Ireray e n’en ni yog bochi pin ni 13 e duw rok u nap’an nni pi’ bochi kus ni tow’ath rok. Ma reb e ppin ni girdien e siyobay nib fel’ rogon e siyobay rok e yog nib computer ni pi’ e chitamangin ni nge fanay u nap’an ni ka bay u high school e aram reb e tow’ath nni pi’ ngak nri thilyeg e yafos rok. Ma reb e pumoon ni ka fini un ko mabgol e yog ni bangi card ni pi’ leengin ngak u nap’an ni ka fini gaman reb e duw ni kar mabgolgow e aram e bin th’abi fel’ e tow’ath ni ke pi’ be’ ngak.

Gubin e duw ni ma tay boor e girdi’ e tayim maku yad ma athamgil u rogon nrayog rorad ni ngar gayed e “bin th’abi fel’” e tow’ath ni ngar pied ngak reb e fager ara girdi’ rorad u nap’an reb e madnom nib ga’ fan. Yooren e pi girdi’ ney e yad baadag ni nga nog ngorad e pi thin ni baaray ni ke yog e pi cha’ney. Me gur, ga baadag ni ngam pi’ reb e tow’ath ngak be’ nra ga’ fan u wan’, ara pi’ be’ reb e tow’ath ngom nrib ga’ fan u wan’um, fa?

Gad gubin ni gad baadag ni nge pi’ be’ reb e tow’ath ngodad ara da pied reb e tow’ath ngak be’ ni aray rogon ni gathi kemus ni bochan e gad manang nra felfelan’ e en ni kad pied fare tow’ath ngak, ya ku bochan e gad ra felfelan’ ni kad pied fare tow’ath. Bin riyul’ riy e, be gaar e Bible: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Riyul’ nib gel e felfelan’ ni gad ra tay ni faanra fare tow’ath e rib ga’ fan u wan’ e en ni kad pied ngak.

Ere, uw rogon ni ngarim felfelan’ ko tow’ath ni kam pi’ ngak be’, miki felfelan’ e en ni kam pi’ fare tow’ath ngak? Ma mang e rayog ni ngam rin’ mi ri ga’ fan fare tow’ath u wan’ e en ni kam pi’ ngak ni faanra dabiyog ni ngam pi’ e “bin th’abi fel’” e tow’ath ngak?