Rogon ni Ngad Daged e T’ufeg ko Girdi’
Bochan ni kad bad rok Adam ni ir e bin som’on e pumoon ni immoy, ma aram fan ni gadad girdien taab tabinaw. Yugu aram rogon ni girdien reb e tabinaw e susun ni ngaur daged e t’ufeg nge tayfan ngorad, machane ngiyal’ ney e ke mo’maw’ ni ngan pirieg e mit ney e t’ufeg. Gathi ireray e n’en nib m’agan’ e Got rodad ngay ni gad ba t’uf rok.
N’EN BE YOG FARE BABYOR NIB THOTHUP U MURUNG’AGEN E T’UFEG
‘Nge par nib t’uf yugu boch e girdi’ rom ni bod gur ni gab t’uf rom.’—LEVITIKUS 19:18.
“Nge t’uf romed e pi toogor romed.”—MATTHEW 5:44.
N’EN BE YIP’ FAN NI NGE T’UF E GIRDI’ ROM
Mu tay fanam i yan u rogon ni ke weliy Got murung’agen e t’ufeg ko Thin rok ni bay ko 1 Korinth 13:4-7:
“En nib t’uf Got rok nge girdi’ e ba gum’an’ ma ba gol.”
Am lemnag: Uw rogon u wan’um ni faanra ma gum’an’ e girdi’ u puluwom ma yad ba gol ngom, maku darur damumuwgad u nap’an ni kam oloboch?
“En nib t’uf Got rok nge girdi’ e der ma awan’.”
Am lemnag: Uw rogon u wan’um ni faanra der pagan’ boch e girdi’ ngom ara be awan’rad ngom?
En nib t’uf Got rok nge girdi’ e gathi “ke mus ni ir e ma lemnag ir.”
Am lemnag: Uw rogon u wan’um ni faanra ba m’agan’ boch e girdi’ ngay ni ngar ted fan rogon lanin’um u boch ban’en ma darur lemnaged ni gubin ngiyal’ ni yad e ngaun yan nga lanin’rad?
En nib t’uf Got rok nge girdi’ e “der ma aw nga laniyan’ e n’en nib kireb ni kan rin’ ngak.”
Am lemnag: Ba m’agan’ Got ngay ni nge n’ag fan e denen rok e piin kar kalgadngan’rad. “Der ma par ni yugub puwan’; ma der ma par nib damumuw ni dariy n’umngin nap’an.” (Psalm 103:9) Faanra kad rin’ed ban’en ngak be’ ni ke kirebnag laniyan’, ma gad ma felfelan’ u nap’an nra n’ag fan rodad. Ere susun e ngki m’agan’dad ngay ni ngad n’aged fan e kireb rok yugu boch e girdi’ u nap’an ni kar rin’ed ban’en ni ke kirebnag lanin’dad.—Psalm 86:5.
iEn nib t’uf Got rok nge girdi’ e “de fel’ u wan’ e ngongol nib kireb.”
Am lemnag: Nap’an nra buch ban’en nib kireb rodad, ma dubdad ni nge felfelan’ yugu boch e girdi’ ko gafgow ni gad be tay. Ere darud felfelan’gad u nap’an nra gafgow yugu boch e girdi’ ni mus ni faanra yad be gafgownagdad.
Ra nge tow’athnagdad Got, ma thingar da t’ufeged e girdi’ ndemtrug yangarrad, ara nam rorad, ara teliw rorad. Reb e kanawo’ nrayog ni ngad rin’ed e re n’ey riy e aram e ngad ayuweged e piin ke t’uf e ayuw rorad.
