni ngar yoloyed nga Bible, ma re gelngin nem e ir e ma ayuwegdad ni ngad nanged fan e pi thin nem ma gad fol riy. (John 14:26; 2 Pet. 1:21) Ku aram e re gelngin ni ma fanay Jehovah ni nge pi’ fare ‘gelngin ngodad ni ir e ba th’abi gel.’ (2 Kor. 4:7) Gelngin Got nib thothup e ku ir e ma pi’ gelngidad ni ngad machibnaged fare thin nib fel’, ma gad gel ko pi lumel ni ma yib ngodad, ma gad athamgil u fithik’ boch ban’en ni ma muleg lanin’dad, nge pi skeng ni ma yib ngodad. Ma ayuwegdad ni nge m’ug rodad e pi fel’ngin  ni aram bang u “wom’engin gelngin Got nib thothup.” (Gal. 5:22, NW) Ba m’agan’ Got ngay ni nge pi’ gelngin nib thothup ngak e piin be pagan’rad ngak, maku yad ma ning ngak u fithik’ e yul’yul’.​—Luke 11:13.

¹⁵ Rra fel’ lanin’dad u nap’an ni gad ra nang nrayog ni nge taga’ e pi tapigpig rok Jehovah nga gelngin nib thothup ni nge ayuwegrad ko pigpig ni yad be tay ngak! Nap’an nra mich u wan’um e tin riyul’ ni kam fil u murung’agen gelngin Got nib thothup, ma ga ra adag ni ngam ognagem ngak Got ngam un ko taufe.

16. Mang e kad filed ko n’en ni gad be weliy?

¹⁶ Nap’an ni ga ra dugliy ni ngam ognagem ngak Got ngam un ko taufe, ma aram e ga be n’en ni ngam rin’ ban’en nrib ga’ fan. Kad filed faram nthingari m’agan’um nga rogon puluwon ni ngam mang reb i gachalpen Jesus ara thingari m’agan’um ngay ni ngam athamgil u fithik’ boch e magawon mu kum pag fan boch ban’en. Machane, pi tow’ath nra yag ngom e dabi chugur ni nge taareb rogon ko tin kam pag fan. Taufe ni ga ra un ngay e rayog ni nge ayuweg e yafos rom, miki beechnag e nangan’ rom u p’eowchen Got. Maku reb e, t’ufeg rom ngak Jehovah Got e ku aram e n’en thingari k’aringem ni ngam un ko taufe. Thingari mich u wan’um e tin riyul’ ni kam fil u murung’agen e en Chitamangiy, nge Fak, nge gelngin Got nib thothup. Tomuren e pi n’ey ni kad weliyed, ma uw rogon ni ga ra pi’ e fulweg ko fare deer ni be gaar, “Ke bung rogog nrayog ni nggu un ko taufe, fa?”

17. Mang boch ban’en nib t’uf ni nge rin’ be’ u m’on ni nge un ko taufe?

¹⁷ Faanra ga be lemnag ni ke bung rogom nrayog ni ngam un ko taufe, ma dariy e maruwar riy ni boor ban’en ni kam rin’ ya nge yag ni fel’ e tha’ u thilmew Jehovah. * Bochan ni ga ma fil e Bible, ma boor ban’en ni kam fil u murung’agen Jehovah nge Jesus. Ke yag e michan’ ngom. (Heb. 11:6) Rib mich u wan’um e pi n’en ke micheg Jehovah ni bay u Bible, ma rib mich u wan’um ni michan’ rom ko fare biyul ni ke pi’ Jesus e rayog ni nge chuwegem ko denen nge yam’. Kam kalngan’um ko denen rom, ma ka mog ngak Jehovah ni nge n’ag fan rom. Kam thilyeg e yafos rom; kam taleg e tin nib kireb ban’en ni um rin’ kafram ma kam tabab ni ngam ngongol u reb e kanawo’ nib m’agan’ Got ngay. (Acts 3:19) Ri ga baadag ni ngam weliy e michan’ rom ngak yugu boch e girdi’. Ere ke yag ni nge bung rogom ni ngam mang reb e unbaptized publisher ma kam tabab ni ngam un ko pi walag u lan e ulung ko machib. (Matt. 24:14) Ba gel e felfelan’ ni ke tay Jehovah ngom ni bochan e kam rin’ e pi n’ey.​—Prov. 27:11.

18. Mang e kub t’uf ni ngam rin’ u m’on ni ngam un ko taufe?

¹⁸ U m’on ni ngam un ko taufe, ma ka bay in ban’en nib t’uf ni ngam rin’. Kad filed faram nthingar mu ognagem ngak Got. Mmeybil ngak ni yigoo gur ni keb u gum’irchaem, mag micheg ngak ni kam dugliy ni ngam fanay e yafos rom ni ngam rin’ e tin nib m’agan’ ngay. (1 Pet. 4:2) Ngemu’ ma gog ngak e en ma yarmiy e piin piilal ni ga baadag ni ngam un ko taufe. Ma aram e ir e ra yan i yog ngak boch e piilal ni ngam mada’gad. Wenig ngom, dab mu  rus ni ngam mada’gad e pi piilal ney. Dariy e maruwar riy ni manangem e pi walag ney ma gab t’uf rorad. Gimed ra yan u daken boch e machib u Bible ni kam fil. Ya yad baadag ni ngari gagiyel ni kam nang fan e pi machib nem ma kam nang feni ga’ fan ni ngam ognagem ngak Got ngam un ko taufe. Faanra m’agan’rad ngay ni ke bung rogom nrayog ni ngam un ko taufe, ma aram e yad ra yog ngom nrayog ni ngam un ko taufe ko bin migid e assembly ara convention ni yira tay.

19-20. Mang e ba t’uf ni ngam rin’ u tomuren ni ga ra un ko taufe, ma uw rogon ni ngam rin’ e re n’ey?

¹⁹ Mang e ba t’uf ni ngam rin’ u tomuren ni ga ra un ko taufe? * Dab mu pagtalin nnap’an ni ga ra ognagem ngak Jehovah ma aram e kam micheg ban’en ngak, mab m’agan’ ngay ni ngam tay u gil’ e n’en ni kam micheg. Ere tomuren ni ga ra un ko taufe, ma thingar mu rin’ e n’en kam micheg u nap’an ni kam ognagem ngak Got. Uw rogon ni ngam rin’ e re n’ey?

²⁰ Mu par ni gab chugur ko ulung rom. Chiney ni kam mang reb e Kristiano ni kan taufenagem e kam mang bang u ba ulung i walag “ni ke mich Got u wun’rad.” (1 Pet. 2:17) Pi walagem u lan e ulung e aram chon e tabinaw rom. Faanra um un ko muulung ni gubin ngiyal’, ma aram e ra gel e tha’ u thilmed. Um beeg e Thin rok Got ni gubin e rran ma ga be fal’eg i lemnag. (Ps. 1:1, 2) Tomuren ni kam beeg bang ko Bible, mag tay e tayim ni ngam fal’eg i lemnag e n’en kam beeg. Faan ga ra rin’ ni aray rogon, ma ra taw e thin riy nga gum’irchaem. ‘Um meybil.’ (Matt. 26:41) Meybil ni ga ma tay u polo’ i gum’irchaem e ra chugurnagem ngak Jehovah. ‘Ngam m’oneg u wan’um e gagiyeg rok Got.’ (Matt. 6:33) Rayog ni ngam rin’ e re n’ey ni aram e ngam tay fare maruwel ni machib ni aram reb e ban’en nib ga’ fan u lan e yafos rom. Faan ga ra un ko machib ni gubin ngiyal’ ma aram e ra par e michan’ rom nib gel, me yag ni ngam ayuweg yugu boch e girdi’ ni nge yag e yafos ni manemus ngorad.​—1 Tim. 4:16.

 21. Ga ra un ko taufe, ma mang e ke mab e kanawo’ riy ngom?

²¹ Ga ra dugliy ni ngam ognagem ngak Jehovah ngam un ko taufe, ma aram e n’en th’abi ga’ fan ni ga ra dugliy u lan e yafos rom. Riyul’ ni bay boch ban’en nib t’uf ni ngam pag fan. Machane gur, bay fan ni ngam pag fan e pi n’ey, fa? Arrogon! Demtrug e magawon ni ga ra mada’nag u lan e re fayleng ney mab ‘gafgow nib achig ndabi n’uw nap’an me m’ay.’ (2 Kor. 4:17) Machane, taufe ni ga ra un ngay e ra bing e kanawo’ ngom ni nge fel’ boch e par rom e chiney me yag e “bin riyul’ e yafos” ngom boch nga m’on. (1 Tim. 6:19) Ere wenig ngom, mu fal’eg i lemnag mag yibilay murung’agen e fulweg rom ko fare deer ni be gaar, “Ke bung rogog nrayog ni nggu un ko taufe, fa?”